Filippa 4
4
Läwen em Harn un sikj freien
1Doawäajen, leewet Jeschwista, no dee ekj mie bang, dee jie miene Freid un miene Kroon sent, stot faust em Harn. Ekj sie junt goot. #2Kor 1,14; 1Tess 2,19-20 2Ekj fodda Efodia un Sintieche opp, sikj eenich to sennen em Harn. 3Un ekj froag uk die, mien trua Metoabeida, halp de Frues. See haben mie em Deenst aum Evangelium tru biejestonen. Daut haben uk Klemens un de aundre Metoabeida jedonen. Äare Nomes stonen em Läwensbuak. #Luk 10,20
4Freit junt emma em Harn! Un ekj saj junt noch eemol: Freit junt! #2Kor 13,11; Flp 3,1; 1Tess 5,16 5Lot aulemaun seenen, woo leeftolich jie sent! De Har es dicht bie! #Tit 3,2 6Sorcht junt om nuscht. Lot Gott met bäden un prachren un dankscheen sajen aules weeten waut junt fält! #Mat 6,25-34; 1Pet 5,7 7Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken en Christus Jesus bewoaren! #Joh 14,27; Kol 3,15
8Dan to goodalatst, Breeda: Waut Woarheit es, waut toom achten es, waut jerajcht es, waut rein es, waut leeftolich es, waut eenen gooden Roop haft, waut goode Ieejenschoften haft, waut to lowen es, doamet jäft junt auf en june Jedanken! 9Eeft junt doarenn waut jie von mie jelieet un jehieet un jeseenen un jekjräajen haben. Dan woat de Frädens Gott met junt sennen.
Dank fa de Unjastettunk
10Ekj frei mie sea em Harn, daut jie wada bat doa jekomen sent, fa mie to sorjen. Jie wieren aul emma doaropp bedocht, oba de Omstend leeten daut nich too. 11Ekj räd nich wiels mie waut fält. Ekj hab jelieet, tofräd to sennen woo emma mie daut jeit. #1Tim 6,6 12Ekj weet woo daut es, jedeemooticht to woaren, un woo daut es, von aules to haben. Ekj hab daut Jeheemnis jelieet, en aule Loagen tofräd to sennen. Ekj kaun saut ooda hungrich sennen, rikjlich ooda knaup haben. #2Kor 6,10 13Ekj kaun aules derch Christus, dee mie stoakj moakt. #2Kor 12,10 14Emmahan, jie haben goot jedonen, mie bietostonen en daut waut mie schwoa es. 15Un jie Filippa weeten, daut sikj buta junt sest kjeene Jemeent aum jäwen un nämen fa mie bedeeljen deed aus ekj Mazedonien veleet un aunfunk, daut Evangelium to prädjen. #2Kor 11,9 16Uk aus ekj en Tessalonich wia, schekjt jie mie waut #4,16 Eenje oole Schreften sajen mie Jelt. fa mienen Jebruck, ieescht een mol un dan noch eemol. 17Nich daut ekj daut Jeschenkj sieekj; ekj sieekj de Frucht, wuaderch jun Loon toonemt. 18Ekj hab aules jekjräajen, un hab mea aus ekj bruck. Ekj sie goot vesorcht derch daut, waut jie mie derch Epafroditus jeschekjt haben. Daut es een scheenrikjendet un aunjenämet Opfa, daut Gott jefelt. #Flp 2,25 19Un mien Gott woat junt met aules vesorjen waut jie brucken, gaunz doano aus hee rikj es aun scheenet en Christus Jesus. 20Gott ons Voda saul fa emma un emma jeieet un jeloft woaren! Amen.
Gruss un Säajenswunsch
21Jreest aule Heilje en Christus Jesus. Dee Breeda, dee hia bie mie sent, bestalen junt to jreessen. 22Aule Heilje bestalen junt to jreessen, un gaunz besondasch dee vom Kjeisahus. #Flp 1,13 23Mucht däm Harn Jesus Christus siene Jnod met junem Jeist sennen!
Currently Selected:
Filippa 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.