2 YÁ̰A̰ GƏ̄ 3
3
Salomo̰ rāā kújə yā Kɔ́ɔ̄ɓē
(Á̰a̰ī 1 Mba 6.1-38)
1Salomo̰ əla gír rāā kújə yā Kɔ́ɔ̄ɓē kem ɓē kə́ Jerusalem tə́ dɔ mbal̄ Moriya tə́, loo ń Kɔ́ɔ̄ɓē ndɔ̄bə̄ bɔbə̄n Dabid tū tə́ ní tə́, I loo ń Dabid rāā kété loo kənda kōō yā Ornan kə́ Yebus tə́ ní. 2Ni-əla gír rāā kújə́ ní i kem nāā kə́ nge ko̰ jōó tə́, kem ɓāl̄ ko̰o̰ ɓē yān kə́ nge ko̰ sɔ́ tə́.
3Ngə̄ra kújə́ ń Salomo̰ əndā yā rāań kújə yā Nə́ɓā ní n toó: Ngālən i kíl deē kutə mehḛ́ ō, laan i kíl deē kutə jōó ō. 4Ngōn̄ kújə́ kə́ ta róbə́ tə́ ń ngālən asən̄ naā kə laa kújə yā Nə́ɓāá ní, ngālən asə kíl deē kutə jōó ō, ngālən kə́ kə̄ dɔɔ́ asə kíl deē ɓú kə kutə jōó ō. Rāān̄ kemən kə lɔ́ŕ kə́ unjə̄ njáý njáý. 5Rāān̄ kem kújə́ kə́ bo kə kāgə̄ sipəres ba tə́ya̰n̄ gidə kāgə̄ gə̄ ní kə lɔ́ŕ kə́ hɔɔ́lɔ̄ péĺ péĺ ō, rāān̄ ta jī kāgə̄ túmbur gə̄ ō, hútə̄ mu lis gə̄ ō, gidə lɔ́ŕ ní tə́. 6Rāān̄ ro̰ kem kújə́ kə́ bo ní kə mbal̄ gə̄ kə́ gātə̄də́ i ngá̰ý gə̄ ɓáý to̰ ō. Lɔ́ŕ ń rāān̄neé kəla ń noō ní i lɔ́r kə́ Parbaim. 7Rāān̄ kem kújə́ ní i kə lɔ́rɔ́ malang: Rāān̄ tū kāgə̄ nga danən gə̄ tə́ ō, tū kāgə̄ ta róbə gə̄ tə́ ō, kadə ndogə̄ mbal̄ gə̄ tə́ ō, tū ta róbə gə̄ kə́ yā kudəń kə̄ kem kújú gə̄ tə́ ō, rāān̄ de kə́ dɔ rā̰ tə́ gə̄ kadə bɔr gə̄ tə́ ō. 8Rāān̄ kújə́ ń a ɓārə́n̄ na i loo kə́ táĺ ngá̰ý ní ō, ngālən asə kíl deē kutə jōó tītə̄ yā laa kújə yā Nə́ɓā ō, laan asə kíl deē kutə jōó ō. Lɔ́ŕ kə́ hɔɔ́lɔ̄ péĺ péĺ ń rāān̄ kemeé malang ní, kɔȳn asə kəlōo dūbú kutə jōó. 9Máyá̰ lɔ́r gə̄ ń rāān̄neé kəla ní kɔȳn asə ngán kəlōo ɓú mí. Tə́ya̰n̄ lɔ́r gidə kāgə̄ gə̄ kə́ gār̄ kújə́ tə́ ō.
10Gō tə́ anī rāān̄ de kə́ dɔ rā̰ tə́ gə̄ jōó kə gində̄ kə́ nō horoó ō, rāān̄ lɔ́r gidədə́ tə́ ō, ba tə́ndān̄də́ kem loo kə́ táĺ ngá̰ý ní tə́. 11-13De kə́ dɔ rā̰ tə́ gə̄ ní ran̄ i kə njadə́ dɔɔ́ kadə naā tə́, ba tūrə̄n̄ kumdə́ kə̄ ta róbə́ tə́. Bɔ̄gə̄də́ gə̄ i jōó jōó ō, jā̰n̄ bɔ̄gə̄də́ gə̄ ní ō. Ngāl̄ bɔ̄gə̄ de kə́ dɔ rā̰ tə́ kógə̄ḿ kə́ jā̰ ta naā tə́ i kíl deē mí. Ta bɔ̄gə̄n kə́ dām̄ kógə̄ḿ tə́ ɔdə kadə bɔr ō, ta bɔ̄gə̄n kə́ dām̄ kə́ noō tə́ ɔdə ta bɔ̄gə̄ de kə́ dɔ rā̰ tə́ kə́ nge ko̰ jōó ō. Adə̄ bɔ̄gə̄də́ kə́ sɔ́ mbak gə̄ kə́ jā̰ ta naā tə́ ní ngāl̄də́ i kíl deē kutə jōó. 14Ojōn̄ kūbə̄ kə́ yā gāngəń kem kújə kə kəlā lḛ́ḛ, ba əlan̄ kum man̄ yá̰á̰ kə́ ndul gusə gusə tə́ ō, kə́ kərē bḭḭ tə́ ō, kə́ kərē pírírí tə́ ō. Rāān̄ de kə́ dɔ rā̰ tə́ gə̄ tū kūbə̄ kə́ yā gāngəń kem kújə́ ní tə́.
Gində̄ nə̄ngaá kasə kə́ bo kə́ ngāl̄ ɓururu gə̄ ō, loo tun̄ yá̰a̰ ō
(Á̰a̰ī 1 Mba 7.15-22)
15Rāān̄ gində̄ nə̄ngá kasə kə́ bo kə́ ngāl̄ ɓururu gə̄#3.15 Gində̄ nə̄ngá kasə: Á̰a̰ī 1 Mba 7.15 jōó kə́ ngāl̄də́ kə kə̄ dɔɔ́ i kíl deē kutə mətá gidə i mí, yā tə́ndādə́ ta kújə yā Kɔ́ɔ̄ɓē tə́. Tə́ndān̄ yá̰á̰ kə́ tītə̄ jóo bo gə̄ tadə́ tə́ dɔɔ́. Yá̰a̰ gə̄ ní ngāl̄də́ kə́ kə̄ dɔɔ́ i kíl deē mí. 16Rāān̄ yá̰á̰ kə́ tītə̄ məde kə́ sūr̄ ta naā tə́ gə̄ tə́lan̄ ta gində̄ nə̄ngá kasə kə́ bo kə́ ngāl̄ ɓururu gə̄ ní tə́ dɔɔ́ ɓáý to̰. Gō tə́ anī rāān̄ yá̰á̰ súū yá̰a̰ kə kan̄ kāgə̄ gərenadə gēé asə ɓú ń noō ba tə́lan̄ tū kəlā məde gə̄ ní tə́. 17Túdə̄n̄ gində̄ nə̄ngá kasə kə́ bo kə́ ngāl̄ ɓururu gə̄ ní ta kújə yā Kɔ́ɔ̄ɓē tə́: Kógə̄ḿ i dɔ jī ko̰ tə́ ō, kə́ noō i dɔ jī gel tə́ ō. Rī nge kə́ dɔ jī ko̰ tə́ na i Yakin, kumən na Nə́ɓā i nge mbūsə̄ ngəra yá̰a̰ kadə̄ ra ngan̄g, ba rī nge kə́ dɔ jī gel tə́ na i Boaj, kumən na Tɔ́gə i kem jī Nə́ɓā tə́.
Currently Selected:
2 YÁ̰A̰ GƏ̄ 3: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.