JOB 3
3
Pathian Parah Job a Phunzai
1Job cu daitein a um thei nawn lo ih a suah ni kha siat a serh ciamco:
Job
2-3“Ka suah ni cu siatserh siseh;
‘Fapate a suak’ an ti zan khal!
4Ka suah ni cu thimnak ni ah
cang seh;
Cuih ni cu Pathian in
ciing nawn hlah seh;
Cuih ni ah tleunak khal
tlang hlah seh.
5Riahsiat ni le a pitzet mi
thimnak ni ah cang seh;
Khawdur in tuam sehla van ih
ni khal khi phiat thluh seh.
6Cuih zan cu kum siarnak sungah
telh loin hnawtfai sisehla,
Ziangtik hmanah siar cih
si nawn hlah seh;
7Zianghman a seem lo zan,
zan ṭhahnem lo le,
lungawinak um lo zanah tuah siseh.
8Cuih ni camtu dingah polsia pawl
sim sehla,
Tipi sungih ramsa Leviathan
thu a pe theitu polsia pawl cu!
9Zing arsi deirel tlang hlah seh;
Khawfing a cat ding, tiih beisei
nak zianghman um hlah seh.
10Cuih zan cu siatserh siseh,
ka suah zan a si ruangah;
Zonzaih retheihnak tong lo dingih
i hum lo ruangah.
11Ka nu ih pum sungah rak thi
ningla ka va duh so!
Asilole ka suah thlak vete in
rak thita ningla ka va duh so!
12Ziangah so ka nu in a cawn parah
i cawi?
Ziangah so a pawhte tla i fawh?
13Cunah rak thi ningla atu ahcun
ka cawldai zo ding naón,
14Khuahlan khawpi rop
a dinsuah saaltu,
Daite ih a itmi siangpahrang le
uktu bawi pawl bangin.
15An inn sungah sui le ngun
khat ko ih a khawltu,
Siangpahrang bangtuk in le,
16thi ciaih a suakmi naute bangin
ka it zo ve ding naón!
17Thlan sungah cun miṭha lo pawl
an siatnak a reh;
A baangzet mi hnaṭuantu pawl
colhnak an ngah.
18Thawngtla pawl hman daitein
an um thei;
Kawk le auhnak in an luat.
19Cutawkah milian, mifarah an kim;
Sal pawl tla an luat a si.
20Ziangah so zonzaih harsatnak
a tuarmi an nun ringring?
Ziangah so riahsiatu pawl hnenah
tleunak a thlen?
21Thih ding lawng an hngak,
Asinain thihnak a ra thleng dah lo.
Ziangvek thil mankhung hawl hnakin
thlaan thlen an duh sawn.
22An thih ih phum an si hlan cu
an lung a awi dah lo;
23An hmailam thu cu Pathian in
a thuhsak;
An kimvel in hauhruang in
a kulh ṭheh fawn.
24Ka ṭahnak cu ka ti rawl an si;
Ka aihramnak cu reh ti a nei lo.
25Ka ngam lomi le ka ṭih
thlohthlo mi hmuahhmuah
a zatein ka tuar thluh zo.
26Hnangamnak ka nei lo,
colh ni ka nei lo;
Ka zonzaihnak a reh dah fawn lo.
Currently Selected:
JOB 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.