MIGI KIITAHAY 4
4
Debora ati Barak
1Ehut a muc le, a dirba nah, Israyeley a zlaka gi malambaˀ a mbuŋ Bumbulvuŋ ɓula si. 2Bumbulvuŋ a vula taŋ da Yabin, buy Kanaˀan misi ar walahay Hasor a hiɗika taŋ. Buy ngi soje naŋhay a zilaka Sizera, naŋ a cifi a Haroset-Goyim. 3Israyeley a wudam ng'avu Bumbulvuŋ, asi Sizera, buy ngi sojeheye, naŋ ti mota ngi ɓiri ngi vurumoy skat skat ngoltir, yo a guzuvura Israyeleye guzuvar guzuvar, hã vi kukur cuw.
4Hirak ti nah na, Debora ngwas mijiviɗ ngi Bumbulvuŋ, ngwas ngi Lapidoto, maga kiita da Israyeleye i naŋ. 5A cifi asi dibinoji mazilaka dibinoji ngi Debora, ar wala ngi Rama ati Betel, a muwã Efrayim. Israyeley a jiɗam nga gi kiita ava a diga. 6Ti di numuŋ ada na, Debora a ɓi a zilaŋ Barak, mangal ngi Abinoˀam, mbur Kedes ngi ruwuy Neftali, a ɓaŋ na: «Bumbulvuŋ, Buymisemuŋ ngi Israyel a puluw jiviɗ le ani: Aru, kuso mizli a muwã Tabor, hil mizli zilehey durmuk kuruˀ angi sukwi ngi Neftali ati ngi Zabuloŋ. 7Sizera, buy ngi soje ngi ruwuy Yabin ati mota ngi vurum naŋhay waɗ soje naŋhaya, i sa hizigiɗo taŋ ng'avi ka a mizaw Kisoŋ, ɓa i sa vuluw taŋ asi haŋ ɗiki.» 8Barak a mbiɗa da Debora: «Da ki ru asi ya na hã ɓula, amma da ki ru asi ya ta na, a gi ta.» 9Debora a mbiɗaŋ di: «I sa ram bummoˀ ɓula so, amma ar li ka masa ru gar na, anta sa vulukuw dudok da ka ta, asi Bumbulvuŋ a sa vula Sizera asi haŋ ngi ngwasa.» Debora a slikiɗ, a ram ati Baraka nga Kedese. 10Barak a zila Zabuloŋhoy ati Neftalihey nga Kedes. Mizli mizilehey durmuk kuruˀ a ram aseˀe, joˀ Debora kwana, aru asi taŋ ya. 11Heber mbur Keni, a wuɗukam le zleˀe ati mizli Keni mekelemey, dideˀ ngi Hobapay, Hobap hazeˀe ngi Moyise. Yo a nga guɗuk naŋ hã seŋ seŋ avu widis madiɗakaŋ a Saˀanayim, gweˀ avu Kedes.
12Mizli a soko ɓaka Sizera na, Barak, mangal ngi Abinoˀam, a jiɗ le nga muwã Tabor. 13Akẽh so na, Sizera a cikila mota ngi ɓiri ngi vurumoy miskat skat ngoltire cek waɗ mizli naŋhaya cek, zle a Haroset-Goyime, a ram nga mizaw Kisoŋ. 14Dar Debora a ɓa Baraka: «Slikiɗi, hin Bumbulvuŋ muvuluw Sizera asi haŋ ɗik na, a ndila le. Haˀaw, Bumbulvuŋ a ki le a mbuŋ ɗike.» Barak tuwa, a po sar ti muwã Taboro, mizli mudurmuk kuruˀ tuwa sek aseˀe. 15Akẽh na, Bumbulvuŋ a ga zluwun da Sizera ati mota ngi vurum naŋhay waɗ soje naŋhay a mbuŋ Baraka, a ngumaka taŋ ti maslalam. Sizera a pi sar tir mota ngi vurum naŋ, a kil ti sar. 16Barak a gidiɗa mota ngi vurumoy ati sojeheye, hã sesẽŋ a Haroset-Goyim. A ngizlaka soje ngi Sizeraˀahaya gar ti maslalam, ko pal tekeɗe a ndir ta.
17Dambalaka Sizera makil ti sar na ng'ar guɗuk ngi Yaˀel, ngwas ngi Heber mbur Keni, asi Yabin, buy Hasor ati hay ngi Heber, mbur Keni na, taŋ zuy zuy ar wala taŋ. 18Yaˀel a bo nga ji hirnga ti Sizera, a ɓaŋ: «So ci a hay ɗu kumani ɗu, so ci a hay ɗu, ki zluwun ko neˀ ta» A ci ngi hay ar guɗuk ngi ngwas tuwa, a sirtaŋ borgo sirit. 19Sizera a ɓa ngwas tuwa: «Yam ara giy, inga vuliy yam ngi si neˀ takwa.» Ngwas tuwa, a wuna kwenekwene ngi ɗuwa wun, a vulaŋ di, a si, waɗ a sirta sirit ti borgo tuwa a muŋ. 20Sizera a ɓa ngwas tuwa ma: «A ra cici deŋ avu miviŋ ngi guɗuko, da mbur a so, a cufuɗuw le: mbur ada aka kwa na, ɓaŋ: mbur anta.»
21Amma Sizera a gir le kupuyah wãˀ, a hinje le ɗokɗok. Yaˀel, ngwas ngi Hebere, a zuɓ dum ngi guɗuk waɗ tokom ngi ɓiri, aru jibaˀ jibaˀ ng'avaŋ. A diraŋ dum ngi guɗuk tuwa, dar ar li tinik, gor njoŋ, hã dar a ruwuy. Sizera a muc simtraˀ. 22Dambalaka Barak ara supo Sizera. Yaˀel a bi nga ji di hirngaŋ, a ɓaŋ: «Sawa i buguw mbur ka masipa na.» Barak a ci ngi hay ngwas tuwa, keɗ na, Sizera i mumuca naŋ simtraˀ a ruwuy, dum a ro sĩw ar li tinike.
23Tapasa, Yabin buy Kanaˀana Bumbulvuŋ a maŋ le a ruwuy a mbuŋ Israyele. 24Israyeley ara ɗuvam ɓihey hirisl hirisl ti gidaŋ da Yabin, buy Kanaˀana hã a kiɗaka mi naŋ gbaˀ na si.
Currently Selected:
MIGI KIITAHAY 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.