ᒫᑯᓯᐅᑉ ᐊᒡᓚᖏᑦ 14
14
ᔩᓱᓯᐅᑉ ᑐᖁᑕᒃᓴᕈᖅᑎᑕᐅᓇᓱᐊᕐᖕᓂᖓ
ᒫᑎᐅᓯ 26:1-5; ᓘᑲᓯ 22:1-2; ᔪᐊᓇᓯ 11:45-53
1 #
ᒨᓯᓯ ᐂᑉᐸᖏᑦ 12:1-27. ᐅᓪᓘᒃ ᓱᓕ ᒪᕐᕉᑎᓪᓗᒋᒃ ᓇᓪᓕᐅᓐᓂᖅᓯᐅᕐᕕᖏᑕ ᖄᖏᖅᑕᐅᕕᖕᒥᒃ ᑍᔭᐅᔫᑉ ᐳᕙᓪᓚᖅᑯᑎᖃᖏᑦᑐᒥᒡᓗ#14:1 ᐳᑦᔪᓴᐅᑎᖃᖏᑦᑐᓂᒃ ᓂᐊᖂᔭᖅᑐᕐᕕᖏᑕ ᓯᕗᓂᖓᓂ. ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᐱᑦᔪᑎᒃᓴᖅᓯᐅᓕᖅᐳᑦ ᔩᓱᓯ ᖃᐅᔨᔭᐅᖏᓪᓗᑎᒃ ᑎᒍᔪᒪᓪᓗᒍ, ᑐᖁᑦᓱᒪᓪᓗᒍ; 2ᑖᒃᑯᐊ ᐅᖃᖃᑎᒌᒃᐳᑦ, “ᑕᕝᕙᓂ ᓇᓪᓕᐅᓐᓂᖅᓯᐅᕐᕕᖕᒥ ᐱᓇᓱᐊᕆᐊᖃᓐᖏᓚᕗᑦ, ᐃᓄᐃᑦ ᐅᐃᒪᔮᖅᑎᑕᐅᖁᓇᒋᑦ.”
ᔩᓱᓯᐅᑉ ᑯᕕᓯᕕᐅᓂᖓ ᐱᑕᓂᒥ
ᒫᑎᐅᓯ 26:6-13; ᔪᐊᓇᓯ 12:1-8
3 #
ᓘᑲᓯ 7:37,38. ᐱᑕᓂᒦᑎᓪᓗᒍ ᓮᒨᓂᐅᑉ ᐃᒡᓗᖓᓂ ᓯᕗᕐᖓᒍᑦ ᐸᖅᑎᓚᐅᖅᑐᒥ ᑲᑉᐱᐊᒋᔭᐅᔪᒥᒃ, ᑕᕝᕙᓂ ᓂᕆᑎᓪᓗᒍ, ᐊᕐᖕᓇᒥᒃ ᐃᑎᖅᑐᖃᖅᐳᖅ ᑎᐱᑦᓯᐊᕆᒃᓴᐅᒻᒥᒃ ᓇᒃᓴᖅᑐᒥᒃ ᐊᑭᑐᔪᐊᓗᖕᒥᒃ ᐱᕈᖅᓯᐊᓂᑦ ᐱᓯᒪᔪᒥᒃ ᐃᓚᓯᒪᖏᑦᑐᒥᒃ ᐃᒪᓕᖕᒥᒃ, ᐊᕐᖕᓇᐅᑉ ᑎᐱᑦᓯᐊᕆᒃᓴᐅᑦ ᒪᑐᐃᕋᒥᐅᒃ ᔩᓱᓯᐅᑉ ᓂᐊᖁᐊᓄᑦ ᑯᕕᕚ. 4ᐃᓄᐃᑦ ᐃᓚᖏᑦ ᑕᕝᕙᓃᑦᑐᑦ ᐊᑲᐅᒃᓴᕈᓐᓃᖅᐳᑦ ᐃᒻᒥᖕᓄᑦ ᐅᖃᕐᓗᑎᒃ, “ᓱᖕᒪᑦ ᑎᐱᑦᓯᐊᕆᒃᓴᐅᑦ ᐊᑐᖅᑕᐅᕙ ᑕᒪᐅᖕᒊᓐᓇᖅ? 5ᑎᐱᑦᓯᐊᕆᒃᓴᐅᑦ ᓂᐅᕐᕈᑕᐅᒍᓂ ᐊᑭᖃᕋᔭᖅᐳᖅ ᓯᐅᓪᕕᕆᓂᒃ 300 ᐅᖓᑖᓂ, ᑖᒃᑯᐊ ᐃᑲᔫᑕᐅᖔᕐᓗᑎᒃ ᐊᔪᖅᓴᖅᑐᓄᑦ.” ᐊᕐᖕᓇᖅ ᑕᕝᕙᓃᑦᑐᓂᑦ ᓈᒻᒪᒋᔭᐅᖏᒻᒪᕆᓕᖅᐳᖅ.
6ᔩᓱᓯ ᐅᖃᖅᐳᖅ, “ᐊᕐᖕᓇᖅ ᑲᒪᒋᓇᓯᐅᒃ; ᓱᖕᒪᑦ ᐸᒡᕕᓴᒃᐱᓯᐅᒃ? ᐅᓇ ᐅᕙᓐᓄᑦ ᐱᐅᔪᐊᓗᖕᒥᒃ ᐱᓇᓱᐊᖅᑐᖅ. 7#ᒨᓯᓯ ᑕᓪᓕᒪᖏᑦ 15:11.ᑍᒪᓐᖓᓕᒫᖅ ᐊᔪᖅᓴᖅᑐᓂᒃ ᐃᓚᕾᓐᓇᕐᖕᓂᐊᖅᐳᓯ, ᖃᖓᑐᐃᓐᓇᓕᒫᕐᓗ ᐃᑲᔪᕈᒪᑐᐊᕈᑦᓯ ᐃᑲᔪᕈᓐᓇᕐᖕᓂᐊᖅᐸᓯ; ᐅᕙᓐᓂᒡᓕ ᐃᓚᕾᓐᓇᕐᖕᓂᐊᓐᖏᓚᓯ. 8ᐊᕐᖕᓇᖅ ᐱᓇᓱᐊᖅᐳᖅ ᐱᔪᓐᓇᖅᑕᒥᒍᑦ; ᑎᐱᑦᓯᐊᕆᒃᓴᐅᒻᒥᒃ ᑯᕕᓯᕗᖅ ᑎᒥᓐᓄᑦ ᓯᕗᕐᖓᒍᑦ ᐅᐸᓗᖕᒊᔧᓪᓗᓂ ᐃᓗᕕᖅᑕᐅᓂᒃᓴᓐᓄᑦ. 9ᓱᓕᔪᒥᒃ ᐅᖃᐅᑎᕙᑦᓯ, ᓇᓂᓕᒫᖅ ᐅᖃᐅᓰᑦ ᑐᓴᕈᒥᓇᖅᑐᑦ ᐅᖃᐅᓯᐅᓕᕌᖓᑕ ᓯᓚᕐᔪᐊᓕᒫᒥ, ᑖᑦᓱᒪ ᐊᕐᖕᓇᐅᑉ ᐱᓂᐊᕐᖕᓂᕆᔭᖓ ᐅᖃᐅᓯᐅᕙᖕᓂᐊᖅᐳᖅ ᑖᓐᓇ ᐃᖅᑲᐅᒪᔭᐅᓗᓂ.”
ᔫᑕᓯᐅᑉ ᐊᖏᕐᖕᓂᖓ ᔩᓱᓯᒥᒃ ᐱᔭᐅᑎᑦᓯᔪᒪᓪᓗᓂ
ᒫᑎᐅᓯ 26:14-16; ᓘᑲᓯ 22:3-6
10ᑕᕝᕙ ᔫᑕᓯ ᐃᔅᑲᕆᐊᑦ, ᐃᓕᓐᓂᐊᖅᑎᖏᑕ 12 ᐃᓚᖓᑦ, ᐊᓂᓪᓗᓂ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᐊᖅᐳᖅ, ᔩᓱᓯᒥᒃ ᐱᔭᐅᑎᑦᓯᔪᒪᓪᓗᓂ ᑖᒃᑯᓄᖓ. 11ᑖᒃᑯᐊ ᐅᐸᒃᑕᖏᑦ ᖁᕕᐊᓱᒻᒪᕆᒃᐳᑦ ᔫᑕᓯᐅᑉ ᐅᖃᐅᓯᕆᔭᖓᓂᒃ, ᑮᓇᐅᔭᓂᒃ ᑐᓂᓯᓂᐊᕐᖕᓂᕋᕐᓗᑎᒃ ᔫᑕᓯᒧᑦ ᐊᖏᖅᐳᑦ. ᔫᑕᓯ ᕿᓂᓕᖅᐳᖅ ᐱᕕᒃᓴᑦᓯᐊᕆᒐᔭᖅᑕᒥᓂᒃ ᔩᓱᓯ ᐱᔭᐅᑎᑦᓱᒪᓪᓗᒍ ᑖᒃᑯᓄᖓ.
ᔩᓱᓯᐅᑉ ᐃᓕᓐᓂᐊᖅᑎᒥᓂᒃ ᖄᖏᖅᑕᐅᕕᖕᒥ ᓂᕆᖃᑎᖃᕐᖕᓂᖓ
ᒫᑎᐅᓯ 26:17-25; ᓘᑲᓯ 22:7-14,21-23; ᔪᐊᓇᓯ 13:21-30
12ᓇᓪᓕᐅᓐᓂᖅᓯᐅᕐᕕᐅᑉ ᓂᐊᖂᔭᓂᒃ ᐳᕙᓪᓚᖅᑯᑎᖃᖏᑦᑐᓂᒃ#14:12 ᐳᑦᔪᓴᐅᑎᖃᖏᑦᑐᓂᒃ ᓂᕆᕕᐅᑉ ᐅᓪᓗᖏᑕ ᓯᕗᓪᓕᖅᐹᖓᓂ, ᓰᐱᐅᑉ ᓄᕐᕋᖓᑕ ᑐᖁᑕᐅᕕᐊᓂ ᖄᖏᖅᑕᐅᕕᒃ ᐱᑦᔪᑎᒋᓪᓗᒍ, ᐃᓕᓐᓂᐊᖅᑎᖏᑕ ᐊᐱᕆᕚᑦ, “ᓇᓂ ᖄᖏᖅᑕᐅᕕᖕᒥᒃ ᓇᓪᓕᐅᓐᓂᖅᓯᐅᕈᑎᒃᓴᒥᒃ ᐋᖅᑭᒃᓱᐃᔭᖅᑐᖁᕕᑎᒎᑦ ᓂᕆᓂᐊᖅᑕᕐᖕᓂᒃ?”
13ᑕᕝᕙ ᔩᓱᓯ ᐃᓕᓐᓂᐊᖅᑎᒥᓂᒃ ᒪᕐᕉᖕᓂᒃ ᑎᓕᓯᕗᖅ, ᐅᖃᐅᑎᓪᓗᒋᒃ, “ᐃᒡᓗᒐᓴᖕᓄᐊᕆᑦᓯᒃ, ᑕᕝᕗᖓᓗ ᑎᑭᒃᑯᑦᓯᒃ ᐊᖑᒻᒥᒃ ᐃᒪᖃᐅᑎᒥᒃ ᐊᒡᔭᖅᓯᔪᒥᒃ ᑕᑯᓂᐊᖅᐳᓯᒃ; ᑖᓐᓇ ᒪᓕᒃᓯᒃᑯᒃ. 14ᐃᒡᓗᒧᑦ ᐃᑎᕐᕕᒋᔭᖓᓄᑦ, ᐃᒡᓘᑉ ᐃᓄᐊᓄᑦ ᐅᖃᕆᑦᓯᒃ: ‘ᐊᔪᕆᖅᑐᐃᔨ ᐅᖃᕐᖕᒪᑦ, ᓇᐅᒃ ᑍᒪ ᐃᓂᒃᓴᕗᑦ ᐃᓕᓐᓂᐊᖅᑎᒃᑲᓗ ᓂᕆᕕᒋᓂᐊᖅᑕᕗᑦ ᖄᖏᖅᑕᐅᕕᖕᒥᒃ ᓇᓪᓕᐅᓐᓂᖅᓯᐅᕐᓗᑕ?’ 15ᑕᕝᕙ ᑖᑦᓱᒪ ᐃᒡᓗᖃᖅᑑᑉ ᑕᑯᑎᓐᓂᐊᖅᐹᓯᒃ ᐃᒡᓘᑉ ᖁᓛᓂ ᓂᕈᑐᔪᒥᒃ ᐋᖅᑭᒃᓱᖅᓯᒪᔪᒥᒃ ᓱᓇᑐᐃᓐᓇᖃᑦᓯᐊᖅᑐᒥᒃ; ᑕᕝᕙᓂ ᐊᑐᐃᓐᓇᕈᐃᓂᐊᖅᐳᓯᒃ ᓂᕆᔭᒃᓴᑦᑎᓐᓂᒃ.”
16ᐃᓕᓐᓂᐊᖅᑏᒃ ᐊᓂᒐᒥᒃ ᐃᒡᓗᒐᓴᖕᓄᐊᖅᐳᒃ, ᑕᒤᓐᓂᑦᓯᐊᖅ ᔩᓱᓯᐅᑉ ᐅᖃᐅᓯᕆᖅᑲᐅᔭᖏᓐᓂᒃ ᐊᑐᖅᐳᒃ; ᑕᕝᕙᓂ ᖄᖏᖅᑕᐅᕕᒃ ᐱᑦᔪᑎᒋᓪᓗᒍ ᓂᕆᔭᒃᓴᒥᒃ ᐊᑐᐃᓐᓇᕈᐃᓪᓗᑎᒃ.
17ᐅᓐᓄᖕᒪᑦ ᔩᓱᓯ ᑕᕝᕗᓐᖓᖅᐳᖅ ᐃᓕᓐᓂᐊᖅᑎᓂ 12 ᐃᓚᒋᓪᓗᒋᑦ. 18#ᐃᓐᖏᕈᑦ 41:9.ᑕᕝᕙᓂ ᓂᕆᕕᖕᒥ ᓂᕆᖃᑎᒌᒃᑎᓪᓗᒋᑦ, ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓚᑦᓯᓐᓄᑦ ᐱᔭᐅᑎᑕᐅᓂᐊᖅᐳᖓ, ᑕᕝᕙᓂ ᓂᕆᖃᑎᒋᔭᓐᓄᑦ.”
19ᐃᓕᓐᓂᐊᖅᑎᑦ ᑕᒪᑐᒧᖓ ᖁᕕᐊᓱᒍᓐᓃᖅᐳᑦ, ᔩᓱᓯ ᐊᑐᓂᑦ ᐊᐱᕆᖃᑦᑕᓕᖅᐹᑦ, “ᐅᕙᖓᐅᕚ?”
20ᔩᓱᓯᐅᑉ ᐅᖃᐅᑎᕔᑦ, “ᐃᓚᑦᓯᓐᓂᑦ 12ᓂᑦ, ᓂᐊᖂᔭᖅᑐᖅᑕᒥᓂᒃ ᑖᓐᓇ ᒥᓱᒃᓯᖃᑎᒋᔭᕋ ᑖᓐᓇᐅᓂᐊᖅᐳᖅ. 21ᐃᓅᑉ ᐃᕐᖕᓂᖓ ᑐᖁᓂᐊᖅᐳᖅ ᒎᑎᐅᑉ ᐅᖃᐅᓯᖏᓐᓂ ᐅᖃᖅᓯᒪᔪᑦ ᒪᓕᒡᓗᒋᑦ, ᑲᑉᐱᐊᓐᓇᒦᒃ ᐊᖑᑦ ᑖᓐᓇ ᐃᓅᑉ ᐃᕐᖕᓂᖓᓂᒃ ᐱᔭᐅᑎᑦᓯᓂᐊᖅᑐᖅ! ᐱᐅᓂᖅᓴᐅᒐᔭᓚᐅᖅᐳᖅ ᐃᓄᖕᒧᑦ ᑖᑦᓱᒧᖓ ᑖᓐᓇ ᐃᕐᖕᓂᐊᖑᓚᐅᖅᓯᒪᓐᓂᖏᒃᑯᓂ.”
ᐊᑕᓂᐅᑉ ᐅᓐᓄᒍᒻᒥᑕᕐᖕᓂᖓ
ᒫᑎᐅᓯ 26:26-30; ᓘᑲᓯ 22:14-20; 1 ᑯᕆᓐᑎ 11:23-25
22ᑕᕝᕙᓂ ᓂᕆᓪᓗᑎᒃ, ᓂᐊᖂᔭᖅ ᑎᒍᕚ, ᖁᔭᓕᔭᕇᕋᒥ, ᐊᕕᒃᐹ, ᐃᓕᓐᓂᐊᖅᑎᒥᓄᑦ ᑐᓂᓪᓗᒍ ᐅᖃᕐᓗᓂ, “ᑎᒍᓗᒍ ᓂᕆᓯᐅᒃ, ᑕᕝᕙ ᑎᒥᒐ.”
23ᐃᒥᐅᑎᒥᒃ ᑎᒍᓯᒋᕗᖅ, ᖁᔭᓕᔭᕇᕋᒥ ᑖᒃᑯᓄᖓ ᑐᓂᕚ, ᑕᕝᕙᓐᖓᑦ ᐃᒥᖅᑐᐃᓐᓇᐅᕗᑦ. 24#ᒨᓯᓯ ᐂᑉᐸᖏᑦ 24:8; ᔨᕆᒤᐊ 31:31-34.ᐅᖃᐅᑎᓪᓗᒋᑦ, “ᑕᕝᕙ ᐊᐅᒐ ᐊᖏᕈᑕᐅᓯᒪᔪᖅ, ᑯᕕᔭᐅᔪᖅ ᐊᒥᓱᑦ ᐱᓪᓗᒋᑦ. 25ᓱᓕᔪᒥᒃ ᐅᖃᐅᑎᕙᑦᓯ, ᐸᐅᕐᖎᑦ ᐃᑦᑎᖓᓂᒃ ᐃᒥᕐᖕᓂᐊᕈᓐᓃᖅᐳᖓ ᐅᓪᓗᖅ ᑍᓐᓇ ᓇᓪᓕᐅᑎᖅᑳᖅᑎᓐᓇᒍ ᓄᑖᒥᒃ ᐃᒥᕈᒫᕐᕕᒃᓴᕋ ᒎᑎᐅᑉ ᐊᑕᓂᐅᕕᖓᓂ.”
26ᐱᓯᕐᖕᒧᑦ ᐃᓐᖏᕇᕋᒥᒃ, ᑕᕝᕙᓐᖓ ᐊᓂᕗᑦ ᖃᖅᑲᒧᐊᕐᓗᑎᒃ ᐅᖅᓱᒃᓴᐅᔪᓐᓇᖅᑐᓂᒃ ᐸᐅᕐᖓᖃᓲᓂᒃ ᓇᐹᖅᑐᓕᖕᒧᑦ.
ᔩᓱᓯᐅᑉ ᐅᖃᕐᖕᓂᖓ ᐲᑦᑐᕉᓯᐅᑉ ᖃᐅᔨᒪᖏᓐᓂᕋᕐᖕᓂᒃᓴᖓᓂᒃ
ᒫᑎᐅᓯ 26:31-35; ᓘᑲᓯ 22:31-34; ᔪᐊᓇᓯ 13:36-38
27 #
ᓴᑲᕅᐊ 13:7. ᔩᓱᓯᐅᑉ ᐅᖃᐅᑎᕔᑦ, “ᐊᑕᖏᕐᓗᓯ ᕿᒫᓂᐊᖅᐳᓯ; ᒎᑎᐅᑉ ᐅᖃᐅᓯᖏᑦ ᐅᖃᖅᓯᒪᖕᒪᑕ, ‘ᐰᖅᓯᔨ ᑐᖁᓐᓂᐊᖅᐸᕋ, ᓰᐲᑦ ᐊᕙᒻᒧᐊᒡᓗᑎᒃ ᓯᐊᒻᒪᕐᖕᓂᐊᖅᐳᑦ.’ 28#ᒫᑎᐅᓯ 28:16.ᒪᑭᒍᒪᓕ, ᒐᓕᓕᐊᒧᐊᓛᖅᐳᖓ ᓯᕗᓂᑦᓯᓐᓂ.”
29ᐲᑦᑐᕉᓯᐅᑉ ᐅᖃᐅᑎᕚ, “ᐊᑕᖏᕐᓗᑎᒃ ᑖᒃᑯᐊ ᕿᒤᒐᓗᐊᖅᐸᑕ, ᐅᕙᖓ ᕿᒪᖕᓂᐊᓐᖏᓚᒋᑦ!”
30ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ, ᐊᒡᓛᑦ ᐅᓐᓄᒥ ᑕᒪᑐᒪᓂ, ᐊᖑᑎᕕᐊᖅ#14:30 ᐊᖑᑎᕕᐊᑦ ᐊᕿᒡᒋᐅᔭᖅ ᐅᓪᓛᒃᑯᑦ ᖃᐅᒻᒪᒋᐊᓯᑐᐊᕐᖕᒪᑦ ᓂᑦᔮᓯᖃᑦᑕᕐᖕᒪᑕ, ᐊᒡᓛᑦ ᑍᑦᓱᒪᓂᐅᑎᓪᓗᒍ ᓯᕿᖑᔭᕆᔭᐅᕙᒃᑐᕕᓃᑦ ᒪᕐᕈᐃᖅᓱᕐᓗᓂ ᓂᓪᓕᓚᐅᖅᑎᓐᓇᒍ, ᐱᖓᓱᐃᖅᑐᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᖃᑦᑕᕐᖕᓂᐊᖅᐳᑎᑦ.”
31ᐲᑦᑐᕉᓯᐅᑉ ᐅᖃᐅᑎᕚ, ᓲᓕᓂᖅᓴᐅᓇᓱᒃᓗᓂ, “ᐊᒡᓛᑦ ᑐᖁᖃᑎᒋᔭᕆᐊᖃᕋᓗᐊᕈᒃᑭᑦ, ᖃᐅᔨᒪᖏᓐᓂᕋᕐᖕᓂᐊᓐᖏᓚᒋᑦ.”
ᐃᓕᓐᓂᐊᖅᑎᐅᖃᑎᓕᒫᖏᓪᓗ ᑍᒫᒃ ᐅᖃᕆᕗᑦ.
ᔩᓱᓯᐅᑉ ᑐᒃᓯᐊᕐᖕᓂᖓ ᒋᑦᓯᒪᓂᒥ
ᒫᑎᐅᓯ 26:36-46; ᓘᑲᓯ 22:39-46
32ᒋᑦᓯᒪᓂᒧᐊᕋᒥᒃ; ᐃᓕᓐᓂᐊᖅᑎᒥᓄᑦ ᐅᖃᖅᐳᖅ, “ᑕᒫᓂ ᐃᒃᓯᕙᒋᑦᓯ ᑐᒃᓯᐊᕆᐊᖅᑐᖅᑎᓪᓗᖓ.” 33ᐲᑦᑐᕉᓯ ᔧᒥᓯᓗ, ᔪᐊᓇᓯᓗ, ᑖᒃᑯᐊᑐᐊᖅ ᒪᓕᒃᑎᑉᐰᑦ, ᔩᓱᓯ ᐅᖃᒤᒃᓴᕐᖕᓂᕐᖕᒧᑦ ᐊᒃᓱᕈᕐᖕᓇᖅᑐᒦᓕᖅᐳᖅ.#14:33ᑲᑉᐱᐊᓱᖕᓂᖅ ᐅᖁᒤᒃᓴᕐᖕᓂᕐᓗ ᓯᕘᕋᓂᕐᓗ ᑖᒃᑯᐊ ᑲᑎᑦᓱᒋᑦ ᔩᓱᓯᐅᑉ ᐊᑐᓚᐅᖅᐰᑦ ᑕᕝᕙᓂ 34ᑖᒃᑯᓄᖓ ᐅᖃᖅᖢᓂ, “ᐊᒃᓱᐊᓗᒃ ᕿᒃᓵᕕᒡᔪᐊᕐᖕᓂᕐᖕᒦᓕᕋᒪ, ᐊᒡᓛᑦ ᑐᖁᑐᐃᓐᓇᕆᐊᖃᖅᑑᔮᓕᕋᒪ; ᑕᕝᕙᓃᑐᐃᓐᓇᕆᑦᓯ, ᐃᖅᑯᒪᓗᓯ.”
35ᔩᓱᓯ ᐅᖓᒻᒧᑦ ᐱᓱᒃᑲᓐᓂᕐᓗᓂ, ᓄᓇᒧᑦ ᐹᒻᒪᒃᓗᓂ ᑐᒃᓯᐊᖅᐳᖅ, ᐊᔪᕐᖕᓇᖏᑉᐸᑦ ᐊᓐᓂᐊᖅᑎᑕᐅᓂᐅᑉ ᓇᓪᓕᐅᓐᓂᖓ ᐊᑐᕈᒪᓇᓂᐅᒃ. 36ᐃᒫᒃ ᑐᒃᓯᐊᖅᐳᖅ, “ᐋᐸ ᐊᑖᑖᒃ, ᓱᓇᓕᒫᓂᒃ ᐃᓕᖕᓄᑦ ᐊᔪᕐᖕᓇᖅᑐᖃᖏᒻᒪᑦ; ᐃᒥᐅᑦ ᐅᓇ ᐲᖅᑎᓚᐅᕈᒃ ᐅᕙᓐᓂᑦ; ᐱᔪᒪᔭᕋᐅᖏᑦᑐᕐᓕ, ᐱᔪᒪᔧᓪᓕ ᐱᓕ.”
37ᐃᓚᒥᓄᑦ ᐅᑎᕋᒥ ᓯᓂᒃᑐᑦ ᑕᑯᕔᑦ; ᐲᑦᑐᕉᓯᒧᑦ ᐅᖃᖅᐳᖅ, “ᓮᒨᓃ, ᓯᓂᒃᐲᑦ? ᐃᑲᕐᕋᕐᖕᒥᒃ ᐊᑕᐅᓯᕐᖕᒥᒃ ᐃᖅᑯᒪᔪᓐᓇᓐᖏᓚᑏᑦ? 38ᐃᖅᑯᒪᒋᑦᓯ ᑐᒃᓯᐊᕐᓗᓯ ᐱᐅᓐᖏᑐᒧᑦ ᐱᔪᒥᓵᖅᑕᐅᓂᕐᖕᒧᑦ ᑎᑭᖁᓇᓯ; ᐊᓂᕐᖕᓂᖅ ᐱᔪᒪᑦᓯᐊᕋᓗᐊᖅᐳᖅ, ᑎᒥᓕ ᓴᓐᖐᑉᐳᖅ.”
39ᔩᓱᓯ ᕿᒪᕉᑎᒃᑲᓐᓂᕆᕗᖅ ᑐᒃᓯᐊᕐᓗᓂ, ᐅᖃᐅᓰᑦ ᑖᒃᑯᐊᑦᓮᓐᓁᑦ ᐊᑐᕐᓗᒋᑦ. 40ᐅᑎᕐᖕᒥᒐᒥ ᐅᐸᒃᐰᑦ ᓯᓂᒃᑐᑦ, ᐅᐃᕐᖓᕐᖕᓂᕐᖕᒧᑦ ᐅᐃᓴᔪᓐᓁᓪᓕᕗᑦ; ᑕᒪᓐᓇ ᖃᓄᖅ ᐅᖃᕆᐊᒃᓴᖓ ᓇᓗᕚᑦ.
41ᐱᖓᔪᖓᓐᓂᒃ ᑐᒃᓯᐊᕆᐊᖅᑐᑲᓐᓂᓚᐅᕐᓗᓂ ᐅᑎᕐᖕᒥᒐᒥ, ᐅᖃᐅᑎᕔᑦ, “ᓱᓕ ᓯᓂᒃᐱᓰ ᑕᕾᖅᓯᕐᓗᓯ?, ᓈᒻᒪᒃᓯᕗᖅ! ᐃᑲᕐᕋᖅ ᓇᓪᓕᐅᑎᕗᖅ; ᐃᓅᑉ ᐃᕐᖕᓂᖓ ᐱᔭᐅᒃᑲᖅᑕᐅᓯᕗᖅ ᐊᔪᖅᑐᓕᔪᑦ ᐱᔪᓐᓇᕐᖕᓂᖏᓐᓄᑦ. 42ᒪᑭᓪᓗᓯ, ᐱᓱᓕᖅᑕ. ᑕᑯᒋᑦ, ᐊᖑᑦ ᐅᕙᓐᓂᒃ ᐱᔭᐅᒃᑬᔪᖅ ᑎᑭᓕᖅᐳᖅ.”
ᔩᓱᓯᐅᑉ ᑎᒍᔭᐅᓂᖓ
ᒫᑎᐅᓯ 26:47-56; ᓘᑲᓯ 22:47-53; ᔪᐊᓇᓯ 18:3-12
43ᑕᕝᕔᓐᓇᖅ, ᓱᓕ ᑍᒫᒃ ᐅᖃᖅᑎᓪᓗᒍ, ᔫᑕᓯ, ᐃᓕᓐᓂᐊᖅᑎᖏᑕ 12 ᐃᓚᖓᑦ, ᑎᑭᑉᐳᖅ; ᐃᓚᖃᕐᓗᓂ ᐃᓄᒐᓴᒡᔪᐊᓂᒃ ᓴᕕᒡᔪᐊᓕᔭᖅᑐᓂᒃ ᐊᓇᐅᑕᓕᔭᖅᑐᓂᒡᓗ, ᑎᓕᔭᐅᓯᒪᔪᓂᒃ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ, ᐱᖁᔭᓂᒃ ᐃᓕᓮᔨᓄᑦ, ᔫᑎᓪᓗ ᐊᖓᔪᖅᑳᖏᓐᓄᑦ. 44ᑖᑦᓱᒪ ᐱᔭᐅᒃᑬᓂᐊᖅᑑᑉ ᐃᓄᒐᓴᒡᔪᐊᑦ ᓇᓗᓁᒃᑯᑕᒃᓴᒥᒃ ᐅᖃᐅᑎᓯᒪᕔᑦ ᐃᒫᒃ, “ᑖᓐᓇ ᑯᓂᖕᓂᐊᖅᑕᕋ ᑖᓐᓇᐅᓂᐊᖅᐳᖅ ᐱᔪᒪᔭᓯ; ᑖᓐᓇ ᑎᒍᓂᐊᖅᐸᓯ ᑕᕝᕙᓐᖓᓪᓗ ᐊᐅᓪᓚᕈᑎᓗᒍ.”
45ᔫᑕᓯ ᑕᕝᕗᖓ ᑎᑭᓐᓇᒥ, ᔩᓱᓯᒧᑦ ᐅᐸᒍᑎᑲᐅᑎᒋᕗᖅ ᐅᖃᕐᓗᓂ, “ᕌᐰ!” ᑯᓂᒃᐹ. 46ᑕᕝᕙ ᑖᒃᑯᐊ ᔩᓱᓯ ᐅᐸᒃᐹᑦ ᑎᒍᓪᓗᒍ. 47ᑕᕝᕙᓃᑦᑐᓪᓕ ᐃᓚᖓᑦ ᓴᕕᒡᔪᐊᒥᓂᒃ ᐊᒧᓯᓪᓗᓂ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᒻᒪᕆᖓᑦᑕ ᐱᔨᖓ ᐅᓕᒪᕐᓗᒍ ᓯᐅᑎᖓ ᓇᑲᑉᐹ. 48ᔩᓱᓯᐅᑉ ᐅᖃᐅᑎᕔᑦ, “ᐅᕙᓐᓂᒃ ᑎᒍᓯᔭᖅᑐᖅᐱᓰ ᐱᕋᔭᒃᑎᐅᔮᖅᑎᓪᓗᖓ ᓴᕕᒡᔪᐊᓕᔭᕐᓗᓯ ᐊᓇᐅᑦᑎᔭᖅᖢᓯᓗ? 49#ᓘᑲᓯ 19:47; 21:37.ᖃᐅᑕᒫᑦ ᐃᓚᒋᖃᑦᑕᓚᐅᖅᐸᑦᓯ ᐊᔪᕆᖅᑐᐃᑎᓪᓗᖓ ᑐᒃᓯᐊᕐᕕᒃᔪᐊᕐᖕᒥ, ᑎᒍᓚᐅᓐᖏᓚᑦᓯᓐᖓ. ᒎᑎᐅᓪᓕ ᐅᖃᐅᓯᖏᑦ ᓇᓚᐅᑦᓯᔭᕆᐊᖃᖅᐳᑦ.”
50ᐃᓕᓐᓂᐊᖅᑎᓕᒫᑦ ᕿᒫᕗᑦ ᔩᓱᓯᒥᒃ ᕿᒤᓪᓗᑎᒃ.
51ᐃᓅᓱᒃᑐᒧᑦ ᔩᓱᓯ ᒪᓕᒃᑕᐅᓚᐅᖅᐳᖅ, ᖃᓪᓗᓈᖅᑕᒥᒃ ᓵᑦᑐᒥᒃ ᐅᓕᒃᓯᒪᑐᐃᓐᓇᖅᑐᒥᒃ. ᑖᓐᓇ ᑎᒍᖃᓯᐅᑎᓇᓱᐊᖅᐹᑦ, 52ᐅᓕᒋᔭᓂ ᖃᓪᓗᓈᖅᑕᖅ ᓵᑦᑐᖅ ᕿᒪᒃᓗᓂᐅᒃ ᐊᓐᓄᕌᖃᕋᓂ ᕿᒫᕗᖅ.
ᔩᓱᓯᐅᑉ ᐃᖅᑲᖅᑐᐃᔨᕐᔪᐊᑦ ᓵᖓᓃᓐᓂᖓ
ᒫᑎᐅᓯ 26:57-68; ᓘᑲᓯ 22:54-55,63-71; ᔪᐊᓇᓯ 18:13-14,19-24
53ᔩᓱᓯ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᓄᐊᕈᑎᕚᑦ; ᑕᕝᕙᓂ ᑲᑎᒪᖕᒪᑕ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᓕᒫᖏᑦ, ᔫᑎᓪᓗ ᐊᖓᔪᖅᑳᖏᑦ, ᐱᖁᔭᓂᒡᓗ ᐃᓕᓮᔩᑦ. 54ᐲᑦᑐᕉᓯ ᒪᓕᓚᐅᖅᐳᖅ ᐅᖓᓯᒋᔮᓂᓪᓗᓂ, ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᑕ ᐊᓃᕐᕕᖓᓄᑦ ᑎᑭᓪᓗᓂ; ᑕᕝᕙᓂ ᐃᒃᓯᕚᖃᑕᐅᓕᖅᐳᖅ ᖃᐅᔨᓴᖅᑎᓄᑦ, ᑕᕝᕙᓂ ᐃᑯᒪᐅᑉ ᓴᓂᐊᓂ ᐅᖅᑰᓇᓱᐊᖃᑕᐅᕗᖅ. 55ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᑦ ᐃᖅᑲᖅᑐᐃᔨᓕᒫᖏᓪᓗ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ ᓇᓗᓁᖅᑕᐅᑎᑦᓯᓇᓱᐊᖅᐳᑦ; ᑭᓯᐊᓂ ᑐᖁᑕᐅᑦᔪᑎᒃᓴᒥᒃ ᓇᓂᓯᓚᐅᓐᖏᓚᑦ. 56ᐊᒥᓱᑦ ᓴᒡᓗᓪᓗᑎᒃ ᔩᓱᓯᒥᒃ ᐅᖃᐅᓯᖃᓚᐅᖅᐳᑦ, ᑭᓯᐊᓂᓕ ᐅᓂᒃᑲᐅᓯᕆᔭᖏᑦ ᐊᖏᖃᑎᒌᓚᐅᓐᖏᓚᑦ.
57ᐊᖑᑎᑦ ᐃᓚᖏᑦ ᓂᑯᕕᒃᐳᑦ, ᓴᒡᓗᓪᓗᑎᒃ ᐅᖃᖅᐳᑦ, 58#ᔪᐊᓇᓯ 2:19.“ᐅᓇ ᐅᖃᖅᑎᓪᓗᒍ ᑐᓴᓚᐅᖅᑕᕗᑦ, ‘ᑐᒃᓯᐊᕐᕕᒡᔪᐊᖅ ᓯᖁᒥᒍᒪᕙᕋ ᐊᒡᒐᓄᑦ ᓴᓇᔭᐅᓯᒪᔪᖅ, ᐅᓪᓗᐃᑦ ᐱᖓᓱᑦ ᓈᒃᐸᑕ ᐊᓯᐊᓂᒃ ᓴᓇᓂᐊᕆᕗᖓ, ᐊᒡᒐᓄᑦ ᓴᓇᔭᐅᓯᒪᖏᑦᑐᒥᒃ.’” 59ᐊᒡᓛᑦ ᑖᒃᑯᓄᖓ ᐅᖃᐅᓯᕆᔭᒥᖕᓄᑦ ᐊᖏᖃᑎᒌᒃᑎᑦᓯᔪᓐᓇᓐᖏᓚᑦ.
60ᑕᕝᕙ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦ ᓂᑯᕕᓪᓗᓂ ᑖᒃᑯᐊ ᓵᖏᓐᓂ ᔩᓱᓯ ᐊᐱᕆᕚ, “ᑭᒡᒍᓯᒃᓴᖃᓐᖏᓚᑏᑦ?#14:60 ᑭᐅᑦᔪᑎᒃᓴᖃᓐᖏᓚᑏᑦ ᐃᓕᖕᓂᒃ ᐅᖃᐅᓯᖃᕐᖕᓂᒋᓐᓄᑦ?”
61ᔩᓱᓯ ᓂᓪᓕᓐᖏᓚᖅ ᑭᐅᓇᓂᓗ. ᓱᓕ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐊᐱᕆᒃᑲᓐᓂᖅᐹ, “᙭ᔅᑑᓯᐅᕖᑦ, ᒎᑎᐅᑉ ᓂᖅᑐᕐᖕᓇᖅᑑᑉ ᐃᕐᖕᓂᖓ?”
62 #
ᑖᓂᐊᓕ 7:13. ᔩᓱᓯᐅᑉ ᑭᐅᕚ, “ᐅᕙᖓᐅᕗᖓ; ᑕᒪᑦᓯ ᑕᑯᔪᒫᖅᐳᓯ ᐃᓅᑉ ᐃᕐᖕᓂᖓ ᐊᔪᒐᖃᖏᑦᑑᑉ ᑕᓕᖅᐱᐊᓂ ᐃᒃᓯᕙᑎᓪᓗᒍ, ᕿᓚᖕᒥᓪᓗ ᐊᖅᑲᓕᖅᑎᓪᓗᒍ#14:62 ᑎᑭᓕᖅᑎᓪᓗᒍ ᓄᕗᔭᑎᒍᑦ!”
63ᑕᕝᕙ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐊᓐᓄᕌᓂ ᐊᓕᒃᐰᑦ ᐅᖃᕐᓗᓂ, “ᓱᖕᒪᑦ ᓱᓕ ᖃᐅᔨᓇᓱᒋᐊᖃᖅᐱᑖ? 64#ᒨᓯᓯ ᐱᖓᔪᖏᑦ 24:16.ᑐᓴᕋᑖᖅᐸᓯ ᒎᑎᒥᒃ ᐅᖃᕐᖕᓂᕐᓘᑎᖃᖅᑎᓪᓗᒍ! ᖃᓄᖅ ᐃᓱᒪᖃᓕᖅᐱᓰ?” ᑖᒃᑯᐊᓕᒫᑦ ᔩᓱᓯᒥᒃ ᐸᓯᔭᒃᓴᐅᓂᕅᕗᑦ ᑐᖁᑕᒃᓴᐅᖁᓪᓗᒍ.
65ᐃᓚᖏᑕ ᔩᓱᓯ ᑎᕝᕗᓗᒃᐹᑦ,#14:65 ᓯᑉᕗᐊᖅᐹᑦ ᒪᑐᐊᕐᓗᒍ ᑎᒡᓗᖃᑦᑕᓕᖅᐹᑦ, ᐅᖃᐅᑎᓪᓗᒍ, “ᓇᓚᐅᑦᓯᓇᓱᓕᕆᑦ ᑭᓇᒧᑦ ᑎᒡᓗᒃᑕᐅᖕᒪᖔᖅᐱᑦ!” ᖃᐅᔨᓴᖅᑏᑦ ᔩᓱᓯ ᑎᒍᓪᓗᒍ ᑎᒡᓗᖃᑦᑕᓕᖅᐹᑦ.
ᐲᑦᑐᕉᓯᐅᑉ ᔩᓱᓯᒥᒃ ᖃᐅᔨᒪᖏᓐᓂᕋᕐᖕᓂᖓ
ᒫᑎᐅᓯ 26:69-75; ᓘᑲᓯ 22:56-62; ᔪᐊᓇᓯ 18:15-18,25-27
66ᐲᑦᑐᕉᓯ ᓱᓕ ᐃᒡᓘᑉ ᐊᓃᕐᕕᐊᓃᑎᓪᓗᒍ, ᐊᕐᖕᓇᖅ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᖏᑕ ᐃᓚᖓᑦ ᑕᒪᐅᓐᖓᖅᐳᖅ. 67ᑖᑦᓱᒪ ᐲᑦᑐᕉᓯ ᑕᑯᒐᒥᐅᒃ ᐃᑯᒪᔫᑉ ᓴᓂᐊᓂ ᐅᖅᑰᓯᑦᑎᖅᑎᓪᓗᒍ, ᑕᑯᓐᓇᓕᕋᒥᐅᒃ ᐅᖃᖅᐳᖅ, “ᐃᕝᕕᑦᑕᐅᖅ ᔩᓱᓯ ᓈᓴᕇᑎᒥᐅᖅ ᐃᓚᒋᓚᐅᖅᐸᑦ.”
68ᐲᑦᑐᕉᓯ ᓴᒡᓗᓪᓗᓂ ᐅᖃᖅᐳᖅ, “ᖃᐅᔨᒪᓐᖏᓚᕋ ᐅᖃᐅᓯᕆᔭᑎᓪᓘᓐᓃᑦ ᑐᑭᓯᓐᖏᓚᒃᑲ,” ᑕᕝᕙᓐᖓᑦ ᐊᓂᓕᖅᑎᓪᓗᒍ, ᐊᖑᑎᕕᐊᖅ ᓂᓪᓕᖅᐳᖅ.#14:68 ᐊᒡᓚᒃᓯᒪᔪᑐᖃᕐᖕᓂ ᐃᓚᖏᓐᓂ ᐱᑕᖃᖏᑦᑐᖅ “ᐊᖑᑎᕕᐊᖅ ᓂᓪᓕᖅᐳᖅ.”
69ᐱᔨᐅᑉ ᐊᕐᖕᓇᐅᑉ, ᑕᕝᕙᓂ ᐲᑦᑐᕉᓯ ᑕᑯᒐᒥᐅᒃ, ᐅᖃᒃᑲᓐᓂᓕᖅᐳᖅ ᑕᒫᓃᑦᑐᓄᑦ, “ᐅᓇ ᐊᖑᑦ ᑍᒃᑯᓄᖓ ᐃᓚᒋᔭᐅᖕᒥᔪᖅ.” 70ᐲᑦᑐᕉᓯᓕ ᓱᓕ ᓴᒡᓗᒃᑲᓐᓂᕆᕗᖅ.
ᐊᑯᓂᐅᑎᓐᓇᒍ ᓱᓕ ᑕᒫᓃᑦᑐᓄᑦ ᐲᑦᑐᕉᓯ ᐅᖃᐅᑦᔭᐅᕗᖅ, “ᓇᓗᓇᕈᓐᓃᖅᐳᑎᑦ ᑖᒃᑯᓄᖓ ᐃᓚᒋᔭᐅᒐᕕᑦ; ᒐᓕᓕᐊᒥᐅᖑᒐᕕᑦ.”
71ᑕᕝᕙ ᐲᑦᑐᕉᓯ ᐅᖃᕐᖕᓂᕐᓗᓕᖅᐳᖅ, ᐅᖃᕕᒃᓗᓂᓗ ᐊᖏᒻᒪᕆᒃᐳᖅ, “ᐊᖑᑦ ᐅᖃᐅᓯᕆᔭᓯ ᑖᓐᓇ ᖃᐅᔨᒪᓐᖏᓚᕋ.”
72ᑕᕝᕔᓐᓇᖅ ᐊᖑᑎᕕᐊᖅ ᓂᓪᓕᖅᐳᖅ ᐂᑉᐸᖓᓂᒃ, ᐲᑦᑐᕉᓯ ᑕᕝᕙ ᐃᖅᑬᕗᖅ ᔩᓱᓯᐅᑉ ᐅᖃᐅᑎᓚᐅᕐᖕᒪᒍ, “ᐊᖑᑎᕕᐊᖅ ᒪᕐᕈᐃᖅᑐᕐᓗᓂ ᓂᓪᓕᖅᑳᖅᑎᓐᓇᒍ, ᐱᖓᓱᐃᖅᑐᕐᓗᑎᑦ ᖃᐅᔨᒪᖏᓐᓂᕋᓛᖅᐸᕐᖕᒪ.” ᐲᑦᑐᕉᓯ ᐃᓗᐃᓪᓕᒐᒥ ᕿᐊᕗᖅ.
Currently Selected:
ᒫᑯᓯᐅᑉ ᐊᒡᓚᖏᑦ 14: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.