2 YÁ̰A̰ GƏ̄ 2
2
1Ni ɔy de gə̄ dūbú kutə sīrí kadə̄ ətōn̄ yá̰a̰ ō, de gə̄ dūbú kutə sɔ́sɔ́ kadə̄ tə́gān̄ mbal̄ dɔ mbal̄ bo tə́ ō, de gə̄ dūbú mətá kə ɓú mehḛ́ kadə̄ əndān̄ kumdə́ gír kəlaá ō. 2Salomo̰ əla kəla əda Hiram mban̄g kə́ Tir na:
Ḭ̄ ādə̄ bɔbə́ḿ Dabid kāgə̄ sédər gə̄ adə̄ rāań kújə yān. 3Ba mā m̄-gḛy i rāā kújə́ kə́ tām̄ yā rī Kɔ́ɔ̄ɓē Nə́ɓā yāḿ tə́, kadə̄ ra tām̄ yān tə́. A róōn̄ ndujə̄ yá̰á̰ kə́ kotə majə gə̄ tām̄ yā Kɔ́ɔ̄ɓē tə́ kem kújə́ ní tə́ ō, a ɓōkə́n̄ mápá kə́ ndējə̄ gə̄ ta kum Kɔ́ɔ̄ɓē tə́ kem kújə́ ní tə́ ngándáńg ō, a ndējə̄n̄ Kɔ́ɔ̄ɓē yá̰a̰ tun̄ kə́ róō horoó dəloí ō, loo sɔlí ō, yá̰a̰ tun̄ gə̄ kə́ róō horoó ndɔ̄ sabat gə̄ tə́ ō, ndɔ̄ teē nāā gə̄ tə́ ō, ndɔ̄ rāā nāā gə̄ yā Kɔ́ɔ̄ɓē Nə́ɓā yājí tə́ ō, kem kújə́ ní tə́. A tunə̄n̄ yá̰a̰ gə̄ ń noō dɔ nang kə́ Israel tə́ i ngáńdáńg. 4Tá kújə́ ń m̄-sāā rāā ní i kújə́ kə́ bo, tɔdɔ̄ Nə́ɓā yājí i Nə́ɓā kə́ bo tɔȳ nə́ɓā gə̄ malang. 5Kə́ rɔ̄kum tə́ tā anī de kə́ asə rāā kújə kadə̄n gətóo, tām̄ dɔ rā̰ ń bo ngá̰ý ní gə̄gē asən alé. Mā kə dɔḿ m-ásə rāā kújə tām̄ yān tə́ alé, banī m-ā m̄-rāā i loo kə́ kadə̄ de gə̄ ran̄ tū tə́ ndējə̄nən̄neé yá̰á̰ kə́ tun̄ gə̄ ngóy. 6Beé ní ə́la kə kɔdə̄ kógə̄ḿ ādə̄m̄, kɔdə̄ kə́ ger̄ rāā kəla lɔ́r ō, kəla gində̄ arjā̰a̰ ō, gində̄ nə̄ngá kasə ō, gində̄ kə́ karī ō, kə́ ger̄ rāā kūbə̄ kə́ kəla kum man̄ yá̰á̰ kə́ kərē gə̄ tə́ ō, kum man̄ yá̰á̰ kə́ kərē pírírí gə̄ tə́, aláa ndul gusə gusə gə̄ tə́ ō, kə́ ger̄ tɔ́sə yá̰a̰ ō. Ni a rāā kəla kə kɔdə̄ yāḿ gēé, ngé gə̄ ń bɔbə́ḿ Dabid gə̄rādə́ á ndin̄ Jerusalem aláa loo kə́ rang gə̄ tə́ dɔ nang kə́ Juda tə́ ní, 7Əla kə kāgə̄ sédər gə̄ kə́ Liban ō, kāgə̄ sipəres gə̄ ō, kāgə̄ santal gə̄ ō, ādə̄m̄. Tɔdɔ̄ m̄-ger̄ kadə̄ ngé kəla yāí gə̄ gerə̄n̄ tə́gā kāgə̄ gə̄ kə́ Liban ngá̰ý. Ngé kəla yāḿ gə̄ a aw̄n̄ yā rāā kəla kə ngé kəla yāí gēé, 8adə̄ nin̄ malang a sāān̄ kāgə̄ ngá̰ý tām̄ yāḿ tə́ tɔdɔ̄ kújə yā Kɔ́ɔ̄ɓē ń m̄-gḛy rāā ní i kújə́ kə́ bo ō, kə́ majə ka̰ā̰ ngá̰ý ō. 9Ngé kəla yāí gə̄ ń a tə́gān̄ kāgə̄ ní, m-ā m-ādə̄də́ kōō gémē kə́ kɔȳn asə kəlōo dūbú mehḛ́ ō, kōō ɔ́rjə kə́ kɔȳn asə kəlōo dūbú mehḛ́ ō, kasə nduú jóo dūbú kutə jōó ō, kū yibə̄ kə́ bo gə̄ dūbú kutə sɔ́sɔ́ ō. 10Hiram mban̄g kə́ Tir tél ndang makətūbə̄ əlań gogə́ adə̄ Salomo̰. Najə̄ ń ni ɔr seneé kemeé ní n toó: I tām̄ táŕ kə́ Kɔ́ɔ̄ɓē táŕ gír deē yān gə̄ n ni əndāineé mban̄g dɔdə́ tə́ ní. 11Kɔ́ɔ̄ɓē Nə́ɓā yā Israel ń rāā dɔ rā̰ ō, dɔ nang ō ní, m̄-ɓōkə́n tɔ̄ȳ, tɔdɔ̄ ni-adə̄ Dabid ngōn̄ kə́ ngáā ngá̰ý ō, kə́ kumən edə̄ ō, kə́ ger̄ yá̰á̰ ngá̰ý ō, kə́ asə rāā kújə tām̄ yā Kɔ́ɔ̄ɓē tə́ ō, kújə mban̄g kə́ tām̄ yān nəkɔ́ tə́ ō. 12Adə̄ ngɔlaā ní m-ə́la kə kɔdə̄ kógə̄ḿ kə́ ger̄ yá̰á̰ ngá̰ý m-ādī. Rīn na i Hiram Abi. 13I ngōn̄ dəyá̰ kógə̄ḿ kə́ gír ɓē yā Dan tə́, ba bɔbə̄n i de kə́ Tir. Ni ger̄ rāā kəla lɔ́r ō, kəla gində̄ arjā̰a̰ ō, kəla gində̄ nə̄nga kasə ō, gində̄ kə́ karī ō, kəla mbal̄ ō, kəla kāgə̄ ō, kəla tə́la kūbə̄ gə̄ kum man̄ yá̰á̰ kə́ kərē tə́ ō, kum man̄ yá̰á̰ kə́ ndul gusə gusə tə́ ō, kum man̄ yá̰á̰ kə́ kərē pírírí tə́ ō, ger̄ rāā kəla kūbə̄ lḛ́ḛ ō, ger̄ kəla tɔ́sə yá̰a̰ ō. Kəla kə́ rá nəkɔ́ ń deē adə̄n kadə̄ rāā ní ni a rāā ō. Ni a rāā kəla kə kɔdə̄ yāí īkɔ́ gə̄ ō, kə kɔdə̄ gə̄ yā kɔ́ɔ̄ḿ Dabid ń i bɔbí ní ō. 14Ba ngɔlaā ní kɔ́ɔ̄ḿ mban̄g, kōō gémē ō, kōō ɔ́rjə ō, yibə̄ ō, kasə nduú ō ń ə́da najə̄n ní, ə́lań ādə̄jí. 15J-a j-aw̄ yā tə́gā kāgə̄ malang ń kemií gḛy ní dɔ mbal̄ Liban tə́ yā kəlań kadī. J-a j-ɔsə̄də́ ta naā tə́ kadə̄ laa, ba j-a jə-tó̰ō̰də́ ta naā tə́ kə kəlaá. J-a jə-ɓōkə́də́ dɔ bā bo tə́ yā kaw̄ń bátə́ Japa kadī. Ba ḭ̄ ā ɔ́ýdə́ noō yā kaw̄ń Jerusalem. 16Salomo̰ ɔy de kə́ dəngam gə̄ malang kə́ tə̄rā gə̄ ń ndin̄ dɔ nang kə́ Israel tə́ ní, kə gō kutədə́ ń bɔbə̄n Dabid tə́dańdə́ ní. Kutədə́ malang i deē 153 600. 17Ni-ɔr̄ de gə̄ 70 000 dandə́ tə́ kadə̄ ətōn̄ yá̰a̰ ō, 80 000 kadə̄ tə́gān̄ mbal̄ dɔ mbal̄ bo tə́ ō, 3 600 kadə̄ əndān̄ kumdə́ gír kəlaá ō, kadə̄ rāān̄ kəla kə de gə̄ ń noō malang ō.
Currently Selected:
2 YÁ̰A̰ GƏ̄ 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.