ISIKELI 48
48
A nodra i votavota na veimataqali eso, 1-7. Ai votavota tabu, 8-14. Ai votavota ni koro kei nai bili, 15-20. Ai votavota ni tui, 21,22. A nodra i votavota na vo ni veimataqali e tinikarua, 23-29. Ai yalayala ni koro, kei na kena matamata-ni-koro, kei na yacana, 30-35.
1Sa vakaoqo na yacadra na veimataqali. Mai nai yalayala vaka ki na tokalau ka muria na baravi e na sala ki Eciloni, ni sa lakovi ko Emaci, kei na koro ko Enani, kei nai yalayala i Tamasiko vaka ki na tokalau, ka yala ki tai kadua mai Emaci; ena nonai yalayala oqori ki na tu-i-cake ki ra talega, sa na nei Tani. 2Ka veitaravi kei nai yalayala nei Tani, mai na yasana mai na tu-i-cake ka yala ki na yasana ki ra, sa na nei Aseri. 3Ka veitaravi kei nai yalayala nei Aseri, mai na yasana mai na tu-i-cake ka yala ki na yasana ki ra, sa na nei Nafitalai. 4Ka veitaravi kei nai yalayala nei Nafitalai, mai na yasana mai na tu-i-cake ka yala ki na yasana ki ra, sa na nei Manasa. 5Ka veitaravi kei nai yalayala nei Manasa, mai na yasana mai na tu-i-cake ka yala ki na yasana ki ra, sa na nei Ifireimi. 6Ka veitaravi kei nai yalayala nei Ifireimi, mai na yasana mai na tu-i-cake ka yala ki na yasana ki ra, sa na nei Rupeni. 7Ka veitaravi kei nai yalayala nei Rupeni, mai na yasana mai na tu-i-cake ka yala ki na yasana ki ra, sa na nei Juta.
8Ia ka veitaravi kei nai yalayala i Juta, mai na yasana mai na tu-i-cake ka yala ki na yasana ki ra, sa kenai sevu ni vanua mo dou solia, e rua na oba ka lima na udolu na gasau na kena raraba, kei na kena balavu me tauvata kei na dua nai votavota, mai na yasana mai na tu-i-cake ka yala ki na yasana ki ra: ia na tikina tabu ena tu sara ga ki loma. 9Nai sevu dou na solia me nei Jiova, me rua na oba ka lima na udolu na gasau na kena balavu, kei na kena raraba e dua na oba. 10Ia nai sevu tabu oqo ena nodra na bete; a kena balavu vaka ki na tokalau e rua na oba ka lima na udolu, kei na kena raraba ki ra e dua na oba, kei na kena raraba ki na tu-i-cake e dua na oba, kei na kena balavu ki na ceva e rua na oba ka lima na udolu; ia na tikina tabu i Jiova me tu sara ga ki loma. 11Ena nodra na bete na tikina tabu oqo, ko ira na luve i Setoki, sa ra vakaitavi tikoga e na noqu cakacaka, ka sa sega ni cala ni ra sa cala ko ira na Isireli, me vaka ni ra cala ko ira na Livai. 12Ia nai sevu oqo, nai sevu ni vanua me sa nodra tikina tabu sara, ka yaco ki na nodra i yalayala na Livai.
13Ia ena nodra na Livai me sa donuya na nodra i yalayala na bete, e rua na oba ka lima na udolu na kena balavu, ka dua na oba na kena raraba: a kena balavu taucoko ena rua na oba ka lima na udolu, kei na kena raraba e dua na oba. 14Ia me ra kakua ni volitaka, se vakaisosomitaka, se vakayalia nai sevu ni vanua: ni sa tabu me nei Jiova.
15Ia na lima na udolu, sa vo e na rabana sa donuya na rua na oba ka lima na udolu, sa na sega ni tabu na yasana oqo, ia sa na bale ki na koro, me tara kina na vale, me kenai bili talega: ia na koro me tu sara ga ki loma. 16Ka me vakaoqo na kenai vakarau; na tikina mai na tokalau me va na udolu ka lima na drau, kei na tikina mai na ceva, me va na udolu ka lima na drau, kei na tikina mai na tu-i-cake, me va na udolu ka lima na drau, kei na tikina mai ra, me va na udolu ka lima na drau. 17Ia nai bili ni koro me rua na drau ka limasagavulu ki na tokalau, ka rua na drau ka limasagavulu ki na ceva, ka rua na drau ka limasagavulu ki na tu-i-cake, ka rua na drau ka limasagavulu ki ra.
18Ia na vo ni kena balavu sa donuya nai sevu tabu me dua na oba vaka ki na tu-i-cake, ka dua na oba vaka ki ra: ka me donuya nai sevu tabu; ia na kena vuata me sa kedra kakana era qarava na koro. 19Ia me ra vakaitavi kece e na veiqaravi ni koro, ko ira na veimataqali i Isireli.
20Ai sevu taucoko ena rua na oba ka lima na udolu, ka rua na oba ka lima na udolu: me takiveilevu na veiyasana ni sevu dou na solia, kei nai votavota ni koro. 21Ia na kena vo ni sevu tabu, kei nai votavota ni koro, ena nona na turaga, vaka ka vaka, me donuya e rua na oba ka lima na udolu nai sevu e na kenai yalayala ki na tu-i-cake, me donuya talega ki ra e rua na oba ka lima na udolu ki nai yalayala ki ra, sa donuya nai votavota ni tui: ia sa na kenai sevu tabu ko ya; ia na yasana tabu ni vale sa na tu sara ga ki loma. 22Ia na tikina ki daku ni nodra i votavota na Livai, kei nai votavota ni koro, sa tu mai ki loma ni nona na tui, e na maliwa ni yalayala nei Juta kei nai yalayala nei Penijamini, ena nona na tui.
23Ia na kedra vo ni veimataqali; mai na yasana mai na tu-i-cake ka yala ki na yasana ki ra, me nei Penijamini. 24Ka veitaravi kei nai yalayala i Penijamini, mai na yasana mai na tu-i-cake ka yala ki na yasana ki ra, me nei Simioni. 25Ka veitaravi kei nai yalayala i Simioni, mai na yasana mai na tu-i-cake ka yala ki na yasana ki ra, me nei Isakari 26Ka veitaravi kei nai yalayala i Isakari, mai na yasana mai na tu-i-cake ka yala ki na yasana ki ra, me nei Sepuloni. 27Ka veitaravi kei nai yalayala i Sepuloni, mai na yasana mai na tu-i-cake ka yala ki na yasana ki ra, me nei Kati. 28Ka veitaravi kei nai yalayala i Kati, mai na yasana vakaceva mai na ceva, me sa kenai yalayala mai Tema kei na wai ni veileti mai Ketesa, kei na uciwai ka yala sara ki na waitui levu. 29Oqo na vanua mo dou vota me dui nodra i votavota na veimataqali i Isireli me ra taukena, ka sa vakaoqo na nodra i votavota, sa kaya na Turaga ko Jiova.
30Ia sa vakaoqo nai yalayala ni koro e na yasana ki na tokalau, e va na udolu ka lima na drau nai vakarau. 31Ia na matamata-ni-koro ena vakatokai e na yacadra na mataqali i Isireli: e tolu na matamata-ni-koro me donuya na tokalau; e dua na matamata-ni-koro i Rupeni, e dua na matamata-ni-koro i Juta, ka dua na matamata-ni-koro i Livai. 32Ia mai na yasana ki na tu-i-cake e va na udolu ka lima na drau: ka tolu na matamata-ni-koro; e dua na matamata-ni-koro i Josefa, e dua na matamata-ni-koro i Penijamini, ka dua na matamata-ni-koro i Tani. 33E na yasana talega ki na ceva e va na udolu ka lima na drau nai vakarau: ka tolu na matamata-ni-koro; e dua na matamata-ni-koro i Simioni, e dua na matamata-ni-koro i Isakari, ka dua na matamata-ni-koro i Sepuloni. 34E na yasana ki ra e va na udolu ka lima na drau, kei na nodra matamata-ni-koro e tolu; e dua na matamata-ni-koro i Kati, e dua na matamata-ni-koro i Aseri, ka dua na matamata-ni-koro i Nafitalai. 35Ni sa vakavolivolita na koro sa tini ka walu na udolu na kenai vakarau: ia na yaca ni koro mai na siga ko ya, Ko Jiova-sama [Sa tiko maikina ko Jiova].
Currently Selected:
ISIKELI 48: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific