Sakariasi 12
12
f) Jerusaleni p'ímutanhant'asti
Jerusalenini p'imutanhant'asti
1ACHA íni ampe uantasti enka auantani k'éri úka ka echerini uinhaperani, ka enka k'uiripuni inchaak'utini espirituni pérakuka, íni ampe uantats'ïkpesti Israeliri ampe: 2¡Exe je! Jerusaleniksï uirhipkurhaati ka ístu Judani. Ka ji Jerusalenini ísï péraaka eska kauikua atarakua ma enka iámentu iretechani enkaksï imani uirhipant'ani irekaka manaratauaka.
3Enka ima jurhiatekua niáraaka, iámentuksï iretecha parhakpeni anapuechaksï Jerusalenini kúnkuarhekunt'aati, ka imani Jerusalenini ísï péraaka eska tsapaku k'uék'uetsanharhi ma ka iámentuksï ima iretecha enkaksï uékaaka imani tarhatani etsanturhinhaatiksï. 4Enka ima jurhiatekua niáraaka, ji úaka eskaksï iámentu tekechuecha chémastakuarheaka ka eskaksï tekechu jataricha eratsekua tsîtaaka. Iámentu tekechu parhakpeni anapuechani michinharhitauaka ka nóteruksï úati exeni ka Judani k'óruni no jurak'uaka ka imantkuni exeni jauaka. ACHAeri uantakuesti. 5Imecheri mintsitarhuksï Juda anapu urhets'ïkuricha uantaati: Jerusaleni anapuechaksï imecheri uinhapekuani ACHAni jimpo uinhapekuarhesïnti enka uinhapekueka, imecheri Diósï jimpo.
6Enka niáraaka ima jurhiatekua, ji úaka eskaksï Juda anapu urhets'ïkuricha ísï jauaka eska parhankua enka sési tixapeni jarhak'a, eska ampe uánekua chkári jatap'eni ¡K'ueramu ma enka k'éri étskurhini jarhak'a tríju jókukatecharhu! Ka iámentu iretechani móparhakua anapuechani k'amantskauati, ka ménteru uéntani Jerusaleni ménteru irenhant'aati. 7Urheta, ACHA Juda anapu uapats'ïtakuechani kuáchakuauati, eska Dabio anapu t'íntskua ka Jerusaleni anapu no sánteru jukaparhaka eska Judecheri sïrukua jémpecheri. 8Enka ima jurhiatekua niáraaka, ji enkani ACHAeka Jerusaleni anapuechani k'uachakuaaka. Jima anapu enka sánteru kómu jánti ma sánteru uinhapekua jatsiati eska Dabi, ka Dabiri sïrukua jémpechaksï sánteru uinhapekua jatsiati eska ACHAeri ánjelicha enkaksï urhekuani jaka.
9Enka ima jurhiatekua niáraaka, ji iámentu iretechani k'amak'uauaka enkaksï Jerusaleni niáraakuaka. 10Dabiri k'umanchekuarhu ka Jerusaleni anapuechani espirituni ma antats'ïterauaka enka sési jimpo tsípekua jinkunika ka uantatsekuarhekueri ma, ka jíntentsïni exeati ménteru ka ueraatiksï imani jakankurhikuani jimpo enkaksï ísku uanokumaka, ísïksï uéraati eska uáp'a ma jimpo enka mák'ueka námentu uenhak'a enka nemani uarhirakuarhenhak'a. 11Enka niáraaka ima jurhiatekua, Jerusaleni kánekua kómu jánhaati, mák'ueni eska na kómu jánhapka Jadadi Rimoni, Meguido anapu eraxamani jimpo. 12Iámu ireta kómu jauati eska uarhiri ma jarhani, ístu táchani k'umanchekuarhu anapuechaksï kómu jauati: Dabiri sïrukua jémpecha ka jima anapu iurhitskirichaksï, Nataniri sïrukua jémpecha ka jima anapu uarhiticha kómu jauati, 13Lebiri sïrukua jémpecha ka jima anapu uarhiticha ka Simei ka jima anapu uarhiticha, 14ka ístuksï máteru k'umanchekuarhu anapuecha ka jima anapu iurhitskiricha.
Currently Selected:
Sakariasi 12: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.