Colosenses 4
4
1Ha'ex yajwalex, ha xapasic te bin toj soc te bin lec ta stojol amosohic, como ana'ojic te ha nix hich ay Ajwalil awu'unic ta ch'ulchan.
2A'telinahic sc'oponel Dios, q'uehlana asitic ta sc'oponel Dios soc halbeyahic wocol. 3Soc c'opombotcotic me Dios scuenta yu'un yacuc sjambotcotic puerta te Cajwaltic yu'un yalel te sc'ope, scuenta yu'un ya xhu' ya cac'cotic ta na'el a te bin muquen ay ta na'el sc'oblal te Cristo, te ha nix ta scuenta te chuculone. 4C'oponahic Dios yu'un te yacuc xhu' ya jna' bin ut'il ya sc'an ya xc'opojon. 5P'ijanic me bin ut'il ya x'ayinex soc te mach'atic ma ba sch'uhunejic te Cristo, ayuc me scuentahil bin ut'il ya xc'ax c'ahc'al awu'unic ta stojolic. 6Bayeluc me yutsil ac'opic ya xc'opojex, ayuc me yats'amul, scuenta yu'un yac ana'ic bin ut'il yac ajac'beyic sc'opic ta jujutuhl.
Slajibal spatil-o'tanil
7Te quermanotic Tíquico te c'ux ta co'tantic, te jun yo'tan ya'telimbeyej ya'tel Dios soc ha jmohlol ta a'tel ta scuenta Cajwaltic, ha me ya ya'beyex ana'ic bin ut'il ayon. 8Ha scuentahil te la jticombeyex tal ta atojolic, scuenta yu'un ya yalbeyex bin ut'il ayotcotic, yu'un ya smuc'ubtesbeyex q'uinal awa'iyic. 9Ya xjoquinot bahel yu'un te quermanotic Onésimo, te c'ux ta co'tantic soc te jun yo'tan, te ha nix amohlolic. Ha ya ya'beyex ana'ic spisil bintic yac ta c'ohel ta pasel li'i.
10Xcoltanuquex laj yu'un te Aristarco, te pajal ayon ta chuquel soque. Soc xcoltanuquex laj yu'un te Marcos, te snich'an stajun te Bernabé, ha te a'botex ana'ic bin yac apasic ta stojol. Teme ya xbaht te banti ayex, ic'ahic ta atojolic. 11Xcoltanuquex laj yu'un te Jesús, te Justo yan sbihile. Ha'ic nax ini te yich'ojic circuncisión te yac scoltaybelonic ta a'tel yu'un te cuentahinel yu'un Dios, soc te smuc'ubtesbeyejonic q'uinal ca'iye. 12Xcoltanuquex laj yu'un te Epafras, te amohloltac nix soc ha a'bat yu'un Cristo. Spisil ora xbic'talti'ij ta sc'oponel Dios ta atojolic, te junuc awo'tanic, te ayuc yip awo'tanic soc te yacuc xc'oht ta pasel awu'unic spisil te bintic ya sc'an yo'tan te Diose. 13Ho'on testigohon yu'un te bayel ya sna'ex soc te mach'atic ayic ta Laodicea soc ta Hierápolis. 14Xcoltanuquex laj yu'un te Lucas, te doctor te c'ux ta co'tantic, soc nix te Demas.
15Halbon xcoltanuc te quermanotactic te ayic ta Laodicea, soc te Ninfas soc te iglesia ay ta sna. 16Te c'alal ya xlaj ta ilel awu'unic ha'i carta ini, a'beya yilic te iglesia ta Laodicea, soc ha'ex me xawilic te carta yu'un te Laodicea. 17Halbeyahic te Arquipo: Ilawil te yacuc ahu'tes te awa'tel la ya'bat te Cajwaltique, xchihanic.
18Ha spatil awo'tanic cu'un te ya jts'ihbay ta jc'ab, ho'on Pablohon. Na'awonic me te ayon ta chuquele. Ac'a sjoquinex te yutsil yo'tan te Diose. Hichuc.
Currently Selected:
Colosenses 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.