Colosenses 2
2
1Ya jc'an te yac ana'ic bin ut'il tulan yacon ta a'tel ta acuentahic soc ta scuenta te mach'atic ayic ta Laodicea, soc ta scuenta spisil te mach'atic ma ba yilbeyejonic jsit. 2Tulan ya x'a'tejon scuenta yu'un ya xmuc'ubtesbot q'uinal ya'iyic soc junax ayic ta scuenta sc'uxul yo'tanic, scuenta yu'un ya stahic spisil te sc'uhlejal bintic ay ta na'el, te hich ya xhu' ya sna'ic a te bin muquen ay yu'un Dios, te ha nix sc'oblal te Cristo, 3te ha nac'bil ta stojol spisil te sc'uhlejal te p'ijil-o'tanil soc te bintic ay ta na'el. 4Hich ya calbeyex scuenta yu'un mayuc mach'a ya slo'loyex ta scuenta t'ujbil c'opetic te ya xlo'loywane. 5Como aunque ma ba joquex, pero joquinejex ta co'tan, soc tse'el co'tan yu'un te buen chapal awu'unic soc te ay yip sch'uhunel awo'tanic ta stojol Cristo.
Te yach'il cuxlejal ta scuenta Cristo
6Ha yu'un hich te bin ut'il la awic' ta awo'tanic te Cajwaltic Jesucristo, hich me ya x'ayinex ta stojol, 7c'uhbenuc ochel alohp'ic, soc ts'ahcubiluquex hahchel ta stojol soc yich'ojuc yip te sch'uhunel awo'tanic, hich te bin ut'il a'bilex anopic, soc bayeluc xawalbeyic wocol.
Ts'acal te cuxlejal ta scuenta Cristo
8Tsahtaya me abahic te manchuc ayuc mach'a ya slo'loyex ta scuenta biluc nax c'opil te mayuc scuentahil, te bintic ay ta nopel yu'un ants-winiquetic soc te bintic stalel ay ta na'el ta scuenta nax bahlumilal, te ma ha'uc yu'un te Cristo.
9Como te stalel te Dios ts'acal ya xnahin ta stojol Cristo, ta sbaq'uetal, 10soc ha'ex ts'acal ay acuxlejalic ta scuenta, te ha jolal yu'un spisil principaletic soc mach'atic ay ya'telic. 11Ha nix ta scuenta te la awich'ic te circuncisión te ma pasbiluc ta c'abal, awich'ojic te circuncisión yu'un Cristo, ha te hilix awu'unic te apoco'-talelic yu'un mulil. 12Ta scuenta ich'-ha' pajal la awich'ic muquel soc Cristo, soc pajal cha'cuxajex soc te bin ut'il ach'uhunejic te ta scuenta yu'el Dios la scha'cuxajtes tal Cristo ta yohlil mach'atic chamenic. 13Te ha'exe, te c'alal chamenex yu'un amulic soc te c'alal ma ba yich'oj circuncisión te apoco'-talelic yu'un mulil, Dios la yac' te pajal la awich' acuxlejalic soc Cristo, ha la spasbeyex perdón yu'un spisil amulic. 14La stup'botic ta hun te jbetic te quechel ta jcuentatic stojel, te hich ya yal te mandariletic, te ha ya scontrahinotic, la sloq'ues ta cohliltic soc la sbaj ta lawux ta cruz. 15La spojbe yu'el te principaletic soc te mach'atic ay ya'telic, la yac'ticlan ta ilel ta comonsitil c'alal la stsalticlan ta cruz.
16Ha yu'un ma me ayuc mach'a ya yich'oc'optayex yu'un te bin yac awe'ic soc yac awuch'ic, o scanantayel sc'ahc'alel q'uin, yach'il u, o sc'ahc'alel cux-o'tan. 17Ta spisil ini ha snohc'otal nax te bin ya xc'oht ta pasel ta patil; pero te bin smelelil, ha te Cristo. 18Ma me xawac' spojbeyex te premio awu'unic te mach'a sp'isoj sba te peq'uel ay soc te ya sch'uhuntay ch'ul a'batetique. Ha ya slom ta halel te bin ma ba yiloj, tojol ya stoy sba yu'un te bin snopoj ta scuenta ch'ich'-baq'uet; 19ma ba jun ay soc te Jolal, te ha ta scuenta te spisil te sbaq'uetal, te mac'limbil soc te ts'acticlanej sba soc schihal, ya xmuc'ub hich te bin ut'il Dios ya yac' ya xmuc'ube.
20Teme pajal chamex soc Cristo te hich libre c'ohemex yu'un te bintic stalel ay ta na'el ta bahlumilal, ¿bin yu'un te hich cuxulex te bin ut'il ayex ta scuenta te bahlumilal, te yac awac' scuentahinex te mandariletic 21hich te bin ut'il: Ma me xatsac, ma me xawe', ma me xapic, te xchihe? 22Spisil ini ya me xlajic ta tuhunel, como ha mandariletic soc nohptesel yu'un ants-winiquetic. 23Ha'ic te sjel ta p'ijil-c'op, te bin ut'il sjel te sch'uhunejic Dios, te peq'uel yac'oj sbahic soc te ya yuts'in sbaq'uetalic; pero jc'axel ma xtuhun yu'un scomel te bin ya smulan te baq'uete.
Currently Selected:
Colosenses 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.