Pr 31
31
A is k'anej cham Lemuel
1A is k'anej cham rey Lemuel miman yelapnok, tol cuybil cham yuj is txutx:
2Ach wune', a Dios max ach ak'on ayin yuj paktzilok in tewilal; tzetto wal watx' ok wal ayach.
3Manchak etnej el a ba yin eb ix ix; a yuj eb ix xan xiwil eb rey chi etax elok.
4Man watx'ok ach Lemuel, tol ok oc' an an caw wal ow, tamwal yuq'uen juntzan eb et yajawilal an an tu',
5talaj chi tojcan c'ayc'ulal ley e yuj, cax che yetnen eb anima yaynakil.
6Yuc'okab eb ayxa oc yin yailal an vino, yuc'okab eb yatakxac'al ay an an caw wal ow,
7yet watx' chi c'aytok yul c'ul eb tzet chi yut ba, c'amxa chi na eb is mebil, c'al is yailal.
8K'anjaban yuj eb c'am chi je' yalon ba; col eb tol c'am mac chi coloni.
9K'anjaban yin a watx'nen el k'anej yin tojolal; col eb ok'bal c'ul, c'al eb yaynakil, ẍi is txutx cham Lemuel tu' bay.
Watx' k'anej yin xal ix watx' aj nabal
10A junok xal ix watx' nabal, man subojok yilchaji; ec'ban yelapnok xal yintak ch'en ch'en caw wal miman is tojol.
11A xal ayoc yipok c'ul yichamil, c'am tzet chi majax bay.
12Xiwilxa chi yak' tzalojbok c'ul yichamil yin masanil is k'inal.
13Chi toj xal manoj lana c'al lino; yetok wal masanil is c'ul cax chi watx'nen is mulnajil.
14Axca junok barco chi tojtac'al bay najat, axca tu' yayji xal, chi toj yitek tzet yetal chi oc yuj.
15A yet c'amtoc'al chi sakbi, chi aj wanok cax chi c'oli yak'on low yune' c'al eb ix is chekbej.
16Chi toj yil junok tx'otx', cax chi manoni, a ch'en tumin chi yi', a ton chi yak'balnej yawon uva.
17Chi watx'nej ba, cax chi oc wal yin mulnajil.
18Tol chi cam wal yiloni, tzetbil wal chi yun bey is txon; chi mulnaj c'ualil c'al ak'balil.
19Chi watx'nej tx'al, cax chi chemwi.
20Naanc'al eb meba', c'al eb ay is cawxinakil yuj.
21Tok chi xiw yuj is familia yet xiwil sic, yujtol masanil eb, caw wal watx' is pichil eb ayocok.
22A chi watx'nen is txow k'ap, a wal k'ap caw wal watx' chi yaoc is pichilok.
23A cham yichamil xal tu', caw wal ojtakbil bay despachoal is conob, ayoc tz'akilok eb mimek winak yayji bay yul is conobal tu'.
24Chi watx'nej xal k'utilej, yetok c'alilej, cax chi txonon bay eb txonjom.
25Caw wal tec'an waay xal, cax miman yelapnok xal yul sat anima; tok ay tzet chi na yuj cawxinakil yet yecal.
26Yinc'al jelanilal chi k'anjabi, yinc'al camc'ulalil chi cuywaji.
27Ayc'al oc yilon tzet chi yun beytok masanil is tzet yetal bay yatut, c'am bay tol toc'al chi ec' tiempo yuj.
28A eb yune', c'al yichamil, chi yal eb watx' k'anej yin, cax chi yalon eb axca ti':
29Xiwil ix watx' beybal; palta asannej ach ach ti' yelxac'al watx' a beybal yintak masanil eb ix ix tu', ẍi eb.
30A wal watx'il yili mimanil junok ix, ay bay tol montebalc'al. A watx'il yili sat, jun bek chi q'uexchaji; palta a ix ix tol ay yelapnok Jehová yul sat, moj wal tol miman yelapnok.
31Alek watx' k'anej yin xal satak masanil conob; al-layokab watx' k'anej yin yuj masanil tzet yetal chi yunej.
Currently Selected:
Pr 31: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989