ISIKELI 47
47
A raivotu ni wai tabu, 1-5. Na kena yaga, 6-12. Ai yalayala ni vanua, 13-21. Me ia na vakawiri madigi me ra vota vakakina na vanua vei ira na Isireli, kei ira na vulagi era tiko vata kei ira, 22,23.
1Sa qai kauti au tale ko koya ki na katuba ni vale; ka raica, sa dua na wai sa dave yani mai na ruku ni lago ni vale vaka ki na tu-i-cake: ni sa donuya na tu-i-cake na mata ni vale, ia na wai sa dave sobu mai na ruku ni vale mai na tabana ki nai matau, mai na yasa ni cabocabo-ni-soro ki na ceva. 2Sa qai kauti au yani ko koya e na sala ni matamata-ni-koro sa donuya na tokalau, ka sa tuberi au voli e na sala e tautuba ki na matamata-ni-koro ki sau, e na sala sa qara donu ki na tu-i-cake, ka raica, na wai sa drodro tiko mai na liga i matau.
3Ia ni sa lako yani na tamata sa taura na wa i vakarau e na ligana, vaka ki na tu-i-cake, sa vakarauta e dua na udolu na kiupiti, ka sa kauti au ki loma ni wai; na wai sa yala ki na noqu; qurulasawa. 4Sa baci vakarauta tale ko koya e dua na udolu, ka qai kauti au ki loma ni wai; ia na wai sa yala ga ki na duruqu. Sa baci vakarauta tale ko koya e dua na udolu, ka kauti au yani ki loma; ia na wai sa qai yala ki na toloqu. 5Sa baci vakarauta tale ko koya e dua na udolu: ia sa qai dua na uciwai ka'u sa sega ni lakova rawa; ni sa titobu na wai, na wai me qalo kina, na uciwai sa sega ni lakovi rawa.
6A sa kaya vei au ko koya, Ko sa raica na ka oqo, ko iko na luve ni tamata, se segai? Sa qai kauti au ko koya, ka vakalesui au e na bati ni uciwai. 7Ia ni'u sa lesu, raica, sa tu e na bati ni uciwai e dua na ka levu na vu ni kau e na batina ruarua. 8Sa qai kaya vei au ko koya, A wai oqo sa dave yani ki na vanua vaka ki na tu-i-cake, a sa lako sobu ki na vanua liwa lala, ka yaco sara ki waitui; ia ni sa yaco sara ki waitui, ena bula kina na kena wai. 9Ia ena yaco, na ka kece sa bula, ka lako voli, e na tikina kece sa yaco kina na uciwai, ena bula: ia ena levu sara na ika, e na vuku ni na yaco kina na wai oqo: ni na bula kina na wai; ia ena bula talega na ka kece sa yaco kina na uciwai. 10Ia era na tu maikina na gonedau mai Eni-keti ka yala ki Eni-eki-leimi; sa na tu nai sasau ni lawa, ia na kena yavusa ika, ena vaka na ika ni waitui levu, na ka levu sara. 11Ia na kena tikina lolobo ka vakadranodrano ena sega ni bula; ena biu tu me tuituina ga. 12Ia e na bati ni uciwai ruarua ena tubu kece kina na kau sa laukana na vuana, ena sega ni malai na drauna, se oti rawa na vuana: ena vuavuai tikoga e na veivula, ni sa dave na kena wai mai na tikina tabu: ia ena sa daulaukana na vuana, ia na drauna sa na wainimate.
13Sa kaya vakaoqo na Turaga ko Jiova; Me sa kenai yalayala oqo, mo dou muria ni dou vota na vanua ki na veimataqali i Isireli e tinikarua; me nei Josefa e rua nai votavota. 14Ia dou na dui taukena vata ga, na tamata yadua, na vanua ka'u a dulaka cake kina na ligaqu me'u solia vei ira na nomudou qase: ia na vanua oqo ena lutu vei kemudou mo dou taukena.
15Ia ena vakaoqo nai yalayala ni vanua e na yasana ki na tokalau, mai na waitui levu, e na sala ki Eciloni, ni sa lakovi ko Sitati; 16ko Emaci, kei Peroca, kei Sipireimi, mai na maliwa ni yalayala i Tamasiko kei nai yalayala i Emaci; na koro ko Atikoni, e nai yalayala i Avirani. 17Ena kenai yalayala talega mai waitui na koro ko Enani, kei nai yalayala i Tamasiko, kei na yasayasa vakatokalau, kei nai yalayala i Emaci. Ia oqo na kenai yalayala vakatokalau. 18A kenai yalayala talega ki na tu-i-cake dou na yalana mai Avirani, kei Tamasiko, kei Kiliati, kei na yasana ni Isireli mai na Joritani, ia mai nai yalayala ko ya ki na waitui mai na tu-i-cake. Ia oqo na kenai yalayala ki na tu-i-cake. 19A kenai yalayala talega mai na ceva, ko Tema ka yaco ki na wai ni veileti mai Ketesa, mai na uciwai ka yala ki na waitui levu. Ia oqo na kenai yalayala vaka ki na ceva. 20A kenai yalayala talega ki ra, na waitui levu mai nai yalayala ko ya, ka yala sara ki Emaci. Oqo na kenai yalayala ki ra. 21Ia dou na vota na vanua oqo vakataki kemudou na veimataqali i Isireli. 22Ia ena vakaoqo, dou na ia na vakawiri madigi e na vanua mo dou taukena vakataki kemudou, kei ira na vulagi era tiko kei kemudou, sa ra na vakaluveni e na kemudou maliwa: ia me ra tautauvata ko ira kei kemudou na Isireli dou sai taukei dina; me rai taukei vata kei kemudou e na veimataqali i Isireli. 23Ia sa nodra i tavi, na mataqali sa tiko kina e dua na vulagi, me ra solia vua na nonai votavota vanua me taukena, sa kaya na Turaga ko Jiova.
Currently Selected:
ISIKELI 47: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific