Prov 30
30
Agur lhämtes
1Agur tä lajcha Jaqué tä lew'et Masa, häp tä lhämtes täja. Agur tahuyej Itiel lhäy'e Ucal wet yok:
2Matche tä ohich'atej tä n'am han m'akej,
3tsi tälhe tä olhaichufwenhiyejt'a n'ohanyaj
wet ontäfwenhiyejt'a Dios tä N'ot'amajchet.
4¿Atsi tä tiyäj puleye
wet äp tälh puleye?
¿Atsi tä ihutwek yafwthi lhayis
tä ihi takweyey?
¿Atsi tä ihanej chik ikäfwnhi wesaj
häp inät lhayis?
¿Atsi tä iwo lepeseya honhat?
¿Wet chiwoye lhey, lhäy'e lhäs lhey, chik lehanej?
5Nilhokej Dios lhämtes isen t'at,
wet lham t'uyehen wichi tä ilethane.
6Yej let'isej m'ak chik häpe häp lhämet,
tsi elat aifwon wet ain'älthila
tä w'et lhämlhi t'at.
7Tajlhame täkwfwas m'ak tä ot'alhej ame, Iwuk,
tä kamaj n'am leyej honhat.
Tähesna:
8Tiyej kanhi n'ohlä m'ak tä häpe n'otkanyaj
lhäy'e chik w'et oyämlhi.
Wet yej lhen n'oye hin'o tä hiw'en m'ayek,
wet yej lhen n'oye hin'o tä niw'ena m'ayek,
mat en n'oye hin'o tä lhäk nittäyayej.
9Tsi chik wuj m'ak chik ow'en,
elat olehla amej wet oyohlak,
“Ontäfwenhiyejt'a häp Lhawuk.”
Wet chik äp hich'atej tä m'ak n'am w'en,
elat ot'etanla, wet nech'e oailäkwlhi
tä ahäpe oka Dios.
10Yej lhäme tä ni'isa n'okawo
chik lhehi tä tatache häp lewuk.
Tsi lhamlak yäm ame tä akni'isa,
wet ates ihi.
11Iche elh tä fwitsaj
tä yäme tä fwetaj ni'isa lajcha,
wet iwoyeje lhämtes tä ni'isachehen häp lako.
12Ichehen lhamel tä fwetaj newache lech'isukyaj,
mat lakokhayaj ihi.
13Ichehen lhamel tä fwetaj len'ohyajay ihi,
wet lhainuhatpe iyhäj.
14Ichehen lhamel tä yen at lefwajnhatesa letsotey,
wet tet iwoyek tsonhates t'at lech'alo lhiley,
wet ilänejen wichi tä p'elitses tä ihi honhat.
15Iche m'ayhay täkwfwas
tä hätet iwoye fwis,
iläthiyet'ak yok,
“Naya, tek owatlä lhip”,
mat hits'uhi t'at w'oyis.
Iche tres m'ayhay tä ayhthatses,
wok oyok, iche cuatro
tä nhanayej chik yok, “Naya.”
16Häpe n'op'itsekw'et,
lhäy'e atsinha tä sufwnaj,
lhäy'e honhat, tej tä iwomchä
mat kamaj iwat'atlä inät,
lhäy'e itäj, ihanhiyejt'ak yok,
“Naya, tek owatlä hal'ä.”
17Elh tä iläkwlhi lajcha,
wet yen w'et m'ayeka lako lhämet
tä ne'tek yäm is m'ak tä iwoye,
is chik tsetwos timche tatelhoy,
wet istiwin lhayis ichunnejen leles häp t'isan.
18Iche tres m'ayhay tä oseltej,
wok oyok, cuatro tä n'am hanej.
Häp tähesna:
19Häp iyhäjkottaj tä wey'ä,
lhaitsayhatlhi wet is t'at.
Wet amlhäj tä takälä newahi,
mat chik tiyäjpe chenaj is t'at.
Wet barco chik inukwe inät,
häpe m'ak tä wuj mat is t'at.
Wet hin'o ihanej tä itichunayenlhi lhamej atsinha,
wet ikalhi t'at.
20Atsinha tä lech'efwa ihi tä iwoye lakain'oyaj,
tufw lhäk wet ilejo lak'aj wet yok:
“Ihichet'a m'ak chik ni'isak owoye.”
21Iche tres m'ayhay tä matche tä nit'uhawetayej,
wok oyok, cuatro tä wichi niteläytayej.
Häp tähesna:
22Hin'o tä n'okawo
mat tä lepese niyat t'at,
wet hin'o tä ch'isuk
mat teskanej lhäk,
23wet atsinha tä õn'äyiho mat lech'efwa ihi,
wet atsinha tä n'okawo mat tä lepese
icheyäjo lewuk tsinha lew'et.
24Iche cuatro itshätäyhas tä ihi honhat
tä matche tä ihan m'akejen,
inu'pe hin'ol tä ihanche m'akejen.
Häp tähesna:
25Siwanhas newache lakhajyhayaj,
mat tä nahayhos ihutwek lhäk
yämthilek iche t'at m'ak chik tufw.
26Wet inätetas häte lakhajyhayaj ihihit'a,
mat yen at lew'eta chenhas.
27Wet chol, laka niyat ihihit'a,
mat tä yikhen wuj tä is,
tek lhaiwomwethä.
28Wet chal'a takhajayhit'a,
lehanej tä letsoklhi t'at,
matkat ihi t'at niyatey lewukwey.
29Iche tres m'ayhay tä is lew'ekyajay,
wok oyok, cuatro tä wuj tä is tä ilunlhi.
Häp tähesna:
30Hay'äj inu'pe itshätäy iyhäj,
wuj tä takhajay,
nowayhiyet'a m'ak chik häpe.
31Ho'o tä takhajay,
wet kayla tä asnak,
wet rey tä ichunlä laka nifwotaj.
32Chik alhen ch'isukwa tä alechäjlhi,
wok lhenwethä m'ak tä ni'isa,
leyej wet en atichunhayaja täja:
33Elh tä ikasohi itshäwet kat'os,
hiw'enla manteca.
Wet elh tä yäm äytaji leyalh
tä tälhche lenhus, w'oyisla.
Wet elh chik iläkwlhi elh,
tatayhlawek lhamel.
Currently Selected:
Prov 30: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.