TARHA" AGYI 4
4
Debora We' Barag
1Ehud shid thao Israel byu qe wa Asang re qobo dam: shad' lhoe" ako". 2Airumung: Asang wa yao: bam re- Hozo vogaung: mae eib: ra" Khanan kho:kham Yabin yang aung zo" ru qhug' nhao: pye' ra". Yao" nho: gyezug: pho" wa taung bug byu qenho: Haroshed mae na: ra" Sisera ngad: ra". 3Yabin wa gyekhe' myao: lhin" gug' yo qo" ra". Yao: wa Israel byu qere zin lam: shid' xe gyai thin: ra" khyo" se' da: be, khyad' eib: ra". Ailao" Israel byu qe wa Asang re bao" thaug' yu nae" qhid' mae" hug' yao: ako". 4Ana"- Lapidod nho: yham sang myhi" Debora wa Lapa myhi" ngad: ra". Yao: wa ai: ayo, mae tarha" agyi khyo" Israel byu qere caung da" byid' ra". 5Yao: wa Ephrim bam mug: mae" Rama we' Bethela agyo: mae yaug: ra" Laso' gae dagae qao: mae zaung: jo; ra". Israel byu qe wa yao" myid: phyid' kho' ru yu nae" qhid' mae" ai: jo, qo khyo lhaung" ye" ako". 6Daba mae yao: wa Nabhtali mug: Kede vogaung: mae" Abinoam nho: yauggai zo: Barag jhao" byu nhao: ke' mung: yao: re- Asang Israel qenho: Mao"So wa ce: amyin" re byid' ava". Nabhtali we' Zebulun amyu" kaung mae" byu datug jhui" yu mung: yao: bam re Tabo bam khyo jhui" ye: wa,- 7Ngo wa Yabin nho: gyezug: pho" Sisera re Kishon qid gyaung: mae nao re gyekhe' nae" qhid' mae" jhui" li" nae". Yao: wa yao" gyekhe' myao: lhin" jham we' gyezo: jham re jhui" li" li" nae". Ngadqere: ngo wa nao re yao: re aung: pye' nhao nae" ga: ta" nhao: ke' ra".
8Ailao" Barag wa nao ngo we' daga" ye: nae" ngad: re wa ngo ye: nae". Ngadqere: nao ngo we' daga" maye: nae" ngad: re wa ngore: maye: nae" ga: phaug' tau" ra".
9Yao: wa gai va" ngo nao we' daga" ye: nae"- ngadqere: nao wa ai: aung doe; rumae pe" nga: qo" nae" mangad:- pe"mung:ga"re Asang wa Sisera re myiqe: dayaug: lo, khyo ab byid' pye' li" nae"- ga: ta" ra". Aimung: Debora wa Barag we' daga" Kade khyo to" lo" ako". 10Barag wa Nabhtali we' Zebulun amyu" kaung qere khai mung:- byu datug yao" thao cao" ye" ako". Debora wa yao: we' daga" ye" lo" ra".
11Ai: ayo, mae Kenid byu Hebera wa yao" zaung re Kade qid gyaung: te' te'- Zanannim mae" zai gae nhae mae kad' to" ra". Yao: wa Moshe nho: yao: khau: Hoba nho: myid:zo: qe ngad ko" ra" Keni byu gatau qe mae" gao" lo" ra".
12Tabo Bam khyo Barag ye" lo" byaug rure Sisera ba lao"- 13Yao" nho: jo, to' gyekhe' myao: lhin" gug yo we' yao" byu alhab' re khai: yu mung:- taung bug qenho: Haroshed mae" Kade qid gyaung: khyo nhao: ke' ra".
14Ailao" Debora wa Barag re ye" lo" wa,- Asang wa nao re au: jhui" she: na: ra". Ana" ba yao: wa Sisera re: nao re aung nhao: ava"- ga: ta" ra". Airumung: Barag wa yao" byu datug we' daga" Tabo bam mae" gyo" lo" ako". 15Barag wa yao" gyezo: qe we' gyekhe' gelao"- Asang wa Sisera re yao" gyekhe' myao: lhin" we' yao" byu qe alhab' athaui: ayaug sad' lo" nhao: ra". Sisera wa yao" gyekhe' myao: lhin" mae" gyo" mung: khyid khyo" tao" phao: lo" ra". 16Barag wa gyekhe' myao: lhin" jham we' gyezo: qere taung bug qenho: Haroshed khyo cao" khe' mung:- Sisera nho: gyetab geim" se' pye' ru qhug' ako". Dayaug re: madang ngad: ako".
17Sisera wa Keni byu Hebera nho: yham sang myhi" Yaela nho: zaung khyo tao" vao lo" ra". Pe"mung:ga"re Hazora kho:kham Yabin we' Hebera nho: yham byu qe wa mang: yo: jo, geyang: ngad: ra". 18Yaela wa Sisera re tug: yu nae" thug' ye: mung: yao: re- zug: pho" we"- Vao li" ri:- nga" zaung khug khyo vao li" ri:- dagyaug wa,- ga: ta" ra". Ailao" yao: wa vao ye: mung: yao: wa qe, kyo pin: lung: nhaung thao" mae yao: re nyham" to" ra". 19Ailao"- yao: wa Yaela re jeju we' qid byid: jhaug' la,- ngo qid shab' ra"- ga: mho' ra". Yao: wa nung: nug' shoqid thaung phung" mung: yao: re byid: jhaug' ra". Amung: yao: re dam: nyham" to" ra". 20Ai: thao Sisera wa yao: re- zaung kham: dung: mae ye; jo, wa,- dayaug yaug: yang li" mung: cemae dayaug yaug na: la,- ga: nao re li" myid' re- khag' mana ein: ta" wa,- ga: ta" ra".
21Sisera wa saung" myaung: mung: yab mo" myid' sho' yab: lo" ra". Ailao" Yaela wa dau we' zaung daung" zang re gaug: yu yang: sae za: yao: jhao" ye: mung: zaung daung" zang: yang yao" au: lo, yo shad' mae" dashad' khyo myid gaung khyo kyao"sho' be; zhaug' ke' mung: se' pye' ra". 22Barag- Sisera re qho: joe" lo lao"- Yaela wa yao: re yetug: yu nae" thug' ye: mung: yao: re- cekhyo li" ri:- nao cao" qho: na: ra" yaug re ngo nao re ceim" shid' byid: li"- ga: ta" ra". Ailao" yao: wa Yaela we' daga" ye" ra". Aitau mae Sisera wa yao" au: mae zaung daung" zang be; kyao" to: gau myid gaung mae shid: lang" jo; ra".
23Ai: ba mae Mao"So wa Isreal byu qere Khanan kho:kham Yabin re aung: pye' nhao: ra". 24Isreal byu qe wa yao: re phyo' pye' ra" ba na joe" sho' je: je: xo: ra" khyo" deim" zag mung: yao: re gye kad' ako".
Currently Selected:
TARHA" AGYI 4: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009