Eclesiástico 50
50
Sc'oplal li pale Simone
1Li Simone, ja' li xnich'on Oniase, ja' banquilal pale;
c'alal cuxul to'oxe, la xcha'meltsan bu soquemic li ch'ulnae,
xchi'uc la set ta maquel ta coralton li ch'ulnae.
2Ja' laj yac'be noxtoc tsots snacleb li pimil toyol coraltone;
laj yac'beic xoc'tac ti bu la set ta maquel li ch'ulnae.
3C'alal oy ta yabtele, ja' la sjoq'uic yavil vo' noxtoc,
toj ven muc' sjamalil jech chac c'u cha'al nab.
4Ja' la stuc'ulan li slumal c'u cha'al mu xich' pojbel c'usitic oy yu'unique,
xchi'uc la smac lec ta tsatsal coralton li lum sventa mu stsalatic me chtal contrainaticuque.
5¡Yan to x'elan yutsil ti cacal ta o'lil yu'un li steclumale,
ti c'alal ta xloc' te ta ch'ul cuarto ti bu macbil ta poq'ue!
6Ja' jech chac c'u cha'al muc'ta c'anal yilel te xojoban te ta o'lol toque,
xchi'uc jech chac c'u cha'al c'alal lec sepet ue,
7jech chac c'u cha'al c'ac'al ti sacubtasoj li xch'ulna Dios ta vinajele,
xchi'uc jech chac c'u cha'al vacnabal ti xnichiman ta toquetic ti lec c'upil sbae;
8jech c'u cha'al oy xnich nichimaltic ta yorail q'uinubaltic,
xchi'uc c'u cha'al lirio nichim ti te oy ta sts'el nio'e,
xchi'uc jech chac c'u cha'al sq'uelub ch'ut te' ta Líbano ta yorail vo'olaltic,
9jech chac c'u cha'al pom ti chich' chiq'uel ta xchic'ubile,
xchi'uc jech chac c'u cha'al vaso pasbil ta c'anal taq'uin ti lec tenbile,
ti t'ujumtasbil ta ep ta chop c'upilic sba tonetique,
10jech chac c'u cha'al olivo te' ti toj pim sate,
jech chac c'u cha'al c'uc'toj ti ven nat chbat chc'ot c'alal to ta toquetique.
11C'alal ta slap li lequil c'u'il sventa q'uine,
xchi'uc c'alal ta slap li c'usitic lec c'upilic sbae,
c'alal chmuy batel ta ts'u'iltasbil scajleb matanale,
nojem ta slequil yutsilal chc'ot xchi'uc li yamaq'uil xch'ulna Diose.
12C'alal ta xch'am spuculal ti chaq'uic li yantic paleetique,
te va'al ta sts'el scajleb matanal li Simone.
C'alal ja'o te setelic ta stojol li xchi'iltaque ja' jech chac c'u cha'al corona c'otem,
xchi'uc jech chac c'u cha'al sq'uelub ch'ut te' te ta Líbano;
setuojic jech chac c'u cha'al te'el xan.
13Scotolic ja' xnich'nabtac li Aarone;
scotolic lec xojobanic ta q'uelel ti chich'ic batel li matanaletic ta xac'beic Cajvaltique;
te ta stojol scotolic li israeletic te tsobolique.
14C'alal chlaj yo'ntonic c'usi ta spasic te ta scajleb matanale,
xchi'uc laj xa xchapanic lec li matanaletic ta sventa li Dios ta vinajel ti scotol xu' yu'une,
15lic stsac ta sc'ob li vasoe;
la sq'ueb li ya'lel ts'usub sventa matanal noxtoque.
Te la sq'ueb ta yoc li scajleb matanale,
jech chac c'u cha'al yic' muil poxil cha'ay li Dios ta vinajele ti ja' Muc'ta Ajvalil ta sbejel banamile.
16Jech yu'un li xnich'nabtac Aarone
la sjupanic oq'ues ti pasbil ta tenbil taq'uine;
yan to sba stsatsal xbac' c'u cha'al chac'beic ya'ay li Dios ta vinajele.
17Scotol li cristianoetic te oyique
ta ora scotolic la squejan spatan sbaic ta banamil
sventa chich'ic ta muc' li Dios ta vinajel,
ti scotol xu' yu'une.
18Jech laj yalbeic slequilal ta q'ueoj li jq'uejimoletique;
xnechetic no'ox ta q'uejimol li cristianoetique toj c'upil sba ta a'yel.
19Scotol li steclumal Diose lic sc'anbeic vocol li Cajvaltic ta vinajele;
tsc'opanic li Cajvaltic ti ja' jc'uxubinvaneje.
Ja' to ti c'alal chlaj yo'ntonic ta spasel li c'usitic tspasic sventa chich'ic ta muc' li Cajvaltique,
xchi'uc c'alal to laj yo'ntonic ta pasel scotol li c'usitic sna' spasic ta stojole,
20jech chyal tal te ta scajleb matanal;
xbechoj sc'ob ta stojol scotol li xnich'nabtac Israel te tsobolique,
sventa chac'beic sbendición li Cajvaltique.#Lv 9.22; Nm 6.23-27.
Xcuxet no'ox yo'nton ti xu' yu'un ta xalbe sbi li Cajvaltique.
21Li cristianoetique tsquejan sbaic xchibal velta ta yich'el ta muc' li Cajvaltique
sventa stabeic sbendición li Dios ta vinajele.
Sc'oplal c'usi tsc'an chich' pasel
22Jech yu'un ta ora li vo'oxuque albeic me slequilal li Dios ta vinajel banamile,
ti toj labal sba c'usitic tspas ta vinajel banamile,
ti ja' ta xac' ch'icutic talel ti c'alal chijvoc'utique,
yu'un ja' tspasbutic ti c'u x'elan tsc'an chc'uxubinutic stuque.
23Ac'o yac' xcuxetel co'ntontic,
xchi'uc jun co'ntontic ti c'u sjalil cuxulutique;
ac'o oyuc jun o'ntonal ta Israel ta sbatel osil.
24Li c'uxubinel yu'une ac'o teuc oy o ta jtojoltic ta sbatel osil;
ti c'u sjalil cuxulutique, ac'o spojutic.#Nm 25.12-13; Eclo 45.24.
Sc'oplal bic'tal chanubtaseletic
25Oy chib ta lum ti ven chopol chca'ay ta co'ntone,
ta yoxibale mu xa ja'uc lum:
26Ja' li jnaclumetic ta vits Seire, xchi'uc li filistaetique,#Cf. Jue 3—16; 1 S 13—14; 17.19-51; Jer 47; Ez 25.15-17.
xchi'uc li bol cristianoetic te nacajtic ta Siqueme.
Slajebal a'yejetic
27Vu'un Jesusun xnich'onun Sirach,
ja' li xnich'on Eleazar liquem ta Jerusalene.
La jchol jech chac c'u cha'al vo' li sbijil jol co'ntone; li chanubtasel xchi'uc li c'usi jna'e
ja' jech x'elan la jts'ibta comel ta jpoc vun li'i.
28Cuxetuc me yo'nton li boch'otic ta xchanilan batel li a'yej li'i;
li boch'o ta xchabi ta yo'ntone ta xbijub.
29Li boch'otic ja' ta spasilanic batele jech xu' yu'unic spasel scotol,
yu'un ja' ta xojobal Cajvaltic ta xanov batel.
Currently Selected:
Eclesiástico 50: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.