ᒨᓯᓯ ᓯᑕᒪᖏᑦ 2
2
ᑭᖑᕚᖑᖃᑎᒌᑦ ᓯᕗᓕᖅᑎᓪᓗ ᐅᓇᑕᖅᑐᓴᐅᖃᑎᒌᑦ
1ᐊᑕᓂᕐᓗ ᐅᖃᖅᐳᖅ ᒨᓯᓯᒧᑦ ᐂᕉᓂᒧᓪᓗ, ᐅᖃᖅᓗᓂ, 2“ᐃᓴᕆᐊᓕᒥᐅᑦ ᐃᓂᒋᔭᒥᖕᓂ ᑕᖕᒫᖅᓯᒪᔭᕆᐊᖃᖅᐳᑦ, ᑭᖑᕚᖑᖃᑎᒌᑦ ᓇᓗᓁᒃᑯᑕᖓᑕ ᖃᓂᒋᔭᖓᓂ; ᑐᐱᕐᔫᑉ ᑲᑎᒪᕕᐅᑉ ᐅᖓᓯᒋᔭᖓᓂ, ᑐᐱᕐᖕᒧᑦ ᓵᓐᖓᓪᓗᑎᒃ. 3ᓯᕿᓂᐅᑉ ᓄᐃᕕᐊᑕ ᓇᓛᓂ, ᔫᑕᐅᑉ ᑭᖑᕚᖏᑦ ᐅᓇᑕᖅᑐᒃᓴᖁᑎᑎᒃ ᐃᓂᖏᑦ ᒪᓕᒡᓗᒋᑦ; ᓈᓲᓂ ᐊᒥᓇᑕᐱᐅᑉ ᐃᕐᖕᓂᖓ ᔫᑕᐅᑉ ᑭᖑᕚᖏᓐᓂ ᐊᖓᔪᖅᑳᖑᔪᒃᓴᐅᕗᖅ. 4ᐅᓇᑕᖅᑐᒃᓴᖁᑎᖏᓪᓗ 74,600ᓂᒃ ᐅᓄᕐᖕᓂᖃᖅᐳᑦ.
5“ᑖᒃᑯᐊ ᖃᓂᒋᔭᖓᓂ ᑕᖕᒫᕐᕕᖃᕆᐊᖃᖅᐳᑦ ᐃᓴᑳᕆᐅᑉ ᑭᖑᕚᖏᑦ, ᓂᑖᓂᐅᓪ ᔪᐊᕆᐅᑉ ᐃᕐᖕᓂᖓ ᐃᓴᑳᕆᐅᑉ ᑭᖑᕚᖏᓐᓂ ᐊᖓᔪᖅᑳᖑᔪᒃᓴᐅᕗᖅ. 6ᐅᓇᑕᖅᑐᒃᓴᖁᑎᖏᓪᓗ 54,400ᓂᒃ ᐅᓄᕐᖕᓂᖃᖅᐳᑦ.
7“ᑖᒃᑯᐊ ᑲᓂᒋᔭᖓᓂ ᓯᐳᓗᓂᐅᑉ ᑭᖑᕚᖏᑦ, ᐃᓔᐊᑉᓗ ᕼᐃᓘᓂᐅᑉ ᐃᕐᖕᓂᖓ ᓯᐳᓘᓂᐅᑉ ᑭᖑᕚᖏᓐᓄᑦ ᐊᖓᔪᖅᑳᖑᔭᕆᐊᖃᖅᐳᖅ. 8ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 57,400ᓂᒃ ᐅᓄᕐᖕᓂᖃᖅᐳᑦ. 9ᓈᓴᖅᑕᐅᔪᓕᒫᑦ ᐅᓇᑕᖅᑐᒃᓴᐅᖃᑎᒌᑦ ᒪᓕᒡᓗᒋᑦ ᔫᑕᐅᑉ ᑭᖑᕚᖏᑕ ᑕᖕᒫᖅᓯᒪᕕᖓᑦᑕ ᑲᑎᓐᖓᔭᖏᑦ, 186,400ᐅᓚᐅᖅᐳ. ᐸᕐᖕᓇᓕᕌᖓᑕᓗ ᑖᒃᑯᐊ ᓯᕗᓪᓕᖅᐸᐅᓗᑎᒃ ᐸᕐᖕᓇᒋᐊᖃᖅᐳᑦ.
10“ᓯᕿᓂᐅᑉ ᓇᓛᓂ ᑕᖕᒫᓯᒪᕕᖃᕐᖕᒥᓗᓂ ᐅᓇᑕᖅᑐᒃᓴᓂᒃ ᕉᐱᓂᐅᑉ ᑭᖑᕚᖏᓐᓂᑦ ᐅᓇᑕᖅᑐᒃᓴᐅᖃᑎᒌᓂᒃ, ᕉᐱᓂᐅᑉ ᑭᖑᕚᖏᓐᓄᑦ ᓯᕗᓕᖅᑎᐅᓗᓂ ᐃᓕᓱᕆ ᓯᑎᐅᕆᐅᑉ ᐃᕐᖕᓂᖓ. 11ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 46,500ᓂᒃ ᐅᓄᕐᖕᓂᖃᓚᐅᖅᐳᑦ.
12“ᑖᒃᑯᐊ ᖃᓂᒋᔭᖓᓂ ᓯᒥᐅᓂᐅᑉ ᑭᖑᕚᖏᑦ ᑕᖕᒫᕐᕕᖃᖅᓗᑎᒃ, ᓯᕗᓕᖅᑎᐅᓗᓂᓗ ᓯᒥᐅᓂᐅᑉ ᑭᖑᕚᖏᓐᓄᖅ ᓯᓘᒥᐅᓕ ᔪᕆᓴᑍᑉ ᐃᕐᖕᓂᖓ. 13ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 59,300ᓂᒃ ᐅᓄᕐᖕᓂᖃᖅᐳᑦ.
14“ᑕᖕᒫᖅᓯᒪᖃᑎᖃᖅᓗᑎᒃ, ᒑᑎᐅᑉ ᑭᖑᕚᖏᓐᓂᒃ, ᓯᕗᓕᖅᑎᐅᓗᓂᓗ ᒑᑎᐅᑉ ᑭᖑᕚᖏᓐᓄᖅ ᐃᓔᐊᓴᐱ ᕆᐅᓕᐅᑉ ᐃᕐᖕᓂᖓ. 15ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 45,650ᓂᒃ ᐅᓄᕐᖕᓂᖃᖅᐳᑦ. 16ᓈᓴᖅᑕᐅᔪᓕᒫᑦ ᐅᓇᑕᖅᑐᒃᓴᐅᖃᑎᒌᑦ ᒪᓕᒡᓗᒋᑦ ᕉᐱᓂᐅᑉ ᑭᖑᕚᖏᑕ ᑕᖕᒫᖅᓯᒪᕕᖓᑦᑕ ᑲᑎᓐᖓᔭᖏᑦ, 151,450ᐅᓚᐅᖅᐳᑦ. ᐸᕐᖕᓇᓕᕌᖓᑕᓗ ᑖᒃᑯᐊ ᓯᕗᓪᓕᖅᐹᑦ ᑭᖑᓂᑦᓯᐊᖓᓂ ᐸᕐᖕᓇᒋᐊᖃᖅᐳᑦ.
17“ᑐᐱᕐᔪᐊᕐᓕ ᑲᑎᒪᕕᒃ ᓕᕔᑎᓪᓗ ᐊᑯᓪᓕᖅᐸᐅᓗᑎᒃ ᑕᖕᒫᖅᓯᒪᕝᕕᖕᒥᖕᓂᑦ ᐃᖏᕐᕋᖃᑦᑕᕐᖕᓂᐊᖅᐳᑦ ᐃᓂᒋᔭᒥᓃᓪᓗᑎᒃ ᑍᒫᒃ ᑕᖕᒫᖅᐸᒃᓗᑎᒃ, ᐊᑐᓂᑦ ᐃᓂᒋᔭᕆᐊᖃᖅᑕᒥᖕᓃᓪᓗᑎᒃ.
18“ᓯᕿᓂᐅᑉ ᓂᐱᕕᐊᑕ ᓇᓛᓃ ᑕᖕᒫᖅᓯᒪᕕᖃᕐᖕᒥᓗᓂ ᐅᓇᑕᖅᑐᒃᓴᓂᒃ ᐃᕗᕅᒥᐅᑉ ᑭᖑᕚᖏᓐᓂᑦ ᐅᓇᑕᖅᑐᒃᓴᐅᖃᑎᒌᓂᒃ, ᐃᕗᕅᒥᐅᑉ ᑭᖑᕚᖏᓐᓄᑦ ᓯᕗᓕᖅᑎᐅᓗᓂ ᐃᓔᓴᒪ ᐊᒥᕼᐆᑎᐅᑉ ᐃᕐᖕᓂᖓ. 19ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 40,500ᓂᒃ ᐅᓄᕐᖕᓂᖃᖅᐳᑦ.
20“ᑖᒃᑯᐊ ᖃᓂᒋᔭᖓᓂ ᒫᓇᓯᐅᑉ ᑭᖑᕚᖏᑦ ᑕᖕᒫᕐᕕᖃᖅᓗᑎᒃ, ᓯᕗᓕᖅᑎᐅᓗᓂᓗ ᒫᓇᓯᐅᑉ ᑭᖑᕚᖏᓐᓄᖅ ᒐᒤᓕ ᐱᑕᔪᕆᐅᑉ ᐃᕐᖕᓂᖓ. 21ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 32,200ᓂᒃ ᐅᓄᕐᖕᓂᖃᖅᐳᑦ.
22“ᑖᒃᑯᐊ ᖃᓂᒋᔭᖓᓂ ᐱᓐᔭᒥᓂᐅᑉ ᑭᖑᕚᖏᑦ ᑕᖕᒫᕐᕕᖃᖅᓗᑎᒃ, ᓯᕗᓕᖅᑎᐅᓗᓂᓗ ᐱᓐᔭᒥᓂᐅᑉ ᑭᖑᕚᖏᓐᓄᖅ ᐊᐱᑖᓂ ᒋᑎᐅᓂᐅᑉ ᐃᕐᖕᓂᖓ. 23ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 35,400ᓂᒃ ᐅᓄᕐᖕᓂᖃᖅᐳᑦ. 24ᓈᓴᖅᑕᐅᔪᓕᒫᑦ ᐅᓇᑕᖅᑐᒃᓴᐅᖃᑎᒌᑦ ᒪᓕᒡᓗᒋᑦ ᐃᕗᕅᒥᐅᑉ ᑭᖑᕚᖏᑕ ᑕᖕᒫᖅᓯᒪᕕᖓᑦᑕ ᑲᑎᓐᖓᔭᖏᑦ, 108,100ᐅᓚᐅᖅᐳᑦ. ᐸᕐᖕᓇᓕᕌᖓᑕᓗ ᑖᒃᑯᐊ ᐱᖓᔪᒋᔭᐅᓗᑎᒃ ᐸᕐᖕᓇᒋᐊᖃᖅᐳᑦ.
25“ᓯᕿᓂᐅᑉ ᑕᕐᕋᖓᑕ ᓇᓛᓃ ᑕᖕᒫᓯᒪᕕᖃᕐᖕᒥᓗᓂ ᐅᓇᑕᖅᑐᒃᓴᓂᒃ ᑖᓐ ᑭᖑᕚᖏᓐᓂᑦ ᐅᓇᑕᖅᑐᒃᓴᐅᖃᑎᒌᓂᒃ, ᑖᓐ ᑭᖑᕚᖏᓐᓄᑦ ᓯᕗᓕᖅᑎᐅᓗᓂ ᐊᕼᐂᓱᕆ ᐊᒥᓴᑍᑉ ᐃᕐᖕᓂᖓ. 26ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 62,700ᓂᒃ ᐅᓄᕐᖕᓂᖃᖅᐳᑦ.
27“ᑖᒃᑯᐊ ᖃᓂᒋᔭᖓᓂ ᐋᓱᕆᐅᑉ ᑭᖑᕚᖏᑦ ᑕᖕᒫᕐᕕᖃᖅᓗᑎᒃ, ᓯᕗᓕᖅᑎᐅᓗᓂᓗ ᐋᓱᕆᐅᑉ ᑭᖑᕚᖏᓐᓄᖅ ᐸᒊᓕ ᐆᑯᕌᓂᐅᑉ ᐃᕐᖕᓂᖓ. 28ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 41,500ᓂᒃ ᐅᓄᕐᖕᓂᖃᖅᐳᑦ.
29“ᑖᒃᑯᐊ ᖃᓂᒋᔭᖓᓂ ᓈᑉᑕᓕᐅᑉ ᑭᖑᕚᖏᑦ ᑕᖕᒫᕐᕕᖃᖅᓗᑎᒃ, ᓯᕗᓕᖅᑎᐅᓗᓂᓗ ᓈᑉᑕᓕᐅᑉ ᑭᖑᕚᖏᓐᓄᑦ ᐊᕼᐂᕋ ᐃᓈᓂᐅᑉ ᐃᕐᖕᓂᖓ. 30ᐅᓇᑕᖅᑐᒃᓴᖁᑎᖏᑕᓗ ᓈᓴᖅᑕᐅᓂᖓᒍᑦ 53,400ᓂᒃ ᐅᓄᕐᖕᓂᖃᖅᐳᑦ. 31ᓈᓴᖅᑕᐅᔪᓕᒫᑦ ᐅᓇᑕᖅᑐᒃᓴᐅᖃᑎᒌᑦ ᒪᓕᒡᓗᒋᑦ ᑖᓐ ᑭᖑᕚᖏᑕ ᑕᖕᒫᖅᓯᒪᕕᖓᑦᑕ ᑲᑎᓐᖓᔭᖏᑦ, 157,600ᐅᓚᐅᖅᐳᑦ. ᐸᕐᖕᓇᓕᕌᖓᑕᓗ ᑖᒃᑯᐊ ᑭᖑᓪᓕᖅᐹᖑᓗᑎᒃ ᐸᕐᖕᓇᒋᐊᖃᖅᐳᑦ.”
32ᑖᒃᑯᐊ ᑕᕝᕙ ᐃᓴᕆᐊᓕᒥᐅᑦ, ᓈᓴᖅᑕᐅᓚᐅᖅᑐᑦ ᐃᓚᒌᑦ ᒪᓕᒡᓗᒋᑦ. ᑕᖕᒫᖅᓯᒪᕕᖕᒦᑦᑐᓕᒫᑦ, ᐊᕕᒃᑐᖅᓯᒪᓂᖏᑦ ᒪᓕᒡᓗᒋᑦ, 603,550ᓂᒃ ᑲᑎᓪᓗᒋᑦ ᐅᓄᕐᖕᓂᖃᓚᐅᖅᐳᑦ. 33ᓕᕔᑎᓪᓕ ᓈᓴᖃᓯᐅᑎᔭᐅᓚᐅᓐᖏᓚᑦ ᐃᓴᕆᐊᓕᓄᑦ, ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᖕᒪᒍ.
34ᑍᒫᒃ ᑕᕝᕙ ᐃᓴᕆᐊᓕᐅᑉ ᕿᑐᕐᖓᖏᑦ ᐱᓚᐅᖅᐳᑦ ᐊᑕᓂᐅᑉ ᒨᓯᓯᒥᒃ ᐱᖁᔨᓂᖓ ᒪᓕᒡᓗᒍ; ᑕᖕᒫᕐᕕᖃᓚᐅᖅᐳᓪᓗ ᐃᓂᒋᔭᕆᐊᖃᖅᑕᒥᖕᓂ ᑍᒫᒃᓗ ᐸᕐᖕᓇᓕᕌᖓᒥᒃ ᐱᕙᓚᐅᖅᐳᑦ, ᐃᓚᒌᑦ ᒪᓕᒡᓗᒋᑦ, ᓯᕗᓕᕕᓂᕐᖕᒥᓗ ᐃᓚᖃᕐᖕᓂᖏᑦ ᒪᓕᒡᓗᒋᑦ.
Currently Selected:
ᒨᓯᓯ ᓯᑕᒪᖏᑦ 2: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.