Daut Leet 2
2
See
1Aus ne Bloom oppe Stapen en Scharon
un ne Lelje em Tol, daut sie ekj.
Hee
2Aus ne Lelje mank Spekjakrut, saj ekj,
es mien Schauz mank de Mejales em Darp.
See
3Aus een Boom seete Frucht en een Woolt,
es mien Schauz mank de Junges em Darp.
En sien Schauten sie ekj sea jieren,
siene Frucht es soo seet en mien Mul.
4Hee jeft mie dän Wien von sien Kjala,
un wiest mie woo goot hee mie es.
5Jeff mie Rasienen un Apel,
ekj sie krank, soo velang ekj diene Leew.
6Siene linkje Haunt helt mienen Kopp,
un de rajchte drekjt mie aun am naun.
7Vespräakjt mie, Mejales von Jerusalem,
bie daut Ree un Gazell oppe Stap,
daut jie dee, wäa sikj goot sent, nich stieren,
bat see nuach haben von äare Leew.
Daut tweede Leet
See
8Daut es mien Schauz siene Stemm.
Horch emol! Hee kjemt nu no mie!
hee rant un hee sprinjt derch de Boaj.
9Mien Schauz lat soo schmock aus een Ree,
aus een junga.
Hee steit je doa hinja de Waunt;
nu kjikjt hee em Fensta,
un zielt derch de Lod.
10Mien Schauz säd to mie:
Hee
Komm, komm mien Schauz,
du scheenste, komm met.
11Kjikj bloos, de Winta es wajch,
un de Räajen es foadich, vebie.
12Doa sent Bloomen runt om,
un daut Launt sinjt un somt;
un daut kurren von Duwen
en ons Launt es soo scheen.
13De Frucht aun däm Fiejenboom riept,
un daut Wiendruwen Blieechsel rikjt scheen.
Komm, komm, mien Schauz
du scheenste, komm met.
14Mien Dufkje mank de Steena,
em vestäakj opp däm Eewa.
Komm wies mie die doch,
lot mie hieren waut du sajchst;
diene Stemm es soo scheen,
un die lat et soo schmock.
15Jriept ons de Fas, dee kjliene,
waut dän Goaden vedoawen,
wiels ons Wiengoaden blieecht.
See
16Mien Schauz jehieet mie, un ekj jehia am.
Hee erjazt sikj aun de Lelje.
17Ea de Morjen aunkjemt
un de Schauten veschwinjt,
ran, mien Schauz, wajch aus een Ree,
un daut straume Gazell enne Boaj.
Currently Selected:
Daut Leet 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.