Sakariasi 13
13
1Enka niáraaka jurhiatekua, itsarhu ma mítakuarheati eska Dabiri k'umanchekua ka eskaksï Jerusaleni anapuecha k'amanharhintskuechani jimpo pímpinhaxent'aaka ka iámentu imeri ikichakueni jáxekua ampe jimpo pímpinhaxent'ani. 2Enka ima jurhiatekua niáraaka, ji parhakpeni k'amantskant'aaka eratakuecheri jakankurhikuechani, ka méntkuksï nóteru méni míanhaati. Ka ístuni méntkuni k'amantskant'auaka Diósïri uantarichani ka espirituni enka ikichakueni jáp'eka. ACHA Uinhapitiri uantakuesti. 3Jiák'ani ísï úkuarheati, enka nema niáraska uantats'ïkpeni, nánte jémpa ka táte jémpa ima enkaksïni kánkuarheka arhiatiksï: T'úri jatsipirinkia uarhini jimpokari ACHAeri jakankurhikua jimpo chkuántiraska Ka táte jémpa ka amampaksï márku úkuarhent'aati uántikuni jimpoka ima uékaska arhits'ïkpiri úkuarheni.
4Enka niáraka jurhiata, iámentuksï Diósïri uantats'ïkpiricha k'uratseati imani ampe jimpo enkaksï eranhaskaka ka enkaksï uantaka eska úkuarhepirinka, ka nóteruksï méni sïkuiriri ampe xukuparhaati uékani k'arhap'ekuekani. 5Sánteruksï uantaati: Ji no Diósïri uantariska, ji tarheriska. Enkani tumpipka jiáni uénaska juátarhu ánchekuarheni. 6Ka enkaksï kurhamarheaka: ¿Amperi jimpo atakuarheski ják'icharhu? Ima uantaati: Jucheti pámpirichats'ïni ataspti enkani imecheri k'umanchekuarhu jápka.
ACHA jucheti Diósïsti
7Kókuani tiámu atap'etarakua,
jucheti karichi erankutini ata,
imani pámpirini
enkani ji xáni mintsinharhik'a.
Ka karichichaksï etsapakurhiati.
Ka ji karichi sapirhatichani
nósesi ampe úkuauaka.
ACHA enka iámu uinhapekueka
ísï uantasïnti.
8Íni echerirhu anapuechaksï
tanipuru arhustanhaati,
ka tsimani arhustakatechaksï k'amak'unhaati,
tsîtakataksï pakaraati
ka ma ústakata no uarhiati tsípitiksï pakaraati.
ACHA ísï uantasïnti.
9Ka imani tsimani arhustakatani
enkaksï pakarani jaka
chpírirhu kurhirauaka;
echerant'auaka eska tiámu tiripiti na echeranhant'ak'a,
ka ísï mereatarauaka eska tiámu merearini.
Ka imats'ïni k'éri ampe arhiati
ka ji arhiant'auaka: Cháts'ï jucheti ireteska;
ka imaksï uantaati: ACHA juchari Diósïsti.
Currently Selected:
Sakariasi 13: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.