MIGI KIITAHAY 3
3
1Hanayna i sukwi Bumbulvuŋ mupula taŋ mbak asi ruwuyo, ɓa a cam a kwacay Israyeley, misi misinaka ɓi ngi vurum migi a Kanaˀan ta na. 2A wuɗ kahana, hĩˀĩ ɓa ngi dubuna gi vurum da Israyel mendele mekelemey mislam na, ɓa a sinaka gi vurumo ya, taŋ misinaka ɓi ngi vurumo sin le zleˀe t'aruŋ na. 3Mizli, Buymisemuŋ mupula taŋ asi ruwuyo, t'ani: buy Filisti mihimaˀhay zlum, Kanaˀanay gar, Sidoŋhoy waɗ Hivihey micifa ngi muwã Libaŋhay, zle a muwã Baˀal-Hermoŋ hã sesẽŋ a Lebo-Hamat. 4A gi kahana na, ɓa ngi ci a kwacay Israyeley, ɓa a sina, ɓimuɗuvahay, naŋ Bumbulvuŋ muvula da dideˀ taŋhay tihaŋ Moyis na, da a sa cinaka kwana. 5Israyeley a cifam a wuzla Kanaˀanay, Hitihey, Amorihey, Perizihey, Hivihey waɗ a wuzla Zebusiheye. 6A zuɓam ziri mongoso taŋhaya, taŋ kwana, a vulaka ziri mongoso taŋhaya da ziri taŋhaya, yo a gam mezegwel a mbuŋ kuli taŋhaya ma.
MIGI KIITAHAY
Otniyel
7Israyeley a gam gwat malambaˀ a mbuŋ Bumbulvuŋ. A puyukom hirnga ti Bumbulvuŋ taŋ Buymisemuŋ, a gam mezegwel da Baˀal ati Aseras. 8Bumbulvuŋ a slikiɗ himaˀ fõh fõh ar Israyeleye, dar a vula taŋ ngi hiɗik da Kusan-Risatayim, buy Mesopotami, a gam gawla naŋhay hã vi dangafaɗa. 9Israyeley a wudam ng'avu Bumbulvuŋ. Bumbulvuŋ a slino taŋ Otniyel mangal ngi Kenas, mijingaˀ ngi Kalep, ɓa a laha taŋ. 10ˀUf ngi Bumbulvuŋ a ci avu Otniyele, a ga kiita da Israyeleye. Otniyel a bi ng'ar vurum, dar Bumbulvuŋ a vulaŋ Kusan-Risatayim, buy Mesopotami asi haŋ naŋ. 11Hirwuy a cifi setette hã vi kukur mufaɗ. A dirba nah, Otniyel mangal ngi Kenas a mucu.
Ehut
12Israyeley a zlaka gi malambaˀ le a mbuŋ Bumbulvuŋ si ma, vurˀe, Bumbulvuŋ a vula gidaŋ da Egloŋ, buy Moˀapa, ɓa a cici ti gidaŋ a hirnga Israyeleye, asi a gam gwat malambaˀ le avu naŋ Bumbulvuŋ. 13Egloŋ tuwa, a jumo Amoŋhoy ati Amalekeye ng'avu naŋ, a bi vurum nga kiɗa vu ati Israyeleye. A tiɓaka walahay Dibinojiheye. 14Israyeley a gam gawla ngi buy Egloŋ, hã vi kuruˀ nga dangafaɗa. 15Akẽh na, Israyeley a wudam ng'avu Bumbulvuŋ ma, Bumbulvuŋ a slino taŋ Ehut, mbur gula, mangal ngi Gera, mbur Benjameŋ, ɓa a laha taŋ. Israyeley a slinam ti buutu da Egloŋ buy ngi Moˀapa tihaŋ Ehuto. 16Ehut tuwa, a vuɗ gordo mazum raɓ raɓ, jek naŋ a gi gwat ngi reta metir. A juwa tisi zana, avu tuwal vay hazum. 17Aru ti buutu tuwa da Egloŋ, buy Moˀapa, na Egloŋ i mbur mizlimbirkitik haɗa. 18Naŋ muvula buutu da buyo taˀ na, Ehut a kisa mizli musoko ti buutu tuwa. 19Amma taŋ mindiloko avu kulihey migweˀ a Gilgal na, Ehut a mi brok nga dirba a muŋ, a ɓa buyo: «Buy ɗu! Mingiɓi miyaŋŋa ani, ɓa i ɓuw di takwa!» Buy tuwa, a ɓa mizli: «Taˀaka mi!» Dar mizli misi a cikeˀe tuwa, a bam gar ng'avra. 20Ehut a kirih ng'avi Egloŋ muar viŋ vay ngi muŋ, miyaɓyaɓ, mihĩˀĩ nga naŋ na. Ehut a ɓaŋ: «Ya musuw di na, i mingiɓi ngi Bumbulvuŋ», dar buy a slikiɗ tir janga naŋ. 21Ehut a muɗo gordo mikaˀ ar tuwal naŋ vay hazum tuwa tihaŋ gula, a zliga buyo sirif ar kwacaya. 22Gordo a ci sirim wãˀ nga kwacay buyo, jom ti hirnga naŋ, mungul a disla li ngi sliwiɗe dasl, asi Ehut a muɗa gordo ti vi kwacay ngi buyo ta. Dar Ehut a bi tir mifiliw. 23Naŋ migica miviŋ ngi viŋ vay ngi muŋ tuwa giceˀ angi buyo, waɗ kilak na, a bi tir jawleeru.
24Naŋ mucuh na, gawla ngi buyoy a moko, keɗ na, miviŋ ngi viŋ vay ngi muŋ i migica le kiɗasl, a ɓam: «Ko mbri na, buyo a ro ar li muca kwanay ar viŋ miyaɓyaɓa.» 25A kutukoko hã a giram. Keɗ na, naŋ anta wuno miviŋ vay ngi muŋ ta ɓula si. Akẽh na, a zuɓaka lakle, a wunaka miviŋ tuwa, keɗ na, buy taŋ i mumuca pororoŋ a ruwuy. 26Gawlahay mumurom ar li kutuko buy tuwa na, Ehut a kil le. Asi mike na, a pula kuliheye le, a kil le kini ngir ti Seˀira. 27A dirba naŋ mindil ndil a diga na, a hiziga tulum tõht tõht a muwã Efrayime. Joˀ Israyeley a poko sar ti muwã, naŋ tuwa ɓaˀ a mbuŋ Israyele. 28A ɓa taŋ: «Supoko ya, asi Bumbulvuŋ a vulukum mesene kum Moˀapaya le asi haŋ kum.» A poko sar asi Ehuto. A gicaka li tuwuɗ a mizaw Zurdeŋ misi a Moˀapa, ko a pulam mbur a cuh pal ta. 29Tapasa, a kiɗam gwat ngi durmuk kuruˀ. Moˀapaya i mizli migidaŋ, miwirwirey cek, amma ko pal milih anta. 30Zle tapasa, mizli Moˀapay a hinam hirnga a mbuŋ Israyele. Akẽh na, hirwuy a cifi zuy zuy hã vi kukur dangafaɗa.
Samgar
31A dirba Ehuto, mici ar li naŋ i Samgar, mangal ngi Anat. Naŋ kwana, a laha Israyeleye le, a kiɗ Filistiheye vagay vagaya, gwat ngi skat skat merkeɗ ti ganday misi ɓiri yoŋ avu mi naŋ#3.31 ganday misi ɓiri yoŋ avu mi naŋ na, a ɓulam di gwat miŋsaamihey ar slra .
Currently Selected:
MIGI KIITAHAY 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.