Nihimaya 3
3
Upla bani warkka yaban ba
1Bamna prîs tara Eliasib buan bara prîs ai tahkia aikuki Sîp nani dimaia getka ba kli paskan. Playka tara nani ba bapi getka nani ba paman, bara kutbanka ba kli Handat tawerka nani ba wina paski wan ban Hananel tawerka ba kat. 2Witin nani paskan ba wina ai kanra waia ba, Jeriko waitnika nani sin bal kutbanka paski banhwi kan, baha ningkara Imrí luhpia waitna Zacur sin paskan. 3Senaá kiamka nani ba bal, Inska nani getka ba paski banhwan. Playka nani ba bapan bara durka nani paman, praki swiaia dusa nani sin paskan. 4Baha wina kutbanka pîska wala ba Meremot, Urías luhpia waitna ba bara Cos mulika ba, baha nani bal paskan; bara baha wina kutbanka pîska wala ba Mesulam, Berequías luhpia waitna ba, bara Mesezabel mulika ba, baha nani bal paskan; baha wina kutbanka pîska wala ba Sadoc, Baaná luhpia waitna ba bal mâkan. 5Tecoa uplika nani sin balan, baha pîska wala kutbanka ba paskan. Baha uplika kulkanka tara bri nani lika wark takras kan, hilp munaia want apia kan ai tâ uplika nani ra, purara bûi kaiki banhwi kan. 6Joiadá, Paséah luhpia waitna, bara Mesulam, Besodías luhpia waitna wal, Jesaná getka kutbanka ba paskan. Playa bapan durka nani sin paski paman, prakaika dusa nani sin paskan. 7Baha wina kutbanka pîska wala ba, Melatías, Gabaón wina ba, bara Jadón, Meronot wina ba, baku sin Gabaón bara Mispá wina uplika nani ba aikuki bal mâkan. Baha pliska nani ba sika Éufrates awala muna tani ra tasbaya wihtka ba lâka munhtara iwi banhwi kan, baha nani bal paskan. 8Witin nani lama kat kutbanka pîska wala ba, Uziel, Harhaías luhpia waitna gul ni diara papaskra kata ba bal paskan. Baha wina kutbanka pîska wala ba Hananías, isint paski waitnika ba bal paskan. Witin wâl sika Jerusalem walpaya kutbanka ba kli bukan, tnaya kutbanka bîla tarkika ba kat. 9Baha wina kutbanka pîska wala ba Refaías, Hur luhpia waitna, Jerusalem ra tasbaya pîs kum wihta aimaki kan ba, bal aisawanka ba paskan. 10Baha wina pîska wala ba Jedaías, Harumaf luhpia waitna ba, ai watla latka kat pîska ba kutban, bara baha wina ai kainara ba lika, Hatús luhpia waitna Hasabnías bal kutban.
11Malquías, Harim luhpia waitna ba, bara Hasub, Pahat-moab luhpia waitna ba wal, kutbanka pîska wala aisawan kan ba paskan, bara Kubus nani tawerka sin paskan. 12Baha wina kutbanka pîska wala ba Salum, Halohés luhpia waitna, Jerusalem tasba pîska wala kum ra wihta aimaki kata ba, ai lupia mairin nani aikuki bal paskan. 13Baha wina, Hanún bara Zánoah ra iwi uplika nani aikuki, il bîla ra waia getka ba paskan. Durka nani sin paskan, prakaika dusa nani ba sin, bara tawan walpa kutbanka ba sin 1,500 pît kutban, ban tawan wina Tâski saki yakabaika getka ba kat. 14Malquías, Recab luhpia waitna, Bet-haquérem tasbaya wihtka ba bal, tawan wina Tâski sakaia getka baha durka nani paskan, prakaika dusa nani ba sin.
15Salum, Colhozé luhpia waitna ba, Mispá tasbaya wihtka aimaki ba, Lî kârma plapi ba getka paskan: durka purara dista yabi kaia ba paskan, bara prakaika dusa nani ba sin paskan, baku sin Siloé ra, king tangnika giadinka ra, lî watla walpaya kutbanka slingwan kan ba sin paskan, tawan wina mina mangka kum Debit Tawanka bâk iwi ba kat paski brih wan. 16Nihimaya, Azbuc luhpia waitna ba, Bet-sur tasbaya bakriki ra wihta aimaki ba, witin sin bal tawan ba kli kutban, Debit raitika kaina ba kat, baha wina ban suldiar nani kwartilka bâk lui lî watla ba kat brih wan.
17Libait nani sin balan tawan kutbanka ba kli paskaia: Rehúm, Baní luhpia waitna ba; baha wina kau kainara paskan ba Hasabías, Queilá tasbaya ra wihta ba bal ai uplika nina ra paskan. 18Bara baha wina kutbanka pîska wala ba lika, Bavai, Henadad luhpia waitna Queilá tasbaya pîska wala kum ra wihta ba, ai uplika nani aikuki bal mâkan; 19bara baha tâka ba wina Éser, Jasua luhpia waitna, Mispá ra wihta ba bal paskan aiklabaia dukia nani auhbaia watla lama bâk tawi kutbanka ba paski banhwan. 20Bara witin wina Baruc, Zabai luhpia waitna ba bal, baha wih tawi ba tâka wina paski, prîs tara Eliasib watla dimaika ba kat paski brih wan; 21bara Meremot, Urías luhpia waitna bara Cos mulika ba, kutbanka wala ba paskan, Eliasib watla ba wina ban paski ai tâura brih wan.
22Kutbanka pîska wala ba, Jordan ilka bîla ra iwi prîska nani ba bal paskan. 23Baha wina tâka ba, Benjamín bara Hasub wal bal witin nani ai watla nani mawan kat paski brih wan. Bara witin nani ningkara, Azarías, Maaseías luhpia waitna bara Ananías mulika ba bal, witin nani ai watla lama tani ba kutban. 24Baha wina tâka ba paskan, Binuy Henadad luhpia waitna ba bal kutbanka ba Azarías watla ba wina laih walpa kutbanka un rayka bulwi tawi ba kat. 25Witin wina Palal, Uzai luhpia waitna ba bal, baha un rayka bulwi tawan ba wina paski, ban king watla purara tawer kum ba kat brih wan, silak watla lama ba kat. Baha wina kli Pedaías, Parós luhpia waitna ba bal, baha tâka ba paskan, 26ban Lî watla getka ba kat, lalma tani ra tawer laihura kaikaia watla ba lama kat. (Ófel ra iwi uplika nani ba lika tempel ra wark dauki kan.) 27Tecoa wina uplika nani ba bal, baha tâka swin ba wina kutban tawer purara laihura kaikaia kau tara ba lama kat.
28Aras nani dimaika wina, prîs nani bani ba ai watla latka ba sut walpa ni kutban. 29Witin nani kutbi swin tâka ba wina Sadoc, Imer luhpia waitna ba bal, witin ai watla mawan ba kat kutban; bara Semaías luhpia waitna Secanías balan, witin sika lalma tani wina dimaia durka ba aihwaki kaiki kan, witin sin pîska wala ba kutban. 30Witin ai ninara Hananías luhpia waitna, Selemías balan bara Hanún sin, witin sika Salaf luhpia waitna matsip ba ningka ba, witin sin tawan ba kutban; witin nani ninara balan ba Mesulam luhpia waitna Berequías bal ai watla latka pîska ba paskan. 31Bara silbar ni diara papaskra Malquías bal, tempel watla ra wark dadaukra nani watla bara diara atkaia pîska ba sin paskan, baha wina lâ daukaia watla ra dimaika lama bâk aihwawakra bâra ba un rayka tani kat sin kutbi brih wan. 32Bara silbar ni diara papaskra bara diara âiatkra nani ba, aihwawakra main kaiki ba un rayka bulwi tawan ba wina, Sîp nani dimaika ba kat kutban.
Currently Selected:
Nihimaya 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua