Nihimaya 2
2
Artajerjes bui Nihimaya ba Jerusalem ra blikan
Baha piua ra, yang lika king Artajerjes ra wain yabi kaia warkka bri kapri. 1Bara Artajerjes pat 20 mani king aimaki kan ba ra, Nisán katka yua kum, wain ba yang bui king ra yabi katna ba ra, sari pali kapri ba king ai kaikan, 2bara yang ra ai makabi walan:
—Mai kaikisna man sari sma. ¿Dîa mai daukisa? Siknis mai dauki baku apia sma, bara trabil kum bri kaia sma.
Baha minitka kat sibrin tara kum ai daukan, 3bara yang bui king ra wîri:
—¡King tara, piu bani raya ban kama! ¿Nahki muni yang maiwan ba ban lilia kabia, kan yang aisiki nani bikan tawanka ra raitika ba sut slingban, bara getka nani ba sin sut pauta ni angki sauhkan ba?#2 Ki 25.8-10; 2 Kr 36.19; Jir 52.12-14.
4Bara king ba yang ra makabi walan:
—¿Dîa sip sna man dukiamra daukaia?
Baku bamna, yang lika kasbrika pura Gâdka ra puri sunri, 5ningkara king ra wîri:
—Man king tara aitani lukisma kaka, baku sin man bui yang ra yamni ai kulkisma kaka, kingki tara, mamkabisna Juda ra aisiki nani bikan tasbaya ba ra ai blîks wamna, bara tawanka ba kli paskamni.
6Bara king ba lamara maya mairin ba iwi kan, bara witin bui yang ra ai win:
—¿Impakankam ba yu an kabia ki? ¿Bara ahkia kli tawi balma?
Yang yui ba yabri ningkara, king ba ai âuyapah pali takan ai blikaia. 7Baha purkara king ra yang wîri, witin aitani lukisa kaka, wauhtaya sin kum ulbi adar aikbia, Éufrates awala muna tani ra bara wihta nani Éufrates muna tani ra iwi nani ra wibia, yabalki param aikbia ai swika lui waia, Juda ra dimamna ba kat; 8bara wauhtaya wala kum sin ulbi aikbia Asaf ra yaia, witin lika unta ra dus nani pâwi ba king bui yan pura kaiki kan ba, witin tat aikbia tempel kan kahbaika pliska getka nani, utla nani, yang dimaia playka nani ba paskaia dukiara. Bara dîa makabri ba, king baha sut aikan, Gâd kupia yamnika makabri ba yang purira kan ba mita.
9Baha ningkara, yang Éufrates awala muna tani ra iwi ba wihtka nani ra wari ba ra, king wina wauhtaya nani aikan ba witin nani ra yabri, baha purkara, king bui yang main ai kaiki kabia dukiara war wihtka nani bara aras ra uli nani blikan ba sin marikri. 10Sakuna Sambalat, Horón tawanka wina ba, Tobías, Amón tasbaya wina wihtka ba walan upla kum Israel luhpia nani ra hilpka daukaia luki ba balan, bara witin nani kasak lawan.
Jerusalem kutbanka tara ba kli paskaia warkka
11Bamna lâs kat Jerusalem ra wari. Bara lapta yumhpa luan ningkara, 12tihmia ra buri, yang bara waitna wala nani kulki aikuki. Sakuna upla kumi ra sin kau param wiras kapri, Gâd bui yang kupi ra mangkan ba, Jerusalem dukiara yang dîa daukaisna ba. Yang sin diara wala brih waras kapri, biriku uli wari ba baman. 13Baha sim tihmika yang buri, il bîla ra waia getka bâk taki, Piuta laya ra waia bara Tâski yakabi ba getka ra waia yabalka ra kaiki wari, Jerusalem kutbanka batakan ba, bara getka nani angkan ba sin. 14Baha wina kau ban kainira wari, Lî Kârma getka ba tani ra bara King laya watla ra sin waia; sakuna biriku ba bahak luaia sip apia kan. 15Kau tihmia kan bamna, lî aubra bâk uli wari bara aman kaikri, walpa kutbanka nani slingwan ba, bara baha kir tawi kaiki, kli tawi yabalki ra aimaki il bîla ra waia getka bâk tawan ra dimri.
16Wihta nani ba tânka briras kan yang anira wari ba, bara dîa daukri sapa sin tânka briras kan. Baha purkara sin yang, Ju nani ra diara kumi sin wiras kapri, prîs nani ra, wihta bara kulkanka tara bri nani ra, baku sin wark takaia uplika nani kumi ra aisaras kapri. 17Bamna witin nani ra wîri:
—Man nani pain nu sma naha wan dauki wan swin na kat wan trabilka na tara, kan Jerusalem na sut sauhki tikan sa, bara getka nani ba sin sut pali pauta ni angki sauhkan. Bamna yang ra bal asla taks Jerusalem tawan kutbanka na kli paskaia, kau ban wan swira daukan lâka ra iwi kaia sip apia.
18Bara yang bui witin nani ra param wîri, nahki Gâd yamnika ba yang purira kan ba, baku sin baha bîla nani king ai win ba sut param wîri. Bara witin nani aisi banhwan:
—¡Kaisa yawan mahka baha kutbanka ba kli paskaia!
Bara baku witin ani ai lukanka pain wina, pana pana tatukban kupia bukaia. 19Sakuna Sambalat, Horón wina, Tobías tasbaya wihtka ba, Amón, bara Guesem Arabia wina ba witin nani baha sturka walan ba ra, yang nani dukira saura luki laiwaska kiki banhwan, bara naku ai win:
—¿Man nani dîa daukaia lukisma? ¿Ban kra king mapara bûi banhwaia lukisma ki?
20Sakuna yang pana witin nani ra naku wîri:
—Gâd kasbrika purara bâra ba, yang nani daukisna na sut yamni takaia daukbia. Yang nani witin ai warkka dadaukra nani, naha kutbanka tara kli paski banhwamna. Man nani lika nâra diara kumi sin daukaia lukras sma, diara paskaia smatka âpu nani sma, bara raitkam sin âpu Jerusalem dukiara lukaia.
Currently Selected:
Nihimaya 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua