YOSHU 23
23
Yoshu Nho: Lo" Thao" Pyang Dao:
1Gyai myao" thao re- Asang wa Israel byu qere yao: bam re lhang" kham" to" ra" gyevo qe: lo, mae" gug: gam: ru byid' ra". Ai: ayo, mae Yoshu wa gyai mao" ava". 2Airumung: yao: wa Israel byu alhab'- lau: de, qe- au: jhaung qe- tarha" agyi qe- zug: qe alhab' re khai: yu mung:- ana" ngo wa gyai mao: va". 3Naonhaung" mathao mae ce: byumyu" mung"dan: alhab' re naonhaung" Mao"So Asang: yang pe" kad' lai: lo: ru ja: khao: ngo" re naonhaung" the' myao: avako". Naonhaung" Mao"So Asang wa naonhaung" qhid' mae" gyekhe' byid' lo: ra". 4Ngo wa naonhaung" amyu" qe: jo,nho" khyo" ana" na: jo, shiko" ra" byumyu" qenho: mung" rere:- ba thug' shad' Yodan gyaung: mae" ba vao shad' Mug:gaung: panglai: joe" sho' ngo aung: yu: va" byumyu" mung"dan: mug:myid alhab' re naonhaung" re kho' jaung byid' to: va". 5Naonhaung" Mao"So Asang wa yao: bam re naonhaung" mae" zad: phao: lo" nhao nae". Naonhaung" qhid' au: khyo jhin" ye" lo" au:- yao: wa aibam re khe' thug' pye' li" nae". Naonhaung" Mao"So Asang naonhaung" re dao:so: byid' to" ru we' dakhyo: yao: bam: mug:myid re naonhaung" sang: yu genae" ngad: ra". 6Airumung: Moshe nho: tarha" paug' mae tung" to" ru ja: khao: ngo" re lha" yang: mho dao: tae" gyo: mung: cao" kad' ge,. Aimae" dadau rere: dalhaui" pye' ge,. 7Ailao" naonhaung" phaung mae na: dang: jo; ra" taung bug byu qe we' dazam" ge,. Yao: bam: so jham: mang re dalao: ge,- ai: mang jham re lao: yang: jham datang: ge,- ai: so jham re dacaung:pa" ge,- aijham re dagoe; pa" ge,. 8Ai: atha"- ana" joe" sho' naonhaung" ngad: lo ko" ru we' dakhyo:- Asang re jhaug' zaug ge,. 9Naonhaung" qhid' au: khyo jhin" ye" lo" ko" au: Asang wa qi" qhang: ru we' qam: bo: ra" byumyu" qere khe' thug' pye' ra". Khag' re: naonhaung" re khonhae" re: gye maqo" kad' qu" ngad: ako". 10Yao: dao:so: byid' to" ru we' dakhyo: naonhaung" Mao"So Asang wa naonhaung" qhid' mae" gyekhe' byid: va" ruyang naonhaung" mae" khag' ngadqere: byu dataung re tao" phao: lo" nhao: ako". 11Airumung: naonhaung" Mao"So Asang re lha" yang: jhid'de; na ge,. 12Naonhaung" wa jhaug' mazaug lo:- naonhaung" phaung mae na: dang: jo; ra" taung bug byu qe we' jho" zam" khug mung:- yao: bam we' myibyid:- myiyu kad' ko" re wa- 13Naonhaung" qhid' au: khyo jhin" ye" lo" au:- naonhaung" Mao"So Asang wa ai byumyu" qere khe' thug' pye' byid: nae" mangad: rure naonhaung" beim: ge,. Yao: bam wa lha" mangad: lao"- dung: gyan: we' dakhyo: naonhaung" qhid' mae" gyaug ci" ca" mung: naonhaung" dao gaung: mae taui" yang be; ruru:- mangad: lao"- naonhaung" myo, jid' mae zau: ru: no nhao li" nae". Ceru wa naonhaung" Mao"So Asang: yang: naonhaung" re byid' to" ra" ce: mung"dan: gai mae khag' mana: dang: jo; losho' boe" nhao li" nae".
14Ana" ngo wa shid yo, joe" va". Naonhaung" yaug khao: ngo" yao: yao" aung khug nhag' lam: we' myid mae Asang yao: dao:so: byid' to" ra" gai: ra" ja: alhab' re naonhaung" Mao"So Asang: yang byid: va" ra" khyo re naonhaung" ba: ako". Yao: dao:so: byid' to" ru ja: khao: ngo" zaui" pyang" mung:- dalam: re: malhaui: ngad: ra". 15Naonhaung" re yao: byid' to" ra" dao:so: ja: khao: ngo" re zaui" pyang" ru we' dakhyo:- yao: wa qug: khai: kyi" khyag' ru ja: khao: ngo" rere: boe" nhao: ra". 16Naonhaung" phug' cao" genae" qhid' mae" naonhaung" Mao"So Asang: yang amyin" byid' to" va" dao: thang" re naonhaung" maphug' cao" geyang: ngad: re- naonhaung" wa so gatau jham re caung:pa" mung: caung: da" byid: ko" ngad: re- yao: nhag' yo: mung: naonhaung" re qobo dae byid' li" nae". Aimung: yao" yang naonhaung" re byid' to" ra" ce: gai: ra" mung" mae mamyao" re- naonhaung" mae" khag' dayaug re: na: dang lo: genae" mangad:.
Currently Selected:
YOSHU 23: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009