2 YÁ̰A̰ GƏ̄ 4
4
1Rāān̄ loo tun̄ yá̰á̰ kógə̄ḿ kə gində̄ nə̄ngá kasaá. Ngālən i kíl deē kutə jōó ō, laan i kíl deē kutə jōó ō, ngālən kə́ kə̄ dɔɔ́ i kíl deē kutəō.
Bay kə́ bo ō, səmbē gə̄ kə́ rāān̄də́ kə gində̄ nə̄ngá kasaá ō
(Á̰a̰ī 1 Mba 7.23-26)
2Rāān̄ bay kə́ bo kə́ gōr̄ gong kə gində̄ nə̄ngá kasaá. Laan i kíl deē kutə ō, ngālən kə́ kə̄ dɔɔ́ i kíl deē mí ō, ɓōdə̄n i kíl deē kutə mətá ō. 3Rāān̄ man̄g gə̄ gidə bay ní tə́ adə̄ gīrə̄n̄ gidə əlan̄ ta naā tə́, gír bay ní tə́ nang tə́. Man̄g kutə kógə̄ḿ i tū loo kə́ asə kíl deē kógə̄ḿ tə́. Rāān̄ man̄g gə̄ ní adə̄ ran̄ kə ta naá gír loo jōó. Nōn̄ man̄g gə̄ ní horoó i naā tə́ kə bayaá. 4Bay ní ndi i dɔ man̄g gə̄ kə́ rāān̄də́ kə gində̄ nə̄ngá kasaá tə́. Man̄g gə̄ ní i kutə gidə i jōó. Kə́ mətá gə̄ tūrə̄n̄ kumdə́ kə̄ dām̄ mbɔ́r ɓē kə́ ko̰ó̰ tə́ ō, kə́ mətá gə̄ kumdə́ i kə̄ dām̄ kə́ no ɓē tə́ ō, kə́ mətá gə̄ kumdə́ i kə̄ dām̄ mbɔ́r ɓē kə́ geleé tə́ ō, kə́ mətá gə̄ kumdə́ i kə̄ dām̄ kə́ gír ɓē tə́ ō. Nin̄ malang ní tūrə̄n̄ gírdə́ i kum kə̄ kemeé, gír bayaá. 5Nder̄ bay ní asə kə laa da jī deē. Tan kə́ teē kə̄ ndágá ní rāān̄ adə̄ to tītə̄ ta kópə, adə̄ to i tītə̄ hútə̄ lis#4.5 Lis: Á̰a̰ī 1 Mba 7.19 beé. Ré man̄ i kem jóo man̄ dūbú mətá pá tá a rosə kemən.
6Rāān̄ səmbē kə́ lú gə̄ kutə kógə̄ḿ kə gində̄ nə̄ngá kasaá. Tə́ndān̄ kə́ mí gə̄ dām̄ kújə yā Kɔ́ɔ̄ɓē kə́ ko̰ó̰ tə́ ō, kə́ mí gə̄ dāmə̄n kə́ geleé tə́ ō, i kə rī tə́go yá̰a̰ tə́gon̄ dā̰ kə́ yā róō horoó gə̄ i kem səmbē gə̄ ní tə́, banī ngé tun̄ yá̰a̰ gə̄ a tə́gon̄ rɔ̄də́ i kə man̄ kə́ kem bayaá.
Tə́dan̄ yá̰á̰ kə́ rāā kə gindīí gə̄
(Á̰a̰ī 1 Mba 7.40-51)
7Rāān̄ ɗəra hor gə̄ kutə kógə̄ḿ kə lɔ́rɔ́, kə gō ń ɔjən̄neé kadə̄ rāān̄neé ní, ba aw̄ tə́ndān̄də́ kem kújə yā Kɔ́ɔ̄ɓē tə́. Kə́ mí gə̄ i dām̄ kə́ ko̰ó̰ tə́ ō, kə́ mí gə̄ i dām̄ kə́ geleé tə́ ō. 8Rāān̄ tábəl gə̄ kutə kógə̄ḿ ba tə́ndān̄də́ kem kújə yā Kɔ́ɔ̄ɓē tə́, kə́ mí gə̄ i dām̄ kə́ ko̰ó̰ tə́ ō, kə́ mí gə̄ i dām̄ kə́ geleé tə́ ō. Rāān̄ kópə kə́ yā tə́teń yá̰a̰ gə̄ ɓú kə lɔ́rɔ́. 9Rāān̄ ndágə loo kə́ gīr̄ gidə kújə yā Kɔ́ɔ̄ɓē yā ngé tun̄ yá̰a̰ gə̄ ō, rāān̄ ndágə̄ loo kə́ rang kə́ bo ngá̰ý ō, rāān̄ ta róbə gə̄ kə́ yā kudəń kə̄ ndágə̄ loo gə̄ ní tə́ ō. Rāān̄ gidə bápə gə̄ kə́ tū ta róbə gə̄ ní tə́ i kə gində̄ nə̄ngá kasaá.
10Əndān̄ bay kə́ bo kə́ gōr̄ gong ní i dām̄ kújə yā Kɔ́ɔ̄ɓē kə́ ko̰ó̰ tə́, ngɔr kə̄ kadə kílən kə́ dɔ dáń mbɔ́r ɓē kə́ geleé tə́ kə gír ɓēé tə́. 11Hiram rāā səmbē kə́ lú gə̄ ō, pél gə̄ ō, kópə kə́ yā tə̄teń yá̰a̰ gə̄ ō. Ni tɔ̄l̄ ta kəla gə̄ ń kadə̄ ni-rāā tām̄ yā mban̄g Salomo̰ tə́ kem kújə yā Nə́ɓā tə́ ní. 12Rāā gində̄ nə̄ngá kasə kə́ bo kə́ ngāl̄ ɓururu gə̄ jōó ō, yá̰á̰ kə́ tītə̄ jóo bo gə̄ jōó yā tə́ndādə́ tadə́ gə̄ tə́ dɔɔ́ ō, yá̰á̰ kə́ tītə̄ réng gə̄ jōó yā seĺdə́ dɔ jóo bo gə̄ ní tə́ ta gində̄ nə̄ngá kasə kə́ bo kə́ ngāl̄ ɓururu gə̄ ní tə́ ō. 13Kan̄ kāgə̄ gərenadə gə̄ ɓú sɔ́ kə́ tə́lan̄ kə ta naá gír jōó tū réng gə̄ ń tə́nīn̄ dɔ jóo bo gə̄ tə́ ní ō, 14ni-rāā púsə gə̄ ō, səmbē kə́ lú gə̄ kə́ yā tə́ndādə́ ta púsə gə̄ ní tə́ ō, 15bay kə́ bo kə́ gōr̄ gong ō, man̄g kə́ bəra gə̄ kutə gidə i jōó kə́ a ətōn̄ bay ní ō, 16yá̰a̰ kɔy bū gə̄ ō, pél gə̄ ō, yá̰á̰ tɔ́sə dā̰ dɔ hor tə́ gə̄ ō. Yá̰a̰ gə̄ ń noō malang ń Hiram Abi rāādə́ tām̄ yā kújə yā Kɔ́ɔ̄ɓē tə́ kə gō ndū mban̄g Salomo̰ó̰ ní, i kə́ rāādə́ kə gində̄ nə̄ngá kasə kə́ kusə gidə kadə̄ ndə́lēé. 17Nōn̄ yá̰a̰ gə̄ ní i gō nang kə́ Jurdḛ tə́ dɔ dán ɓē kə́ Sukot kə ɓē kə́ Seredata tə́, kem jóo nō gində̄ gə̄ kə́ rāān̄də́ kə nánjá tə́. 18Salomo̰ rāā yá̰a̰ gə̄ ní i ngá̰ý adə̄ kɔȳ gində̄ nə̄ngá kasə ń rāań ní deē asə ger̄ alé. 19Salomo̰ rāā yá̰a̰ malang kə́ kem kújə yā Nə́ɓā tə́ ō, adə̄ i loo tun̄ yá̰á̰ kə́ rāā kə lɔ́r ō, tábəl gə̄ ń a ɓōkə́n̄ mápá kə́ ndējə̄ gə̄ dɔ tə́ ní ō, 20ɗəra hor gə̄ ō, bay hor kə́ ta tə́ gə̄ kə́ yā kəndā hor tū tə́ kadə̄ o̰o̰ kə gō looneé ta kújə kə́ yā ɓōĺ gidə tə́ kə́ rāān̄də́ kə lɔ́r kə́ hɔɔ́lɔ̄ pél pél ō. 21Hútə̄ kāgə̄ gə̄ kə́ rāān̄də́ tū kāgə̄ hor gə̄ tə́ ō, bay hor gə̄ ō, yá̰a̰ kūsə́ ta kəlā hor gə̄ ō, i kə́ rāān̄də́ kə lɔ́r kə́ majə ngá̰ý. 22Kəyā gə̄ ō, səmbē tə̄té yá̰a̰ gə̄ ō, kópə gə̄ ō, ganán gə̄ ō, i kə́ rāān̄də́ i kə lɔ́r kə́ hɔɔ́lɔ̄ pél pél. Ta róbə́ kə́ yā kudəń kə̄ kem kújə yā Kɔ́ɔ̄ɓē tə́ ō, ta róbə gə̄ kə́ kem kújə́ kə́ yā kudəń kə̄ kem loo kə́ táĺ ngá̰ý tə́ ō, ta róbə gə̄ kə́ tū kújə yā Kɔ́ɔ̄ɓē tə́ kə́ yā kudəń kə̄ kem kújə kə́ bo tə́ ō, i kə́ rāā kə lɔ́rɔ́.
Currently Selected:
2 YÁ̰A̰ GƏ̄ 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.