ᕉᑎᐅᑉ ᐅᓂᒃᑲᐅᓯᓂᖓ 3
3
ᕉᑎᐅᑉ ᐅᐃᒃᓴᖅᑖᕐᖕᓂᖓ
1ᑭᖑᓂᖓᒍᑦ ᓁᐅᒥᐅᑉ ᐅᑯᐊᓂ ᕉᑎ ᐅᖃᐅᑎᕚ, “ᐅᐃᒃᓴᕐᖕᓂᒃ ᕿᓂᖁᕕᖔ ᓇᖕᒥᓂᖅ ᐊᖏᕐᕋᖃᑦᓯᐊᓕᕐᖕᓂᐊᕋᕕᑦ? 2ᖃᐅᔨᒪᓚᐅᕈᒃ ᑖᓐᓇ ᐳᐊᓯ, ᐱᓇᓱᐊᖅᑎᖏᓐᓂ ᐊᕐᖕᓇᓂ ᐱᓇᓱᐊᖃᑕᐅᕕᒋᔧᑦ, ᐅᐃᒋᓚᐅᖅᑕᒃᑯᑦ ᐃᓚᒋᒐᑦᑎᒃᑯᒃ. ᒫᓐᓇ ᐅᓐᓄᒃ ᓂᐊᖂᔭᒃᓴᓂᒃ ᓴᓃᔧᓗᓂ ᐃᕖᔧᓂᐊᕐᖕᒪᑦ ᐃᒫᒃ ᐱᖁᕙᒋᑦ: 3ᐅᕐᕙᒡᓗᑎᑦ ᐱᐅᓴᖅᓗᑎᓪᓗ ᐊᓐᓄᕌᑦᓯᐊᖑᓂᖅᐹᓂᒃ ᐊᑎᓗᑎᑦ ᓂᐊᖂᔭᒃᓴᓂᒃ ᐃᕖᔧᕕᖓᓄᐊᕐᖕᓂᐊᖅᐳᑎᑦ; ᖃᐅᔨᑎᑦᑍᓕᓗᒍ ᑕᕝᕙᓃᓐᓂᕐᖕᓂᒃ ᓂᕆᔭᕇᓚᐅᖏᓐᓂᖓᓂ ᐃᒥᕇᓚᐅᖏᓐᓂᖓᓂᓗ. 4ᓇᒧᑦ ᐃᓂᓪᓚᖕᓂᐊᕐᖕᒪᖔᑦ ᖃᐅᔨᒪᓇᓱᐊᕐᖕᓂᐊᖅᐸᑦ, ᓯᓂᓕᖅᐸᓪᓗ ᑭᓗᖓᓄᑦ ᐃᓐᓇᕐᖕᓂᐊᖅᐳᑎᑦ, ᑕᕝᕙᓃᑎᓪᓗᑎᓪᓗ ᖃᐅᔨᒍᓂᑎᑦ ᖃᓄᖅ ᐱᔭᕆᐊᖃᕐᖕᓂᕐᖕᓂᒃ ᐅᖃᐅᑎᓂᐊᖅᐹᑎᑦ.”
5ᕉᑎᓗ ᑭᐅᕗᖅ, “ᐅᕙᓐᓄᑦ ᐅᖃᐅᓯᕆᔭᓕᒫᑎᑦ ᒪᓕᖕᓂᐊᖅᐸᒃᑲ.”
6ᑕᕝᕙ ᕉᑎ ᐳᐊᓯᐅᑉ ᓂᐊᖂᔭᒃᓴᓂᒃ ᐃᕖᔧᕕᖓᓄᐊᖅᐳᖅ ᓴᑭᒥ ᐅᖃᐅᓯᕆᔭᓕᒫᖏᑦ ᒪᓕᒡᓗᒋᑦ. 7ᐳᐊᓯᓕ ᓂᕆᔭᕇᕋᒥ ᐃᒥᕇᕋᒥᓗ ᖁᕕᐊᓱᑦᓯᐊᓕᖅᐳᖅ, ᓂᐊᖂᔭᒃᓮᓪᓗ ᑲᑎᓯᒪᔪᑦ ᐅᖓᓪᓕᖅᐸᖓᓄᑦ ᐃᓂᓪᓚᒃᐳᖅ, ᑕᕝᕙᓂᓗ ᓯᓂᓕᖅᓗᓂ. ᑕᕝᕙ ᕉᑎ ᑐᓵᔭᐅᑦᑍᓕᒪᓪᓗᓂ ᐳᐊᓯᐅᑉ ᑭᓗᐊᓄᑦ ᐃᓐᓇᖅᐳᖅ. 8ᐳᐊᓯᓕ ᐅᓐᓄᐊᖑᑎᓪᓗᒍ ᐃᖅᑯᒻᒪᖅᐳᖅ, ᐃᖏᓐᓇᒥᓗ ᖁᐊᖅᓵᖅᐳᖅ ᑕᑯᓕᕋᒥ ᐊᕐᖕᓇᒥᒃ ᑭᓗᒥᓃᑦᑐᒥᒃ. 9ᐊᐱᕆᕚᓗ, “ᑭᓇᐅᕖᑦ?”
ᕉᑎᓗ ᓇᓗᖁᑎᓪᓗᓂ ᑭᐅᕗᖅ, “ᕉᑎᐅᕗᖓ ᐅᐃᒋᓚᐅᖅᑕᒃᑯᑦ ᐃᓚᒋᒐᒃᑭᑦ, ᐅᕙᓐᓂᒃ ᐰᕆᒃᓯᒋᐊᖃᕋᕕᑦ, ᐅᐃᒋᓚᐅᖅᑕᕋ ᐱᑦᔪᑎᒋᓪᓗᒍ ᐃᓚᒌᓪᓚᕆᒃᐳᒍᒃ.”
10ᐳᐊᓯ ᐅᖃᖅᐳᖅ, “ᑐᒃᓯᐊᖅᐳᖓ ᐊᑕᓂᕐᖕᒧᑦ ᓮᒻᒪᖅᑕᐅᖁᓪᓗᑎᑦ, ᐃᓚᒌᑦ ᐱᐅᓯᕆᔭᕆᐊᖃᖅᑕᖏᓐᓂᒃ ᐃᒃᐱᒍᓱᑦᓯᐊᕐᖕᓂᕐᖕᓂᒃ ᓴᖅᑭᑎᑦᓯᒋᐊᓪᓚᒃᐳᑎᑦ ᒫᓐᓇ, ᓴᑭᖕᓄᑦ ᐱᓂᐊᕐᖕᓂᕆᓚᐅᖅᑕᕐᖕᓂᑦ, ᐊᖑᒻᒥᒃ ᐅᕕᒃᑲᒥᒃ ᖃᓄᐃᑦᑐᑐᐃᓐᓇᕐᖕᒥᒡᓘᓃᑦ ᐅᐃᑖᕋᓱᐊᖏᓐᓃᑦ ᐱᑦᔪᑎᒋᓪᓗᒍ. 11ᐃᓕᕋᓱᒃᑍᓕᒋᑦ ᕉᑏ, ᑕᒪᓐᓇ ᐃᓚᒌᑦ ᐊᑐᕆᐊᖃᖅᑕᖏᓐᓂᒃ ᑲᔪᓯᔪᒪᓃᑦ ᐱᓇᓱᐊᕐᖕᓂᐊᖅᐸᕋ; ᐃᓅᖃᑎᓕᒫᑦᑎᓐᓂᑦ ᖃᐅᔨᒪᔭᐅᓕᕋᕕᑦ ᐃᓄᑦᓯᐊᕙᐅᓂᕐᖕᓂᒃ. 12#ᕉᑎᐅᑉ 2:20.ᐃᓛᒃ ᓱᓕᔪᑎᑦ ᐅᐃᒋᓚᐅᖅᑕᒃᑯᑦ ᐃᓚᒋᒐᕕᖓ, ᐃᓚᒌᓪᓗ ᐱᐅᓯᕆᔭᕆᐊᖃᖅᑕᖏᑎᒍᑦ ᑲᒪᑦᓯᐊᕆᐊᖃᕋᒪ ᐃᓕᖕᓂᒃ, ᑭᓯᐊᓂ ᐅᐃᒋᓚᐅᖅᑕᒃᑯᑦ ᐃᓚᒋᓂᖅᓴᕐᖕᓂᒃ ᐅᕙᓐᓂᑦ ᑕᒫᓃᑦᑐᖃᕐᖕᒥᖕᒪᑦ. 13ᑕᕝᕙᓃᑐᐃᓐᓇᓕᕆᑦ ᒫᓐᓇ ᐅᓐᓄᒃ, ᐅᓪᓚᒃᑯᑦ ᖃᐅᔨᒋᐊᕐᖕᓂᐊᖅᐳᒍᒃ ᑍᓐᓇ ᐃᓚᒋᓂᖅᓴᕆᔧᑦ ᐅᐃᒋᓚᐅᖅᑕᒃᑯᑦ ᑲᔪᓯᔪᒪᖕᒪᖔᑦ ᐃᓕᖕᓄᑦ, ᑲᔪᓯᓂᐊᑐᐊᖅᐸᑦ ᓈᒻᒪᖕᓂᐊᖅᐳᖅ. ᑭᓯᐊᓂᓕ ᑲᔪᓯᔪᓐᓇᖏᑉᐸᑦ, ᐊᑕᓂᖅ ᐃᓅᖕᒪᑦ, ᓱᓕᑦᓯᐊᖅᓗᖓ ᑲᔪᓯᓂᐊᓪᓚᕆᒃᐳᖓ ᒎᑎᐅᑉ ᒎᑎᓪᓚᕆᑐᐊᖑᔫᑉ ᖃᐅᔨᒪᓂᐊᖅᐸᖓ, ᒫᓐᓇᓕ ᑕᕝᕙᓂ ᓯᓂᑐᐃᓐᓇᓕᕆᑦ ᐅᓪᓚᓐᖑᓚᐅᖏᓐᓂᖓᓂ.”
14ᕉᑎᓕ ᐳᐊᓯᐅᑉ ᑭᓗᐊᓂ ᓯᓂᓚᐅᖅᐳᖅ ᐅᓪᓛᓐᖑᓚᐅᖏᓐᓂᖓᓂ, ᒪᑭᓪᓗᓂᓗ ᓱᓕ ᖃᐅᒻᒪᓚᐅᖅᑎᓐᓇᒍ ᐳᐊᓯᐅᑉ ᖃᐅᔨᔭᐅᖁᓚᐅᖏᒻᒪᒍ ᐃᕖᔧᕕᖕᒥ ᐊᕐᖕᓇᒥᒃ ᓯᓂᒃᑐᖃᓚᐅᕐᖕᒪᖔᑦ. 15ᐅᑎᕐᖕᓂᐊᓕᕐᖕᒪᑦ ᐳᐊᓯᐅᑉ ᐅᖃᐅᑎᕚ, “ᐅᓕᑲᐹᑦ ᐃᓯᕕᓚᐅᕈᒃ ᒪᐅᖓ.” ᐃᓯᕕᒻᒪᒍ ᐳᐊᓯᐅᑉ ᓈᕕᑦᓯᕕᒋᕚ ᓂᐊᖂᔭᒃᓴᒥᒃ 50ᐸᐅᒥᒃ ᐅᖁᒤᓐᓂᖃᐸᓗᒃᑐᒥᒃ, ᐃᑲᔪᖅᓗᒍᓗ ᐃᖅᓲᑦᔨᑎᑉᐹ, ᕉᑎᐅᓪᓗ ᑖᓐᓇ ᐃᖅᓱᒡᓗᒍ ᐊᖏᕐᕋᖅᐳᖅ. 16ᐊᖏᕐᕋᕐᖕᒪᑦ ᓴᑭᖓᑕ ᐊᐱᕆᕚ, “ᑖᓐᓇᐅᕖᑦ ᐸᓂᒐ?”
ᑕᕝᕙ ᕉᑎᐅᑉ ᐅᓂᒃᑲᐅᑎᓕᖅᐹ ᑕᒤᓐᓂᒃ ᐳᐊᓯᐅᑉ ᖃᓄᐃᓕᐅᕐᖕᓂᕆᖅᑲᐅᔭᖓᓂᒃ. 17ᐅᖃᖅᓗᓂᓗ, “ᐳᐊᓯᐅᑉ ᐊᖏᕐᕋᐅᑦᔨᖏᓪᓗᖓ ᐊᖏᕐᕋᑐᐃᓐᓇᖁᖅᑲᐅᖏᒻᒪᖓ, ᑍᒫᒃ ᐊᖏᑎᒋᔪᒥᒃ ᐆᒥᖓ ᓂᐊᖂᔭᒃᓴᒥᒃ ᐊᖏᕐᕋᐅᑦᔨᑎᑉᐹᖓ.”
18ᓁᐅᒥᐅᑉ ᑭᐅᕚ, “ᐅᑕᖅᑭᑐᐃᓐᓇᑲᓚᐅᕆᑦ ᖃᓄᖅ ᐱᔪᒪᓂᐊᕐᖕᒪᖔᑦ, ᓇᓗᓇᓐᖏᓚᖅ ᐳᐊᓯ ᓄᖅᑲᐅᑦᔨᑐᐃᓐᓇᑦᔮᔪᓐᓃᖅᑐᖅ ᐅᓪᓗᒥ ᑕᒪᑐᒥᖓ ᐋᖅᑭᒃᓯᓚᐅᖅᑳᕋᓂ.”
Currently Selected:
ᕉᑎᐅᑉ ᐅᓂᒃᑲᐅᓯᓂᖓ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.