Prov 31
31
Lemuel lhämtes
1Rey Lemuel tä lew'et Masa, häp tä lhämtes täja tä lako ichufwenej wet yok:
2Ahäpe olhäs tä tälho okachowej.
Dios t'at tä nichulho ot'alhyaj tä olhaip'altsene.
Iche m'ak tä ofwel amho, oyok:
3Yej alekhajyench'oye atsinhay,
tsi lhamel tamenej reyes tä tatäy.#1~Rey 11.3
4Lemuel, ofwel amho,
isit'ak reyes lhäy'e niyatey iyäyej hat'es.
5Tsi chik iyäyej, hip'ethatlä leyes,
wet nemhit itetshan wichi tä p'elitses.
6W'enho hat'es häp wichi tä eyte y'inhihen,
lhäy'e iyhäj tä laj lakäjyaja,
7häpkhilek nemhit nitichunwethä lhamej tä p'elitses
lhäy'e tä leteläythayaj iyej lhamel.
8Ämlhi'pe wichi tä laj len'ohyajaya,
wet ch'ote iyhäj tä newache elh chik tach'ote.
9Ämlhi wet woye m'ak tä is alhoho,
wet ch'ote wichi tä p'elitses
tä iwatlä m'ayek.
Atsinha tä lehusek ihi
10Atha chik õnlhoke atsinha tä lehusek ihi,
tsi hätet iwoye m'ak chik t'unhi,
wuj laha, inu'pe tuntey tä isis.
11Lech'efwa wuj tä t'ekhaye,
wet lham ikalhi t'at lakäywet.
12Nilhokej ifwalas hin'o isej atsinha,
tsi ihanhiyejt'a chik iwoyeje
m'ak chik ni'isa.
13Ichäj tson'ataj w'ole lhäy'e lino,
wet ihumin tä yenwethä.
14Hätet iwoye barco tä ichäj n'olhäk
tä tälhe lhip elh tä atofwe.
15Tä nech'e fwala tä kamaj honatsi i'pe honhat,
nephä wet iwaklhatho lhäk lew'et lheley,
wet hiw'enhomche lechumtes lakawos tsinhay.
16Itetshan honhat lhip chik häpe wet ichäj,
wet chinaj t'äj tä ikalhi,
itihchä uvas tä itihi lelafwek.
17Lhaikhajyen wet tachumlhi,
18wet hiw'en tä ikalhi t'at laha
m'ak tä wichi ichäj tä tälhe,
wet tä honatsi tachumlhi
pajtha honaj chowej.
19Ikhajyen takweyey
wet tayhin wet ipätsinchehen.
20Lakato t'unhihot'a,
hiw'enho t'at m'akfwaj
elh tä iwatlä m'ayek.
21Tek nowayhlä fwiy'et,
tsi nilhokej lew'et lheley lew'uyis ihi t'at.
22Lham t'at tä yenwethä
lew'uyis tä taw'uyhiche tä imähen,
wet lakay'uchelis häpe t'at wesaj tä isis.
23Wichi tä ihi hupuy tä lew'et
wuj tä nitäfwelej hin'o tä lech'efwa
tä iyejpej hin'ol tä len'ohyajay ihi
tä lhaihutpejwek.
24Lham yenwethä leyhil tä isis,
wet wichi ichäj t'at.
Yenwethä n'okawakay,
wet hin'ol tä yen chumeta m'ayhay
tä ihäne honhates iyhäj,
lhamel ichäj t'at.
25N'äl tä häpe t'at atsinha
tä takhajay wet lewujyaj ihi,
wet yenhit'a lhakliya ifwalas tä tatache.
26Chik yämlhi,
n'äl t'at tä lehanyaj ihi,
wet tä ichufwenhen iyhäj,
n'äl tä lep'altsenyaj ihi.
27Itetshanpej m'ak tä lew'et lheley iwoye,
wet tufwit'a m'ak chik nitälhaye lechumet.
28Leles lhäy'e lech'efwa
lhamel iwujyen wet yok:
29“Iche t'at atsinhay tä lehusey ihi,
mat am lenu'pe lhamel,
wuj tä ahusek ihi.”
30M'ayhay tä ikänitlhi hin'o mathichet'a,
wet n'osilatyaj t'unhit'a.
Mat häp atsinha tä ihumin Lhawuk
wet iwoye lhämtes,
häp tä t'uhawetej chik õ'wujyen.
31¡Wunit tä ihi tä wichi tatache!
¡Is chik lewujyaj tälhe t'at
lechumtes tä yenlhi!
Currently Selected:
Prov 31: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.