MIGI KIITAHAY 2
2
Bumbulvuŋ mimbiɗa hirnga da mizli naŋhay
1Modro ngi Bumbulvuŋ aru ti Gilgala nga Bokim, a ɓa Israyeleye na: «I bo ti kum le ti ruwuy Ezipte, yo i co ti kum le nga ruwuy ya miɓa ɗaˀ le ti hudum da dideˀ kumoy na. Yi ɓi zleˀe na: ‹Ko y'anta sa ngila ɓi ngi jumoˀay ɗu ati kumo ta ndiɗaˀ wãˀ, 2yo kumo kwana, ko ki ɗiyam ɓi ngi jumoˀay ati mizli ngi ruwuy hana ta, kisa putukusoko li gi mikuli taŋhaya.› Amma ko ki cinikiy mi ta, ki gam hana i gwat mike? 3Dar yi ɓi: ‹Ko y'anta sa ɓula mizli ngi ruwuy hana a mbuŋ kumo ta, mbak a sa tiram ngamngam avu kumo, yo kuli taŋhay a sa tiram mazaɓay avu kumo.›» 4Modro ngi Bumbulvuŋ miɓa ɓi hana ɗaˀ da Israyeleye si na, a zlaka widi cərəwcərəw, a tuwam cõh cõh. 5A caka slimiɗ da li nah Bokim, dar a gam mikulihey da Bumbulvuŋ a diga.
Muc ngi Zozuwe.
6Zozuwe a waha zigiduwo, Israyeleye, mbur gar na, nga ruwuy nga naŋ nga naŋ, ɓa ngi tiɓa hirwuyo. 7Mizli Israyeley a gam slra da Bumbulvuŋ ar siifa ngi Zozuwe gar waɗ ar siifa ngi mizli micawwahay micifam a dirba Zozuwe, i mizli mupuraka slra madiɗahay gar Bumbulvuŋ miga taŋ da Israyeleye. 8Zozuwe, mangal ngi Nun, gawla ngi Bumbulvuŋ, a muc ti vi skat ti kuruˀu. 9A dikaka angi hirwuy muvulakaŋ di da naŋ, a Timnat-Heres, a muwã Efrayim, kini tir vay muŋ ngi muwã Gaˀak. 10Akẽh na, mizli mendele tayna gar a micam. A dirba taŋ, mizli mendele mekelemey a slam ma, amma taŋ a sinaka Bumbulvuŋ mata, ko slra naŋ miga da Israyeley na kwana, a si na ka ta
Mizli Israyeley a pulaka Bumbulvuŋ le
11Israyeley a gam gwat malambaˀ avu Bumbulvuŋ, a huruk hurukam a mbuŋ Baˀalay. 12Bumbulvuŋ, Buymisemuŋ ngi dideˀ taŋhay mubo ti taŋ ti ruwuy Ezipte na, a pulakaŋ fuku, dar a sipam kuli ngi mizli mekelemey mugun hirnga taŋ na. A hurukom a mbuŋ kuli tayna, a slikiɗaka mevel da Bumbulvuŋ. 13A pulaka Bumbulvuŋ fuku, a gam mezegwel da Baˀal ati Astarte. 14Bumbulvuŋ a slikiɗ himaˀ fõh fõh ar Israyeleye: a pula taŋ mbak da mufuyvuhoy a fuyoko taŋ, a hiɗikaka taŋ da mesene taŋhay mugun hirnga taŋ na. Ko a ndilaka ngi cici zlak a mbuŋ mesene taŋhaya gu mata. 15Taŋ mibam le ng'ar vurum gar na, gidaŋ ngi Bumbulvuŋ a ro ar taŋ, ɓa mendere a luuma taŋ, kaɓa naŋ miɓa taŋ di ti hudum tuwa, hã bonoy taŋ a gi fineˀ gidaŋ wãˀ. 16Akẽh na, Bumbulvuŋ a slino taŋ migi kiitahay, dar migi kiitahay a lahaka taŋ tisi haŋ ngi mivivuhoyo. 17Amma ko taŋ a cinaka mi da migi kiita taŋhay vuna ta ma. Asi ara huruk hurukam a mbuŋ kulihey, ara hurukom a mbuŋ taŋ. A ngizlam kutum avu jiviɗ ngi dideˀ taŋhay misipaka zleˀe. Dideˀ taŋhay a sipaka ɓimuɗuva ngi Bumbulvuŋ le, amma taŋ a gam ka dideˀ taŋhaya ta. 18Ti Bumbulvuŋ mislino taŋ migi kiitahay le na, migi kiita gar na, Bumbulvuŋ naŋ da ati naŋ. Ti migi kiita misi ada ar siifa aruŋ na, a laha Israyeley avu mesene taŋhaya. Naŋ kine, da Israyeley mira tuwam ti mesene taŋhay maguzuvuraka taŋ, yo magaka taŋ malambaˀ na, Bumbulvuŋ a pura taŋ ircece. 19Amma da migi kiita a muc le na, a maka hiri ngi gi malambaˀa fineˀ ngi dideˀ taŋhaya. A sipam kulihey, a gaka taŋ mezegwel, yo a hurukom a mbuŋ taŋ. Slra taŋ malambaˀ ati gi gwat taŋ ngi cine mi ta na, a ngumam pul naŋ ta ndiɗaˀ wãˀ.
Bumbulvuŋ mici a kwacay Israyeley
20Bumbulvuŋ a slikiɗ mevel fõh fõh ar Israyeleye, a ɓi: «Ani sukwi ngi mizli hana, a ngilaka ɓi ngi jumoˀay ɗu le, jumoˀay misi ya miɓa ɗaˀ le da dideˀ taŋhaya, yo a cinaka mingiɓi ɗu ta. 21Naŋ kine, Zozuwe, ti naŋ mumuc t'aruŋ na, sukwi naŋ mupula taŋ mbak, a ɓula taŋ ta na, ya kwana, y'anta sa ɓul purla le asi taŋ ta ya. 22A gi kanah na, ɓa ngi ci a kwacay Israyeley, ɓa ngi sina, sipa jiviɗ nga ya Bumbulvuŋ na, zliv a sa jaka ɓi nah a hirnga kwa malla a jaka ta kwa, yo a sa sipaka jiviɗ ɗu kaɓa dideˀ taŋhay zleˀe na ya kwana kini.» 23Dar Bumbulvuŋ a pula sukwi ngi mizli tayna a cifam asi ruwuyo, a vula taŋ asi haŋ ngi Zozuwe ɓa a ɓula taŋ kutum ta.
Currently Selected:
MIGI KIITAHAY 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.