Mc 3
3
Jesús yemegue q'aen ñe'me leuaĝaic ga'me nolo' jo'ne niyamaqatac
(Mt 12.9-14; Lc 6.6-11)
1Ca'li ñe'me Jesús yitaĝa taue ga'me nemaĝaiqui, qama'le 'uo ñe'me jiyaĝaua jo'ne ja daconaĝana ga'me louaq. 2Nataq'aen uo'oe gaa'me fariseopi jo'ne ch'e nauateda'a joñe'me Jesús qaedi yauachidigui qom en yemegue ga'me nolo' jo'ne niyamaqatac, qama'le chiyaqayi q'aen da'me uajoilegue. 3Chane'eja ñe'me Jesús dojapegue' ñe'me jiyaĝaua jo'ne ja yaqanatet ta'le daconaĝana ga'me louaq, enaac:
—¡Oñijeguem, anechachi'ña na'me nojo' laeñi!
4Yem qama'le yena't jogaa'me laqaya':
—¿Jach'e ga'me qoyajeta ta'le qoya'uo ga'me nolo' jo'ne niyamaqatac? ¿Qo'li qoyajeta ta'le qoye'tem ga'me 'noota jenjo' qadaqaya, uotaĝa ta'le qoye'tem ga'me ja no'en? ¿Qo'li qoyajeta ta'le qonec'alaĝategue ga'me 'loyaĝac, uotaĝa ta'le qoyapalaĝat?
Qalaĝaja jogaa'me qaya'te nenaĝatedegue. 5Chane'eja joñe'me Jesús jalcote da'me totelegue ca'li, nataq'aen dalematayi da'me lec'atenaĝanaĝac qa'a ja jetaque yacoteguet ga'me enaac, qama'le enapega ñe'me jiyaĝaua:
—¡Anodegue na'me adouaq!
Ñe'me jiyaĝaua nodegue, qama'le paja'a 'noota ga'me louaq. 6Mane'e ca'li yenoĝodegue jogaa'me fariseopi, paja'a nayatena't ca'li dojapega't, nataq'aen jogaa'me jo'ne quetedapegue' ñe'me Herodes, qaedi yauata ga'me lajoĝoc da'me yala't ñe'me Jesús.
Jalcote ga'me jiyaĝadipi jo'ne ueteda'a ga'me qa'em lae
7Jesús nataq'aen jogaa'me lapaĝaguenataqa yec'adeta ga'me lae jaga'me qa'em lat'edai, qama'le jalcote joga'me Galilea laje'pi nataq'aen quetegue joñe'me Jesús. 8Ca'li qodep'iquitapegalo jogaa'me 'lonataqa jo'ne p'ajodaye, nach'e ena'am nec'adeta joga'me Judea laje'pi qaedi yauata, nataq'aen jogaa'me chiyoqoda'ña di'me Jerusalén, nataq'aen jogaa'me Idumea laje', choqogaa'me jo'ne chiyoĝotegue di'me nayapije'ma jañe'me ajeua jo'ne lajego di'me Jordán, nataq'aen jogaa'me lep'aĝa'j di'me aleua jo'ne Tiro nataq'aen di'me Sidón.
9Qo'che' joñe'me Jesús uaqateque jogaa'me lapaĝaguenataqa, enaac:
—Aviyamaĝacheta't jaga'me licota qaedi ja jayem 'te qoyepataĝa't, qa'a ja nejataĝaic ga'me jiyaĝadipi.
10Qa'a jalcote ga'me en yemegue q'aen, qama'le ena'uaque joga'me leuaĝaiquipi quetedapegue' joñe'me qaedi yepo't. 11Nataq'aen nale dajoya'agueta jogaa'me payac lepaqa'li qama'le yejoidiñe nale naa'me leliquetel qama'le 'yalaqa'tape nale jogaa'me: “¡Naqa'am mach'e am Dios Lec'oĝot!” 12Qalaĝaja ñe'me Jesús jalcote da'me uaqatelegue qaedi ja qo'yaĝatetapi'ñgui.
Jesús yiyaĝanalo joga'me doce jo'ne lamaĝa's
(Mt 10.1-4; Lc 6.12-16)
13Yem qama'le Jesús yec'adije'ma ga'me qajoĝonaĝa jo'ne qayaje'mec, qama'le yauo'oe gaa'me yiyaĝanalo, jogaa'me jo'ne quetelo'te lauel, qama'le jogaa'me yec'adeta joñe'me. 14Ca'li male nalo'ta't jogaa'me, qama'le yiyaĝanalo jogaa'me liquiyaqa jo'ne doce, qaedi naequetedapegue', nataq'aen qaedi male yamaĝalo'te da'me 'yaĝatetedac joda'me 'naqataĝanaĝac jo'ne onaĝaic. Nach'enaua yaneque Dios lamaĝa's. 15Nataq'aen queda'me yanema da'me lañoqotaĝanaĝa'j qaedi yamaĝadegue jogaa'me payagodipi.
16Naajo' doce jo'ne liquiyaqa: Simón nach'eñe jo'ne en lenaĝat Pedro; 17Santiago nataq'aen laqaya jo'ne Juan jo'ne lec'oqo'te ñe'me Zebedeo, jo'ne e'n lenaqa'te Boanerges (jo'ne eetojo': “Qajoĝonaĝa lec'oqo'te”); 18ñe'me Andrés; ñe'me Felipe; choqogaa'me Bartolomé, Mateo, Tomás, nataq'aen Santiago jo'ne Alfeo lec'oĝot, Tadeo, Simón jo'ne celote, 19nataq'aen Judas Iscariote jo'ne ua'edi yanegue ñe'me Jesús.
Qoyepoleguelegue ñe'me Jesús da'me uetaye ga'me payac lepaqal
(Mt 12.22-32; Lc 11.14-23; 12.10)
20Ua'edi Jesús yitaĝa taue di'me 'lachaqa', qampaja'a qaa'le yitaĝa qoyemalegue joca'li ga'me jiyaĝadipi, chayovida'a da'me ja yaqanate't ta'le 'uo ga'me yali'j choqogaa'me lapaĝaguenataqa. 21Ca'li jogaa'me laqaya' jo'ne lanogaĝa'u ñe'me Jesús yayate'n da'me dojo' qama'le yec'adeta qaedi yaue'j joñe'me, qa'a enapega'ajalo: “'Uo da'me lalaĝac.”
22Nach'e ena'ama jogaa'me jo'ne judiopi napaĝaguenoqo'tpi jo'ne chiyoqoda'ña di'me Jerusalén, male enapega'ajalo: “Nach'eñe Beelzebú uetaye joñe'me, chane'eja ñe'me payac lejaliaĝanec yanem da'me lañoqotaĝanaĝac qaedi yamaĝadegue jogaa'me payagodipi.”
23Jesús yiyaĝanalo ca'li, qama'le 'uo ga'me daloqotenaĝana, enaac: “¿Toqoch'e yaqanatet ñe'me payac jo'ne Satanás ta'le yamaĝaye ñe'me nach'e ena'am Satanás? 24Qom ja nalo'ta'ajalo jogaa'me jo'ne dajoya'agueta joga'me laute'upi qama'le ja yaqanate't ta'le nechata'agueta jogaa'me. 25Nataq'aen qom ja nalo'ta'ajalo jogaa'me 'nachaqadiaĝa'u, qama'le gaa'me ja yaqanate't ta'le nach'e eta'ajalo 'uo da'me lemaĝa'j. 26Nach'e naq'aeta joñe'me payac jo'ne Satanás, qom ñijeguem qaedi ma'te ja niyamaĝadenapega't, ja yaqanatet ta'le nach'e eta't dite da'me male yovita da'me loiquiaqa'.
27“Qaya'te yaqanatet ta'le taue ga'me 'lemec ga'me jiyaĝaua jo'ne 'uañaĝaic qaedi yacona ena'uac ga'me jo'ne yauana, qom cha'li ja 'uaeñe da'me yecoñe'; jaldata da'me naq'aeta qama'le yaqanatet ta'le doĝotaĝanec ga'me yauana.
28“Eja ami ja'aĝatema queda'me Dios yapalaĝa't ena'uaque jogaa'me loeco joga'me jiyaĝadipi, nataq'aen ena'uaque gaa'me 'laqataqa jo'ne ja 'noe'n. 29Qalaĝaja gamachaqaega jo'ne ye'uetac joñe'me Dios Lepaqal, qamqa'me ja qoyapalaĝat da'me dojo' loec jo'ne le'uenaĝanaĝac, dite da'me 'uo da'me naviyaqataguec jo'ne ja 'naidena'a.”
30Dojo' nenaĝategue joñe'me Jesús, qa'a ena'uaque jogaa'me enapega'ajalo: “'Uo ga'me uetaye jo'ne payac lepaqal jo'ne ja no'en.”
Jañe'me lat'e ñe'me Jesús nataq'aen lanogaĝa'u yelotedaque joñe'me
(Mt 12.46-50; Lc 8.19-21)
31Qama'le novideta jogaa'me lanogaĝa'u ñe'me Jesús nataq'aen jaga'me lat'e, qalaĝaja p'adegue jogaa'me qama'le ch'e damaĝajoĝode'uo. 32Ga'me jiyaĝadipi jo'ne ñichidiñe t'aqataĝatem joñe'me Jesús:
—Jada'me adat'e nataq'aen daa'me adaqaya' ueteda'a di'me p'aye nataq'aen am yelotedaque.
33Joñe'me Jesús 'yategueta:
—¿Jach'e jagamaĝa yat'e? Nataq'aen ¿jach'e jogamaĝa yataqachiñe yaqaya'?
34Qama'le yajoĝonouelo da'me lec'atenaĝanaĝa'j jogaa'me jo'ne neteda'ñejop jo'ne ñichidiñe, enaac:
—Naajo' jo'ne ñichidiñe mach'e yat'e nataq'aen mach'e yaqaya'olqa. 35Qa'a gamachaqaega ga'me jo'ne yauo'oe daa'me jo'ne loequenataĝanaĝaco 'me yepaquetapegalo joñe'me Dios, naqaega yaqayole, nataq'aen yaqayolec, nataq'aen mach'e yat'e.
Currently Selected:
Mc 3: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina