Eclesiástico 51
51
Stojbel ta vocol Dios ta q'uejimol
1Vu'un ta jc'an ta jtojbot ta vocol, Cajval, Muc'ta Ajvalil;
ta xcalbot alequilal, Dios, Jcoltavanej cu'un.
Ta sventa abi ta jtojbot ta vocol.
2Yu'un vo'ot Jpojvanejot, xchi'uc Jcoltavanejot;
yu'un vo'ot laj acoltabun jbec'tal ta sventa li lajele,
xchi'uc laj acoltaun ta syoquic li boch'otic tsc'an chisnopbicun jmule,
ta sventa yeic li boch'otic lec sna'ic snopel epalc'ope.
3Laj acoltaun xchi'uc laj aloq'uesun ta sc'obic li cajcontrataque,
yu'un ech'em li c'uxubinel avu'une, xchi'uc atalel o ti toj lecote;
laj acoltaun ta yeic li boch'otic chapalic chisti'icune,
xchi'uc laj acoltaun ta sc'obic li boch'otic tsc'an chismilicune.
Laj acoltaun ta sventa li tsatsal vocoliletic la jtae,
4xchi'uc li c'oc' la xpixun ti ta xtu'p xa co'nton yu'une,
ti c'alal te oyun ta o'lol c'oc' ti mu vu'ucun la jtsane.
5Xchi'uc laj acoltaun ta natiquil xab ja' li c'atinbaque,
xchi'uc ta i'lalc'op, xchi'uc epalc'op,
6xchi'uc ta yeic li boch'otic ven chopolique.
Li vu'une nopol xa'ox oyun ta sventa li lajele;
li jcuxlejale jutuc xa mu ibat ta natil xab.
7La smaquicun ta joyob, pero mu'yuc boch'o la scoltaun;
la jsa' boch'o chiscoltaun, pero mu'yuc la jta.
8Jech yu'un la jt'ab ta co'nton li c'uxubinel avu'une, Cajval,
xchi'uc ti te oy o li slequil avo'nton ta vo'onee,
xchi'uc ti chacha'tots liquel li boch'o ta smalaicote,
ti chacolta loq'uel ta sc'ob li yajcontraique.#Sal 100.5; 135.
9Lic'opoj muyel tal li' ta banamil,
xchi'uc xivocolet ti ac'o acoltaun loq'uel ta sventa li lajele,
10jech la jcaptaot: “Cajval, vo'ot li jtotote,
mu me xacomtsanun ti c'alal yorail vocolile,
ti c'alal mu'yuc c'usi xu' cu'un ta stojol li jtoyba cajcontrataque.
Mu'yuc slajeb ta xcal batel li ac'oplale,
xchi'uc ta jtojbot ta vocol ti c'alal ta jq'uejintaote.”
11Jech yu'un laj ava'ibun li jc'ope,
jech laj aloq'uesun ta sventa li lajele;
xchi'uc laj acoltaun ta yorail vocol.
12Ja' yu'un ta jtojbot ta vocol, xchi'uc ta xcal alequilal.
Ta xquich'be ta muc' sbi li Cajvale.
12a # 51.12a Li ver. 12a-12o ja' q'ueoj ti ta hebreo c'op no'ox te oye. Ja' lec tojbeic ta vocol li Cajvaltique, yu'un ja' lec li stuque,
yu'un sbatel osil mu xlaj o li slequil yo'ntone.#Sal 136.
12bTojbeic ta vocol ta q'uejimol li Diose,
yu'un li slequil yo'ntone te oy o ta sbatel osil.
12cTojbeic ta vocol li Jpojvanej yu'un Israele,
yu'un li slequil yo'ntone te oy o ta sbatel osil.
12dTojbeic ta vocol li Boch'o la spas scotol c'usitic oye,
yu'un li slequil yo'ntone te oy o ta sbatel osil.
12eTojbeic ta vocol li Jcoltavanej yu'un Israele,
yu'un li slequil yo'ntone te oy o ta sbatel osil.
12fTojbeic ta vocol li boch'o la stsob sutel tal li israeletic ti bu pucbilic batele,
yu'un li slequil yo'ntone te oy o ta sbatel osil.
12gTojbeic ta vocol li boch'o la xcha'pas li lum xchi'uc li ch'ulnae,
yu'un li slequil yo'ntone te oy o ta sbatel osil.
12hTojbeic ta vocol li Boch'o la xcha'ach'ubtasbe stsatsal li smomnich'nab Davide,
yu'un li slequil yo'ntone te oy o ta sbatel osil.
12iTojbeic ta vocol li boch'o la st'uj sventa chcom ta paleetic li smomnich'nabtac Sadoque,
yu'un li slequil yo'ntone te oy o ta sbatel osil.
12jTojbeic ta vocol li spojobbail Abrahame,
yu'un li slequil yo'ntone te oy o ta sbatel osil.
12kTojbeic ta vocol li snac'ubbail Isaaque,
yu'un li slequil yo'ntone te oy o ta sbatel osil.
12lTojbeic ta vocol li Dios yu'un Jacob ti scotol xu' yu'une,
yu'un li slequil yo'ntone te oy o ta sbatel osil.
12mTojbeic ta vocol li boch'o la st'uj li lum Sione,
yu'un li slequil yo'ntone te oy o ta sbatel osil.
12nTojbeic ta vocol li muc'ta Ajvalil yu'un scotol ajvaliletique,
yu'un li slequil yo'ntone te oy o ta sbatel osil.
12o¡Yu'un ja' laj yac'be stsatsal li steclumale!
I'ich'at ta muc' yu'un scotol li boch'otic lequique,
ja' li steclumal Israel ti nabal ta stojole.
¡Ich'biluc ta muc' li Cajvaltique!
Sjunul co'nton la jsa' li bijilile
13C'alal queremun to'oxe, ti mu'yuc to'ox libat ta xanel li banamile,
jech co'nton jamal la jc'anbe Dios li jbijile.
14Ja' te la jc'anbe ta stuq'uil sti' li ch'ulnae;
ja' ta jsa'ilan o c'alal to ta jmalubel.
15Naca to'ox chnichin ti c'alal la jtae, jech te oyun o c'alal to iyijub batel ta xchojol li sate,
jech toj xcuxet ic'ot co'nton yu'un.
Li vu'une ja' la jts'aclinbe batel li sbelale,
yu'un ta jqueremal ono'ox la jchan talel.
16La jtse'an jutuc jchiquin ta ya'yel, jech i'och ta co'nton;
ja' te ep c'usi la jchan o yu'un.
17Ja' ta scoj ti lec c'usitic ibat cu'une,
ja' yu'un ta jtojbe ta vocol li boch'o la sbijubtasune.
18La jnop lec ti ta jpasilan o batel c'usi chalbune;
bats'i juteb co'nton spasel li c'usi leque, mu'yuc ta jchibajes co'nton yu'un.
19Tsots cac'oj jba ta sa'el
jech noxtoc ja' la jpas c'usitic chal li mantaletique.
Te jtoyoj o muyel jc'ob ta vinajel
sventa chcal ta jamal ti bats'i mu jna' c'u x'elan li bijilile.
20Ja' batem co'nton ta stojol;
la jchabi jba lec ti c'alal la jtae.
Ta sliquebal ono'ox c'alal la jtae,
jech ijam jba jsat,
jech mu'yuc ta scomtsanun o.
21Toj xtuch' co'nton yu'un ta sa'el,
ja' yu'un oy c'usitic lec c'upilic sba la jta yu'un.
22Li Cajvaltique laj yac'bun jna' c'uxi xu' lec chic'opoje,
ja' yu'un tsots ta xcalbe lec sc'oplal.
23Nopajanic tal vo'oxuc ti mu c'usi xana'ique;
la' ayinanic ta snail li chanubtasele.
24¿C'u yu'un chavalilanic ti mu xataic li chanubtasele
ac'o me chac sc'upin ya'ay li avo'ntonic li bijilile?
25Ja' yu'un jamal chacalboxuc: Ich'ic li bijilile,
ich'ic me ta matanal;
26nijano me abaic ta xchanel,
ja' jech xu' chc'ot ta avo'ntonic li bijubtasel yu'une.
Ch'unic me li c'usi abtelal cha'ac'batique.
Li stuque te noch' no'ox oy ta atojolic.
27Q'uelic lec ta asat atuquic ta jutuc no'ox abtel la jta li vu'une,
pero ep laj yac'bun jcux co'nton.
28A'yo me lec ava'ay li c'usitic jutuc no'ox la jchan tal ta jqueremale,
ja' jech chataic ec li c'anal taq'uin xchi'uc li saquil taq'uine.#51.28 Li ver. 28 mu xvinaj lec c'usi chal ta hebreo c'op. Jech noxtoc mu xvinaj c'usi smelol ta griego c'op.
29¡Cuxetuc me avo'ntonic yu'un li c'uxubinel ta xac' li Cajvaltique!
Mu me xaq'uexovic ta yalbel sc'oplal.
30Tsc'an me cuchemuc xa spasel li avabtel
ti c'alal tsta sc'ac'alil sc'oplal cuchem avu'une.
Ja' Dios ta xac' lec matanal.
Ja' jech jts'ibtaoj: Ja' sbijil Jesús xnich'on Sirach.
Currently Selected:
Eclesiástico 51: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.