Filippa 2
2
Christus ons Väabilt
1Moakt bie junt eena dän aundren mootich en Christus? Treest jie junt leeftolich? Hab jie em Jeist Jemeenschoft? Sent jie junt von Hoaten goot, un kjenn jie metfeelen met dee waut lieden? 2Dan moakt mie soo rajcht froo, daut jie junt eenich woaren, junt aula jlikjen goot sent, junt goot vedroagen un no eenalei sträwen. 3Siet nich nosikj un ieajiezich, väl mea, acht dän Näakjsten hecha aus junt selfst. #Reema 12,10; Gal 5,26 4Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet. #1Kor 10,24; 13,5 5Siet unjarenaunda soo jesonnen, aus Christus Jesus selfst wia. 6Jesus wia von siene Natua häa Gott, oba daut sach hee nich soo aun, daut hee daut met Jewault faustholen must. #Joh 1,1-2; 17,5 7Hee trock sikj daut “soo aus Gott sennen” ut, neem eene Jestault aun aus een Kjnajcht, un wort doaderch soo aus wie Menschen, jebuaren aus een Mensch. #Jes 53,3; Mat 20,28; 2Kor 8,9; Heb 2,14.17 8Deemootich muak hee sikj jerinj un wort jehuarsom batem Doot, jo, batem Doot aum Kjriez. #Luk 14,11; Heb 12,2; 5,8 9Doawäajen haft Gott am uk huach jehowen un am eenen Nomen jejäft, dee äwa aule Nomes steit. #Apost 2,33; Efs 1,21; Heb 1,3-4 10Em Nomen von Jesus sellen sikj aule Kjneeen em Himmel un opp de Ieed un unja de Ieed bieejen. #Jes 45,23; Joh 5,23; Opb 5,12-13 11Un aule Tungen sellen to Gott siene Iea bekjanen, daut Jesus Christus Har es. #Opb 5,13
Aus Nofolja doabie bliewen
12Soo, leewe Frind, aus ekj doa wia, jehorcht jie un deeden waut ekj säd. Doot nu uk soo wieda wua ekj nich doa sie. Schauft met ferchten un zetren, daut jie seelich woaren. #1Pet 1,17 13Wiels Gott wirkjt en junt beides, daut wellen un daut foadich moaken, soo aus am daut jefelt. #Flp 1,6
14Doot aules onen brumsch to sennen un onen to twiewlen. 15Dan sent jie Gott siene reine un schultfriee Kjinja, aun dee nuscht uttosaten es. Schient aus Lichta mank eene vedorwne un vedreide Menschheit en dise Welt. #Mat 5,14; Efs 5,8-9; Flp 1,10 16Hoolt junt aun daut läwenbrinjende Wuat, daut ekj mie aun Christus sienen Dach freien kaun, daut ekj nich vejäfs jeoabeit un mie aunjestrenjt hab. #2Kor 1,14; 1Tess 2,19 17Un wan mien Läwen uk sull jeopfat woaren äwa junen hanjäwenden Gloowensdeenst, wudd ekj doch froo sennen un mie met junt freien. #2Tim 4,6 18Freit junt uk doatoo un freit junt met mie. #Flp 4,4
Timotäus un Epafroditus
19Wan de Har Jesus daut soo well, räakjen ekj Timotäus boolt hantoschekjen, om to hieren, woo daut met junt steit. Daut woat mie fresch Moot jäwen. 20Ekj hab sest kjeenem aus am, dee soo opprechtich om jun gootgonen besorcht es. #1Kor 16,10 21De aundre sieekjen äaren ieejnen nutzen, un nich Jesus Christus siene Sach. #2Tim 4,10.16 22Oba jie weeten, woo Timotäus sikj hanjestalt haft, un woo hee aus een Sän met däm Voda met mie toop aum Evangelium jedeent haft. 23Doawäajen räakjen ekj am hantoschekjen, soo schwind aus ekj weet, woo sikj daut met mie romnämen woat. 24Un ekj hab daut vetruen em Harn, daut ekj selfst uk boolt hankomen woa. #Flp 1,25
25Ekj sach daut uk fa needich aun, mienen Brooda Epafroditus no junt trigj to schekjen. Hee es mien Metoabeida un Metkjamfa, von junt jeschekjt toom mie halpen. #Flp 4,18 26Hee haud een velangen no junt aula un wia besorcht, wiels jie jehieet hauden, daut hee krank jeworden wia. 27Un hee wia werkjlich doodeskrank, oba Gott erboarmd sikj äwa am, un nich mau äwa am, oba uk äwa mie, daut ekj nich noch eenen Trua mea haud. 28Doawäajen hab ekj am soo schwind trigj jeschekjt, daut jie am wada seenen un junt freien kunnen, un ekj weinja to sorjen haud. 29Nämt am en Christus met Freid opp, un doot soone Menschen väl wieet achten. #1Kor 16,16 30Wäajen de Oabeit fa Christus wia hee meist jestorwen aus hee sien Läwen oppet Spell sad, om mie en june Städ to deenen.
Currently Selected:
Filippa 2: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.