Jonás 2
2
La sc'opon Dios Jonás
1Te c'alal ay ta sch'uht chay a te Jonás, la sc'opon te Jehová, te Dios yu'un, 2hich la yal:
Te c'alal ayon ta wocol a, la jc'opon te Jehová,
la ya'iybon jc'op;
awonon c'alal ta yutil te stsobojibal mach'atic chamenic,
la awa'iybon te jc'ope.
3La ach'ojon cohel ta banti c'ubul,
ta yohlil te maretic,
la sjoytayon te yacan ha';
spisil te tulan stselajan awu'un
c'ax ta jba.
4Ha yu'un hich la jcal:
Loq'uesbilon ta atojol,
mayuquix bin ora ya quil
te ch'ul templo awu'un, xchihon.
5La sjoytayon te ha'etic c'alal ta jch'uhlel,
la sjoytayon te xahab,
la sjoytaybon jol te ya'malel mar.
6Cohon bahel c'alal ta yich'o-ip te witsiltic,
te q'uinal la smacon scuenta sbahtel q'uinal;
pero ha'at, Jehová, Diosat cu'un,
la aloq'uesbon jcuxlejal ta muquenal.
7C'alal yac ta lajel yip te jcuxlejal
la jna' te Jehová;
te bin la jcalbat c'oht ta atojol,
c'oht c'alal ta ch'ul templo awu'un.
8Te mach'atic ya st'unic loc'ombahetic te tojol ayic,
ma ha'uquix jun yo'tanic ta atojol.
9Pero te ho'one, ta scuenta yalel wocol,
ya ca'bat milbil mahtanil;
ya jpas te bin caloj ta jamal ta atojol.
¡Yu'un Jehová te colele!
xchi ta sc'oponel Dios.
10Te Jehová la yalbe mandar te muc'ul chay, hich la xehtay loq'uel ta lumq'uinal te Jonás.
Currently Selected:
Jonás 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.