TARHA" AGYI 2
2
Bokhim Jo,qo Mae Asang: Mug: Lagyo:
1 Asang: mug: lagyo: wa Gilagala mae" Bokhim khyo ye: mung:- Israel byu qere- ngo wa naonhaung" re Egutu mung" mae" jhui" thug' lo mung: naonhaung" phug' pho" qere dao:so: byid' to" ra" mung"dan: khyo naonhaung" re jhui" lo va". Naonhaung" we' to" ra" nga" dao: thang" re khonhae" re: maphyo' pye' nae" ein: ngo naonhaung" re ta" to: va". 2Ce: mung" mae na ko" ra" mo, we' dao: thang" daja: re: naonhaung" magai: to: ngad: ako". Naonhaung" wa yao: bam: phan jham re phyo' khyo" pye' ca" ako". Ngadqere: naonhaung" wa ngo ta" to" rure makad' ko" ngad: ra". Naonhaung" wa atug' khyo" kad' avako". 3Airumung: ana" ngo wa naonhaung" qhid' khyo jhin" ye" lo" au: ce: byumyu" qere makhe' thug' pye' nae" ngad: ra" khyo ngo naonhaung" re ta" kyo: nae". Yao: bam wa naonhaung" gyevo qe ngad: li" genae". Naonhaung" wa yao: bam: so jham re caung:pa" ra" mau" zo" yang lha" mae myi" li" genae"- ga: ta" ra". 4Mug: lagyo: ce: dao: re bin: ta" to: lao"- Israel byu qe alhab' mo, gyi: ngug: ako". 5Ce: mathao mae ai: jo, qo re Bokhim ga: mhang" ru ngad: ra". Yao: bam wa ai: jo, qo mae Asang re xeim: ngaui" byid' ako".
Yoshu Shid: Ra" Khyo
6Yoshu wa Israel byu qere yao: bam yao" khyo khyo nhao: ke' mung: yaug khao: ngo" wa ai: yao" gae bam mug: myid: re yesang: yu: ako". 7Yoshu daui na: gu: mae Isreal byu qe wa Asang re caung da" byid' ako". Yao: shid: byaug thao re lhao" re:- Israel byu qe: qhid' mae" Asang kad' ra" qi" qhang: ra" mau" zo" alhab' re yao: bam yao" myo; yang the' myao vako" ra" au: jhaung qe adaui: na na wa yao: bam airu: xo' yang: caung da" byid' ako". 8Nun nho: yauggai zo: Asang: daui daui yaug Yoshu wa apyad dayo: daxe zin re shid: lo" ra". 9Ephrim bam mug:- Gasha mug: am: yao" gae bam mug: myid Timnad Sera jo, qo mae yao: re nyhab' ako". 10Ai: byu qae: daqae: geim" re: shid: lo" ako". Ai: thao Asang re we' Israel byu qe: qhid' mae" yao: kad' ra" mau" re to" myhid' pye' ako".
Israel Byu Qe Asang Re Caung:pa" Ra" Khyo Thang: Pye' Ko" Ra" Ru
11Airumung: Israel byu qe wa Asang re qobo shad' lhoe" gemung: Bala re caung da" byid' ako". 12Yao: bam wa yao: nho: phug' pho" qenho: Mao"So- Egutu mung" mae" yao: bam re jhui" thug' lo: ra" Mao"So Asang re caung:pa" byid' ra" khyo thang: pye' ako". Amung: yao: bam wa- yao: bam: lhang" gam: mae" byu qenho: so jham ngad: ra" so gatau jham re caung:pa" byid' ako". Yao: bam aijham re goe; pa" byid: gemung: Asang re nhag' yo: nhao: ako". 13Yao: bam wa Asang re caung:pa" rure thang: pye' mung:- Bala so jham re we' Astard jham re caung da" byid' ako". 14Airumung: Asang wa Israel byu qere nhag' jam: yo" li" mung: gyevo qere phyo' nhao mung: yao: bam re lhad' zo: nhao: ra". Yao: wa yao: bam: lhang" gam: mae" gyevo qere yao: bam re aung zo: nhao mung:- Isreal byu qe wa yao: bam yao" gaung re maqo" gug: gam: yu loko" ngad: ra". 15Yao: bam gyekhe' poe ye: khao: ngo" yao: khoru: kad' nae" ta" ru we' dakhyo: Asang wa yao: bam re gye kad' ra". Yao: bam wa qi: sho' nhag' lam: thao" ako".
16Ailao" Asang Israel byu qere au: jhaung qe byid' ra". Aibam wa Israel byu qere phyo' zo" ra" mo, lo, mae" khyad' yu ako". 17Ngadqere: Israel byu qe wa yao: bam: au: jhaung qe: dao: re matae" gyo: ko" ngad: ra". Israel wa Asang re jhaug' mazaug lo:- so gatau jham re caung:pa" byid' ako". Yao: bam: phug' pho" qe Asang: nho: mho dao: re tae" gyo" ako". Ngadqere: ce: byu qae: asag' wa phyad za: airu: kad' nae" thang: pye' ako". 18Asang wa Israel byu qere au: jhaung byid: khao: ngo" Asang wa yao: re bao" thaug' mung:- ai: au: jhaung daui: na: ra" myhao" yao: bam gyevo qe: lo, mae" amyu" byu qere khyad' yu: ra". Yao: bam: dayin dayo: qug: khai: kham zo" ru we' deim" zag zo" ru qao: mae" yao: bam nokyang: kyang: geyang: Asang wa yao: bam re nhag' khyag' yu: ra". 19Ngadqere: au: jhaung shid lo" lao" amyu" byu qe wa khyo xug' jham khyo dam: tug' lo" mung:- lai: lo: ra" byu qae: tho' je: xo: ra" lo, mau" re kad' ako". Yao: bam wa so gatau jham re caung da" byid: mung: caung:pa" ako". Amung: yao: bam yao" makhyang" ra" khyo re nhag' lam: qao mung: xo' yang: su" ako". 20Ailao" Asang wa Israel byu qere nhag' jam: yo: mung:- ce: byumyu" wa yao: bam: phug' pho" qere phug' cao" nae" ngo amyin" byid' to" ra" dao: thang" re phyo' pye' avako". Pe"mung:ga"re yao: bam wa ngore mho dao: magyo: lo:ngad: ako". 21Yoshu shid: ra" au: ce: mung"dan: mae na: jo, shiko" ra" pe" ja" amyu" rere: ngo makhe' thug' lo nae". 22Yao: bam: phug' pho" qe kad' ko" ru we' dakhyo: ce: Israel byu qe nga" khyo jham mae cao" ko" ra" la,- macao" ko" ra" la, ein: rure ce: amyu" jham re ci yang: jham" nae"- ga: ta" ra". 23Airumung: Asang wa ai: byumyu" qe re ai: mung"dan: mae na: dang: jo, nhao: ra". Yao: wa Yoshu re aibam re ma aung: pye' nhao ngad: ra". Yoshu shid thao rere: phyad za: ai bam re yao: makhe' thug' ke' ngad: ra".
Currently Selected:
TARHA" AGYI 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009