Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 3
3
Ngé rāā kəla madə̄ naā kə́ kijə
1Najə̄ gə̄ ń noō ní ɔjən̄ kadə̄ jə-tél j-əda i najə̄ yājí kə́ majə a? Jə-sāā i kadə̄sí makətūbə̄ kə́ ɔjə najə̄ kə́ majə yājí tītə̄ ń de kə́rēý gə̄ a rāān̄neé ní a? Aké jə-sāā i kadə̄ sḭḭ̄ ī-rāāī makətūbə̄ ə́daīneé najə̄ kə́ majə yājí a? 2I sḭḭ̄ kɔ́ gə̄ n i makətūbə̄ kə́ ndang yājí ní. Ndangən̄sí i dan wurjí tə́ ō, de gə̄ malang asən̄ ger̄ ō, asən̄ tə́da ō. 3Kadə̄ sḭḭ̄ i makətūbə̄ kə́ *Kərist ndang əla jījí tə́ kadə̄ j-adə̄ de gə̄ ní, nge ń noō to i kə̄ dɔ ndágá. Sḭḭ̄ i makətūbə̄ kə́ ndang kə man̄ yá̰á̰ kə́ nduluú alé, banī i kə́ ndang kə Ndíĺ Nə́ɓā kə́ ndi kə kumneé. Sḭḭ̄ i najə̄ kə́ ndang dɔ ngán mbal̄ kə́ laa gə̄ tə́ alé, ba i dan wur deē tə́.
4Jḭḭ j-əda nge ń noō tɔdɔ̄ j-ənī kemjí mámák j-adə̄ Nə́ɓā kə ta kūl̄ Kərist. 5Tɔdɔ̄ jḭḭ ń toō j-asə rāā yá̰á̰ kógə̄ḿ kə deē dɔjí alé, banī i Nə́ɓā nəkɔ́ n rāā tá jḭḭ j-asəń rāā yá̰á̰ ní. 6Tɔdɔ̄ i ni n i nge rāā tá kadə̄ jḭḭ j-asəń téĺ ngé rāā kəla gə̄ yā *madə̄ naā kə́ kíjə ní. Madə̄ naā kə́ kijə ní ra i dɔ *ndū najə̄ kə́ ndang tə́ alé, banī ra i dɔ Ndíĺ tə́. *Ndū najə̄ kə́ ndang a tɔ̄l̄ i deē, banī Ndíĺ i nge rāā kadə̄ deē ndi kə kumneé.
7Kété ní ndangən̄ *ndū najə̄ i dɔ bar mbal̄ gə̄ tə́ ō#3.7 K. 7: Ndangən̄ ndū najə̄ ní tū mbal̄ tə́ i kə gində̄ kə́ ta kataá, tɔ́sə̄n̄ i mbée tū mbal̄ tə́., *kɔsə gɔn yā Nə́ɓā ndə́lē ngá̰ý dan ngeé ń noō tə́ ō. Ta kum Moijə ndə́lē ngá̰ý ō, adə̄ ngán *Israel gə̄ asən̄ kəndā kumdə́ ta yān tə́ alé. Tá kɔsə gɔn ní, i kɔsə gɔn kə́ a to ta kum Moijə tə́ i ngándáńg alé. Ré *ndū najə̄ ń kəla rāān i kaw̄ kə deé kəlan ta yo tə́ ní, reē i kə kɔsə gɔn kə́ asə naā beé anī, 8kɔsə gɔn ń a dān̄ gō kəla yā Ndíĺ ní i ngá̰ý tɔȳ aĺ a? 9Ré kɔsə gɔn yā kəla gān̄g saryaá dɔ de gə̄ tə́ to anī, kəla ń rāā adə̄ de gə̄ télən̄ de kə́ gōtə́ gə̄ ta kum Nə́ɓā tə́ ní tá kɔsə gɔn yān i ngá̰ý tɔȳ aĺ a! 10Tá j-asə kəda na *kɔsə gɔn ń ndə́lē kété ní, i yá̰a̰ alé kadə nge kə́ ngɔlaā tə́, tām̄ nge kə́ ngɔlaā tɔȳn sa̰y ngá̰ý. 11Tɔdɔ̄ ré yá̰á̰ ń to dan i ngá̰ý aĺ ní kɔsə gɔn yān to anī, yá̰á̰ ń a to ngándáńg ní kɔsə gɔn yān i ngá̰ý tɔȳ aĺ i ba̰ý?
12Dan ń j-əndā kemjí i dɔ yá̰á̰ kə́ tītə̄ ń noō tə́ ní, j-ənī kemjí mámák jə-ndiń kanjə̄ sōl̄ yá̰á̰ kógə̄ḿ. 13Jḭḭ jə-rāā yá̰a̰ tītə̄ yā Moijə alé.
Ni-seĺ kūbə̄ ta kumən tə́ kɔ̄ɔ́, ɔgə̄ń ngán *Israel gə̄
ka̰a̰ ta tɔ̄l̄ ta yá̰á̰ kə́ ndə́lē ngá̰ý kə́ a mān̄.
14Banī nin̄-asən̄ ger̄ kum najə̄ alé. Adə̄ bátə́ ɓōólaā gə̄gē ní, ré a tə́dan̄ makətūbə̄ *madə̄ naā kə́ jóo anī, kūbə̄ kə́ kógə̄ḿ beē nəkɔ́ ń toō i kə́ seĺ ta kumdə́ tə́ ɓáý. I de kə́ nin̄-ɓoon̄ naā kə *Kərist ngóy n kūbə̄ ngeé ń toō a gətóo kɔ̄ɔ́ ta kumən tə́ ní. 15Bátə́ ɓōólaā gə̄gē ní, kə dɔ tə́dádə́ makətūbə̄ yā Moijə malang ń noō ní, kūbə̄ ní a utə̄ ta kumdə́ laā ɓáý. 16Ba tītə̄ ń makətūbə̄ ədań ní,
loo ń ré deē tūr̄ rɔ̄n kə̄ rɔ̄ Kɔ́ɔ̄ɓē tə́ anī, kūbə̄ ní i kə́ kun kɔ̄ɔ́.
17Tá laā ní, najə̄ ń ədan̄ na i Kɔ́ɔ̄ɓē ní, kumən na i Ndíl. Ba loo ń Ndíĺ Kɔ́ɔ̄ɓē i tū tə́ ní, deē i kɔ́ɔ̄ rɔ̄n tū tə́ ō. 18Ba jḭḭ̄ malang ń unən̄ kūbə̄ kə́ seĺ ta kumjí tə́ kɔ̄ɔ́ ní, j-ɔjiī kɔsə gɔn yā Kɔ́ɔ̄ɓē kə̄ ndágá. I beé n tūrə̄n̄neéjí kadə̄ jə-toī tītə̄ Kɔ́ɔ̄ɓē ō, j-ḭḭ̄neé tū kɔsə gɔn kógə̄ḿ tə́ ba j-awīneé tū kɔsə gɔn kə́ rang kə́ bo tɔȳ nge kə́ kété tə́ ō ní. Tɔdɔ̄ kəla ń Ndíĺ Kɔ́ɔ̄ɓē rāā ní n noó.
Currently Selected:
Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad