Nihimaya 4
4
Waihla nani bal Ju nani lawaska kikan ba
1 #Naha borska nani 4.1-23 na bors. wala 3.33—4.17 ra kli baku ulban sa, baku Hibru nani ulbanka baku sa. Sambalat walan yang nani tawan kutbanka ba walpa ni kli kutbi banhwisna, bara kasak ai kupia sauhki lawan, mahka Ju nani lawaska kikaia sturi aisin; 2ai pânika nani wali kan, Sameria wina aiklaklabrika nani sin wali kan witin aisin: “¿Ju nani ba dîa lukisa sanglang bla tauki ba? ¿Dîa witin nani lukisa swika kli sakripais dauki kabia? ¿Apia kaka witin nani lukisa ki yu kumi ra warkka ba sut daukaia? ¿Dîa witin nani lukisa ki diara aman paski swin ba wina walpa pain nani sakaia?”
3Tobías Amón wina ba sin ai lamara bûi kan, bara kau pura praki aisin: “Witin nani kutbanka paski ba lawaska kikaia dukiara, kaiki banhs: ¡sikiski mita sin baha slingbaia sip sa, baha purara ulbia kaka!”
Nihimaya ai pura sunisa
4Bara yang puri sunri: “Yang nani Gâdki: man wals nahki baha nani yang nani laiwaska kiki ba. Bamna lahtubanka bîla aisi ba, man bui yas witin nani ai purara kauhbia, ai waihla nani mihta ra kauhbia bara alki alba brih kuntri wala ra brih wabia. 5Witin nani watawi lâka bara saurka lâka dauki ba diki sâkpara, man kaiki bas, kan tawan kutbanka kli mâki uplika nani bara witin nani mita mapara saura aisi banhwan bamna.”
Waihla nani ba mita tayahki kan
6Bamna yang nani tawan kutbanka ba pat bakriki paski banhri kan, upla nani ba kasak wilinkira warkka ba dauki banhwi ba mita. 7Sakuna Sambalat, Tobías, Arabia uplika nani, Amón uplika nani bara Asdod uplika nani walan Jerusalem tawan kutbanka ba pat sut mâkan, mahka unta nani ba lalaubisa, bara witin nani ba ai kupia sauhki kasak pali lawan. 8Bamna witin nani mahka asla taki aisi kaikan nahki bal Jerusalem ba mapara aiklabi sauhki tikaia. 9Bara yang nani mahka Gâdki ra puri sunri, bara witin nani mapara aihwawakra nani mangkri, tihmia bara kakna aihwaki wan kaina kaiki kan. 10Ban sakuna Juda uplika nani ba buan bara naku aisan: “Twatwilkra nani karnika ba kasak pali mâyara iwan sa, diara slingwan nani ba kau ban ailal sa, tawan kutbanka na yawan sip pali paski danh takbia apia.”
11Wan waihla nani ba lukan yawan wan dara sin walbia apia, kaikbia sin apia witin nani bal wan tilara dimi wan iki tiki warkka ba takaskbia ba kat lika wan tânka bribia. 12Sakuna Ju nani witin nani ai tilara iwi kan ba aima ailal balan bara yawan ra wan win, baha uplika nani ba wan tnaya kir wina bal wan mapara aiklabaisa, 13Ba mita yang wîri ani pîska mâyara kan ba ra, kutbanka wala ra, bara ani tani ra param kan ba ra sin, upla nani ba kiamka bani wina bara aihwakaia mangkri, ai sordka nani bri, ai langsika nani bri bara ai trisbaya nani ba sin brih aihwakaia. 14Sakuna yang kaikri upla nani ba sibrin dauki kan, bara yang mita wihtka nani ra, wark tâ bri nani ra bara tawan uplika nani ra sin naku wîri: “Man nani lika witin nani mawan ra sîa bripara, kupiam krauks Dawan tânka ba, nahki tara sibrinkira ba, bamna man nani luhpiam waitna nani, luhpiam mairin nani, mairin nani bara wamtla uplika nani tâwan pât taki banhwi bas.”
15Bara wan waihla nani ba walan, yang nani ai mapara aiklabaia kapri ba, bara Gâd mita sin witin nani daukaia luki kan ba slingbi sauhkan, bara yang nani sut kli tawi balri taim, kutbanka paskaia warkka bri banhri. 16Baha piua ba wina upliki nani dakni kum wark dauki kan, bara dakni wala nani ba lika ai mihta ra langsa nani brih, ai kaina kahbaia dukia nani, pantamangka nani, ai lama prakaia dukia nani sin bri kan. Bara wihta nani sut ba tâ baiki kan Juda uplika nani ra, 17uplika tawan kutbanka mâki nani ba. Bara uplika nani kutbanka paski kan ba, walpa auhbi karbi nani kan ba bara ai pahpaya ra twilki nani kan ba sut, ai mihta kumi ni warkka ba dauki kan, sakuna ai mihta wala ba lika aiklabaia dukia nani ba bri kata, 18upla sut baha paskaia wark taki banhwi kan ba, ai maisa ra sord bri kan, bara trumpit puhbaia uplika ba lika yang tnaiya ra bâra kata, 19kan yang mita upla tara nani ra, wihta nani, wark tâ brabrira nani, bara upla sut ra naku wîri: “Warkka nani na tara bara uya pali sa, bara yawan wan lamara apia, kumi wala ba wal laihura wark takisa. 20Bamna man nani trumpit binka walma ba ra, bahara yawan aikuki asla taki banhwaia sma bara wan Gâdka ba yawan tâwan aiklabia.”
21Bamna naku sika yang nani warkka ba taki banhwi kapri, lapta takuya ba wina lapta dimuya ba kat, dakni bakriki ba ai langsika ai mihta ra bri kan wark danh takuya ba kat. 22Baha purkara sin, witin nani ra wîri, upla sut bara wark taki nani ba sin, Jerusalem kutbanka bilara kabia kakna bara tihmia sin, baku ba ra tihmia ra main kaiki, bara kakna ra lika warkka ba dauki kabia. 23Bara yang sin bara taiya nani aikuki wark taki nani ba sut, aihwawakra nani ba sin sut, prâika nani ba daikras, upla kumi bani ai mihta ra langsa bri kan.
Currently Selected:
Nihimaya 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua