Jonás 1
1
Jonás ahn loq'uel ta stojol Dios
1Te sc'op Jehová tal ta stojol Jonás snich'an Amitai, hich la yalbe: 2Hahchan, bahan ta muc'ul pueblo Nínive, c'opojan ta scontrahinel, como mohix tal ta jtojol te schopolile, xchi.
3Pero te Jonás loc' ta ahnel ta stojol Jehová, ya c'an bahtuc ta Tarsis. Hich co bahel ta Jope banti la sta jun barco te ya xbaht ta Tarsis. La stoj spasaje, och ta barco, yu'un ya sjoquin bahel ta Tarsis, namal ta stojol te Jehová. 4Pero te Jehová la yac' hahchuc tulan ic' ta mar, c'ax tulan te yic'al ha'al ta mar, c'an jatuc te barco yu'un. 5Xiwic te j'a'teletic ta barco, jujutuhl la yawtay te dios yu'unique. Soc la sch'ojticlanic ochel ta mar te ihcatsiletic te ayic ta barco, yu'un ya xco yalal. Pero te Jonás cohemix bahel ta yutil te barco, ochem swayel a. 6Te capitán yu'un te barco nohpoj tal ta stojol, hich la yalbe: ¿Bin yac apas te wayalate? Hahchan, c'opona te Dios awu'une; ya wan sna'botic yo'bolil jbahtic, hich ma ba ya xlajotic, xchi.
7Talel c'axel hich la yalbe sbahic te j'a'teliletic ta barco: La', ya jpasbetic seña ta na'el yu'un hich ya jna'tic a mach'a ta scuenta te talem ta jtojoltic te wocole, xchihic. Hich la spasic seña ta na'el, ha c'oht ta scuenta Jonás.
8Ha yu'un hich la yalbeyic: Hala ca'iycotic bin scuentahil te talem ta jtojoltic te wocol ini. ¿Bin awa'tel, soc banti talemat? ¿Banti ay aq'uinal, soc banti ay alumal? xchihic.
9La sjac' te Jonás: Te ho'one hebreohon, quich'oj ta muc' te Jehová te Dios ta ch'ulchan, te la spas te mar soc te lumq'uinal, xchi.
10Bayel xiwic yu'un te winiquetic, hich la yalbeyic: ¿Bin yu'un te hich la apas? xchihic, como sna'ojic te loc' ta ahnel ta stojol Jehová, como hich halbotic yu'un. 11Yac ta yich'bel xan yip te mar, ha yu'un hich la sjoc'obeyic: ¿Bin ya jpascotic ta atojol scuenta yu'un ya xlahmaj te mare? xchihic.
12La sjac' te Jonás: Tsacawonic, ch'ojawonic ochel ta mar, hich ya xlahmaj a te mar; como jna'oj te ho'on ta jcuenta te talem ta atojolic te tulan yic'al ha'al ini, xchi.
13Te j'a'teletic ta barco la yaq'uic xan fuersa te yacuc xc'oht ta q'uinal te barco, pero ma ba hu' yu'unic, como tulan xan yac ta bahq'uel te mar ta scontrahinel. 14Ha yu'un la yawtayic te Jehová, hich la yalic: Awocoluc, Jehová, manchuc ya xlajucotic ta scuenta scuxlejal te winic ini; ma xawac' ta jtojolcotic te sch'ich'el te mach'a mayuc smule; como ha'at, Jehová, la apas te bin la sc'an awo'tan, xchihic.
15Hich la stsaquic te Jonás, la sch'ojic ochel ta mar; hich lahmaj te tulan sbahq'uel mar. 16Hich te winiquetic bayel la xi'ic te Jehová; la ya'beyic milbil smahtan soc ay bin la yalic ta jamal ta stojol.
17Pero te Jehová ay schahpanej jcoht muc'ul chay te ya sbic' te Jonás. Oxeb c'ahc'al soc oxeb ahc'abal ay ta sch'uht te chay te Jonás.
Currently Selected:
Jonás 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.