Jonás 3
3
La suhtes yo'tan Nínive
1Tal te sc'op Jehová scuenta schebal buelta ta stojol Jonás, hich la yalbe: 2Hahchan, bahan ta muc'ul pueblo Nínive. Halbeya ya'iy te bin ya calbat, xchi.
3Hich hahch te Jonás, baht ta Nínive, hich te bin ut'il halbot yu'un te Jehová. Mero muc'ul pueblo te Nínive, oxeb c'ahc'al ta behentayel ta jehch ta jehch. 4Te Jonás hahch bahel ta yutil te muc'ul pueblo, jun c'ahc'al behen ochel, hich yac ta yalel: Ta cha'winic c'ahc'al ya me xlaj te Nínive, xchi.
5Te ants-winiquetic yu'un Nínive la sch'uhunic te Diose, la yalic mandar te ya scom swe'elic soc la slapic pac' scuenta mel-o'tan, muc' biq'uitetic. 6Te c'alal c'oht te c'op ta stojol te ajwalil yu'un Nínive, la stehc'an sba ta banti hucul, la schol loq'uel te sc'u', la slap pac' scuenta mel-o'tan soc la shuhcan sba ta tan. 7Hich la spuc ta halel ta Nínive: Ta scuenta smandar te ajwalil soc te mach'atic muc' ya'telic: Ma me ayuc mach'a ya xwe', ants-winiquetic, chambahlametic, wacaxetic soc tuminchijetic, ma me x'a'bot swe'elic o ha' te ya yuch'ique. 8Ac'a smuc sbahic ta pac' scuenta mel-o'tan, ants-winiquetic soc chambahlametic, soc ac'a yawtayic te Dios ta spisil yip yo'tanic. Jujutuhl ac'a yihquitayic hilel te chopol be yu'un soc te uts'inel ya spasique. 9Ya wan suht sc'op te Diose, ya wan sch'ay te sc'ahc'al yilimba, hich ma ba ya xlajotic, xchi.
10Te Dios la yil te bin la spasic, ha te la suhtes yo'tanic yu'un te chopol be yu'unique, hich la suht sc'op yu'un te bin chopol yaloj te ya spasbe.
Currently Selected:
Jonás 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.