Sakariasi 11
11
1¡Líbanu anapu míkuechani kókosï mítaa,
jurak'ue chpíri uáparhakuechani iámu kurhiant'aani!
2Ka t'u iótati uáparhakua
¡Uéra k'érati uáparhakuechani jimpo
enkaksï kuarhatsekia,
imani anhatapu k'ératichani jimpo
enkaksï kuáskunhaka!
¡Uera je chát'u Basani anapu urhikuecha,
xáni taiapiti juátechani jimpo
enkaksï iámu ch'apanhakia!
3¡Jurak'uts'ï kurhanhani enkats'ï p'ikuarherani jaka
cha karichi erankuticha,
jimpoka xuxunhasï uitsakua k'arhiranhaskia!
¡Uinhacha je mintsirani púkicha,
Jordani anapu k'érikua k'amakurhistia!
Tsimani karichi erankuticha
4ACHA jucheti Diósïrini ísï arhisti: Kuách'akua karichichani enkaksï uántikunhani jámpkia, 5imechani enkaksï imecheri karichi erankuticha jamperi no p'amok'uak'a; enkaksï piáricha uántikuak'a ka nómpe máksï nósesi ampe p'ikuarherasïnti ka ima enkaksï atarant'ak'a ísïksï uantasïnti: ¡ACHA xáni k'éri ampesti, iásï k'óruni kánekua jatsikuarheskia! 6Ísï jimposïni ji parhakpeni anapuechani nóteruni p'amok'uauakia. Sánteru imecheri pámpirichani intsïnharhitant'auaka ka imecheri irechani. Ka na uék'iksï iámentu iretechani k'amantskant'aani, ji no kuák'utauaka. ACHAeri uantakuesti.
7Ka ji niátaska ka karichichani kuách'akuaska enkaksï uántikunhani pánhani jápkia, sánteru jámaska karichi marhisïchani erankuani. Ka tsimani pirimuechani p'ikukuarheaska; ma Sési jakua jakankurhitaraska ka Márkuentskua jakankurhitaska máteruni. 8Ma kutsï jimpo tanimu karichi erankutichani k'amak'uaska jimpokani nóteru úspkia tekaakuant'aani ka imat'uts'ïni jínteni niáchasptia.
9Ka ísï jimpo ji arhiaspka: Jíksïni nóteru uákia chánksïni erankuni jámani jarhani. Jurak'ue méntku uarhini náki enka jatsikia uarhirini, ka méntku tsînchekuarhe náki enka jatsika tsîncheni, ka ima enkaksï tsípiti pakaraaka jurak'ue ántani pámpiri jémpani.
10Ka jupint'aska jucheti pirimu arhich'upetarakuani P'amok'perakuani, ka kuarhakuska pirimuni ka ísï xerent'aska pakatperakuani enkani iámentu iretechani jinkuni úpka. 11Imani jurhiatekua pakatperakua nóteru marhuaspti, ka ísï karichi sapirhatichaksï enkats'ïni erateni jápka enkaksï kómu jántipka jánhaskaspti eska i uantakua ACHAeri uantakuespka. 12Ka ji arhiaspka: Enkats'ï cha sési erankuntka, maiamuts'ïni je jucheti ánchekuarhetani jimpo. Ka enkats'ï nósesi erankuntka xántku ísï jurak'u je.
13Ka ACHArini arhispti: ¡Xáni enkats'ïni kánekua jukaparharaka! ¡Jatsikuarhekuani jatakuarhu jatsira je! Ka ji témpeni ekuatse tumina taiakaterichani p'íkuaspka ka jatsikuarhekua jatakuarhu jatsiraspka ACHAeri tióstarhu, 14ka tátsekuani máteru pirimuni kuarhakuspka, Irhikurhitani, ka úska eskaksï Juda ka Israeli nóteru erachipirinkia.
15Ka tátsekuarini ACHA arhispti: Ísï xukutakuarheni iásï eska karichi erankuti ma enka nósani mímixeka, 16jimpoka ji úaka eska parhakpeni karichi erankutini ma jauaka enka nósani uant'anheauaka karichichani enkaksï tsînchekuarheaka, ka no niuati karichi sapirhatichani jirinhant'aani ka no ampakerant'auati enkaksï kuarhantuaka, ka ni ichantia imani enka kuataraakia, sánteru úati ka karichi p'ukuricha auant'auati ka ték'ichani arhakukuauati. 17¡Námentu jámaa karichi erankuti enka nósani míakua jukaka ka jurarkuani karichichani! ¡Eska tiámu atap'etarakua ma tepaxurhakuarhu ataaka ka éskuarhu jurhik'ant'ani atani! ¡Eska ják'ini k'urhuk'utini pakataaka ka eska éskua jurhik'ant'ani anapu nóteru úaka exeni!.
Currently Selected:
Sakariasi 11: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.