Mc 4
4
Jesús daloqotenaĝana gaa'me petal jo'ne qoyaañi
(Mt 13.1-23; Lc 8.4-15)
1Jesús yitaĝa dapaĝaguenataĝan ca'li ua'a ga'me lae jaga'me qa'em lat'edai. Yataqachiñe jalcote ga'me jiyaĝadipi jo'ne yema'a't, qama'le Jesús nañgui jaga'me licota jo'ne netañgui ga'me noĝop, qama'le ñichiñe, qalaĝaja ga'me jiyaĝadipi cha'li ueteda'a ga'me lae jaga'me qa'em. 2Chane'eja joñe'me Jesús jalcote ga'me lapaĝaguenataĝanaĝac, qalaĝaja uo'oe gaa'me e'n laloĝoiqui'. Da'me lapaĝaguenataĝanaĝac enaac: 3“Cha'li anaquiaĝañiya da'me dojo': 'uo ca'li ñe'me jiyaĝaua jo'ne ec qaedi danaĝan. 4Ca'li male yijaĝadegue gaa'me nepetal, qama'le uo'oe gaa'me jo'ne tachidi'ña ga'me naq'aec: qama'le novi't ga'me mayodipi, qama'le yali'j gaa'me. 5Nataq'aen 'uo jaga'me peta lae ta'ña ga'me qadijat jo'ne jaleca ga'me aleua: jaga'me peta paja'a najeguem qa'a ja jalcote qaya'ñgui ga'me aleua; 6qalaĝaja nenoĝojeguem jañe'me ajeua qama'le yaviyaĝa't gaa'me nanaqa, nataq'aen en daqaqa qa'a ja jalcote qayada'ñelo gaa'me patadi. 7Nataq'aen 'uo jaga'me peta lae tachi'ñalo gaa'me lolelaĝail jo'ne yaĝat: gaa'me yaĝat nichiquetedajeguem chayovida'a yep'aĝadiñe jogaa'me yataqachiñe nanaqa, qama'le jogaa'me ja yauote jala. 8Qalaĝaja uo'oe gaa'me petal maqachaĝa tachidi'ña ga'me aleua jo'ne onaĝaic: qama'le nach'egaua jo'ne nadijeguem, nataq'aen nolelidijeguem, qama'le jalcote ga'me jalayaĝa'j. Jaga'me laqata jo'ne lepee yaqanatet treinta jaga'me jala jo'ne onole; gaa'me peta laqaya' chiyaqayilo sesenta jaga'me jala; gaa'me laqaya' yaqanate't cien jaga'me jala.”
9Jesús noqotetenegue ga'me 'laqatac: “Ami jo'ne anaquiaĝañiya, ¡'noota qom auomachiiya da'me dojo'!”
10Ca'li male yejamaĝa'yeto jogaa'me doce jo'ne lapaĝaguenataqa, nataq'aen gaa'me laqaya' jo'ne quetedapegue' joñe'me Jesús, qama'le yena't joñe'me, “¿Jach'e ga'me yataqachiñe yelo'teguet da'me adaloqotenaĝanaĝaqui?” 11'Yategueta joñe'me: “Ami yaqaya'olqa, eja Dios ami yayatenaĝanaĝaneque da'me dojo', nataq'aen yatetonaĝanaĝaneque ga'me ja di'yoq mañaĝa jo'ne lejaliaĝa. Jogaa'me jo'ne p'adegue ch'e qoyen tauelo gaa'me naloqotenaĝanaĝaiqui' da'me qo'yaĝatema, 12qaedi:
«Mate mane'e yec'ate'n qalaĝaja ja yauata,
nataq'aen mate mane'e domachita qalaĝaja ja yayate'n,
qaedi ja 'niyelaĝadetot joñe'me Dios
nataq'aen qaedi ja yapalaĝa't jodaa'me loeco.»”
13Nataq'aen enaac joñe'me Jesús: “Qom ja auayachiñe da'me dojo' yaloqotenaĝanaĝaiqui, qama'le ¿teua'atoqo' auayachiñe yema gaa'me yaloqotenaĝanaĝaiqui' laqaya'?
14“Ñe'me jo'ne yijaĝadegue gaa'me nepetal qom danaĝan, nach'e naq'aeta ñe'me jo'ne 'yaĝatetac da'me 'naqataĝanaĝac jo'ne onaĝaic.
15“Uo'oe gaa'me jiyaĝa'u jo'ne ena'ama gaa'me petal jo'ne tadi'ña ga'me naq'aec: jo'ne te'me domachita da'me 'naqataĝanaĝac, qalaĝaja qom yoĝo'yi da'me domachita qama'le novi' ñe'me payac jo'ne Satanás qama'le doĝotaĝanec ga'me jo'ne te'me qodanaĝanouelo naa'me lai'li.
16“Uo'oe gaa'me laqaya' jo'ne ena'ama gaa'me petal jo'ne tauelo ga'me qadijat: domachita da'me 'naqataĝanaĝac qama'le made'tape da'me yacoteguet. 17Qalaĝaja ena'ama gaa'me nanaqa jo'ne ja jalcote qayada'ñelo gaa'me patadi, qama'le ja nach'e eta'ajalo ta'le 'nañaĝatela'ajalo, qo'che' qom uo'oe daa'me necanagueco uotaĝa napiyenagueco, da'me uajouetem da'me dojo' 'naqataĝanaĝac, qama'le paja'a qaya da'me lepe'e'.
18“Uo'oe gaa'me laqaya' jo'ne ena'ama gaa'me petal jo'ne naje'moto jogaa'me yaĝat: domachita da'me dojo' 'naqataĝanaĝac, 19qalaĝaja 'uo da'me lipi'chi' daa'me leuoyaĝaco jena'me aleua, nataq'aen da'me loqovinaĝanaĝac da'me neuoyaĝac, nataq'aen gaa'me nepitaqataĝanaĝaco gamachaqaegaua jo'ne uedapi'ña jena'me aleua. Nach'enaua jo'ne yep'aĝadiñe da'me dojo' 'naqataĝanaĝac, qama'le ja yauote jalayaĝa'j.
20“Qalaĝaja uo'oe gaa'me laqaya' jo'ne ena'ama gaa'me petal jo'ne tadi'ña ga'me aleua jo'ne onaĝaic: domachita da'me dojo' 'naqataĝanaĝac qama'le yataqachiñe yacoteguet, qama'le jalcote yauote jalayaĝa'j, onolqa'tape chiyaqayilo treinta, ga'me laqaya yauana sesenta, ga'me laqaya yauana cien.”
Da'me laloĝoiqui jaga'me coyadaĝanaqate
(Lc 8.16-18)
21Nataq'aen enaac joñe'me Jesús: “¿Qo'li qonedouo jaga'me coyadaĝanaqate qama'te qoyanaue jaga'me lae't jo'ne yedapega't, uotaĝa qoyano'ot ga'me 'nochaĝala'? ¡Ja naq'aeta! Dite da'me qoyanalegue ga'me qayaje'mec jaga'me coyadaĝanaqate, qaedi yema yecoyadelegue. 22Qa'a nach'e naq'aeta da'me dojo', gamachaqaega ga'me jo'ne ja 'yaqalegue, uotaĝa gamachaqaega ga'me jo'ne qoyoĝotetapiñe, nach'ega qoyaloĝon qomle, qama'le di'yoqotelegue. 23Ami jo'ne anaquiaĝañiya, ¡'noota qom auomachiiya da'me dojo'!”
24Nataq'aen enaac: “'Noota qom yataqachiñe aueloi'tegue da'me dojo', qa'a ga'me adapogoqotaĝanaĝaqui jo'ne auapogoqotaĝañiya nale nach'e naq'aeta queda'me Dios ami napogoqoteque, nataq'aen queda'me yaguegue ga'me ami yanema. 25Qa'a ga'me jo'ne 'uo ga'me yauana, Dios 'nouadijelegue ga'me qoyanem, qalaĝaja ga'me jo'ne qaya'te yauana, chayovida'a ga'me jaleca jo'ne te'me yauana, Dios doĝotaĝanec.”
Da'me laloĝoiqui da'me 'netela't jaga'me peta
26Nataq'aen enaac ñe'me Jesús: “Da'me lejaliaĝa joñe'me Dios ena'am da'me dojo': 'uo ga'me jiyaĝaua jo'ne yejenoue jaga'me nepeta jena'me aleua, 27qama'le cha'li ja uenate'ta, nale t'oche nale pi'yaq, nach'e ena'am nale nelotaye nale nolo', jaga'me peta niyamaĝachiñe qama'le nolelijeguem, qama'le ñe'me jiyaĝaua ja yayaten ga'me eeta jo' da'me 'netela't. 28Qa'a mach'ena jena'me aleua, da'me ya'uo jalayaĝac: qo'che' 'uaeñe da'me nolelidijeguem ga'me lolelaĝail jo'ne uedalegue jena'me aleua, ua'edi qama'le 'netela'ajalo gaa'me laqata jo'ne nayelo gaa'me la'uo, ua'edi qama'le yi jaga'me jala jo'ne en nayelo gaa'me laqata. 29Nataq'aen qom male yem jaga'me jala jo'ne nayelo gaa'me laqata qama'le qonaqat da'me yovita ga'me laloqo'.”
Da'me laloĝoiqui jaga'me mostaza jala
(Mt 13.31-32; Lc 13.18-19)
30Nataq'aen enaac ñe'me Jesús: “¡Cha'li anaquiaĝañiya da'me dojo', jo'ne ñaloqotenaĝaneguet da'me lejaliaĝa ñe'me Dios! 31Nach'e naq'aeta jaga'me mostaza jala, queda'me mate mane'e yataqachiñe jaleca, jo'ne ja ena'ama ga'me petalpi jena'me aleua jo'ne qoyaadiñi nale. 32Qalaĝaja nale yem da'me qoyaañi qama'le najeguem, nach'aga nana jo'ne qayaje'mec, napacalo'te ga'me nanaqapi jo'ne uedalegue ga'me nanaĝanaqa', jo'ne ga'me mayodipi yanayelo lepataque'te gaa'me lepeel, qa'a onaĝaic ga'me paqal.”
Da'me lapaĝaguenataĝanaĝac ñe'me Jesús en tauelo laloqotenaĝanaĝaiqui'
(Mt 13.34-35)
33Qama'le naq'aeta da'me dapaĝaguenataĝanec ñe'me Jesús da'me 'naqataĝanaĝac jo'ne onaĝaic. Ch'e en tauelo gaa'me laloqotenaĝanaĝaiqui' jo'ne qayoĝode', ena'ama daa'me daajo', nataq'aen ga'me jiyaĝadipi maqachaĝa yaqanate't ta'le yayate'n. 34Qama'le yema gaa'me 'laqataqa e'n tauelo gaa'me laloqotenaĝanaĝaiqui'; qalaĝaja nale yejamaĝa'to gaa'me lapaĝaguenataqa qama'le yataqachiñe 'yaĝatema gaa'me yelo'tegueta q'aen gaa'me laloqotenaĝanaĝaiqui'.
Jesús en 'nemaĝañe ga'me nauomaĝa
(Mt 8.23-27; Lc 8.22-25)
35Nach'ejo jo'me nolo' ca'li yenoĝonegue, qama'le nadi'ta ga'me pi'yaq, Jesús dojapegue'to gaa'me lapaĝaguenataqa:
—Jajoĝogue di'me lajego.
36Chane'eja queda'ae ga'me jiyaĝadipi, qama'le nedañgui jaga'me licota jo'ne joote netae'ndi qaedi yachi'y joñe'me. Nataq'aen gaa'me nelicota laqaya' jo'ne uaĝayeta. 37Ua'a ca'li novi' ga'me nauomaĝa jo'ne nagoue ga'me layat t'adaic, qama'le gaa'me lepa' ga'me noĝop napacalegue jaga'me nelicota, chane'eja en najaĝaye jaga'me. 38Qalaĝaja Jesús t'ochetac ca'li, ga'me p'ategue jaga'me licota uaqatalegue ga'me nalaĝanaĝat. 'Noqotoĝo'n ca'li joñe'me, qama'le dojedapegue':
—¡Jaliaĝanec! ¿Toqoch'e ja qo'mi 'te adetela'aque queda'me jetaque qo'mi domalidiñe?
39Jesús ñijeguem ca'li qama'le yicochaĝaguet ga'me layat, nataq'aen yicochaq ga'me noĝop let'adaic, enaac:
—¡At'emaĝañe! ¡At'emaqata!
Qama'le ga'me layat 'nemaĝañe ca'li, yataqachiñe nedo'ta't da'me tochiñe. 40Yoĝo'yi da'me dojo' qama'le Jesús enapegalo jogaa'me lapaĝaguenataqa:
—¿Toqoch'e jalcote da'me at'oiyi? ¿Qo'li maliaĝa qaya'te adepi'i?
41Qalaĝaja jogaa'me 'nemaĝadela'ajalo qa'a jalcote da'me loqolanaqa', nataq'aen nenatetapega't:
—¿Jach'e da'me dojo', queda'me chayovida'a ga'me layat nataq'aen ga'me noĝop let'adaic yoqochideta?
Currently Selected:
Mc 4: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina