ᒫᑯᓯᐅᑉ ᐊᒡᓚᖏᑦ 16
16
ᔩᓱᓯᐅᑉ ᑐᖁᖓᔪᓂᑦ ᒪᑭᓐᓂᖓ
ᒫᑎᐅᓯ 28:1-8; ᓘᑲᓯ 24:1-12; ᔪᐊᓇᓯ 20:1-10
1ᓴᐸᑎ ᐊᓂᒍᕐᖕᒪᑦ, ᒥᐊᕆ ᒫᒃᑕᓖᓂ, ᒥᐊᕆᓗ ᔧᒥᓯᐅᑉ ᐊᓈᓇᖓ, ᓴᓗᒥᓗ ᓂᐅᕕᖅᐳᑦ ᑎᐱᑦᓯᐊᕆᒃᓴᐅᑎᓂᒃ, ᔩᓱᓯᐅᑉ ᑎᒥᖓᓄᑦ ᒥᖑᐊᕈᑎᒋᔪᒪᔭᒥᖕᓂᒃ. 2ᐅᓪᓛᒻᒪᕆᒃᑯᑦ ᐱᓇᓱᐊᕈᓯᐅᑉ ᐅᓪᓗᖏᑕ ᓯᕗᓪᓕᖅᐹᖓᓂ, ᓯᕿᓂᖅ ᓄᐃᓕᖅᑎᓪᓗᒍ ᐃᓗᕕᕐᖕᒧᐊᖅᐳᑦ. 3ᐃᒻᒥᖕᓄᑦ ᐅᖃᖃᑎᒌᒃᓗᑎᒃ, “ᑭᓇᐅᑉ ᐅᔭᕋᒡᔪᐊᖅ ᐊᒃᓴᑲᖅᑎᓐᓂᐊᕐᖕᒪᒍ ᐃᓗᕕᐅᑉ ᐹᖓᓂᑦ?” 4ᑕᑯᒋᐊᓕᕋᒥᒃ, ᑕᑯᓚᐅᖅᐳᑦ ᐅᔭᕋᒡᔪᐊᖅ ᐊᒃᓴᑲᖅᑎᑕᐅᔭᕇᖅᑐᕕᓂᖅ ᐃᓗᕕᕐᖕᒥᑦ; ᑖᓐᓇ ᐅᔭᕋᒡᔪᐊᖅ ᐊᖏᔪᒻᒪᕆᐊᓘᖕᒪᑦ. 5ᐃᓗᕕᕐᖕᒧᑦ ᐃᑎᕋᒥᒃ, ᑕᑯᓪᓗᑎᒃ ᐊᖑᒻᒥᒃ ᐃᓅᓱᒃᑐᒥᒃ ᐃᓗᕕᐅᑉ ᑕᓕᖅᐱᐊᓂ ᐃᒃᓯᕙᔪᒥᒃ, ᐊᓐᓄᕌᖅᓯᒪᔪᒥᒃ ᖃᑯᖅᑕᒥᒃ; ᑖᒃᑯᐊ ᖁᐊᖅᓵᖅᐳᑦ.
6ᑖᑦᓱᒪ ᐅᖃᐅᑎᕔᑦ, “ᖁᐊᖅᓵᕋᓯ; ᔩᓱᓯ ᓈᓴᕇᑎᒥᐅᖅ ᑭᑭᐊᒃᑐᖅᑕᐅᓚᐅᖅᑐᖅ ᕿᓂᖅᐱᓯᐅᒃ. ᒪᑭᓯᒪᓕᖅᐳᖅ, ᑕᒫᓃᓐᖏᓚᖅ; ᑕᑯᓕᖅᓯᐅᒃ ᑎᒥᖓᑕ ᐃᓂᒋᓚᐅᖅᑕᖓ. 7#ᒫᑎᐅᓯ 26:32; ᒫᑯᓯ 14:28.ᒫᓐᓇ ᐃᓕᓐᓂᐊᖅᑎᖏᓐᓄᑦ ᐅᖃᕆᐊᖅᑐᓕᕆᑦᓯ ᐲᑦᑐᕉᓯᒧᓪᓗ ᓯᕗᓂᑦᓯᓐᓂ ᒐᓕᓕᐊᒧᐊᕐᖕᓂᐊᖅᐳᖅ; ᑍᑲᓂ ᑕᑯᓂᐊᖅᐸᓯ, ᑍᒫᒃ ᐅᖃᐅᑎᓚᐅᕐᖕᒪᓯ.”
8ᐊᕐᖕᓁᑦ ᑕᕝᕙᓐᖓᑦ ᐊᓂᕗᑦ ᐅᓪᓚᒃᓯᓪᓗᑎᒃ ᐃᓗᕕᕐᖕᒥᑦ; ᓴᔪᖕᓂᕐᖕᒧᑦ ᑲᒪᓂᐊᕐᖕᓂᕐᖕᒧᑦ ᑎᑭᑕᐅᒐᒥᒃ; ᑕᒪᑐᒥᖓ ᐅᖃᓚᐅᓐᖏᓚᑦ ᑭᓇᒧᓪᓘᓐᓃᑦ, ᑲᑉᐱᐊᓱᓕᕋᒥᒃ.
ᑕᕝᕗᖓ ᐊᒡᓚᒃᓯᒪᔪᑐᕾᑦ ᐃᓱᖃᓚᐅᖅᑐᕕᓂᐅᕗᑦ
ᔩᓱᓯᐅᑉ ᒥᐊᕆ ᒫᒃᑕᓖᓂᒧᑦ ᓴᖅᑭᓐᓂᖓ
ᒫᑎᐅᓯ 28:9-10; ᔪᐊᓇᓯ 20:11-18
9ᔩᓱᓯ ᑐᖁᖓᔪᓂᑦ ᒪᑭᓐᓇᒥ ᐱᓇᓱᐊᕈᓯᐅᑉ ᐅᓪᓗᖏᑕ ᓯᕗᓪᓕᖅᐹᖓᓂ, ᓯᕗᓪᓕᖅᐹᒥᒃ ᓴᖅᑭᓚᐅᖅᐳᖅ ᒥᐊᕆ ᒫᒃᑕᓖᓂᒧᑦ, ᑖᑦᓱᒧᖓ ᐊᓂᕐᖕᓂᕐᓗᖕᓂᒃ 7ᓂᒃ ᐊᓂᑎᑦᓯᕕᒋᓚᐅᖅᓯᒪᔭᒥᓄᑦ. 10ᑖᓐᓇ ᐅᖃᕆᐊᖅᑐᖅᐳᖅ ᔩᓱᓯᐅᑉ ᐃᓚᒋᖃᑦᑕᓚᐅᖅᑕᖏᓐᓄᑦ, ᕿᒃᓵᕕᒡᔪᐊᖅᑐᓄᑦ ᕿᐊᔪᓄᓪᓗ. 11ᑖᒃᑯᐊᓕ ᑐᓴᕋᒥᒃ ᔩᓱᓯᐅᑉ ᒪᑭᓯᒪᓂᖓᓂᒃ ᑕᑯᖅᑲᐅᓂᕋᕐᖕᒪᒍ, ᐅᒃᐱᓐᖏᓚᑦ.
ᔩᓱᓯᐅᑉ ᒪᕐᕉᖕᓄᑦ ᐃᓕᓐᓂᐊᖅᑏᖕᓄᑦ ᓴᖅᑭᓐᓂᖓ
ᓘᑲᓯ 24:13-35
12ᑕᒪᑐᒪ ᑭᖑᓂᖓᒍᑦ ᔩᓱᓯ ᓴᖅᑭᒃᑭᕗᖅ ᐊᓯᐊᓂᒃ ᑕᐅᑦᑐᖃᕐᓗᓂ ᐃᓕᓐᓂᐊᖅᑏᖕᓄᑦ ᒪᕐᕉᖕᓄᑦ, ᑖᒃᑯᐊᒃ ᐱᓱᒃᑎᓪᓗᒋᒃ ᓄᓇᐅᑉ ᐊᓯᐊᓄᑦ ᐃᒡᓗᒐᓴᖃᖏᑦᑐᒃᑯᑦ. 13ᑖᒃᑯᐊᒃ ᐅᑎᕋᒥᒃ ᐃᓚᒥᖕᓄᑦ ᑕᒪᑐᒥᖓ ᐅᖃᐅᓯᖃᖅᐴᒃ, ᑖᒃᑯᐊᓕ ᐅᒃᐱᕈᓱᖏᓐᓂᕗᑦ.
ᔩᓱᓯᐅᑉ ᐃᓕᓐᓂᐊᖅᑎᒥᓄᑦ 11ᓄᑦ ᓴᖅᑭᓐᓂᖓ
ᒫᑎᐅᓯ 28:16-20; ᓘᑲᓯ 24:36-49; ᔪᐊᓇᓯ 20:19-23; ᐋᐴᓯᑕᓖᑦ 1:6-8
14ᑭᖑᓂᖓᒍᑦ ᔩᓱᓯ ᓴᖅᑭᒃᑭᕗᖅ ᐃᓕᓐᓂᐊᖅᑎᒥᓄᑦ 11ᓄᑦ ᓂᕆᖃᑎᒌᒃᑎᓪᓗᒋᑦ; ᔩᓱᓯᐅᑉ ᓱᐊᒃᐰᑦ ᐅᒃᐱᖏᒻᒪᑕ ᐆᒻᒪᑎᖏᓪᓗ ᓯᑎᔫᓪᓗᑎᒃ, ᐅᒃᐱᕈᓱᓚᐅᖏᒻᒪᑕ ᔩᓱᓯ ᐆᒪᓕᖅᑎᓪᓗᒍ ᑕᑯᓚᐅᖅᑐᑦ ᐅᖃᐅᓯᖏᓐᓂᒃ. 15#ᐋᐴᓯᑕᓖᑦ 1:8.ᔩᓱᓯᐅᑉ ᐅᖃᐅᑎᕔᑦ, “ᐂᓕᕆᑦᓯ ᐱᓐᖑᖅᑎᑕᐅᓯᒪᔪᓄᑦ ᑕᒤᓐᓄᑦ ᐊᔪᕆᖅᑐᐃᓗᓯ ᐅᖃᐅᓯᕐᖕᓂᒃ ᑐᓴᕈᒥᓇᖅᑐᓂᒃ. 16ᓇᓪᓕᐊᑦ ᐅᒃᐱᖅᑐᖅ ᐹᑉᑎᑕᐅᓗᓂ ᑖᓐᓇ ᐱᐅᓕᔭᐅᔪᒫᖅᐳᖅ; ᓇᓪᓕᐊᓪᓕ ᐅᒃᐱᖏᑉᐸᑦ ᑖᓐᓇ ᐃᖅᑲᖅᑐᖅᑕᐅᔪᒫᖅᐳᖅ. 17ᐅᕙᓐᓄᑦ ᐅᒃᐱᖅᑐᑦ ᓇᓗᓁᒃᑯᑕᖃᕈᒫᖅᐳᑦ ᒪᑯᓂᖓ; ᐊᑎᕋ ᐊᑐᕐᓗᒍ ᐊᓂᕐᖕᓂᕐᓗᖕᓂᒃ ᐊᓂᑎᑦᓯᖃᑦᑕᕈᒫᖅᐳᑦ; ᐅᖃᐅᓯᕐᖕᓄᑦ ᓄᑖᓄᑦ ᐅᖃᓪᓚᖃᑦᑕᕈᒫᖅᐳᑦ; 18ᖁᒡᓗᒋᐊᓂᒃ ᑐᖁᓐᓇᖅᑐᓕᒡᓂᒃ ᑎᒍᓯᔪᓐᓇᕈᒫᖅᐳᑦ, ᑐᖁᓐᓇᖅᑐᒥᒡᓗ ᐃᒥᕋᓗᐊᕈᑎᒃ ᖃᓄᐃᓕᖃᑕᕈᒫᓐᖏᓚᑦ; ᖃᓂᒪᔪᑦ ᐸᑎᒻᒥᒃᐸᒋᑦ ᖃᓄᐃᑦᓱᓐᓃᖃᑦᑕᕈᒫᖅᐳᑦ.”
ᔩᓱᓯᐅᑉ ᕿᓚᓕᐊᖅᑎᑕᐅᓂᖓ
ᓘᑲᓯ 24:50-53; ᐋᐴᓯᑕᓖᑦ 1:9-11
19 #
ᐋᐴᓯᑕᓖᑦ 1:9-11. ᑕᕝᕙ ᐊᑕᓂᖅ ᔩᓱᓯ, ᑖᒃᑯᓄᖓ ᐅᖃᓪᓚᒌᕋᒥ, ᕿᓚᓕᐊᖅᑎᑕᐅᕗᖅ, ᒎᑎᐅᑉ ᑕᓕᖅᐱᐊᓄᑦ ᐃᖏᑦᓴᖅᑐᕐᓗᓂ. 20ᐃᓕᓐᓂᐊᖅᑎᑦ ᐊᔪᕆᖅᑐᐃᔭᖅᑐᖅᐳᑦ ᓇᒧᑐᐃᓐᓇᓕᒫᖅ, ᐊᑕᓂᐅᑉ ᐱᓇᓱᐊᖃᑎᒋᕔᑦ ᐊᔪᕆᖅᑐᐃᓂᖏᑕ ᓱᓕᓂᖏᑦ ᓇᓗᓁᒃᑯᑕᖃᓚᐅᖅᐳᑦ ᑲᒪᓇᖅᑐᓕᓂᒃᑯᑦ ᐱᓇᓱᐊᖅᑕᖏᑎᒍᑦ.#16:20 ᐃᓚᖏᑦ ᐊᒡᓚᒃᓯᒪᔪᑐᖃᕕᓃᑦ ᐋᖅᑭᒃᓱᖅᑕᐅᕙᒃᑐᕕᓃᓪᓗ ᐊᒡᓚᑐᕾᑦ ᓁᓐᓂᖅᓴᐅᖕᒪᑕ, ᐃᓚᖏᓪᓗ ᑕᑭᓂᖅᓴᐅᓪᓗᑎᒃ ᑕᕝᕙᓐᖓᑦ ᕚᓯᖓ 9ᒥᑦ-20ᒧᑦ ᐃᓚᓯᒪᓪᓗᑎᒃ
ᐊᒡᓚᒃᓯᒪᔪᑐᕾᑦ ᐊᓯᖏᑦ ᐅᑯᓂᖓ ᐃᓚᔭᐅᒃᑲᓐᓂᖅᓯᒪᕗᑦ
9ᑕᕝᕙ ᐊᕐᖕᓁᑦ ᐲᑦᑐᕉᓯᒧᐊᖅᐳᑦ ᐃᓚᓐᓇᕆᔭᖏᓐᓄᓪᓗ, ᐅᖃᕐᓗᑎᒃ ᓁᑦᑐᒥᒃ ᐅᖃᐅᑦᔭᐅᑦᔪᑎᒋᖅᑲᐅᔭᒥᖕᓂᒃ. 10ᑕᒪᑐᒪ ᑭᖑᓂᖓᒍᑦ, ᔩᓱᓯ ᓇᖕᒥᓂᖅ ᑎᓕᓯᓚᐅᖅᐳᖅ ᐃᓕᓐᓂᐊᖅᑎᒥᓂᒃ ᓯᕿᓂᐅᑉ ᓄᐃᕕᐊᓂᑦ ᓯᕿᓂᐅᑉ ᓂᐱᕕᐊᓄᑦ ᑎᑭᓪᓗᑎᒃ. ᑕᒪᑐᒥᖓ ᐅᖃᐅᓯᖃᕐᓗᑎᒃ ᐃᔨᖅᓯᒪᓚᐅᖅᑐᒥᒃ ᐃᓅᓯᖃᕐᖕᓇᖅᑐᒥᒃ ᐱᐅᓕᔭᐅᓂᕐᖕᒥᒡᓗ ᐃᓱᖃᖏᑦᑐᒧᑦ.#16:10 ᐃᓚᖏᑦ ᐊᒡᓚᒃᓯᒪᔪᑐᖃᕕᓃᑦ ᐋᖅᑭᒃᓱᖅᑕᐅᕙᒃᑐᕕᓃᓪᓗ ᐊᒡᓚᑐᕾᑦ ᓁᓐᓂᖅᓴᐅᖕᒪᑕ, ᐃᓚᖏᓪᓗ ᑕᑭᓂᖅᓴᐅᓪᓗᑎᒃ ᑕᕝᕙᓐᖓᑦ ᕚᓯᖓ 9ᒥᑦ-10ᒧᑦ ᐃᓚᓯᒪᓪᓗᑎᒃ
Currently Selected:
ᒫᑯᓯᐅᑉ ᐊᒡᓚᖏᑦ 16: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.