ᒨᓯᓯ ᓯᑕᒪᖏᑦ 3
3
ᐂᕉᓂᐅᑉ ᐃᕐᖕᓂᖏᑦ
1ᐅᑯᐊ ᑕᕝᕙ ᑎᑎᕋᖅᑕᐅᓯᒪᔪᑦ ᐂᕉᓂᐅᑉ ᒨᓯᓯᐅᓪᓗ ᐃᓚᖏᑦ ᐊᑕᓂᖅ ᒨᓯᓯᒧᑦ ᐅᖃᖅᑎᓪᓗᒍ ᖃᖅᑲᒥ ᓮᓁᒥ. 2#ᒨᓯᓯ ᓯᑕᒪᖏᑦ 26:60.ᐅᑯᐊ ᑕᕝᕙ ᐂᕉᓂᐅᑉ ᐃᕐᖕᓂᖏᑕ ᐊᑎᖏᑦ: ᓇᑖᑉ, ᐊᖓᔪᒃᓯᖅᐹᖅ, ᐊᐱᕼᐅ, ᐃᓕᓯᕆ, ᐊᒻᒪᓗ ᐃᑕᒫᕐ. 3ᑖᒃᑯᐊ ᑕᕝᕙ ᐂᕉᓂᐅᑉ ᐃᕐᖕᓂᖏᑦ, ᐅᖅᓱᖅᑎᖅᑕᐅᓪᓗᑎᒃ ᑐᓂᕐᕈᓯᖅᑎᑦᓯᔨᓐᖑᓚᐅᖅᑐᑦ, ᐱᔨᑦᓯᖅᑐᒃᓴᐅᓪᓗᑎᒃ ᑐᓂᕐᕈᓯᖅᑎᑦᓯᔨᓐᖑᓚᐅᖅᑐᑦ. 4#ᒨᓯᓯ ᐱᖓᔪᖏᑦ 10:1,2; ᒨᓯᓯ ᓯᑕᒪᖏᑦ 26:61.ᓇᑖᑉ ᐊᐱᕼᐅᓗ ᐊᑕᓂᐅᑉ ᓵᖓᓂ ᑐᖁᓚᐅᖅᐴᒃ ᐊᑕᓂᕐᖕᒧᑦ ᑐᓂᕐᕈᓯᓚᐅᕐᖕᒪᑎᒃ ᐃᑯᐊᓚᔪᒃᓴᒥᒃ ᐱᖁᔭᐅᓯᒪᓇᑎᒃ ᓮᓁᑉ ᐃᓄᖃᖏᑦᑐᖓᓂ; ᑖᒃᑯᐊᒃ ᕿᑐᕐᖓᖃᓚᐅᓐᖏᓚᒃ. ᐃᓕᓯᕆᓕ ᐃᑕᒫᕐᓗ ᑐᓂᕐᕈᓯᖅᑎᑦᓯᔨᐅᓂᕐᖕᒥᒃ ᐱᔨᑦᓯᓚᐅᖅᐳᒃ ᐊᑖᑕᑎᒃ ᐂᕉᓂ ᐃᓚᒋᓪᓗᒍ.
ᓕᕔᑎᑦ ᐱᔨᑦᓯᕐᖕᓂᖓᑦ ᑐᐱᕐᔪᐊᒥ
5ᐊᑕᓂᖅ ᐅᖃᓚᐅᖅᐳᖅ ᒨᓯᓯᒧᑦ, ᐅᖃᖅᓗᓂ, 6“ᓕᕔᑎᑦ ᑭᖑᕚᖏᑦ ᐅᕙᓐᓄᑦ ᖃᓂᒡᓕᑎᒃᑭᑦ, ᕾᑎᓪᓗᒋᓪᓗ ᐂᕉᓂᒧᑦ ᑐᓂᕐᕈᓯᖅᑎᑦᓯᔨᒧᑦ, ᑖᑦᓱᒥᖓ ᐱᔨᑦᓯᖁᓪᓗᒋᑦ. 7ᑖᒃᑯᐊ ᑖᑦᓱᒪ ᐱᔭᕆᐊᖃᖅᑕᖏᓐᓂᒃ ᑲᒪᔨᐅᓂᐊᕐᖕᒪᑕ, ᐃᓄᒋᐊᒃᑐᕐᔪᐊᓪᓗ ᑐᒃᓯᐊᕆᐊᖅᐸᒃᑐᑦ ᐱᔭᕆᐊᖃᖅᑕᓕᒫᖏᓐᓂᒃ ᑲᒪᔨᐅᓂᐊᕐᖕᒪᑕ, ᑐᐱᕐᔪᐊᒥ ᐱᔭᕆᐊᖃᖅᑐᓕᒫᓂᒃ ᐱᓕᕆᔨᐅᓂᐊᖅᐳᑦ. 8ᑐᐱᕐᔪᐊᓪᓗ ᑲᑎᒪᕕᐅᑉ ᐃᓗᓕᓕᒫᖏᓐᓂᒃ ᑲᒪᔨᐅᓂᐊᕐᖕᒪᑕ, ᐃᓴᕆᐊᓕᐅᓪᓗ ᕿᑐᕐᖓᖏᑕ ᐱᔭᕆᐊᖃᖅᑕᓕᒫᖏᓐᓂᒃ, ᐱᓕᕆᐊᖃᖅᓗᑎᒃ ᑐᐱᕐᔪᐊᒥ ᑲᑎᒪᕕᖕᒥ ᐱᔭᕆᐊᖃᖅᑐᓂᒃ ᑕᒤᓐᓂᒃ. 9ᐃᕝᕕᓪᓗ ᓕᕔᑎᑦ ᑐᓂᔭᕆᐊᖃᖅᐸᑎᑦ ᐂᕉᓂᒧᑦ ᐃᕐᖕᓂᖏᓐᓄᓪᓗ; ᑖᒃᑯᐊ ᓱᓇᒥᑦᓯᐊᖅᓗᒋᑦ ᑐᓂᔭᐅᖕᒪᑕ ᑖᑦᓱᒧᖓ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ. 10ᑍᒤᒻᒪᑦ ᑎᓕᓕᑭᑦ ᐂᕉᓂᓗ ᐃᕐᖕᓂᖏᓪᓗ, ᑐᓂᕐᕈᓯᖅᑎᐅᓂᕐᖕᒥᒃ ᐱᔭᒃᓴᖃᕐᖕᓂᐊᕐᖕᒪᑕ; ᑕᒫᓐᖓᑐᐃᓐᓇᕐᓕ ᐱᓗᓂ ᑖᒃᑯᓄᖓ ᖃᒡᓕᔪᖅ ᑐᖁᑕᐅᔭᕆᐊᖃᖅᐳᖅ.”
11ᐊᒻᒪ ᐊᑕᓂᖅ ᒨᓯᓯᒧᑦ ᐅᖃᖅᐳᖅ, ᐅᖃᖅᓗᓂ, 12#ᒨᓯᓯ ᐂᑉᐸᖏᑦ 13:2.“ᑕᑯᒋᑦ, ᐅᕙᖓ ᓇᖕᒥᓂᖅ ᓕᕔᑎᑦ ᓂᕈᐊᓚᐅᖅᐸᒃᑲ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᐃᕐᖕᓂᐊᖑᖅᑳᖅᑐᑦ ᐊᖑᑎᑦ ᐱᓐᖏᖔᖅᓗᒋᑦ, ᐃᒡᓕᐊᕐᖕᒥᑦ ᐊᓂᖅᑳᖅᑐᑦ ᐃᓴᕆᐊᓕᒥᐅᓂᑦ. ᑍᒤᒻᒪᑦ ᓕᕔᑎᑦ ᐱᒋᓂᐊᖅᐸᒃᑲ, 13ᐃᕐᖕᓂᐊᖑᔪᑦ ᓯᕗᓪᓕᖅᐹᒥᒃ ᐱᒋᒐᒃᑭᑦ. ᑍᑦᓱᒪᓂ ᓇᓪᓕᐅᑦᑐᒥ ᐃᕐᖕᓂᐊᖑᖅᑳᖅᑐᑦ ᑐᖁᑎᓚᐅᕋᒃᑭᑦ ᓄᓇᒥ ᐄᑦᔨᑉᑎᒥ, ᐅᕙᓐᓂᒃ ᐃᑦᔪᕐᖕᓁᑎᑉᐳᖓ ᐃᓴᕆᐊᓕᓂ ᐃᕐᖕᓂᐊᖑᖅᑳᖅᑐᓄᑦ, ᐃᓄᖕᓄᓪᓗ ᓂᕐᔪᑎᓄᓪᓗ. ᑖᒃᑯᐊ ᐱᒋᓂᐊᖅᐸᒃᑲ: ᐅᕙᖓ ᐊᑕᓂᐅᒐᒪ.”
ᓕᕔᑎᑦ ᓈᓴᖅᑕᐅᓂᖏᑦ
14ᐊᒻᒪ ᐊᑕᓂᖅ ᐅᖃᓚᐅᖅᐳᖅ ᒨᓯᓯᒧᑦ ᓮᓁᒥ ᐃᓄᖃᔪᐃᑦᑐᒥ, ᐅᖃᖅᓗᓂ, 15“ᓕᕔᑎᑦ ᕿᑐᕐᖓᖏᑦ ᓈᓴᒃᑭᑦ ᐃᓚᒌᑦ ᒪᓕᒡᓗᒋᑦ ᓯᕗᓕᕕᓂᖏᑕ ᐃᓚᒌᖕᓂᒋᑦ ᒪᓕᒡᓗᒋᑦ, ᐊᖑᑎᓕᒫᑦ ᓈᓴᖅᓗᒋᑦ ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒋᑦ ᐊᖓᔪᒃᓰᓪᓗ.” 16ᑕᕝᕙ ᒨᓯᓯᐅᑉ ᓈᓴᓚᐅᖅᐰᑦ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ, ᑍᒫᒃ ᐱᖁᔭᐅᓚᐅᕋᒥ. 17ᐅᑯᐊ ᑕᕝᕙ ᓕᕔᑎᑦ ᐃᕐᖕᓂᕆᓚᐅᖅᑕᖏᑕ ᐊᑎᖏᑦ, ᒌᕐᓲᓂ, ᑯᕼᐋᑦ, ᒥᕋᕆᓗ. 18ᐅᑯᐊᓗ ᑕᕝᕙ ᒌᕐᓲᓂᐅᑉ ᐃᕐᖕᓂᖏᑕ ᐊᑎᖏᑦ ᐱᓚᒌᑦ ᒪᓕᒡᓗᒋᑦ: ᓕᑉᓂ, ᓯᒥᐂᓗ. 19ᑯᕼᐋᑎᐅᓪᓗ ᐃᕐᖕᓂᖏᑦ ᐃᓚᒌᑦ ᒪᓕᒡᓗᒋᑦ: ᐊᒪᕌᒻ, ᐃᔾᕼᐊᕆ, ᕼᐃᐸᕋᓐ, ᐊᑦᔧᐅᓕᓗ. 20ᒥᕋᕆᐅᓪᓗ ᐃᕐᖕᓂᖏᑦ ᐃᓚᒌᑦ ᒪᓕᒡᓗᒋᑦ: ᒪᕼᐊᓔ, ᒧᓮᓗ. ᑖᒃᑯᐊ ᑕᕝᕙ ᓕᕔᑎᑦ ᑭᖑᕚᖏᑕ ᓯᕗᓕᕕᓂᖏᑦ.
21ᒌᕐᓲᓂᐅᑉ ᐃᓚᖏᓐᓂᑦ ᐱᔪᑦ ᓕᑉᓁᑎᐅᕗᑦ ᓯᒥᐂᑎᐅᓪᓗᑎᒡᓗ; ᑖᒃᑯᐊ ᑕᕝᕙ ᒌᕐᓲᓂᐅᑉ ᑭᖑᕚᖏᑦ. 22ᓈᓴᖅᑕᐅᓚᐅᖅᐳᑦ ᐊᖑᑎᓕᒫᑦ, ᐊᑕᐅᓯᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, ᓈᓴᖅᑕᐅᔪᓪᓗ 7,500ᓂᒃ ᐅᓄᕐᖕᓂᖃᓚᐅᖅᐳᑦ. 23ᐃᓚᒌᑦ ᒌᕐᓲᓁᑎᑦ ᑕᖕᒫᕐᕕᖃᓚᐅᖅᐳᑦ ᑐᐱᕐᔪᐊᑉ ᑲᑎᒪᕕᐅᑉ ᑐᓄᐊᓂ ᓯᕿᓂᐅᑉ ᓂᐱᕕᐊᑕ ᓇᓛᓂ. 24ᓯᕗᓕᖅᑎᐅᓚᐅᖅᑐᖅ ᒌᕐᓲᓂᐅᑉ ᑭᖑᕚᖏᓐᓄᑦ ᐊᑎᖃᓚᐅᖅᐳᖅ ᐃᓔᐊᓴᐱ ᓔᓕᐅᑉ ᐃᕐᖕᓂᖓ. 25ᒌᕐᓲᓂᐅᑉ ᕿᑐᕐᖓᖏᑕ ᐱᔭᒃᓴᖏᑦ ᑐᐱᕐᔪᐊᒥ ᐃᓚᖏᑦ ᐃᒤᑦᑑᓚᐅᖅᐳᑦ, ᑐᐱᕐᔪᐊᖅ, ᐅᓕᖓᓗ, ᑖᓗᑕᕐᔪᐊᕐᓗ ᐃᑎᖅᑕᕐᕕᒃ ᑐᐱᕐᔪᐊᑉ ᑲᑎᒪᕕᐅᑉ ᐃᑎᖅᑕᕐᕕᖓ, 26ᑐᖅᓲᖓᑕᓗ ᐃᑎᖅᑕᕐᕕᖓᑕ ᑖᓗᑕᕐᔪᐊᖓ, ᑐᖅᓲᖕᓂᓗ ᓂᕕᖓᔪᑦ ᑐᐱᕐᔪᐊᑉ ᐊᕙᓗᐊᓂᒃ ᓈᔨᓯᒪᔪᑦ ᑐᓂᕐᕈᓯᕐᕕᐅᓪᓗ ᐊᕙᓗᐊᓂ, ᐃᐱᐅᑕᖏᓪᓗ, ᑖᒃᑯᓄᖓᓗ ᑐᕌᖅᑐᓕᒫᑦ.
27ᑯᕼᐋᑎᐅᑉ ᐃᓚᒌᖏᓐᓂᑦ ᐱᔪᑦ ᐃᓚᒌᑦ ᑍᔭᐅᓚᐅᖅᐳᑦ ᐊᒪᕋᒤᑎᓂᒃ, ᐃᓚᖏᓪᓗ ᐃᔾᕼᐊᕅᑎᓂᒃ, ᐃᓚᖏᓪᓗ ᕼᐃᐸᕋᓁᑎᓂᒃ, ᐃᓚᖏᓪᓗ ᐊᑦᔧᐅᓔᑎᓂᒃ; ᑖᒃᑯᐊ ᑕᕝᕙ ᐃᓚᒌᑦ ᑯᕼᐊᑍᑎᑦ. 28ᑖᒃᑯᓇᓂ ᐊᖑᑎᑦ ᐅᓄᕐᖕᓂᖏᑦ ᒪᓕᒡᓗᒋᑦ, ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, 8,600ᓂᒃ ᐅᓄᕐᖕᓂᖃᓚᐅᖅᐳᑦ ᐃᑦᔪᕐᖕᓁᑦᑐᕕᖕᒥᒃ ᑲᒪᔨᐅᔪᑦ. 29ᑭᖑᕚᖑᖃᑎᒌᑦ ᑯᕼᐋᑎᐅᑉ ᕿᑐᕐᖓᖏᑦ ᑕᖕᒫᕐᕕᖃᓚᐅᖅᐳᑦ ᑐᐱᕐᔪᐊᑉ ᓂᒋᖓᓂ. 30ᓯᕗᓕᖅᑎᐅᔪᖅ ᓯᕗᓕᕕᓂᕐᖕᒥ ᑯᕼᐋᑎᐅᑉ ᑭᖑᕚᖏᓐᓄᑦ ᐃᓔ-ᓴᐸᓇ ᐊᑦᔧᐅᓕᐅᑉ ᐃᕐᖕᓂᖓ. 31ᑖᒃᑯᐊ ᐱᔭᒃᓴᖏᑕ ᐃᓚᖏᑦ ᐃᒃᓯᕐᕕᒃ ᐊᖏᕈᑎᑕᓕᒃ ᑲᒪᒋᓗᒍ, ᐊᒻᒪᓗ ᓵ, ᓇᓂᕈᐊᓪᓗ ᐃᓂᖓ, ᑐᓂᕐᕈᓯᕐᕖᓪᓗ, ᑐᓂᕐᕈᓯᖅᑎᑦᓯᔨᐅᓪᓗ ᐱᓕᕆᑦᔪᑎᖏᓐᓂᒃ ᐃᑦᔪᕐᖕᓁᑦᑐᕕᖕᒦᑎᓪᓗᒍ, ᑕᓗᕐᔪᐊᕐᓗ ᐃᑦᔪᕐᖕᓁᑦᑐᕕᒧᑦ ᑖᓗᑕᖅ, ᐱᔭᒃᓮᓪᓗ ᑕᒪᑐᒧᖓ ᑐᕌᖓᔪᓕᒫᑦ.
32ᐃᓕᓯᕆ ᐂᕉᓂᐅᑉ ᑐᓂᕐᕈᓯᖅᑎᑦᓯᔨᐅᑉ ᐃᕐᖕᓂᖓ ᐊᖓᔪᖅᑳᖑᔭᕆᐊᖃᖅᐳᖅ ᓕᕔᑎᑦ ᓯᕗᓕᖅᑎᖏᓐᓄᑦ, ᐊᖓᔪᖅᑳᖑᓗᓂᓗ ᐃᑦᔪᕐᖕᓁᑦᑐᕕᖕᒥ ᐱᓇᓱᐊᒐᖃᖅᑐᓄᑦ.
33ᐃᓚᒌᓂᑦ ᒪᕼᐊᓔᑎᓂᑦ ᒥᕋᕆᒃᑯᑦ ᐃᓚᒌᑦ ᐱᓯᒪᕗᑦ, ᐃᓚᒌᓪᓗ ᒧᓮᑎᑦ; ᑖᒃᑯᐊ ᒥᕋᐅᕆᒃᑯᑦ ᐃᓚᒌᖏᑦ. 34ᑖᒃᑯᓇᓂ ᐊᖑᑎᑦ ᐅᓄᕐᖕᓂᖏᑦ ᒪᓕᒡᓗᒋᑦ, ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, 6,200ᓂᒃ ᐅᓄᕐᖕᓂᖃᓚᐅᖅᐳᑦ. 35ᓯᕗᓕᖅᑎᐅᔪᖅ ᓯᕗᓕᕕᓂᕐᖕᒥ ᒥᕋᕆᐅᑉ ᑭᖑᕚᖏᓐᓄᑦ ᔪᕅᓕ ᐊᐱᕼᐂᓕᐅᑉ ᐃᕐᖕᓂᖓ. ᑖᒃᑯᐊ ᑕᖕᒫᕐᕕᖃᕆᐊᖃᓚᐅᖅᐳᖅ ᑐᐱᕐᔪᐊᑉ ᐅᐊᖕᓇᖓᓂ. 36ᑎᓕᔭᐅᑦᔪᑎᒋᓯᒪᔭᖏᑦ ᒥᕋᕆᐅᑉ ᕿᑐᕐᖓᖏᑕ ᑐᐱᕐᔪᐊᑉ ᖃᓇᖏᓐᓂᒃ ᑲᒪᔨᐅᓗᑎᒃ, ᓴᐅᓂᖏᓐᓂᒡᓗ, ᓇᑉᐸᖅᑯᑎᖏᓐᓂᒡᓗ, ᖃᓇᓕᕐᕕᖏᓐᓂᒡᓗ, ᐋᖅᑭᒃᓱᐃᑦᔪᑎᖏᓐᓂᒡᓗ, ᐊᓯᖏᓐᓂᒡᓗ ᑖᒃᑯᓄᖓ ᑐᕌᖓᔪᓕᒫᓂᒃ. 37ᑐᖅᓲᖓᑕᓗ ᓇᑉᐸᖅᑯᑎᓕᒫᖏᓐᓂᒃ, ᓇᑉᐸᖅᑯᓯᕐᕕᖏᓐᓂᒡᓗ, ᐸᐅᒍᐊᖏᓐᓂᒡᓗ, ᓄᖃᕈᑎᖏᓐᓂᒡᓗ.
38ᐅᑯᐊᓗ ᑕᖕᒫᖅᓯᒪᔭᕆᐊᖃᖅᐳᑦ ᑐᐱᕐᔪᐊᑉ ᑲᑎᒪᕕᐅᑉ ᓵᖓᓂ ᑲᓇᖕᓇᖓᓂ, ᒨᓯᓯᓗ ᐂᕉᓂᓗ ᐃᕐᖕᓂᖏᓪᓗ, ᐃᑦᔪᕐᖕᓁᑦᑐᕕᖕᒥᒃ ᑲᒪᔨᐅᓗᑎᒃ, ᐃᓴᕆᐊᓕᒥᐅᓪᓗ ᐱᔭᕆᐊᖃᖅᑕᓕᒫᖏᓐᓂᒃ ᐱᓇᓱᐊᖅᓗᑎᒃ; ᑖᒃᑯᓄᖓᓕ ᐃᓚᐅᖏᓪᓗᓂ ᖃᒡᓕᓗᐊᖅᑐᖅ ᑐᖁᑕᒃᓴᐅᕗᖅ. 39ᓕᕔᑎᓪᓕ ᑭᖑᕚᖏᓐᓂ ᒨᓯᓯᐅᑉ ᐂᕉᓂᐅᓪᓗ ᓈᓴᖅᑕᖏᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, ᐃᓚᒌᑦ ᐊᕕᒃᑐᖅᓯᒪᓂᖏᑎᒍᑦ ᐊᖑᑎᑦ ᐅᓄᕐᖕᓂᖏᑦ ᒪᓕᒡᓗᒋᑦ, ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, 22,000ᓂᒃ ᐅᓄᕐᖕᓂᖃᓚᐅᖅᐳᑦ.
ᓕᕔᑎᑦ ᓂᕈᐊᖅᑕᐅᓂᖏᑦ ᐃᕐᖕᓂᐊᖑᖅᑳᖅᑐᑦ ᐱᔭᐅᓐᖏᖔᖅᓗᑎᒃ
40ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᖅᐳᖅ: “ᓈᓴᒃᑭᑦ ᓯᕗᓪᓕᖅᐹᒥᒃ ᐊᖑᑎᑦ ᐃᕐᖕᓂᐊᖑᖅᑳᖅᓯᒪᔪᓕᒫᑦ ᐃᓴᕆᐊᓕᒥᐅᓂ, ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, ᐊᑎᖏᓪᓗ ᐅᓄᕐᖕᓂᖏᓪᓗ ᒪᓕᒡᓗᒋᑦ. 41ᓕᕔᑎᓪᓕ ᐅᕙᖓ ᐱᑦᔪᑎᒋᓗᖓ ᐱᓕᒃᑭᑦ, ᐅᕙᖓ ᐊᑕᓂᐅᒐᒪ, ᐃᓴᕆᐊᓕᒥᐅᓂ ᐃᕐᖕᓂᐊᖑᖅᑳᖅᑐᓕᒫᑦ ᐱᓐᖏᖔᖅᓗᒋᖅ, ᓕᕔᑎᓪᓗ ᐆᒪᔪᖁᑎᖏᑦ, ᐃᓴᕆᐊᓕᒥᐅᓪᓗ ᐆᒪᔪᖁᑎᖏᓐᓂ ᐃᕐᖕᓂᐊᖑᖅᑳᖅᑐᑦ ᐱᓐᖏᖔᖅᓗᒋᑦ.” 42ᑍᒤᒻᒪᑦ ᒨᓯᓯᐅᑉ ᐃᕐᖕᓂᐊᖑᖅᑳᖅᑐᓕᒫᑦ ᐃᓴᕆᐊᓕᓂ ᓈᓴᖅᐰᑦ, ᐊᑕᓂᐅᑉ ᑍᒫᒃ ᐱᖁᓚᐅᕐᖕᒪᒍ. 43ᐊᑕᐅᓯᕐᖕᒥᒃ ᑕᖅᑭᖃᖅᑐᓂᑦ ᐱᒋᐊᖅᓗᒍ ᐊᖓᔪᒃᓰᓪᓗ, ᑖᒃᑯᐊᓕᒫᑦ ᓈᓴᖅᓗᒋᑦ ᐅᓄᕐᖕᓂᖏᑦ 22,273ᓂᒃ ᐅᓄᕐᖕᓂᖃᓚᐅᖅᐳᑦ.
44ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕆᕗᖅ: 45“ᓕᕔᑎᑦ ᓂᕈᐊᒃᑭᑦ ᐃᓴᕆᐊᓕᒥᐅᓂ ᐃᕐᖕᓂᐊᖑᖅᑳᖅᑐᓕᒫᑦ ᐱᓐᖏᖔᖅᓗᒋᑦ, ᓕᕔᑎᓪᓗ ᐆᒪᔪᖁᑎᖏᑦ ᐱᓗᒋᑦ ᑍᒃᑯᐊ ᐆᒪᔪᖁᑎᖏᑦ ᐱᓐᖏᖔᖅᓗᒋᑦ. ᓕᕔᑎᑦ ᐱᒋᓂᐊᕋᒃᑭᑦ: ᐅᕙᖓ ᐊᑕᓂᐅᒐᒪ. 46ᓂᐅᕕᐊᕆᔭᕆᐊᖃᖅᐸᑎᑦ ᐃᓴᕆᐊᓕᒥᐅᓂ ᐃᕐᖕᓂᐊᖑᖅᑳᖅᑐᑦ 273 ᐅᓄᓗᐊᕈᑎᔪᑦ ᓕᕔᑎᓂᑦ ᐅᓄᕐᖕᓂᖅᓴᐅᑦᔪᑎᖏᑦ, 47ᓄᐊᑦᓯᔭᕆᐊᖃᖅᐳᑎᑦ ᑕᓪᓕᒪᓂᒃ ᓴᑯᔅᓂᒃ ᓯᐅᓪᕕᕆᓂᒃ ᑖᒃᑯᐊ ᐃᓄᐃᑦ ᐊᑐᓂᑦ ᐊᑭᖏᓐᓂᒃ; ᐃᑦᔪᕐᖕᓁᑦᑐᕕᐅᑉ ᑮᓇᐅᔭᖏᑕ ᐅᖁᒤᓐᓂᖏᑦ ᒪᓕᒡᓗᒋᑦ, 48ᑮᓇᐅᔧᑦ ᓯᐅᓪᕕᕇᑦ ᑐᓂᓗᒋᑦ ᐂᕉᓂᒧᑦ ᐃᕐᖕᓂᖏᓐᓄᓪᓗ ᐊᑭᓕᐅᑎᔪᑦ ᐃᕐᖕᓂᐊᖑᖅᑳᖅᑐᑦ ᐅᓄᓗᐊᕈᑎᖏᓐᓄᑦ.” 49ᑕᕝᕙ ᒨᓯᓯᐅᑉ ᑮᓇᐅᔧᑦ ᓂᐅᕕᐅᑕᐅᔪᑦ ᑎᒍᕔᑦ ᐅᓄᓗᐊᕈᑎᔪᓂᑦ ᓕᕔᑎᓂᑦ ᐊᑭᓕᐅᑕᐅᔪᑦ. 50ᐃᓴᕆᐊᓕᒥᐅᑦ ᐃᕐᖕᓂᐊᖑᖅᑳᖅᑐᖁᑎᖏᓐᓂᑦ ᑮᓇᐅᔧᑦ ᐱᓪᓗᒋᑦ, 1,365ᓂᒃ ᓴᑯᔅᓂᒃ ᓯᐅᓪᕕᕆᓂᒃ ᐅᓄᕐᖕᓂᖃᖅᐳᑦ, ᐃᑦᔪᕐᖕᓁᑦᑐᕕᐅᑉ ᑮᓇᐅᔭᑯᑎᖏᑕ ᐋᖅᑭᓯᒪᖁᔭᐅᓂᖏᑦ ᒪᓕᒡᓗᒋᑦ. 51ᒨᓯᓯᐅᓪᓗ ᓂᐅᕕᐅᑕᐅᔪᑦ ᑮᓇᐅᔧᑦ ᑐᓂᕔᑦ ᐂᕉᓂᒧᑦ ᐃᕐᖕᓂᖏᓐᓄᓪᓗ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᖕᒪᒍ.
Currently Selected:
ᒨᓯᓯ ᓯᑕᒪᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.