ᒫᑯᓯᐅᑉ ᐊᒡᓚᖏᑦ 15
15
ᔩᓱᓯᐅᑉ ᓵᓐᖓᔭᐅᓂᖓ ᐰᓛᑑᓯᐅᑉ ᓵᖓᓂ
ᒫᑎᐅᓯ 27:1-2,11-14; ᓘᑲᓯ 23:1-5; ᔪᐊᓇᓯ 18:28-38
1ᐅᓪᓛᖑᓕᕐᒪᑦ, ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᑲᑎᒪᖃᑎᖃᓕᖅᐳᑦ ᔫᑎᑦ ᐊᖓᔪᖅᑳᖏᓐᓂᒃ ᐱᖁᔭᓂᒡᓗ ᐃᓕᓮᔨᓂᒃ, ᐃᖅᑲᖅᑐᐃᔨᓕᒫᓂᒡᓗ. ᔩᓱᓯ ᕿᓚᒃᓱᖅᐹᑦ, ᐊᐅᓪᓚᕈᑎᓪᓗᒍ, ᐰᓛᑑᓯᒧᑦ ᐂᑦᑑᑎᒋᕚᑦ. 2ᐰᓛᑑᓯᐅᑉ ᔩᓱᓯ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᖅᐳᑎᑦ.”
3ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑕ ᔩᓱᓯ ᐸᓯᓇᓱᐊᖅᐹᑦ ᓱᓇᑐᐃᓐᓇᕐᖕᓄᑦ ᐊᑦᔨᒌᖏᑦᑐᓄᑦ. 4ᐰᓛᑑᓯᐅᑉ ᑕᕝᕙ ᐊᐱᕆᒃᑲᓐᓂᖅᐹ, “ᑭᐅᑦᔪᑎᒃᓴᖃᓐᖏᓚᑏᑦ ᖃᓄᑐᐃᓐᓇᖅ ᐊᒥᓱᓂᒃ ᐸᓯᔭᐅᓇᓱᖕᓂᕐᓄᑦ?”
5ᔩᓱᓯ ᓱᓕ ᑭᐅᓐᖏᓚᖅ, ᑕᕝᕙ ᐰᓛᑑᓯ ᐊᖏᔪᒥᒃ ᑲᒪᓂᐊᖅᐳᖅ.
ᔩᓱᓯᐅᑉ ᑐᖁᑕᒃᓴᓐᖑᖅᑎᑕᐅᓂᖓ
ᒫᑎᐅᓯ 27:15-26; ᓘᑲᓯ 23:13-25; ᔪᐊᓇᓯ 18:39—19:16
6ᖄᖏᖅᑕᐅᕕᒃ ᓇᓪᓕᐅᑎᔭᕌᖓᑦ, ᐰᓛᑑᓯ ᐱᐅᓯᖃᖅᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᕙᒡᓗᓂ, ᐃᓄᐃᑦ ᐊᓂᑎᑕᐅᑯᔭᖓᓐᓂᒃ. 7ᑍᑦᓱᒪᓂ ᑎᒍᔭᐅᓯᒪᔪᖃᓚᐅᖅᐳᖅ ᐸᕋᐹᓯᒥᒃ ᐊᑎᓕᖕᒥᒃ ᑖᓐᓇ ᑎᒍᔭᐅᓚᐅᖅᑐᖅ ᐃᓄᖕᒥᒃ ᑐᖁᑦᓯᓚᐅᕐᖕᒪᑦ ᐱᔮᕆᓪᓗᑎᒃ ᐱᕋᔭᒃᑐᐊᓘᑎᓪᓗᒋᑦ. 8ᐃᓄᒐᓴᒡᔪᐊᓪᓕ ᐰᓛᑑᓯᒧᐊᕐᓗᑎᒃ ᐊᐱᕆᓚᐅᖅᐳᑦ ᐱᔪᒪᔭᒥᖕᓂᒃ ᐱᐅᓯᕆᓲᖓᓂᒃ ᐊᑐᖅᑎᑕᐅᔪᒪᓪᓗᑎᒃ. 9ᑕᕝᕙ ᐰᓛᑑᓯᐅᑉ ᐅᖃᐅᑎᕔᑦ, “ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᐊᐅᓪᓚᖅᑎᑦᓯᖁᕕᓯᓐᖔ?” 10ᖃᐅᔨᒪᑦᓯᐊᕋᓗᐊᕐᓗᓂ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᐰᓛᑑᓯᒧᐊᕈᑦᔨᓚᐅᕐᖕᒪᑕ ᔩᓱᓯᒥᒃ ᓵᓐᖓᔭᑑᔪᒪᓂᕐᖕᒧᑦ.
11ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᐃᓄᒐᓴᒡᔪᐊᓂᒃ ᐃᓱᒻᒥᖅᑐᐃᓚᐅᖅᐳᑦ ᐸᕋᐹᓯᒥᒃ ᐱᔪᒪᖔᖁᓪᓗᒋᑦ ᑖᓐᓇ ᐊᓂᑎᑕᐅᖔᖁᓪᓗᒍ. 12ᐰᓛᑑᓯ ᐃᓄᖕᓄᑦ ᐅᖃᒃᑲᓐᓂᕆᕗᖅ, “ᖃᓄᕐᓕ ᐅᕙᓐᓄᑦ ᐱᓂᐊᕐᕕᐅᖁᕕᓯᐅᒃ ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᑍᔭᓯ?”
13ᐃᓄᐃᑦ ᕾᒐᓛᕐᓕᖅᐳᑦ, “ᑭᑭᐊᒃᑐᖅᑕᐅᓕ!”
14ᐰᓛᑑᓯᐅᑉ ᐊᐱᕆᕔᑦ, “ᓱᖕᒪᑦ, ᖃᓄᖅ ᐱᐅᖏᑦᑐᒥᒃ ᐱᓯᒪᖕᒪᑦ?”
ᐃᓄᐃᑦ ᓂᐱᖅᑯᖅᑐᓯᒋᐊᒃᑲᓐᓂᕐᓗᑎᒃ ᕾᒐᓛᓕᖅᐳᑦ, “ᑭᑭᐊᒃᑐᖅᑕᐅᓕ!”
15ᐰᓛᑑᓯ, ᐃᓄᒐᓴᒡᔪᐊᓂᒃ ᓈᒻᒪᒋᔭᐅᔪᒪᒐᒥ, ᐸᕋᐹᓯ ᐊᓂᑎᑉᐹ ᑎᒍᔭᐅᓯᒪᕕᖕᒥᑦ; ᔩᓱᓯ ᑏᒐᖅᑐᖅᑕᐅᖁᓚᐅᕐᓗᒍ, ᐂᑦᑑᑎᒋᕚ ᑭᑭᐊᒃᑐᖅᑕᐅᖁᓪᓗᒍ.
ᐅᓇᑕᖅᑐᒃᓮᑦ ᔩᓱᓯ ᒥᑕᐅᑎᒋᕚᑦ
ᒫᑎᐅᓯ 27:27-31; ᔪᐊᓇᓯ 19:2-3
16ᑕᕝᕙ ᐅᓇᑕᖅᑐᒃᓮᑦ ᔩᓱᓯ ᐊᐅᓚᑦᓯᔨᐅᑉ ᐃᒡᓗᕐᔪᐊᖓᑕ ᐊᓃᕐᕕᖓᓄᐊᕈᑎᕚᑦ, ᐅᓇᑕᖅᑐᒃᓴᓕᒫᓪᓗ ᐃᓚᒋᔭᑎᒃ ᑕᕝᕗᖓ ᕾᖁᕔᑦ. 17ᔩᓱᓯ ᐅᓕᒡᔪᐊᒥᒃ ᐊᐅᐸᓪᓚᕆᒃᑐᒥᒃ ᐊᑎᑎᑉᐹᑦ; ᓂᐊᖂᑎᒃᓴᖓᓂᒡᓗ ᑲᑭᓪᓚᐅᑎᓕᖕᓂᒃ ᐱᕐᕅᕗᑦ, ᔩᓱᓯᐅᑉ ᓂᐊᖁᐊᓄᑦ ᐃᓕᕚᑦ. 18ᓂᓪᓕᐅᑎᖃᑦᑕᓕᖅᐹᑦ: “ᓂᖅᑐᖅᑕᐅᓕ ᔫᑎᑦ ᐊᖓᔪᖅᑳᕐᔪᐊᖓᑦ!”
19ᓂᐊᖁᐊᒍᑦ ᕿᔪᖕᒧᑦ ᓱᓪᓗᓕᖕᒧᑦ ᐊᓇᐅᖃᑦᑕᐹᑦ, ᑎᕝᕗᓗᒃᓗᒍ, ᓵᖓᓄᑦ ᓰᖅᑯᖅᐳᑦ, ᐅᑯᕕᒋᓪᓗᒍ. 20ᒥᑕᐅᑎᒋᔭᕇᕋᒥᑦᔪᒃ, ᐅᓕᒡᔪᐊᖅ ᐊᐅᐸᓪᓚᕆᒃᑐᖅ ᐲᖅᐹᑦ ᐊᓐᓄᕌᖏᓐᓂᒃ ᓇᖕᒥᓂᖏᓐᓂᒃ ᐊᑎᑎᒃᑭᕚᑦ. ᑕᓯᐅᖅᐹᑦ ᑕᕝᕙᓐᖓᑦ ᑭᑭᐊᒃᑐᕆᐊᖅᑐᓕᕐᓗᒍ.
ᔩᓱᓯᐅᑉ ᑭᑭᐊᒃᑐᖅᑕᐅᓂᖓ
ᒫᑎᐅᓯ 27:32-44; ᓘᑲᓯ 23:26-43; ᔪᐊᓇᓯ 19:17-27
21 #
ᕉᒪᒥᐅᓄᑦ 16:13. ᐊᖅᑯᑖᓂ ᑲᑎᓯᕗᑦ, ᓄᓇᓕᖕᓄᑦ ᑎᑭᓕᖅᑐᒥᒃ, ᐅᓇᑕᖅᑐᒃᓮᓪᓗ ᐃᓱᒪᓯᐅᖏᑦᓯᐊᕐᓗᒍ ᐊᒡᔭᖅᓯᑎᑉᐹᑦ ᔩᓱᓯᐅᑉ ᓴᓐᓂᖓᔪᓕᒃᓴᖓᓂᒃ; ᑖᓐᓇ ᓮᒨᓂᒥᒃ ᐊᑎᖃᖅᐳᖅ ᓮᕆᓂᒥᐅᑕᖅ, ᐊᓕᒃᓵᓐᑕᕆᐅᑉ ᕉᐸᓯᐅᓪᓗ ᐊᑖᑕᖓ. 22ᔩᓱᓯ ᖃᖅᑲᒧᐊᕈᑎᕚᑦ ᒎᓪᒑᑕᒧᑦ, ᑖᑦᓱᒪ ᖃᖅᑲᐅᑉ ᐊᑎᖓ ᑐᑭᓕᒃ, “ᓂᐊᖁᕕᓂᖅ.” 23ᑕᕝᕙᓂ ᐃᒥᖅᑎᑕᐅᓇᓱᐊᖅᐳᖅ ᐅᐂᓂᒥᒃ ᐃᓚᖃᖅᑐᒥᒃ ᒨᕋᒥᒃ;#15:23 ᒨᕋ ᑐᑭᓕᒃ ᐋᓐᓂᐊᓗᐊᕇᒃᑯᑎᒥᒃ ᐃᓚᓕᒃ ᔩᓱᓯᐅᓪᓕ ᐃᒥᕈᒪᓐᖏᓛ. 24#ᐃᓐᖏᕈᑦ 22:18.ᑭᑭᐊᒃᑐᕇᕋᒥᑦᔪᒃ, ᐊᓐᓄᕌᖏᑦ, ᓇᓚᐅᓵᕈᑎᒧᑦ ᐱᓐᖑᐊᕈᑎᒋᓪᓗᒋᑦ ᐱᑖᖅᑐᒐᕆᕔᑦ. 25ᐅᓪᓛᑯᑦ 9ᒧᐊᖅᑎᓪᓗᒍ, ᔩᓱᓯ ᑭᑭᐊᒃᑐᖅᑕᐅᓚᐅᖅᐳᖅ. 26ᐸᓯᒃᓯᕈᑎᒥᖕᓂᒃ ᓇᓗᓁᖅᓯᓇᓱᐊᕐᓗᑎᒃ ᑎᑎᕋᖅᓯᒪᔪᖃᓚᐅᖅᐳᖅ ᐃᒫᒃ: “ᔫᑎᑦ ᐊᖓᔪᖅᑳᕐᔪᐊᖓᑦ.” 27#ᐂᓮᐊᓯ 53:12.ᐅᓇᑕᖅᑐᒃᓮᑦ ᑭᑭᐊᒃᑐᐃᓚᐅᕆᕗᑦ ᐊᖑᑏᖕᓂᒃ ᒪᕐᕉᖕᓂᒃ ᐱᕋᔮᖕᓂᒃ, ᐂᑉᐹ ᑕᓕᖅᐱᐊᓄᑦ ᐂᑉᐹᓗ ᓴᐅᒥᐊᓄᑦ. [ 28ᑍᒤᓕᐅᖅᑎᓪᓗᒋᑦ ᒎᑎᐅᑉ ᐅᖃᐅᓯᖏᑦ ᓇᓚᐅᑦᓯᓚᐅᖅᐳᑦ ᐃᒤᓕᔪᑦ, “ᐱᐅᖏᑦᑐᓕᔪᓄᑦ ᐃᓚᓕᐅᑦᔭᐅᕗᖅ.”]#15:28 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ. ᑕᑯᓗᒍ ᓘᑲᓯ 22:27
29 #
ᐃᓐᖏᕈᑦ 22:7; 109:25;
ᒫᑯᓯ 14:58; ᔪᐊᓇᓯ 2:19. ᐃᓄᐃᑦ ᓴᓐᓂᖓᔪᓕᐅᑉ ᓴᓂᐊᒎᖅᑐᑦ, ᓂᐊᖁᕐᖕᒥᖕᓂᒃ ᐃᓕᕿᑕᒫᕐᓗᑎᒃ ᐅᖃᖅᐳᑦ, “ᑕᑯᒋᑦ! ᑐᒃᓯᐊᕐᕕᒡᔪᐊᕐᖕᒥᒃ ᓯᖁᒥᑦᓯᓂᐊᓚᐅᖅᑐᑎᑦ ᓴᓇᖕᒥᓗᒍ ᐅᓪᓗᓂᒃ ᐱᖓᓱᓂᒃ, 30ᐊᑏ ᐃᓕᖕᓂᒃ ᐱᐅᓕᓕᕆᑦ, ᓴᓐᓂᖓᔪᓕᖕᒥᑦ ᐊᖅᑲᕐᓗᑎᑦ!”
31ᑐᓂᕐᕈᓯᖅᑎᑦᓯᔩᑦᑕᐅᖅ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᔩᓱᓯᒥᒃ ᒥᑕᐅᑎᖃᕆᕗᑦ ᐃᒻᒥᖕᓄᑦ ᐅᖃᖃᑕᐅᑎᓪᓗᑎᒃ, “ᐊᓯᒥᓂᒃ ᐱᐅᓕᒃᓯᓚᐅᖅᐳᖅ; ᐃᒻᒥᓂᒡᓕ ᐱᐅᓕᔪᓐᓇᓐᖏᓚᖅ. 32ᐊᑏ ᒥᓮᐊ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ, ᒫᓐᓇ ᓴᓐᓂᖓᔪᓕᖕᒥᑦ ᐊᖅᑲᕐᓕ, ᑕᑯᓗᑕ ᐅᒃᐱᓕᕐᖕᓂᐊᕋᑦᑕ.” ᑭᑭᐊᒃᑐᖅᑕᐅᖃᑎᒋᓯᒪᔭᖏᒃᑕᑦᑕᐅᖅ ᔩᓱᓯ ᒥᑕᐅᑎᒋᒋᕚᒃ.
ᔩᓱᓯᐅᑉ ᑐᖁᓂᖓ
ᒫᑎᐅᓯ 27:45-56; ᓘᑲᓯ 23:44-49; ᔪᐊᓇᓯ 19:28-30
33ᐅᓪᓗᖅ ᕿᑎᕋᓕᖅᑎᓪᓗᒍ, ᓄᓇᓕᒫᖅ ᑖᖅᑐᕐᔪᐊᕐᖕᒧᑦ ᑎᑭᑕᐅᓚᐅᖅᐳᖅ ᐃᑲᕐᕋᑦ ᐱᖓᓱᑦ ᓈᓪᓗᒋᑦ. 34#ᐃᓐᖏᕈᑦ 22:1.ᓯᕿᓐᖑᔭᖅ 3ᒧᐊᖅᑎᓪᓗᒍ ᔩᓱᓯ ᓂᐱᖁᖅᑐᓪᓗᓂ ᕾᒐᓛᖅᐳᖅ, “ᐃᓗ-ᐃ, ᐃᓗ-ᐃ, ᓛᒪ ᓴᐸᖅ-ᑖᓃ?” ᐃᒫᒃ ᑐᑭᓕᒃ, “ᒎᑎᒐ, ᒎᑎᒐ, ᓲᖅ ᕿᒪᒃᐱᖔ?”
35ᐃᓄᐃᑦ ᐃᓚᖏᑦ ᑕᕝᕙᓃᑦᑐᑦ ᑐᓴᕋᒥᑦᔪᒃ ᐅᖃᖅᐳᑦ, “ᑕᑯᒋᑦ, ᐃᓔᑦᔭᒥᒃ ᕾᖁᔨᓕᖅᐳᖅ.” 36#ᐃᓐᖏᕈᑦ 69:21.ᐃᓚᖓᑦ ᑕᕝᕙᓃᑦᑐᖅ ᐅᓪᓚᒃᓯᕗᖅ, ᔩᓱᓯᐅᑉ ᓵᖓᓄᐊᕐᓗᓂ ᐳᕙᐅᔭᕐᖕᒥᒃ ᐅᐂᓂᒥᒃ ᐃᑦᓴᒃᑎᖅᓯᒪᔪᒥᒃ ᑎᒍᓯᕗᖅ, ᕿᔪᑯᑖᒧᑦ ᓱᓪᓗᓕᖕᒧᑦ ᐃᓕᓪᓗᓂᐅᒃ ᔩᓱᓯᐅᑉ ᖃᓂᖓᓄᐊᖅᐹ ᐅᖃᕐᓗᓂ, “ᐊᑏ, ᑕᑯᓐᓇᓕᖅᑕ ᐃᓔᑦᔭ ᕾᓂᐊᕐᖕᒪᖔᑦ ᑖᑦᓱᒥᖓ ᐊᖅᑲᖅᑎᑦᓯᒋᐊᖅᑐᕐᓗᓂ.”
37ᔩᓱᓯ ᓂᐱᖅᑯᖅᑐᓪᓗᓂ ᓂᓪᓕᖅᐳᖅ, ᐊᓂᕐᖕᓇᖏᕐᓗᓂ.
38 #
ᒨᓯᓯ ᐂᑉᐸᖏᑦ 26:31-33. ᑐᒃᓯᐊᕐᕕᒡᔪᐊᕐᖕᒦᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ, ᖁᓛᓂᑦ ᐊᑖᓄᑦ ᑎᑭᓪᓗᒍ. 39ᐅᓇᑕᖅᑐᒃᓮᑦ ᐊᖓᔪᖅᑳᖓᑦ ᓴᓐᓂᖓᔪᓕᐅᑉ ᓵᖓᓂ ᓇᖏᖅᑐᖅ, ᑕᑯᒐᒥ ᔩᓱᓯᐅᑉ ᑐᖁᓕᕐᓗᓂ#15:39 ᑐᖁᓕᕐᓗᓂ, ᐃᓚᖏᓐᓂᑦ ᐊᒡᓚᑐᖃᕐᖕᓂ ᐅᖃᖅᓯᒪᔪᖅ “ᓂᐱᖅᑯᖅᑐᓪᓗᓂ ᓂᓪᓕᕐᓗᓂ ᐊᓂᕐᖕᓇᖏᖅᐳᖅ.” ᖃᓄᐃᓐᓂᖓᓂᒃ. ᐅᖃᖅᐳᖅ, “ᓱᓕᔪᒥᒃ ᐊᖑᑦ ᑖᓐᓇ ᒎᑎᐅᑉ ᐃᕐᖕᓂᕆᕚ!”
40 #
ᓘᑲᓯ 8:2,3. ᐊᕐᖕᓁᑦ ᑕᕝᕙᓃᓚᐅᕆᕗᑦ ᓴᓐᓂᖓᔪᓕᐅᑉ ᐅᖓᓯᒋᔭᖓᓂ ᑕᑯᓐᓈᖅᑐᑦ, ᐅᑯᐊ, ᒥᐊᕆ ᒫᒃᑕᓖᓂ, ᒥᐊᕆ ᔧᒥᓯᐅᑉ ᓄᑲᖅᓯᐅᑉ ᔫᓯᐅᓪᓗ ᐊᓈᓇᖓ, ᓴᓗᒥᓗ. 41ᑖᒃᑯᐊ ᔩᓱᓯᒥᒃ ᒪᓕᓚᐅᖅᑐᑦ ᒐᓕᓕᐊᒦᑎᓪᓗᒍ ᓱᓕ ᐱᔨᑦᓯᕋᖅᐸᒡᓗᒍ; ᐊᕐᖕᓁᓪᓗ ᐊᓯᖏᑦ ᐊᒥᓱᑦ ᔩᓱᓯᒥᒃ ᒪᓕᓚᐅᕐᖕᒥᔪᑦ ᔨᕉᓴᓕᒻᒧᐊᖅᑎᓪᓗᒍ ᑕᕝᕙᓃᓚᐅᕆᕗᑦ.
ᔩᓱᓯᐅᑉ ᐃᓗᕕᖅᑕᐅᓂᖓ
ᒫᑎᐅᓯ 27:57-61; ᓘᑲᓯ 23:50-56; ᔪᐊᓇᓯ 19:38-42
42ᐅᓐᓄᓕᖅᑎᓪᓗᒍ ᐅᓪᓗᖅ ᑖᓐᓇ ᐅᐸᓗᖕᒊᔭᕐᕕᐅᖕᒪᑦ, ᖃᐅᒃᐸᑦ ᓴᐸᑎᐅᓂᐊᓕᕐᖕᒪᑦ, 43ᔫᓯᐱ ᐊᕆᒪᑎᐊᒥᐅᖅ ᑎᑭᑉᐳᖅ, ᑖᓐᓇ ᐱᔪᓐᓇᑦᓯᐊᕐᖕᓂᖓᓄᑦ ᐅᐱᒋᔭᐅᑦᓯᐊᖅᑐᖅ ᐃᓚᒋᔭᐅᔪᖅ ᐃᖅᑲᖅᑐᐃᔨᐅᕙᒃᑐᓄᑦ, ᑖᓐᓇ ᓂᕆᐅᖕᓂᖃᕆᕗᖅ ᒎᑎᐅᑉ ᐊᑕᓂᐅᕕᖓᓂᒃ, ᑖᓐᓇ ᓯᕘᕋᓇᓂ ᐰᓛᑑᓯᒧᐊᓚᐅᖅᐳᖅ, ᕿᓄᕕᒋᓪᓗᒍ ᔩᓱᓯᐅᑉ ᑎᒥᖓᓂᒃ. 44ᐰᓛᑑᓯ ᑐᓴᕋᒥ ᔩᓱᓯᐅᑉ ᑐᖁᔭᕇᕐᖕᓂᖓᓂᒃ ᖁᐊᖅᓵᖅᐳᖅ; ᐅᓇᑕᖅᑐᒃᓮᑦ ᐊᖓᔪᖅᑳᖓᓐᓂᒃ ᕾᖁᔨᓪᓗᓂ ᐊᐱᕆᓪᓗᒍ, ᔩᓱᓯ ᑐᖁᔭᕇᕐᖕᒪᖔᑦ. 45ᐅᓇᑕᖅᑐᒃᓮᑦ ᐊᖓᔪᖅᑳᖓᑦᑕ ᐅᖃᐅᓯᕆᔭᖏᓐᓂᒃ ᑐᓴᕋᒥ ᑐᖁᓂᕋᕐᖕᒪᒍ, ᐰᓛᑑᓯᐅᑉ ᔩᓱᓯᐅᑉ ᑎᒥᖓ ᔫᓯᐱᒧᑦ ᐱᔭᐅᖁᓕᖅᐹ. 46ᔫᓯᐱ ᖃᓪᓗᓈᖅᑕᒥᒃ ᐃᒻᒧᑎᒃᓴᒥᒃ ᓇᒃᓴᕋᒥ, ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᖅᑎᓪᓗᒍ ᐃᒻᒧᓯᖅᐹ, ᐃᓗᕕᒃᓴᒧᐊᕐᓗᒍ ᑖᓐᓇ ᐃᓗᕕᒃᓴ ᕾᖅᑐᑯᑦ ᐃᓗᓕᐅᖅᑕᐅᓯᒪᔪᖅ; ᐃᓗᕕᐅᑉ ᐹᖓ ᐅᔭᕋᒡᔪᐊᕐᖕᒥᒃ ᐊᒃᓴᑳᑎᑦᓯᓪᓗᓂ ᒪᑐᕚ. 47ᒥᐊᕆ ᒫᒃᑕᓖᓂᓕ, ᒥᐊᕆᓗ ᔫᓯᐅᑉ ᐊᓈᓇᖓ ᑕᑯᓐᓈᖅᐳᒃ ᔩᓱᓯᐅᑉ ᑎᒥᖓ ᓇᒧᑦ ᐃᓕᔭᐅᖕᒪᖔᑦ.
Currently Selected:
ᒫᑯᓯᐅᑉ ᐊᒡᓚᖏᑦ 15: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.