Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 2
2
1Adə̄ yá̰á̰ ń mā m̄-ra dɔ tə́ ngan̄g ní n toó: M-ā m̄-tél yā kaw̄ gogə́ loosí kə kemḿ kə́ nelə̄m̄ aĺ aĺ bátə́. 2Tɔdɔ̄ ré m̄-rāāsí adə̄ kemsí nel̄sí aĺ ní, i náā n a rāā kadə̄ kemḿ mā a nelə̄m̄ ní? I ngé gə̄ ń m̄-rāādə́ adə̄ kemdə́ nel̄də́ aĺ ní ngóy aĺ a? 3I tām̄ najə̄ ń noō tə́ n m̄-ndangəń makətūbə̄ m-ə́lań kété m-ādə̄sí ní, i yā kadə̄ ré m-ūgə̄ anī ī-rāāmə̄n̄neé kadə̄ kemḿ nelə̄m̄ aĺ alé. Tɔdɔ̄ ngé gə̄ ń majə kadə̄ rāāmə̄n̄ kadə̄ kemḿ nelə̄m̄ ní i sḭḭ̄. Tɔdɔ̄ m̄-ger̄ majə kadə̄ sḭḭ̄ ní ré rɔ̄ḿ mā nelə̄m̄ anī, rɔ̄sí sḭḭ̄ malang a nel̄sí ō. 4Adə̄ tōr̄ rɔ̄ḿ ngá̰ý tā ba m̄-tə́gā i taḿ n m̄-ndangəń makətūbə̄ m-ādə̄sí kə man̄ nōó kumḿ tə́ ní. I yā rāāńsí kadə̄ kemsí nel̄sí aĺ alé, banī i yā kadə̄ sḭḭ̄ ī-gerīneé kadə̄ nelə̄m̄ sesí ngá̰ý.
Ī-mā̰yī rɔ̄sí dɔ deē ń rāā yá̰á̰ kə́ gō tə́ aĺ tə́ ní
5Ré deē kógə̄ḿ rāā yá̰á̰ kə́ to rɔ̄nel̄ aĺ anī, i mā n ni-rāām̄ adə̄ rɔ̄ḿ nelə̄m̄ aĺ ní alé, banī i sḭḭ̄ malang. Ré i yā kəda kə́ rɔ̄kum tə́ anī i sḭḭ̄ malang alé, ba i ngé kə́rēý gə̄ dɔ dáńsí tə́. 6Tām̄ yā de kə́ beé tə́ ní, mbātə́ ń kósə de gə̄ malang mbātə́n̄ najə̄ gōn tə́ ní asə. 7I beé ní majə kadə̄ ngɔlaā ī-mā̰yī rɔ̄sí dɔn tə́ ō, ī-sɔlī kemən ō, na sōgə́ rɔ̄nel̄ aĺ kə́ ngá̰ý al̄ naā ń kemən tə́ ní taā tɔ́gən kɔ̄ɔ́. 8Adə̄ m̄-dəjesí kadə̄ ɔ́jin̄ kadə̄ ni-ger̄ na ī-tárniī. 9Tɔdɔ̄ yá̰á̰ ń m̄-ndang makətūbə̄ m-ādə̄sí yā rāań ní n toó: I kadə̄ m̄-nāańsí ké ā ōōī taḿ tū yá̰a̰ gə̄ tə́ malang wa. 10Ré deē kógə̄ḿ rāā yá̰á̰ kə́ gō tə́ alé, adə̄ najə̄ əhɔn, ba ī-mā̰yī rɔ̄sí dɔn tə́ anī, mā m-ā m̄-mā̰ȳ rɔ̄ḿ dɔn tə́ ō. Ba yá̰á̰ ń m̄-mā̰ȳ rɔ̄ḿ dɔ tə́ ní, ré m̄-mā̰ȳ rɔ̄ḿ dɔ yá̰á̰ kə́rēý tə́ anī, i najə̄ yāsí sḭḭ̄ tə́ ta kum *Kərist tə́, 11yā kadə̄ *Sətan dumə̄ńjí kə gól̄ loo yānneé alé, tɔdɔ̄ jə-gerī yá̰á̰ ń ni-sāā rāā ní.
Pol ndi kə sōlōó kem ɓē kə́ Təroas tə́
12Dan ń m-ūgə̄ kem ɓē kə́ Təroas tə́ kadə̄ m-ɔ́jə Najə̄ kə́ Majə yā Kərist kemeé ní, Kɔ́ɔ̄ɓē teē ta róbə kəla kə́ bo ngá̰ý adə̄m̄ ɓá tā, 13ba ndílə́ḿ ndi i kə sōlōó kəkəre, tām̄ m-ə́nge ngōkó̰ó̰ḿ Titə alé. Adə̄ m̄-rāā de kə́ Təroas tə́ gə̄ lápə́ya ba m-āw̄ Masedəwan.
Tetə rɔ̄ɔ̄ yā Jeju Kərist
14Banī jə-ndadə̄ j-adə̄ Nə́ɓā, tām̄ ni-ndɔ́r̄jí aw̄ sejí gō *Kərist ń tetə rɔ̄ɔ̄ tə́ ní ngándáńg ō, ni-unjí rāań adə̄ de gə̄ gerə̄n̄ Kərist kə̄ loo gə̄ tə́ malang ō. Adə̄ to i tītə̄ sēē ítər kə́ otə majə kə́ taā loo beé. 15Tɔdɔ̄ jə-to i tītə̄ sēē ítər kə́ otə majə kə́ *Kərist ndējə̄ Nə́ɓā beé. Jḭḭ i sēē ítər tām̄ yā ngé gə̄ ń nin̄ i dɔ róbə kajə tə́ ní ō, tām̄ yā ngé tḭ̄ḭ̄ ta rɔ̄də́ gə̄ tə́ ō. 16Tām̄ yā ngé tḭ̄ḭ̄ ta rɔ̄də́ tə́ ɓáa i sēē nīń kə́ a əla deē ta yo tə́. Ba tām̄ yā ngé gə̄ ń nin̄ i dɔ róbə ndi kə kumuú tə́ ní ɓáa, i sēē ndi kə kumuú kə́ a rāā kadə̄ deē ndi kə kumneé. Ba i náā n asə rāā kəla kə́ tītə̄ ń noō ní? 17De gə̄ ngá̰ý a rāān̄ najə̄ yā Nə́ɓā i yá̰a̰ gātə̄ tə́, banī jḭḭ jə-to i tītə̄də́ aĺ ō, jḭḭ jə-rāā beé aĺ ō. Tām̄ i Nə́ɓā n əlají ní, j-ɔr̄ najə̄ kanjə̄ gír̄ kə́ rang kemjí tə́ ta kum Nə́ɓā tə́, kə gō ɓoo naā yājí kə *Kərist.
Currently Selected:
Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad