Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 4
4
Yá̰a̰ kənge kə́ gātə̄n i ngá̰ý kə́ to kem jóó nánjə́ tə́
1Nə́ɓā a̰a̰ kum tō ndoō yājí, adə̄ ni-adə̄jí kəla ń toō. I tām̄ najə̄ ń noō tə́ n tɔ́gə́jí urə̄ń wak aĺ ní. 2Jḭḭ jə-mbātə́ yá̰á̰ kə́ to rɔ̄sɔl̄ kə́ rāā loo mundə̄ tə́ gə̄ kɔ̄ɔ́ ō, jə-rāā yá̰a̰ kə ngamaá aĺ ō, jə-tūr̄ gidə najə̄ yā Nə́ɓā aĺ ō, banī i najə̄ kə́ rɔ̄kum n j-əda kə̄ ndágá adə̄ kumən unjə̄, jə-sāań kadə̄ de gə̄ malang ənīn̄ kemdə́ adə̄n̄jí kə̄ ta kum Nə́ɓā tə́ ní. 3Ré Najə̄ kə́ Majə ń j-ɔjə ní kumən unjə̄ aĺ anī, unjə̄ aĺ i ta kum ngé gə̄ ń nin̄ kɔ́ gə̄ a tḭ̄ḭ̄n̄ ta rɔ̄də́ tə́ ní. 4Nin̄-taān̄ kem aĺ, i tɔdɔ̄ nə́ɓā kə́ dɔ nang tə́ laā utə̄ kumdə́ kɔ̄ɔ́. Adə̄ nin̄-asən̄ ger̄ kum Najə̄ kə́ Majə alé. I beé n nin̄-asənə̄ń ka̰a̰ *kɔsə gɔn yā *Kərist ń ɔsə kum gotə Nə́ɓā nəkɔ́ ní alé ní. 5Tɔdɔ̄ dan ń j-ɔjə najə̄ ní, j-ɔjə i najə̄ yājí jḭḭ kɔ́ gə̄ alé, banī i najə̄ yā Jeju Kərist kə́ ni i Kɔ́ɔ̄ɓē. Ba kə́ tām̄ yājí jḭḭ tə́ ɓáa, j-əda na jḭḭ na i ngé kəla yāsí gə̄ tām̄ yā Jeju tə́.
6Nə́ɓā ń əda na kadə̄ loo kə unjə̄ kow kum til tə́ ní, i nəkɔ́ n unjə̄ kow ngarān̄g kemjí gə̄ tə́, yā kadə̄ jə-gerə̄ń kɔsə gɔn yān ń ndə́lē ta kum Kərist tə́ ní.
7Banī jḭḭ ń j-ətō yá̰a̰ kənge kə́ gātə̄n i ngá̰ý ngeé ń toō ní, jə-to i tītə̄ jóó nánjə̄ gə̄ beé, yā kadə̄ de gə̄ gerə̄n̄neé kadə̄ tɔ́gə́ kə́ ngá̰ý kə́ to tayā ngeé ń toō ní, i yā Nə́ɓā ba i yājí jḭḭ alé. 8J-a̰a̰ tápə̄ ngá̰ý, banī yá̰a̰ gə̄ ń rāān̄jí adə̄ j-a̰a̰ tápə̄ ní, rējə̄n̄jí kɔ̄ɔ́ alé. Jə-ndi dan yá̰á̰ kə́ ngan̄g gə̄ tə́, kə́ ta róbə́ kə́ kadə̄ jə-teēń kum tə́ gətóo, banī j-aw̄ bátə́ anī jə-teē kum tə́. 9Rāān̄jí ndoō tə́, banī Nə́ɓā əya̰jí kɔ̄ɔ́ alé. Əsōn̄ sejí nang tə́, banī nujən̄ sejí kɔ̄ɔ́ alé. 10J-ətō Jeju kem dā̰ rɔ̄jí tə́ ngándáńg, yā kadə̄ ndi kə kumuú yā Jeju ɔjəń rɔ̄n kə̄ ndágá dā̰ rɔ̄jí tə́ ō. 11Tɔdɔ̄ jḭḭ ń jə-ndi kə kumjí ní, əlan̄jí ta yo tə́ kə dɔ ndɔ̄ gə̄ najə̄ yā Jeju tə́, yā kadə̄ ndi kə kumuú yā Jeju ɔjəń rɔ̄n kə̄ ndágá kem dā̰ rɔ̄jí kə́ a oy tə́ ō. 12I tītə̄ ń noō n yo a rāań kəla kemjí jḭḭ tə́, banī ndi kə kumuú a rāań kəla kemsí sḭḭ̄ tə́ ní.
13Ndangən̄ kem makətūbə̄ yā Nə́ɓā tə́ na:
m̄-taā kem, adə̄ i tām̄ najə̄ ń noō tə́ n m-ɔ̄rəń najə̄ ní.
Adə̄ jḭḭ jə-taā i kem ō n j-ɔrə̄ń najə̄ ní. 14Tɔdɔ̄ deē ń ndól̄ Kɔ́ɔ̄ɓē Jeju kə́ oy ní, jə-ger̄ kadə̄ ni a ndól̄jí naā tə́ kə Jeju ō, a əndājí kadən tə́ ngɔr naā tə́ sesí ō. 15Ba yá̰a̰ malang ń rāājí ní i tām̄ yāsí sḭḭ̄ tə́. I tītə̄ ń noō n Nə́ɓā a rajəń de gə̄ kə̄ kété kété, yā kadə̄ kutə ngé ndadə̄n yā kɔsəń gɔnən gə̄ i ngá̰ý ní.
Ndi kə kumuú kə ta kūl̄ taā kem
16I tām̄ najə̄ ń noō tə́ n j-əhɔń rɔ̄jí tɔgə ní. Ré rɔ̄jí kə́ ndágá a nujə i mbée gə̄gē anī, ndíĺjí kə́ kemeé a tél i kə́ kijə kə dɔ ndɔ̄ gə̄.
17Wur kɔl gə̄ ń əsōn̄ dɔjí tə́ kum ngōn̄ mbang kə́ sḛ́ý beē tə́ ní, ré deē əndādə́ kadə naā tə́ kə kɔsə gɔn kə́ a to ngándáńg ń yá̰á̰ kə́ tōr̄ gə̄ ngeé ń toō rāān̄ loon tām̄ yājí tə́ ní anī, asən̄ naā aĺ bátə́, tɔdɔ̄ kɔsə gɔn ní i kɔsə gɔn kə́ ngá̰ý tɔȳ yá̰á̰ kə́ tōr̄ gə̄ ń rāān̄jí ní. 18Tɔdɔ̄ j-əndā kumjí i dɔ yá̰á̰ kə́ deē a̰a̰ kə kumneé tə́ alé, banī i dɔ yá̰á̰ kə́ deē a a̰a̰ kə kumneé aĺ tə́. Yá̰á̰ ń deē a̰a̰ kə kumneé ní i yá̰á̰ kə́ a to dan i ngá̰ý alé, banī yá̰á̰ ń deē a̰a̰ kə kumneé aĺ ní, i yá̰á̰ kə́ a to ngándáńg.
Currently Selected:
Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad