Daut Leet 4
4
Hee
1Oba die lat et soo schmock;
miene scheenste, die lat et soo schmock.
Diene Uagen von hinja dien Schleia
sent saunft aus ne Duw.
Soo aus Kosen von Gilead streemen,
soo henjen de Hoa von dien Kopp.
2Diene Tänen, dee stonen aus Schop,
dee nom schäaren un wauschen oppkomen;
jieda eene haft twee bie sikj stonen,
un kjeene fält daut noch aun dee.
3Diene Leppen sent kloa roode Eesen,
dien Mul lat mie bloos sea schmock.
Un de Baken sent Baken von Apel,
dee hinja dien Schleia väa schienen.
4Dien Hauls es soo steil aus de Schutz Torm,
dee David met glautet Steen bud;
un de Haulskjäden blenkjren runt om
aus de Schilten von 1.000 Soldoten.
5De Brost es een Poakje Gazellen,
dee leicht mank de Lelje oppstonen.
6Ekj go schwind no de Boaj
von de Mirren un Weiruak,
ea de Morjen aunkjemt
un de Schauten veschwinjt.
7Oba die lat et soo schmock,
miene scheenste, die lat et soo schmock,
Du, mien Schauz, du best aulawäajen schmock,
ekj finj bloos kjeen Fäla aun die.
8Komm emol met mie, miene Brut;
ut däm Libanon, komm. Moak die frie
von däm Boajch Amana, un von Senir
un Hermon, wua Leiws un Leoparden
rejieren. Komm met, du mien Schauz.
9Du hast mie mien Hoat gaunz benomen,
met een Blekj met de Uagen, mien Schauz;
met een Baunt von de Kralen aum Hauls,
hast mien Hoat, miene Brut un mien Schauz.
10Daut jeit mie soo scheen, wan du mie
soo goot best, miene Brut un mien Schauz,
daut es scheena aus Wien en mien Mul;
dien Parfum es de scheensta waut daut jeft.
11Mien Schauz, diene Leppen sent seet,
du hast Honnich un Malkj unjare Tung,
un dien Kjleet rikjt soo scheen aus de Libanon.
12Miene Brut un mien Schauz
es een Goaden veschloten;
see es ne Kjwal aufjejrenst,
un een Borm gaunz bedakjt.
13Jo, du best mie een Paradies Goaden,
met scheenste Granat Apelbeem,
un met Henna un Narden Eeljbeem,
14uk met Safran un Kalmus, Kerneel
un uk Weiruak un Mirren un Alo,
von jieda Sort scheenste Jewerz.
15Du best eene Kjwal en däm Goaden,
een Borm, dee doa väl Wota jeft,
daut et rant von de Libanon Boaj.
See
16Lot däm Nuadwint nu komen,
mucht de Siedwint doch weien,
daut Jeroch von mien Goaden metnämen.
Lot mien Schauz en sien Goaden nenn komen,
un äten de Frucht, waut dee jeft.
Currently Selected:
Daut Leet 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.