Colosenses 3
3
1Ha yu'un teme cha'cuxajemex soc Cristo, ha me xalehic te bintic ay ta toyol, ta banti hucul ta swa'el-c'ab Dios te Cristo. 2Ha me xawac' asitic a te bin ay ta toyol, ma ha'uc te bintic scuenta te bahlumilal, 3como chamenex soc nac'bil acuxlejalic soc Cristo ta stojol Dios. 4Te c'alal ya xchicnaj tal te Cristo, te ha acuxlejalic, hich ya xchicnajex soc a ta utsilal.
Te poco' soc te yach'il cuxlejal
5Ha yu'un ac'a chamuc te bintic scuenta bahlumilal te ay ta awo'tanic: ha te antsiwej soc antsinel, te bintic ilobtic sba, sc'anel bintic ma lecuc, smulanel spasel bin chopol, soc bic'tal-o'tanil, te ha pajal soc sch'uhunel loc'ombahetic. 6Ha ta scuentahic ini te ya xtal te yilimba Dios ta stojol te jc'axun-c'opetique.#3.6 Ay antiguo hunetic te ma ba ya yal: ta stojol te jc'axun-c'opetique. 7Ha nix tey behenex a ta nahil to, te c'alal tey cuxulex a. 8Pero yo'tic ihquitayahic spisil ini: ilimba, c'ahc'ubel, snopel spasel bin chopol, bohlc'optaywanej soc ixta'c'op. 9Ma me xalotiy abahic, te bin ut'il la acholiquix loq'uel te apoco'-talelic soc te ya'tele, 10la alapiquix te yach'il acuxlejalic, te xquechet ta ach'ubel te hich yilel ya xc'oht te bin ut'il te Jpaswanej yu'une, scuenta yu'un ts'acal yac ana'beyic sba ta lec a. 11Tey mayuc griego o judío, teme yich'oj circuncisión o ma ba yich'oj circuncisión, bárbaro#3.11 bárbaro: ha ants-winiquetic te yan stalelic, te mayuc lec cultura yu'unic. o jyanlum, moso o mach'a libre ay, ha nax ay sc'oblal stuquel te Cristo soc te ay ta co'tantic jpisiltic.
12Ha yu'un, ha'ex te tsahbilex yu'un Dios, te ch'ultesbilex soc c'uxultaybilex, lapahic te c'uxultaywanej, lequil-o'tanil, peq'uel-o'tanil, manso-o'tanil, soc ac'a cuhchuc awu'unic. 13Talel c'axel cuhchuc awu'unic soc pasbeya abahic perdón teme ay ya xhahch c'op awu'un soc te yane. Hich te bin ut'il la spasbeyex perdón te Cristo, ha ni me hich xapasbe abahic perdón. 14Ta sba spisil ini, lapahic te c'uxul-o'tanil, te ha ya xchuc spisil te jun ya xc'ohtic ta mero smelelil. 15Ac'a scuentahimbeyex awo'tanic te lamal q'uinal yu'un Cristo, te ha nix yu'un te la awich'ic tsobel ta junax baq'uet. Soc na'ahic me yalel wocol.
16Ac'a nahinuc bayel te sc'op te Cristo ta awo'tanic. Ta scuenta p'ijil-o'tanil talel c'axel me xanohptes abahic soc xatsits abahic. Soc bayeluc yutsil awo'tanic xac'ayojtayic te Cajwaltic ta scuenta salmohetic, c'ayojetic yu'un Dios soc ch'ul c'ayojetic. 17Spisil te bintic yac apasic, teme ta ac'opic o te bin yac apasic, pasahic spisil ta scuenta sbihil te Cajwaltic Jesús, soc halbeyahic wocol te Jtatic Dios ta scuenta.
Bintic ya sc'an pasel yu'un te yach'il cuxlejal
18Antsetic, ac'a abahic ta cuentahinel yu'un te amamalalic, hich te bin ut'il ya sc'an pasel ta scuenta te Cajwaltique. 19Winiquetic, c'ux me xawa'iy ta awo'tanic te awihnamic, ma me ayuc slab awo'tanic ta stojol. 20Al-nich'anetic, ch'uhumbeyahic spisil smandar te ame'atatic, yu'un ha lec yo'tan yu'un te Cajwaltique. 21Ha'ex sme'statex, ma me xawac' ilinuc yo'tan te awal anich'anic, scuenta yu'un ma ba ya xlaj yutsil yo'tanic a.
22Mosohex, ch'uhumbeyahic spisil smandar te awajwalic ta bahlumilal, ma me ha'uc to te c'alal yac yilbelex a, te hich lec ac'oblalic ya xc'oht yu'un, pero junuc me awo'tanic xapasic ta scuenta yich'el ta muc' te Diose. 23Spisil te bintic yac apasic, spisiluc me awo'tan xapasic, hichuc te bin ut'il ta stojol te Cajwaltic, ma ha'uc ta stojol winiquetic, 24yu'un yac ana'ic te ay bin ya x'a'bot awich'ic hilel yu'un te Cajwaltic yu'un, como ayex ta a'batinel yu'un te Cajwaltic Cristo. 25Yan te mach'a ya spas te bin ma stojiluc, ya me x'a'bot stoj yu'un te bin ma stojiluc la spas, como ma tsahbiluc nax mach'a ay sc'oblal yu'un Dios.
Currently Selected:
Colosenses 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.