Filippa 3
3
Waut werkjlich talt, es Christus
1Dan wieda, miene Breeda, freit junt em Harn! Mie felt daut nich schwoa, junt dit emma wada to schriewen, doaderch woa jie emma sechra. #Flp 2,18; 4,4
2Wäat junt fa de Hunj, fa de beese Oabeida, fa dee waut dän Kjarpa veschnieden wellen! #Gal 5,12; Opb 22,15 3Wiels wie sent dee, dee werkjlich beschnäden sent. Wie deenen Gott em Jeist #3,3 Eenje oole Schreften sajen Wie deenen en Gott sienen Jeist. un sent froo en Christus Jesus, un wie veloten ons nich opp ons selfst. #Reema 2,29 4Ekj haud mie goot kunt opp sechtboare Tieekjens veloten, un wan wäa meent, daut hee sikj opp sien sechtboaret fromm sennen veloten kunn, ekj wudd mea Uasoak doafäa haben: #2Kor 11,18.22 5Ekj wort aum achten Dach beschnäden, ekj staum von daut Volkj Israel, däm Staum Benjamin, ekj sie een Hebräa von Hebräa, nom Jesaz jehia ekj to de strenje Farisäa. #Apost 26,5; 2Tim 1,3 6Ekj wia iewrich de Jemeent to vefoljen, un no de vom Jesaz jefoddade Jerajchtichkjeit wia ekj fälaloos. #Apost 8,3 7Oba waut don fa mie jewennen meend, see ekj nu om Christus sient haulwen aus velieren aun. #Mat 13,44-46 8Mea aus daut, ekj see aul daut aun aus Schoden, wan ekj daut doamet vejlikj, woo äwa aule maussen väl wieet mie daut es, daut ekj Christus Jesus aus mienen Harn kjan. Wiels ekj Christus goot sie, see ekj daut aula aun aus Schoden un aus Drakj, un well mau Christus jewennen. 9Ekj well en am sennen un nich miene ieejne Jerajchtichkjeit haben, dee derch daut Jesaz kjemt. Ekj sieekj dee Jerajchtichkjeit, dee derch dän Gloowen aun Christus kjemt. Daut es eene Jerajchtichkjeit, dee Gott mie toosprakjt, wan ekj aun Jesus jleew. #Reema 3,22 10Ekj well disen Christus kjanen lieren un de Krauft, derch dee hee vom Doot oppstunt. Ekj well met sien lieden bat aum Doot bekaunt woaren, un soo met am em Doot jlikj woaren. #Reema 6,3-5; 8,17; Gal 6,17 11Ekj mucht doahan komen, uk vom Doot opptostonen.
Wie sent noch nich aum Ziel
12Nich daut ekj daut aul aula hab, ooda doarenn volkomen sie. Oba ekj doo aules waut ekj kaun, daut to hoolen to kjrieen, wuarenn Christus Jesus mie aul to hoolen haft. #Apost 9,3-6; Kol 1,29; 1Tim 6,12 13Breeda, ekj see mie nich doafäa aun, daut ekj daut aul to hoolen hab. Oba eenalei doo ekj: Ekj vejät, waut hinja mie licht, un rakj mie ut no daut, waut ver mie es. #Luk 9,62 14Ekj joag opp daut Ziel loos, dän Pries to kjrieen, wuatoo Gott mie vom Himmel en Christus Jesus jeroopen haft. #1Kor 9,24 15Aula, dee wie aul volkomen em Gloowen sent, sullen soo jesonnen sennen. Un wan jie en irjent waut aundasch denkjen, Gott woat junt uk doarenn daut noch openboaren. 16Emmahan, doano aus ons Jnod jejäft, doano well wie uk läwen.
Ons Birjarajcht es em Himmel
17Breeda, komt mie hinjaraun un kjikjt opp dee, dee soo läwen aus ekj an daut väajeläft hab. #1Kor 11,1 18Ekj hab junt daut aul foaken jesajcht un saj daut nu noch eemol met Tronen: Väle läwen soo, aus wan see de Fiend von Christus sien Kjriez sent. #1Kor 1,23; Gal 6,12 19Äa Enj woat de Vedaumnis sennen, wiels äa Buck es äa Gott. See sent stolt met daut, wuamet see sikj schämen sullen, un see beschaftjen sikj met Dinja, dee to dise Welt jehieren. #Reema 16,18 20Ons Birjarajcht oba es em Himmel, un wie luaren aul doano, daut ons Heilant un Har Jesus Christus von doa komen woat. #Efs 2,6; Kol 3,1; Heb 12,22; Tit 2,13 21Hee woat derch siene Krauft, derch dee hee sikj aules unjadon moakt, onsen nuschtjen Kjarpa omendren, soo daut dee sienen veharlichten Kjarpa likjnen woat. #1Kor 15,49; 2Kor 5,1; 1Joh 3,2
Currently Selected:
Filippa 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.