ISIKELI 46
46
A ka eso sa lesi me cakava ko koya na turaga, 1-8, kei ira na lewe ni vanua, ni ra la'ki cuva e na mata i Jiova, 9-15. A nonai votavota vanua na tui me ra taukena ko koya kei ira na luvena sa taravi koya, me kakua ni soli tani, 16-18. A rara eso me ia kina, na vakasasaqa kei na vavavi, 19-24.
1Sa kaya vakaoqo na Turaga ko Jiova; A matamata-ni-koro ni lomanibai eloma sa donuya na tu-i-cake me sogo tu e na bogi ono sa ia kina na cakacaka; ia me qai dolavi e na siga tabu, ka me dola talega e na siga ni vula vou. 2Ia me curu mai na turaga mai na sala ni curucuru ni matamata-ni-koro ko ya mai tautuba, me mai tu ko koya mai na duru ni matamata-ni-koro, ka ra na cakava na bete na nonai soro kama kei na nonai madrali ni veivinakati, ka me lotu tiko ko koya mai nai lago ni matamata-ni-koro: me qai suka yani ko koya; ia me kakua ni sogo na matamata-ni-koro, me yakavi mada ka qai sogo. 3Me ra mai lotu talega ko ira na lewe ni vanua mai na katuba ni matamata-ni-koro oqo e na mata i Jiova e na veisiga tabu kei na veivula vou.
4Ia nai soro kama ena vakacabora na turaga vei Jiova e na siga tabu, me ono na lami sa sega na kena ca, ka dua na sipi tagane sa sega na kena ca: 5kei nai madrali laukana e dua na efa me ia vata kei na dua na sipi tagane, ia na kedrai madrali laukana na lami, me vaka na ka sa rawa vua me solia, ka tini na paidi waiwai me ia vata kei na dua na efa. 6Ia e na siga ni vula vou me dua kina na luve ni pulumokau sa sega na kena ca, ka ono na lami, ka dua na sipi tagane: me sa sega na kena ca. 7Ia me ia vata e dua na efa kei na dua na pulumokau, ka dua na efa me ia vata kei na dua na sipi tagane, me vakarautaka ko koya mei madrali laukana, kei na kedra na lami me vaka na ka sa rawata ko koya, ka tini na paidi waiwai me ia vata kei na dua na efa.
8Ia ni sa curu mai na turaga, me curu ga ko koya mai na sala ni curucuru ni matamata-ni-koro ko ya, ia na sala talega ko ya me curu yani kina. 9Ia ni ra lako mai na lewe ni vanua ki na mata i Jiova e na gauna tabu, o koya sa curu mai na sala ni matamata-ni-koro mai na tokalau me mai lotu, me curu yani ko koya e na sala ni matamata-ni-koro ki na ceva: kei koya sa curu mai na sala ni matamata-ni-koro mai na ceva, me curu yani ko koya e na sala ni matamata-ni-koro ki na tokalau: me kakua ni lesu yani ko koya e na sala ni matamata-ni-koro ka curu mai kina, me curu ga yani ko koya e na sala sa donuya. 10Ia ni ra sa curu mai ko ira, ena curu talega mai ko koya na turaga ka tiko e na kedra maliwa; ka ni ra sa curu yani ko ira, me curu talega yani ko koya. 11Ia e na so levu kei na gauna tabu me dua na efa mei madrali laukana me ia vata kei na dua na pulumokau, ka dua na efa me ia vata kei na dua na sipi tagane, kei na kedra na lami me vaka na ka sa rawa vua me solia, ka tini na paidi waiwai me ia vata kei na dua na efa. 12Ia ni sa via cakava vei Jiova ko koya na turaga e dua nai soro kama, se dua nai madrali ni veivinakati, ni sa lomana ga kina, me qai dolavi vua na matamata-ni-koro sa donuya na tu-i-cake, me mai cakava ko koya na nonai soro kama kei na nonai madrali ni veivinakati, me vaka sa cakava ko koya e na siga tabu: me qai curu tale yani ko koya; ia ni sa curu yani, me qai sogo na matamata-ni-koro.
13Ia mo vakarautaka e dua na lami, sa yabaki dua ka sega na kena ca, mo cakava e na veisiga mei soro kama vei Jiova: e na veimataka kece mo cakava ga oqori: 14a kenai madrali laukana talega mo cakava e na veimataka kecega, nai kaono ni dua na efa, ka tolu na paidi waiwai me natuki vata kei na madrai droka ni witi; oqo nai madrali laukana sa lesi me caka tiko ga vei Jiova ka sega ni mudu. 15Ia me ra vakarautaka vakaoqo na lami, kei nai madrali laukana, kei na waiwai, e na veimataka kecega, mei soro kama tikoga.
16Sa kaya vakaoqo na Turaga ko Jiova; Ni sa solia na turaga e dua na ka ni loloma vua e dua vei ira na luvena, na ka sa qai taukena mai ko koya oqo ena nodra na luvena; era na taukena ko ira era taravi koya. 17Ia ni sa solia ko koya e dua na nona ka sa taukena vua e dua vei ira na nona tamata, ena nona tiko ga ka yacova na yabaki ni veisere; ia ena qai suka tale vua na turaga: ia na ka sa taukena ko koya ena nodra dina sara na luvena. 18Ia me kakua ni kovea ko koya na turaga na nodra tiki ni vanua na tamata, me vakasavi ira tani kina mai na nodra tiki ni vanua; me so ga na nona tiki ni vanua me solia ko koya me ra taukena na luvena: me ra kakua ni vakasevi tani e dua na noqu tamata mai na nona tiki ni vanua.
19Sa qai kauti au yani ko koya ki nai curucuru mai na taba ni matamata-ni-koro, ki na nodra veivalevale tabu na bete, sa donuya na tokalau: ka raica, sa dua na yasana ki na tabana ruarua ki ra. 20Sa qai kaya vei au ko koya, Oqo na nodra tikina na bete me ra vakasaqa kina nai soro ni caka cala kei nai soro ni valavala ca, me ra vavia talega kina nai madrali laukana; me ra kakua ni kauta ki na lomanibai ki taudaku, me vakatabui ira kina na tamata. 21Sa qai kauti au yani ko koya ki na lomanibai ki taudaku, ka tuberi au voli ki na tutuna vava ni lomanibai; ka raica, sa yadua na kena rara e na tutuna vava ni lomanibai. 22E na tutuna vava ni lomanibai sa yadua kina na kena rara e vakabai sa vasagavulu na kiupiti na kena balavu, ka tolusagavulu na kena raraba: sai vakarau vata vava na veitutuna oqori. 23Ka sa yadua na kedrai yatu vale e tu volita na loma ni rara, sa tu volita vava oqori, ka so nai riri e caka tu e ruku ni yatu vale me volita. 24Sa qai kaya vei au ko koya, Oqo na nodra tikina na dauvakasasaqa, na nodra era dauqarava na vale tabu me ra vakasaqa kina na nodra i soro na tamata.
Currently Selected:
ISIKELI 46: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific