Pr 30
30
A is k'anej cham Agur
1A is k'anej Agur, c'ajol Jaqué miman yelapnok. A Agur tu' max k'anjab bay Itiel c'al bay Ucal, max yalon axca ti':
2Yelxac'al c'am in nabal ayin ti' yintak masanil wet animail, c'am in nabal axca nabal eb.
3Maj wi' jabok in nabal, caw wal man wojtakok janic'ok, tzetbil wal yayji oc Cham Asanxanej Ocok.
4¿Mac wal max ajtok bay satcan c'al yay paxtek? ¿Mactxel chi je' mitx'on waay cak'ek' yul is k'ab? ¿Mactxel chi je' pichon a' mar yetok is k'util? ¿Mactxel max aon ay is mojonal tx'otx' tx'otx'? Al ayin, ta ojtak tzet is bi Cham, c'al tzet bi is c'ajol.
5A Dios chi taynen eb chi yaoc c'ul yin; masanil tzet yetal bay chi yak' is ti', moj ton wal jaon oc yipok co c'ul.
6Manchak aoc tz'akil tzet yetal max yal Cham, axa talaj chi yunajok, chach tzulay yuj, cax yinxa lek'tial chi yun a cani.
7Asan cab tzet yetal chin k'an ayach Mamin Jehová; a tzet chin k'an tu', ak' ayin, yet c'amto chin cami:
8Manchak in a cha oc yin lek'tial, c'al yin etnewomalil; manchak in aoc yin beyomal, tamwal yin mebail; asan chak' ayin tzet yetal chi oc yopiso wuj junjun c'u.
9Tatol yelxac'al xiwil tzet yetal ay ayin, ach toj talaj c'ayc'ulal wuj, cax chi walon ajok tol man ach wojtakok. Ta c'am pax tzet yetal ay ayin, in toj talaj elk'an, cax chi oc in mul ayach.
10Manchak al yobal k'anej yin junok mosejal satak is patrón, talaj c'uxan chach catabnelay yuj jun mosejal tu', cax chaben yail yuj.
11Ay mactxel chi yal yobal k'anej yin is mam, cax c'am chi yal janic'ok watx' k'anej yin is txutx.
12Ay mactxel chi na' tol caw wal c'am is mul, c'am pax chi watx'nej ba yin is yobtakil.
13Ay mactxel chi na' tol caw wal miman yelapnok, caw wal chi mimannej ba bay juntzanokxa.
14Ay mac caw wal c'am is yabenc'ulal yin eb meba', chi etax eb yuj, cax chi yionxac'al is tzet yetal eb.
15Ay cac'on yune' no uc'om el chic', asanc'al k'anoni chi yunej. Ay caneb tzet yetal tol c'am yechel chi oc wanaj yocheni:
16A mukbal camnak, ix ix c'am chi unewi, tx'otx' tx'otx' c'am yaejal, c'al k'ak' k'ak'ej c'am chi oc wanaj lajwi el si' yuj.
17A mactxel chi yintaknej is mam, cax c'am chi yikej bay is txutx, a jun tu' moj wal tol chi ilay eltek sat yuj no joj, cax chi chilaytok yuj no ostoc.
18Ay caneb tzet yetal chi c'ayaj in c'ul yuj, cax c'am chi nachaj el wuj:
19a ton tzet wal chi yun bey no' águila bay satcan, tzet wal chi yun yec' no bakne labaj bay satlak ch'en, tzet chi yun toj junok barco bay yiban a' mar, c'al tzet chi yun montelen ba nak winak yetok ix ix.
20Caw wal chi c'ay c'apax aj in c'ul yuj tzet chi yut ba junok ix ix ay yajaw, cax chi oc yin ajmulal. Chi mulji, chi lajwi tu' chi achinwi, cax chi yaloni: Tokwal ay yobtakilal chi wunej,*fn* ẍi ix.
21Ay can makan anima tol c'am chi techaj is beybal, axac'al eb chi binaj yul is conobal:
22junok mosejal chi oc yin reyal, junok c'am is nabal tol xiwil is lobej,
23junok ix buchbil elok, tol chi oc yichamil, yetok junok ix mosejal yayji, chi occan is q'uexelok xal is patrón.
24Ay can makan no coc'al no' bay sat tx'otx' ti', tol aj nabal yintak mac ay is nabal:
25No sanic, jun wal miman bulan yayji no', axca tol c'am wal yip, palta a no' tu', chi wajcan no' is lobej yet waresma;
26axa no txitx, c'am wal yip no', palta chi cajay bay yulak ch'en;
27a no chapulín, c'am junok is yajawilal no', palta txolil chi yun bey no';
28a no patix, chi je' co mitx'oni, palta chi apni oc no' bay yatut eb rey.
29Ay ox makan no no' caw wal jelan chi yut ba, ay c'apax junokxa yet is can:
30a no coj, a no' tu' yelxac'al ay is may no', tol c'am chi elaj no' bay satak junok mactxel;
31a no mam caẍlan, caw chi maynej ba no', yetokc'al no mam chiwo chi maynej c'apax ba, axca c'apax tu' junok rey tol chi babji toj satak eb soldado.
32Ta yinc'al a comon nabalil cha mimanen a ba, cax cha naon onen tzet yetal man watx'ok, chi cam wal a naon sic'libil tzet chonej.
33Tatol chi mak'lay no' leche, caytu' chi yun yeltek mantequilla, ta cha pitz' a txam, chi tit chiq'uil, tatol cha tx'em junok mactxel, owalxa ok yun lajwok ajok, ẍi cham Agur.
Currently Selected:
Pr 30: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989