YOSHU 22
22
Ba thug' Shad' Mae" Amyu" Kaung Qere Yoshu Yham Phao Nhao: Ra" Khyo
1Ai: thao Yoshu wa Rubin- Gad- ba thug' shad' mae Manashe amyu" qere khai: zhang" yu: ra". 2Yao: wa aibam re- naonhaung" wa Asang: daui daui yaug Moshe yang naonhaung" re amyin" byid' ra" gu: ja: khao: ngo" re bin kad' avako". Amung: nga" amyin" dao: alhab' rere: naonhaung" phug' cao" avako". 3Naonhaung" wa cemyhao" joe" sho'- naonhaung" Israel mao:nhaung: qere qo: ra" au: khao: ngo" bao" thaug' byid' lo: avako". Naonhaung" Mao"So Asang: amyin" dao: jham rere: gelho: za: naonhaung" phug' cao" avako". 4Ana"- yao: dao:so: to" ru we' dakhyo:- naonhaung" Mao"So Asang wa naonhaung" Israel mao:nhaung: qere ngaui pyo: yaug yo: ru byid' to" ava". Airumung: Asang: daui daui yaug Moshe yang naonhaung" re byid' ra" Yodan gyaung: ba thug' shad' mae" naonhaung: yao" mug:myid ga: ta" sang: yu: ra" yham mug: khyo phao: lo" ge,. 5Moshe yang naonhaung" re byid' to" ra" tarha" re phug' cao" nae" beim: ge,- naonhaung" Mao"So Asang re jhid'de; mung:- yao" myid o: rure cao" ge,- yao: re jhaug' zhaug mung: naonhaung" aung khug nhag' lam: alhab' we' kao so' alhab' yang yao: re caung da" ge,- ga: ta" ra". 6-8Yoshu wa yao" shaman" dao: we' ceru: ga: pyang yang aibam re yham phao nhao: ke' ra". Yao: bam re naonhaung" wa lanyab gug'nyhug' myo: sho' we'- ngaui- qhang- gyid:- jo, to' we' mai bau: jham jo,nho" gyai qo" yang: yham phao: lo" ako". Naonhaung" nho: gyevo qemae" sham" yu: ra" zai re naonhaung" amyu" mao:nhaung: qere gae byid: ge,- ga: ta" ke' ra". Ai: thao yao: bam wa yham khyo phao: lo" ako".
Moshe wa Yodan gyaung: ba thug' shad' mae" mug:myid re Manashe amyu" agaung: daqi" re byid' to" ra". Ngadqere: gatau agaung: daqi" gu: re wa Yoshu yang gatau: amyu" qe we' daga" Yodan gyaung: ba vao shad' mug:myid re byid' ra".
9Ailao"- Rubin- Gad ba thug' shad' mae" Manashe amyu" kaung qe wa yham phao: lo" ako". Dang: ra" Israel byu qere Khanan mung" Shilo mae to: co' mung:- Moshe nhad' khyo" yao: bam re Asang: yang amyin" byid' to" ru we' dakhyo: yao: bam yu: to" ra" Gilead mung" yao: bam yao" mug: khyo to" lo" ako".
Yodan Gyaung: Yae Mae" Phan
10Rubin- Gad we' ba thug' shad' Manashe amyu" byu qe wa Yodan gyaung: nhae mae jo; ra" Gelilod khyo joe" lo gelao"- yao: bam wa qid yae mae qi" ru we' nhag' taui: tho' ra" phan dalam: zao: ako". 11Dang: ra" Israel amyu" byu qere- Rubin- Gad- ba thug' shad' Manashe amyu" byu qe Yodan gyaung: cete' yao: bam: shad' mae" mug:myid mae" Gililot mae phan dalam: zao: avako"- ga" rure the' gyo" ako". 12Israel byu qe cere the' gyo: gelao"- ba thug' shad' mae" amyu" byu qere gyekhe' nae" qhid' mae" mo, phung: geim" Shilo khyo zang" ye" ako".
13Ai: thao Israel byu qe wa khinjaung Eleaza nho: yauggai zo: Phineha re Gilead mung" mae na ko" ra" Rubin- Gad- ba thug' shad' Manashe amyu" byu qejhao" nhao: ke' ako". 14Au: jhaung alhab' daxe: byid yaug cao: ye" ako". Phineha we' daga" ba vao shad' amyu" damyu" mae" dayaug we' amyu" kaung qe: phaung mae" au: jhaung dayaug yaug- au: jhaung daxe yaug bocao: ye" ako". 15Yao: bam Gilead mung" khyo Rubin- Gad- ba thug' shad' mae" Manashe amyu" byu qejhao" joe" lo gemung:- 16Yao: bam wa Asang: mo,byu phung: geim" qhid' mae" (gaung tha") aibam re- naonhaung" pe"mung: Israel nho: Mao"So re gye kad' ra" ce: makhyang" ra" mau" re kad' vako" i? Naonhaung" yao" qhid' mae" ce: phan re zao ko" ra" khyo" yang Asang re gye kad' geim lau to" avako". Naonhaung" wa yao" thao macao" loko" ngad: ra". 17Asang wa yao" amyu" byu qere qam" no gyo" nhao yang: qobo dae byid' au: mae" Peora mae ngonhaung" shad' ra" qobo re myid: beim: ge,- ngonhaung" ana" ba joe" sho' ai: mathao mae qug: khai: dayin dayo: kham zo" na shi"- ai: qobo maga" shi ge, i? 18Ana" naonhaung" wa yao" thao cao" nae" ha: pye' nae" ein: ko" i? Ana" ba naonhaung" Asang re tau: lhan: gye kad' yang: ngad: re wa yao: wa ne, mo" ba Israel byu yaug khao: ngo" re nhag' yo" li" nae". 19Aimung:- ana" naonhaung" mug:myid wa caung:pa" nae" madau ma- ang yang: ngad re yao" Zaung jo; ra" Asang: mug:myid khyo li" lo geri:- ngonhaung" phaung mae mug:myid daqhae: lomho' gela,- ngadqere: ngonhaung" Mao"So Asang: phan mae- phan dalam: kad' laung" ra" khyo" Asang re tau: lhan: gye dakad' ge,- mangad: lao"- ngonhaung" re tau: lhan: gye dakad' ge,. 20Phyo' qheim" pye' nae" dao: phyid' to" ra" zai: jham: khyo we' sin: yang: amyin" byid' ra" dao: re matae" gyo: ha: pye' ra" Zera nho: yauggai zo: Akhan khoru: boe" rure myid: beim: ge,. Ai: mathao mae Israel byu phung: geim" qobo dae byid' ru qhug' ako". Akhan wa yao" qobo mathao mae yao: dayaug za: mashid ngad: ra"- ga: ta" ako".
21Ailao"- Rubin- Gad- ba thug' shad' mae" Manashe amyu" byu qe wa ba vao shad' mae" amyu" yham khaung qenho: au: jhaung qere- 22Qam: bo: thao" ra" yaug wa Mao"So ngad: ra". Yao: wa Asang ngad: ra". Qam: bo: thao" ra" yaug wa Mao"So ngad: ra". Yao: wa Asang ngad: ra". Yao: ceru: pe"mung: kad' lai: lo: rure yao: ba: ra". Aimung: naonhaung" rere: ngonhaung" ba nhao nug: ra". Ngonhaung" yao: tau: lhan: mung: Asang re lam: khug: ra" lam khug: myid re macao" yang: ngad: re ngonhaung" re dadaui: na nhao lo: gela,- 23Asang re ngonhaung" mho dao: magyo: mung:- ai: dao mae ngaui" xeim: phad' ngaui" nae"- mangad: lao" gaug zo ngaui" xeim: ngaui" byid: nae"- zam" khug: ra" ngaui xeim: jham re phad' ngaui" byid nae" qhid' mae" ngonhaung" yao" phan re kad' yang: ngad: re wa- Asang yao: yao: ngonhaung" re qobo dae byid: vashao:- 24Airu: mangad: lhe"- naonhaung" myid:zo: qe wa ngonhaung" myid:zo: qere Israel nho: Mao"So Asang we' naonhaung" pe" sin: ko" i? 25Asang wa ngonhaung" we' naonhaung" Rubin- Gad byu qere agyo: mae Yodan gyaung: re mug: kyo: kad' to" ra". Asang we' naonhaung" pe" masin: ko" i? ga: ta" li" genae" rure ngonhaung" gyaug yang: kad' ru ngad: ra". Amung: naonhaung" myid:zo: qe wa ngonhaung" nho: myid:zo: qe Asang re caung:pa" rure gai: tam" pye' ako". 26Airumung: ngonhaung" phan dalam: kad' va" ai wa ngaui" xeim: phad' ngaui" nae" we'- xeim: ngaui" byid: nae" qhid' mae" mangad:- 27Ai: atha"- ngonhaung" amyu" we' naonhaung" amyu" qe: qhid' mae" re: sagse: khyo" ngad mung:- ngonhaung" thao mae" qae: qe: qhid' mae" re: ngonhaung" xeim: jham ngaui" xeim: phad' ngaui" ru jham- zam" khug: ra" xeim: jham re ngaui" byid: mung: dang za: yao" gyang" lho" Zaung qhid' kheim: mae Asang re caung:pa" nae" ga" ra" sagse ngad: ra". Ceru wa Asang we' ngonhaung" myid:zo: qe pe" masin: ga: naonhaung" myid:zo: qe mata" genae" qhid' mae" kad' ru ngad:. 28Ceru: boe" yang: ngad: re ngonhaung" myid:zo: qe wa- qu" ge,- ngonhaung" phug' pho" qe wa Asang: phan we' dau: ru phan dalam: kad' to" ako"- ga: qo" ta" genae" qhid' mae" ngonhaung" myid: thug' yang: kad' ru ngad:- aiwa xeim: phad" ngaui" nae" we' xeim: ngaui byid: nae" qhid' mae" kad' ru mangad:- ngonhaung" amyu" we' naonhaung" amyu" qe: qhid' mae" aso: khyo" kad' ru ngad. 29Ngonhaung" wa ai: dao mae xeim: phad' ngaui" nae"- gaug zo xeim:- ngaui xeim: ngaui" byid: nae" phan re kad' ra" khyo" yang dang yao: Asang re tau: lhan: gye kad' ru- ana" yao" thao cao" rure thang: pye' ru mangad:- ngonhaung" wa yao" qhid' kheim: Zaung qhid' au: mae ye; jo; ra" ngonhaung" Mao"So Asang: phan mae" je yang: phan pe" gatau dalam: rere: makad' nug- ga: tau" ako".
30Khinjaung Phineha we' yao: we' daga" bocao ko" ra" byu phung" nho: au: jhaung daxe yaug- ba vao shad' amyu" qenho: yham khaung qe: au: jhaung qe wa Rubin- Gad- ba thug' shad' mae" Manashe amyu" qe ta" ko" ra" dao: re gyo: gemung: yao: bam nhag' gyo" dag: ako". 31Khinjaung Eleaza nho: yauggai zo: Phineha wa yao: bam re- ana" Asang ngonhaung" we' daga" na: rure ngonhaung" ba va". Naonhaung" yao: re tau: lhan: gye kad' ru mangad: genhaung- aimung: naonhaung" wa Israel byu qere Asang: qobo dae mae" khyad' yu vagenhaung -ga: ta" ra".
32Ailao" Phineha wa au: jhaung qe wa Rubin- Gad amyu" qere Gilead mung" mae nha: to: co' mung: Khanan mung" khyo Israel byu qejhao" tug' phao: lo mung: yao: bam re lau lokyo" ako". 33Israel byu qe wa nhag' gyo" dag gemung: Mao"So re caung:khin" ako". Rubin we' Gad amyu" qe: te" na ko" ra" mug:myid re phyo' qheim" pye' nae" gyekhe' nae" khyo we' sin: yang: yao: bam mata" loko" ngad: ra".
34Rubin we' Gad amyu" qe wa- ce: phan wa Mao"So wa Asang ngad: ra" khyo ngonhaung" alhab' qhid' mae" sagse: ngad: ra"- ga: ta" ako". Airumung: yao: bam wa aire sagse: ga: mhang" ako".
Currently Selected:
YOSHU 22: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009