TARHA" AGYI 3
3
Byumyu" Jham Mung"dan: Mae Na: Dang: Jo, Ko" Ra" Khyo
1Airumung: Asang wa Khanan mung" mae gyekhe' poe mavao: qu" lai: lo ko" ra" Israel byu qere jham" qu" nae" qhid' mae" byumyu" daqae: re ai mung"dan: mae tang" to: byid' ra". 2Yao: wa ceru re Israel byu qae: khao: ngo" gyekhe' poe qhid' mae" za: kad' ru ngad: ra". Jeyang: wa qhid' phyao: gyekhe' poe mae khonhae" re: mabo: qu" ra" mo; qhid' mae" ngad: ra". 3Ai: mung"dan: mae na: dang: jo; ra" mo, wa- Philisti vogaung: ngo" lam:- Khanan byu qe alhab' Sidon byu qe we' Baal Hermon bam mae" Hamad bam gyo: khyo joe" sho' na ko" ra" Lebanon bam mae" Hivi byu qe ngad: ako". 4Moshe khyo" yang yao: bam: phug' pho" qere Asang: yang byid' to" ra" amyin" dao: jham re Israel byu qe mho dao: gyo: ko" ra" la,- magyo: ko" ra" la, ein: rure ba nae" qhid' mae" jham" qu" nae" yao: bam re tang" to" ru ngad: ra". 5Airumung: Israel byu qe wa Khanan byu qe- Hiti byu qe- Amori byu qe- Perizi byu qe- Hivi byu qe- Yebusi byu qe: phaung mae na: jo; ako". 6Yao: bam wa ai bam we' myi:byid: myiyu kad' mung: ai: bam: so jham re caung:pa" ako".
Othnie
7Israel byu qe wa yao: bam: Mao"So Asang re to" myhid' pye' ako". Yao: bam wa Asang re qobo shad lhoe" gemung: Bala we' Ashe so jham re caung:pa" ako". 8Airumung: Asang wa Israel byu qere nhag' yo" ra". Amung: Masopotemia kho:kham Kushan- Rishathaim re yao: bam re aung: pye' nhao: ra". Yao: bam wa yao" yang eib: ra" qao: mae she' zin na: ako". 9Ailao" Israel byu qe wa Asang re zag: yao gemung: yao: bam re loe; beim nhao: ra" dayaug re Asang nhao: ke' byid' ra". Ceyaug wa Khaleb nho: yao: nhaung: Kena nho: yauggai zo: Othnie ngad: ra". 10Asang: byo wa yao" dao mae joe" li" mung:- yao: wa Israel byumyu" nho: au: jhaung boe" lo: ra". Othnie wa gyekhe' poe khyo ye: mung: Asang wa yao: re Mesopotamia kho:kham re aung: pye' nhao: ra". 11Mung"dan: mae byid xe zin ngaui pyo: yaug yo mung:- ai:thao Othnie shid: lo" ra".
Ehud
12Israel byu qe wa Asang re qobo dam: shad' lhoe" pye' ako". Ce: mathao mae Asang wa Moba kho:kham Eglon re Israel tho' qam: je: bo nhao: ra". 13Eglon wa Amon byu qe we' Amaleg byu qe we' xo' yu: ra". Yao: bam wa Israel byu qere aung: pye' mung: laso' gae vogaung: Yerikho re sang: yu: pye' ako". 14Israel byu qe wa Eglon eib: ra" qao: mae daxe: she' zin lam lam: na: jo; ako". 15Ai: thao Israel byu qe wa Asang re dam: zag: hug' gemung:- yao: bam re loe, beim nhao nae" byu dayaug nhao byid' ra". Ce yaug wa Benyamin kaung mae" Gera nho: yauggai zo: lo, kaung: kaung: yaug Ehud ngad: ra". Israel byu qe wa Ehud re kho:kham pho" Eglon jhao" jhaung qhu" jham we' daga" nhao ke' ako". 16Ehud wa shae su: shid' shad' de; mung: dadaung" ko qhang: ra" shae pyang: dakhyae: re yao" qhid' mae" be; yu: ra". Yao: wa aire lo, yo shad' phyid' dam: mae yao" mai bau: khug mae myag: te' ci: ra". 17Ai: thao yao: wa gyai xau yaug ngad: ra". Eglon jhao" jhaung qhu" ceye: byid' ra". 18Ehud wa jhaung qhu" jham Eglon re bin: byid: lao" yao: wa ai: jhaung qhu" re vin: li" mo, re yham khyo phao: lo" genae" qhid' mae" ta" ra". 19Ngadqere: Ehud yao: yao: wa Gilgala nhae mae jo; ra" laug pyo' zang jham mae" tug' mung: Eglon jhao" dam: tug' ye yang: kho:kham pho" we"- ni" qhid' mae" dao: nyham: dakheim: ngo qo" ga: lo" ta" ra". Ailao" kho:kham pho" wa yao" daui daui mo, re nga" shid' zo: za: jho" jhau nae" lo" ge,- ga: amyin" byid' ke' ra". Airumung: yao: bam alhab' mo, thug' lo" ako".
20Kho:kham pho" wa yao" cae: ngin" ra" qe, tho' pyae mae yao: za: zaung: jo; au: Ehud wa yao: jhao" te' ye: mung:- ni" qhid' mae" Mao"So mae" joe" li" ra" mungdao: ngo qo"- ga: ta" ra". Ailao" kho:kham pho" wa to" ye; li" ra". 21Ehud wa yao" lo, kaung: lo, yang: lo, yo shad' phyid' dam: mae" shae pyang: re she: yu yang kho:kham pho" vae: dug: re thug' kyao" ke' ra". 22Shae pyang: wa shae zhaug' nab sho' vao lo" byaug mung: aire xau: yang nghoe' pye' ra". Kho:kham pho" Ehud wa kho:kham pho" vae: dug: mae" ai: shae re mashe: yu ngad: ra". Aiwa nhaung thao" shad' khyo kyao" lo" mung: khyid gyo: mae thug' sho' ngad: ra". 23Ailao"- Ehud wa taung gaung khyo thug' lo" yang: kham: pyid' mung: kham: kyao" kyao" co' yang:- ai:thao yao: thug' lo" ra". 24Daui daui mo, wa joe" li" mung: kham: jham kyao" to" rure lamyao: ako". Kho:kham pho" wa akhug mae ngha ye" na sam" ra" gaza: myid: jho: ako". 25Yao: bam lao" ang: ra" myhao" lao" qu" gengadqere: yao: wa kham: maphung" lo: na: jo; lao"- yao: bam wa kham: thug' re yu mung: phung" ke' ako". Akhug mae yao: bam: asang wa phyao: gaung mae shid: lang" jo; ra".
26Yao: bam airulao" na shiko" au: re Ehud phao: loe; byaug: ra". Yao: wa laug pyo' zang jham re Lai co' mung: Seira khyo phao loe; lo" ra". 27Yao: wa Ephrim bam mug: khyo joe" lao" gyekhe' poe to" ye: nae" qhid' mae" Israel byu qere khai: ra" labo" re mad: ke' ra". Aimung: yao: wa ai bam re bam mug: mae" jhui" gyo" lo" ra". 28Yao: wa yao: bam re nga" thao cao" ge, Asang wa naonhaung" gyevo Moba byu qere aung: pye' nae" naonhaung" re akhang" byid' ava"- ga: ta" ra". Airumung: yao: bam wa Ehud thao cao" gyo" lo" gemung: Moba byu qe Yodan gyaung: gau" de, genae" ra" jo, qo re sang: yu: pye' ako". Yao: bam wa dayaug rere: gau" de; nae" akhang" mabyid: ko" ngad: ra". 29Aiba mae yao: bam wa lhe" thao" ra" Moba gyezo: datug ko re se' pye' ako". Aibam mae" dayaug re: maloe, ngad: ako". 30Aiba re Israel byu qe wa Moba byu qere khe' aung: pye' mung: mung"dan: mae she' xe zin ngaui pyo: yaug yo: jo; ra".
Shamga
31Ai: thao mae" au: jhaung wa Anad nho: yauggai zo: Shamga ngad: ra". Yao: re: thaung kang aceim: yang Philisti byu khyaug' yo re se' pye' yang: airu: Israel byu qere khyad' yu: ra".
Currently Selected:
TARHA" AGYI 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009