YOSHU 24
24
Shekhem Mae Israel Byu Qere Yoshu Dao: Jhau: Ra" Khyo
1Yoshu wa Shekhem mae Israel byumyu" kaung alhab' re khai: zhang" yu: ra". Yao: wa lau: de,- au: jhaung qe- tarha" agyi qe- Israel zug: qere khai: ra". Yao: bam wa Mao"So: qhid' kheim: khyo joe" lo: ako". 2Yoshu wa amyu" byu alhab' re- Israel nho: Mao"So Asang ta" ra" dao: ngad: ra". Aiwa- ganhae"- naonhaung" phug' pho" qe wa Uphrad gyaung: thoete' mae na mung: so gatau jham re caung:pa" mo, ngad: ako". Ai: phug' pho" qemae" dayaug wa Abraham we' Naho tao: yao: pho" Tera ngad: ra". 3Ai: thao ngo wa naonhaung" phug' pho" Abraham re Uphrad gyaung: thoete' mae" jhui" yu mung: Khanan mung" geim" khyo jao: sho' jhin" lai: ye: va". Ngo wa yao: re myid:zo: myo: sho' byid: va". Ngo wa yao: re Isag- 4Isag re Eso we' Yaku tao re byid: va". Ngo wa Eso re yao" jo,nho" khyo"- Edom bam mug: re byid: va". Ngadqere: naonhaung" phug' pho" Yaku we' yao" zo: dau qe wa Egutu mung" khyo gyo" ye" ako". 5Thao re ngo wa Moshe we' Arun tao re nhao: ke' mung: Egutu mung" dao mae qug: khai: aqi: boe" nhao va". Ngadqere: ngo wa naonhaung" re jhui" thug' lo va". 6Ngo wa naonhaung" phug' phyid' qere Egutu mung" mae" jhui" thug' lo mung:- Egutu byu qere wa aibam re myao: tab we' gyekhe' myao: lhin" jham: yang cao" khe' ako". Ngadqere: naonhaung" phug' pho" qe Tham: Ne khyo joe" ye: gelao"- 7Yao: bam wa ngore bao" thaug' yu nae" hug' yao: ako". Amung: yao: bam we' Egutu byu qe: agyo: mae ngo wa mug: cad' re to" to: byid: va". Ngo wa Egutu byu qe: dao mae panglai: re nhai" pye' nhao mung:- yao: bam re nhai" se' pye' va".
Ngo Egutu re pe" kad' lai: lo: rure naonhaung" ba: ako". Naonhaung" wa din"pyad' yo mae ayo, myao" sho' na: ako". 8Ai: thao ngo wa naonhaung" re Yodan gyaung: ba thug' shad' mae na ko" ra". Amori byu qe: mug:myid khyo jhui" lo va". Yao: bam naonhaung" re gyekhe' ako". Ngadqere: ngo wa naonhaung" re yao: bam re aung: nhao va". Naonhaung" qhid' au: khyo jhin" ye" lo" ko" au:- naonhaung" wa yao: bam: mug:myid re yu: pye' mung:- yao: bam re se' tam" pye' ako". 9Ai: thao Moba kho:kham Zippo nho: yauggai zo Balag wa naonhaung" re gyekhe' ra". Yao: wa Beo yauggai zo: Balam naonhaung" re nhang: kheim: ke' byid: nae" qhid' mae" mho' ra". 10Ngadqere: ngo wa Balam dao: re magyo: byid:- aimung: yao: wa naonhaung" re shaman" byid' ra". Ceru: kad' yang: naonhaung" re ngo Balag nho: lo, mae" khyad' yu: lo va". 11Naonhaung" wa Yodan gyaung: re gau" de, mung:- Yerikho khyo joe" lo: ako". Yerikho vobyu qe wa Amori- Perizi- Khanan- Hiti- Gigashid- Hivi- Yebusi byu qere" ru: naonhaung" re gyekhe' ako". Ngadqere: ngo wa yao: bam alhab' re aung: pye' nae" ru naonhaung" re byid: va". 12Naonhaung" qhid' au: khyo jhin" ye" lo" ko" au:- Amori kho:kham shid' yaug re qo" khe' thug' pye' nae" qhid' mae" yao: bam re ngo byodin byosho: boe" nhao va". Naonhaung" nho: shae jham we' lo, la: jham: yang kad' ru mangad: ngad: ako". 13Ngo wa naonhaung" khonhae" re: mau" mazaui" qu" ra" mug: myid- naonhaung" mate" ra" vomo" jham naonhaung" re byid: va". Ana" naonhaung" aimae na: jo, mung: naonhaung" maqho" ra" sabyi naui mae" ashi: we' zhanlun gae jham mae" ashi: jham re zo" na: ako"- ga: ta" ra".
14Yoshu wa xo' yang:- ana" Asang re nga: yhe' byid: mung:- yao: re din: dangman" man: jhaug' zaug taung" caung: da" byid: ge,. Naonhaung" phug' pho" qe Mesopotamia mung" we' Egutu mung" mae lhaung" caung:pa" ko" ra" so jham re yu: pye' mung: Asang re za: caung da" byid: ge,. 15Naonhaung" yao: re manug: caung da" byid: ko" re wa Mesopotamia mung" mae naonhaung" phug' pho" qe caung:pa" byid: ko" ra" so jham re- mangad: lao"- naonhaung" ana" na: jo, ko" ra" Amori byu qe: so jham re- khoru re naonhaung" caung da" byid: genae" ru ana" ba myid: phyid' ge,. Ngo we' nga" yham byu qe kam" wa- Asang re caung da" byid: nae"- ga: ta" ra".
16Ailao"- amyu" byu qe wa- so gatau jham re caung da" nae" qhid' mae" Asang mae" ngonhaung" khonhae" re: maphaug' to: co' nae" wo". 17Ngonhaung" Mao"So Asang wa ngonhaung" phug' pho" qe we' ngonhaung" re Egutu mung" mae jeim kad' ra" rumae" jhui" thug' lo: ra". Amung: yao: kad' qhu" ra" mug' pho: ve, lho re ngonhaung" the' myao: bam va". Ngonhaung" lai: phyid' lo: ra" amyu" phaung mae ngonhaung" ye: khao: ngo" yao: ngonhaung" re gug: gam byid' ra". 18Ce: mung"dan: khyo ngonhaung" jhin" vao ye" lo" au: Asang wa cemae na ko" ra" Amori byu qe alhab' re khe' thug' pye' ra". Aimung: ngonhaung" re: Asang re caung da" byid: nae". Yao: wa ngonhaung" Mao"So ngad: ra"- ga: tau" ako".
19Yoshu wa amyu" byu qere- ngadqere: naonhaung" wa yao: re maqo" caung da" byid: ko" maba- yao: wa gyang" lho" ra" Mao"So ngad mung: naonhaung" qobo jham re makhyad' byid: nae".
Yao: wa qam: qhi" cao: khag' rere: mazang: byid: nae". 20Taung bug so jham re caung da" nae" naonhaung" yao: mae" phaug' lo" ko" re wa- yao: wa naonhaung" re gye tug' kad' mung: qobo dae byid' li" nae". Yao: wa qhid' phyao: naonhaung" re gai kad' sho' ngadqere: naonhaung" re se' tam" pye' li" nae"- ga: ta" ra".
21Amyu" byu qe wa Yaku re- mangad:- ngonhaung" wa Asang re caung da" byid: nae"- ga: ta" ako".
22Yoshu wa yao: bam re- Asang re caung da" nae" qhid' mae" naonhaung" yao: khyin: yu vako" ru wa naonhaung" yao: sagse: ngad: ako"- ga: ta" ra".
Yao: bam wa ngad:- ngonhaung" wa sagse: re: ngad:- ga: tau" ako".
23Aimung:- naonhaung" qo" to: ko" ra" taung bug so jham re yu: pye' ge,- Israel nho: Mao"So Asang re naonhaung" jhaug' zaug phug' cao" nae" khyo- jham tang: ge,- ga: mho' ra".
24Ailao" amyu" byu qe wa Yoshu re- ngonhaung" wa ngonhaung" Mao"So Asang re caung da" nae"- yao" amyin" dao: jham re ngonhaung" phug' cao" nae"- ga: ta" ako".
25Aimung: Yoshu wa ai: ba re amyu" byu qe: qhid' mae" dao: thang" kad' mung:- yao: wa aitau Shekhem mae" tarha" jham we' thung" li jham yao: bam re byid' ra". 26Yoshu wa Mao"So: tarha" mugsug' paug' mae ai: tarha" jham re tung" ra". Ai: thao yao: wa laugbaui qi: dabaui re gaug: yu yang: Asang: gyang: lho" jo, qo yham mae" shikhai: gae qao: mae zhaug' to" ra". 27Yao: wa amyu" byu alhab' re- ce: laugbaui wa ngonhaung" sagse: ngad: li" nae". Asang ngonhaung" re dao: jhau va" dao: kheim: alhab' re the' gyo: va". Aimung: airu wa naonhaung" shad' mae sagse: ngad mung: naonhaung" Mao"So re tau: lhan: gye kad' rure tam" pye' li" nae"- ga: ta" ra". 28Aimung: Yoshu wa amyu" byu qere nhao: ke' ra". Yaug khao: ngo" yao: yao" mug: khyo tug' phao: lo" ako".
Yoshu We' Eleaza Shid: Byaug Ko" Ra" Khyo
29Ai: thao re- Asang: daui daui yaug Nun nho: yauggai zo: Yoshu wa apyad dayo: daxe zin re shid: ra". 30Yao: bam wa yao: re Gasha bam- mug: am: shad'- Ephrim bam mug: mae" yao" mug: Timnad Sera mae nyhab' to" ako".
31Yoshu daui: na: ra" gu: mae Israel byu qe wa Asang re caung da" byid: mung:- yao: shid thao re yao: bam wa- Israel qhid' mae" Asang kad' byid' lo: ra" lo, mau" ja: khao: ngo" re the' myao: ra" mo, ngad ko" ra" ai: au: jhaung qe daui: na: gu: mae xo' yang: airu: kad' ako".
32Egutu mung" mae" Israel byu qe dao: lo ko" ra" Yoseb nho: maogaung re Yaku yang Shekhem nho: yao: pho"- Hamo nho: yauggai zo: qemae" ngaui dayo kye' yang vai: yu: to" ra" mug:myid mae" Shekhem mae nyhab' to" ako". Ce: mug:myid wa Yoseb nho: myid:zo: qe qo" yu: ra" ma mug:myid ngad: ra".
33Arun nho: yauggai zo: Eleaza wa shid: mung:- yao" yauggai zo: Phineha re byid' to" ra" Ephrim bam mug: mae" Gibea mae nyhab' to" ako".
Currently Selected:
YOSHU 24: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009